സ്റ്റാറ്റസിൽ പരസ്യം കാണിച്ചു തുടങ്ങാൻ വാട്സ്ആപ്പ്

നിരവധി മെസേജിങ്ങ് ആപ്പുകൾ വന്നിട്ടും വാട്സ്ആപ്പ് തന്നെയാണ് ഏവർക്കും പ്രിയപ്പെട്ടത്. അതിനുള്ള പ്രധാന കാരണങ്ങളിലൊന്ന് വളരെ യൂസർ ഫ്രണ്ട്ലി ആയ ഇൻ്റർഫേസും പരസ്യങ്ങൾ തീരെ കാണിക്കുന്നില്ല എന്നതുമായിരുന്നു. എന്നാൽ ഈ സൗകര്യം ഉടനെ അവസാനിക്കാൻ പോവുകയാണ്. സ്റ്റാറ്റസുകൾക്കിടയിൽ പരസ്യം കാണിക്കുന്ന പുതിയ ഫീച്ചർ ഉടനെ ആരംഭിക്കാൻ പോവുകയാണെന്ന് വാട്സ്ആപ്പ് കഴിഞ്ഞ ദിവസം വ്യക്തമാക്കി. പുതിയ അപ്ഡേറ്റ് പൂർത്തിയാക്കിയ വാട്സ്ആപ്പിലെ സ്റ്റാറ്റസുകൾക്കിടയിൽ പരസ്യങ്ങൾ പ്രതൃക്ഷപ്പെട്ടു തുടങ്ങിയെന്നും റിപ്പോർട്ടുകളുണ്ട്. ഫേസ്ബുക്ക്, ഇൻസ്റ്റഗ്രാം എന്നിങ്ങനെയുള്ള മെറ്റയുടെ മറ്റു സോഷ്യൽ മീഡിയ പ്ലാറ്റ്ഫോമുകൾ പോലെ പരസ്യത്തിലൂടെ വരുമാനം കണ്ടെത്തുന്നത് വാട്സ്ആപ്പും ആരംഭിച്ചുവെന്ന് ഇതിൽ നിന്നും വ്യക്തമാകുന്നു. രാജ്യം, ഭാഷ എന്നിവ പോലെയുള്ള വളരെ പരിമിതമായ വിവരങ്ങൾ മാത്രമേ വാട്സ്ആപ്പ് സ്റ്റാറ്റസിലെ പരസ്യങ്ങൾക്കായി ഉപയോഗിക്കൂ എന്നു കമ്പനി വ്യക്തമാക്കിയിട്ടുണ്ട്. ഇതിനു പുറമെ ചാനലുകളിൽ സബ്സ്ക്രിപ്ഷൻ തുടങ്ങുന്ന വിവരവും വാട്സ്ആപ്പ് വെളിപ്പെടുത്തിയിട്ടുണ്ട്. 2018 മുതൽ വാട്സ്ആപ്പിൽ പരസ്യങ്ങൾ ഉൾപ്പെടുത്താനുള്ള ചർച്ചകൾ ആരംഭിച്ച മെറ്റ ഇപ്പോഴാണ് ഇക്കാര്യത്തിൽ ഔദ്യോഗികമായി തീരുമാനമെടുക്കുന്നത്.

ഇനി വാട്സ്ആപ്പിലും പരസ്യങ്ങൾ:

വാട്ട്‌സ്ആപ്പ് ഒരു ബ്ലോഗ് പോസ്റ്റിലൂടെയാണ് അപ്‌ഡേറ്റ്സ് ടാബിൽ മാറ്റങ്ങൾ പ്രഖ്യാപിച്ചത്. പ്രധാനമായും മൂന്ന് പുതിയ സവിശേഷതകളാണ് വാട്സ്ആപ്പ് അവതരിപ്പിച്ചിരിക്കുന്നത്. ചാനൽ സബ്‌സ്‌ക്രിപ്‌ഷൻസ്, പ്രൊമോട്ടഡ് ചാനൽസ്, ആഡ്സ് ഓൺ സ്റ്റാറ്റസ് എന്നിവയാണത്. അഡ്മിൻസ്, ബിസിനസുകൾ, ഓർഗനൈസേഷനുകൾ എന്നിവർക്ക് വാട്ട്‌സ്ആപ്പിൽ അവരുടെ സാന്നിധ്യം വളർത്തിയെടുക്കാൻ സഹായിക്കുന്നതിനാണ് ഈ അപ്‌ഡേറ്റുകൾ രൂപകൽപ്പന ചെയ്‌തിരിക്കുന്നത്.

ചാനൽ സബ്‌സ്‌ക്രിപ്‌ഷനിലൂടെ ഉപയോക്താക്കൾക്ക് പ്രതിമാസം ഫീസ് അടച്ച് അവരുടെ പ്രിയപ്പെട്ട ചാനലുകൾ ആസ്വദിക്കുകയും പിന്തുണയ്ക്കുകയും അനുവദിക്കും. സബ്‌സ്‌ക്രൈബർമാർക്ക് എക്‌സ്‌ക്ലൂസീവ് അപ്‌ഡേറ്റുകൾ ലഭിക്കും, കൂടാതെ ഈ സവിശേഷത ഡയറക്‌ടറിയിലൂടെ പുതിയ ചാനലുകൾ കണ്ടെത്തുന്നത് എളുപ്പമാക്കുകയും ചെയ്യും. ചാനൽ കൂടുതൽ ആളുകളിലേക്ക് എത്തിക്കുന്നതിനായി അഡ്‌മിനുകൾക്ക് അവരുടെ ചാനലുകൾ പ്രൊമോട്ട് ചെയ്യാൻ കഴിയും.

മറ്റൊരു അപ്‌ഡേറ്റ് നേരത്തെ പരാമർശിച്ച പ്രൊമോട്ടഡ് ചാനൽസാണ്, ഇത് സെർച്ച് റിസൾട്ടുകൾ, റെക്കമൻഡേഷൻസ് തുടങ്ങിയവയിൽ അഡ്‌മിൻസിന് അവരുടെ കണ്ടൻ്റുകളെ ഹൈലൈറ്റ് ചെയ്യാൻ അനുവദിച്ച് ഉപയോക്താക്കളെ പുതിയ ചാനലുകൾ കൂടുതൽ എളുപ്പത്തിൽ കണ്ടെത്താൻ സഹായിക്കുന്നു.

അപ്‌ഡേറ്റ്സ് ടാബിന് കീഴിലുള്ള സ്റ്റാറ്റസ് വിഭാഗത്തിൽ പരസ്യങ്ങൾ അവതരിപ്പിച്ചതാണ് ഏറ്റവും വലിയ മാറ്റം. ഈ പരസ്യങ്ങളിലൂടെ ഉപയോക്താക്കൾക്ക് പുതിയ ബിസിനസുകൾ കണ്ടെത്താനും അവരുമായി നേരിട്ട് ചാറ്റ് ആരംഭിക്കാനും കഴിയും. പരസ്യങ്ങൾ അപ്‌ഡേറ്റ്സ് ടാബിൽ മാത്രമേ ദൃശ്യമാകൂ എന്നും പ്രൈവറ്റ് അല്ലെങ്കിൽ ഗ്രൂപ്പ് ചാറ്റുകളിൽ ഉണ്ടാകില്ലെന്നും വാട്ട്‌സ്ആപ്പ് സ്ഥിരീകരിക്കുന്നു.

2018-ൽ തുടങ്ങിയ ചർച്ചകൾ; നടപ്പിലാക്കുന്നത് ഇപ്പോൾ:

വർഷങ്ങളായി നിലനിന്നിരുന്ന കിംവദന്തികൾക്കും ഇങ്ങിനെയൊരു നീക്കവുമായി ബന്ധപ്പെട്ട സൂചനകൾക്കും വിരാമമിട്ട് ആപ്പിൽ പരസ്യങ്ങൾ പ്രദർശിപ്പിക്കാൻ തുടങ്ങുമെന്ന് വാട്ട്‌സ്ആപ്പ് ഔദ്യോഗികമായി സ്ഥിരീകരിച്ചു. 2018-ൽ, വാട്ട്‌സ്ആപ്പിന്റെ മുൻ വൈസ് പ്രസിഡന്റ് ആയ ക്രിസ് ഡാനിയൽസ്, കമ്പനിക്ക് പണം സമ്പാദിക്കാനുള്ള പ്രധാന മാർഗം പരസ്യങ്ങളായിരിക്കുമെന്ന് പറഞ്ഞിരുന്നു. ഇത് ബിസിനസുകൾക്ക് ആളുകളുമായി ബന്ധപ്പെടാൻ ഒരു പുതിയ മാർഗം നൽകുമെന്ന് അദ്ദേഹം പരാമർശിച്ചു. കുറച്ച് വർഷങ്ങൾക്ക് ശേഷം, വാട്ട്‌സ്ആപ്പിന്റെ നിലവിലെ മേധാവിയായ വിൽ കാത്ത്കാർട്ട് ആപ്പിൽ പരസ്യങ്ങൾ ഉൾപ്പെടുത്താനുള്ള സംവിധാനം വികസിപ്പിച്ചു കൊണ്ടിരിക്കുകയാണെന്നും പറഞ്ഞിരുന്നു. ഇപ്പോൾ, ആ ഫീച്ചർ വാട്സ്ആപ്പ് ഔദ്യോഗികമായി തന്നെ ആരംഭിക്കാൻ തുടങ്ങുകയാണ്.

വാട്ട്‌സ്ആപ്പിന്റെ അഭിപ്രായത്തിൽ, സ്റ്റാറ്റസ്, ചാനൽ എന്നീ വിഭാഗങ്ങളിൽ ഈ പരസ്യങ്ങൾ ദൃശ്യമാകും. നിങ്ങളുടെ രാജ്യം, നഗരം, ഭാഷ, നിങ്ങൾ പിന്തുടരുന്ന ചാനലുകൾ, നിങ്ങൾ സാധാരണയായി പരസ്യങ്ങളുമായി എങ്ങനെ ഇടപഴകുന്നു തുടങ്ങിയ പരിമിതമായ വിവരങ്ങൾ മാത്രമേ ഈ പരസ്യങ്ങൾ കാണിക്കാൻ ഉപയോഗിക്കൂ എന്ന് കമ്പനി പറയുന്നു. നിങ്ങൾ വാട്ട്‌സ്ആപ്പിനെ അക്കൗണ്ട്സ് സെന്ററുമായി ലിങ്ക് ചെയ്‌തിട്ടുണ്ടെങ്കിൽ, പരസ്യവുമായി ബന്ധപ്പെട്ടു നിങ്ങൾക്കുള്ള മുൻഗണനകളും നിങ്ങളുടെ മറ്റ് മെറ്റാ അക്കൗണ്ടുകളിൽ നിന്നുള്ള (ഫേസ്ബുക്ക് അല്ലെങ്കിൽ ഇൻസ്റ്റാഗ്രാം പോലുള്ളവ) വിശദാംശങ്ങളും ഇത് ഉപയോഗിച്ചേക്കാൻ സാധ്യതയുണ്ട്.

വാട്ട്‌സ്ആപ്പ് ഒരിക്കലും നിങ്ങളുടെ ഫോൺ നമ്പർ വിൽക്കുകയോ പരസ്യങ്ങൾ നൽകുന്നവരുമായി പങ്കിടുകയോ ചെയ്യില്ലെന്ന് കമ്പനി വ്യക്തമായി പറഞ്ഞിട്ടുണ്ട്. കൂടാതെ, നിങ്ങൾ ഏതൊക്കെ പരസ്യങ്ങളാണ് കാണേണ്ടത് എന്നു തീരുമാനിക്കാൻ നിങ്ങളുടെ സ്വകാര്യ ചാറ്റുകൾ, കോളുകൾ, ഗ്രൂപ്പ് സന്ദേശങ്ങൾ എന്നിവ ഉപയോഗിക്കില്ലെന്നും അവർ വ്യക്തമാക്കുന്നു. എന്തായാലും ഉപഭോക്താക്കളുടെ ഇടയിൽ വാട്സ്ആപ്പിൻ്റെ ഈ തീരുമാനത്തിന് സ്വീകാര്യത ലഭിക്കില്ലെന്നുറപ്പാണ്.