കസ്റ്റമേഴ്സിൻ്റെ മനസറിഞ്ഞ് എയർടെൽ; 279 രൂപയ്ക്ക് ഓൾ ഇൻ വൺ ഒടിടി പായ്ക്ക് പ്രഖ്യാപിച്ചു

ഇന്ത്യയിലെ പ്രമുഖ ടെലികോം കമ്പനികളിൽ ഒന്നായ ഭാരതി എയർടെൽ പ്രീപെയ്ഡ് ഉപഭോക്താക്കൾക്കായി പുതിയ ഒടിടി റീചാർജ് പ്ലാനുകൾ പുറത്തിറക്കുന്ന കാര്യം പ്രഖ്യാപിച്ചു. ചൊവ്വാഴ്ചയാണ് ഈ പ്ലാനുകൾ എയർടെൽ ലോഞ്ച് ചെയ്തത്. ഇതിൽ ഇരുപത്തിയഞ്ചിലധികം ജനപ്രിയ സ്ട്രീമിംഗ് പ്ലാറ്റ്‌ഫോമുകളിലേക്കുള്ള ആക്‌സസ് ഉൾപ്പെടുന്നു. 279 രൂപ വിലയുള്ളതാണ് ഏറ്റവും അടിസ്ഥാന പ്ലാൻ, ഒരു മാസത്തെ വാലിഡിറ്റിയും ഇതിൽ ഉൾപ്പെടുന്നു. ഈ പ്ലാനിലൂടെ, ഉപയോക്താക്കൾക്ക് നെറ്റ്ഫ്ലിക്സ്, ജിയോഹോട്ട്സ്റ്റാർ (മുമ്പ് ഹോട്ട്സ്റ്റാർ), Zee5, സോണിലിവ് തുടങ്ങിയ പ്രധാന ഒടിടി പ്ലാറ്റ്‌ഫോമുകളിലെ കണ്ടൻ്റുകൾ കാണാൻ കഴിയും. ഇതിനുപുറമെ, എയർടെൽ രണ്ട് എൻറർടൈൻമെൻ്റ് പ്ലാനുകൾ കൂടി പുറത്തിറക്കിയിട്ടുണ്ട്. ഇതിലൊന്നിന് 598 രൂപയാണ്, ഇതിന് 28 ദിവസത്തെ വാലിഡിറ്റിയുണ്ട്. 1,729 രൂപ വിലയുള്ള മറ്റൊരു പ്ലാൻ 84 ദിവസത്തെ വാലിഡിറ്റിയും വാഗ്ദാനം ചെയ്യുന്നു. ഈ രണ്ട് പ്ലാനുകളും അൺലിമിറ്റഡ് 5G ഡാറ്റ, അൺലിമിറ്റഡ് വോയ്‌സ് കോളുകൾ, വിവിധ ഒടിടി പ്ലാറ്റ്‌ഫോമുകളിലേക്കുള്ള ആക്‌സസ് എന്നിവ നൽകുന്നു.

എയർടെൽ ഓൾ ഇൻ വൺ ഒടിടി പായ്ക്കിൻ്റെ വിവരങ്ങൾ:

എയർടെൽ പുതിയ പ്രീപെയ്ഡ് റീചാർജ് പ്ലാനുകൾ കഴിഞ്ഞ ദിവസം പുറത്തിറക്കി. അതിൽ നിരവധി OTT (ഓവർ-ദി-ടോപ്പ്) പ്ലാറ്റ്‌ഫോമുകളിലേക്കുള്ള ആക്‌സസ് ഉൾപ്പെടുന്നു. പ്രീപെയ്ഡ് ഉപയോക്താക്കൾക്കായി ഇന്ത്യയിൽ ആദ്യമായാണ് ഈ ഓൾ-ഇൻ-വൺ എന്റർടൈൻമെന്റ് പ്ലാനുകൾ വരുന്നത്. ഒന്നിലധികം സബ്‌സ്‌ക്രിപ്‌ഷനുകളില്ലാതെ ആളുകൾക്ക് നിരവധി സ്ട്രീമിംഗ് സേവനങ്ങൾ ആസ്വദിക്കാൻ ഇതിലൂടെ കഴിയും.

നാല് വ്യത്യസ്ത പ്ലാനുകൾ എയർടെൽ അവതരിപ്പിച്ചിട്ടുണ്ട്. അവയിൽ രണ്ടെണ്ണത്തിന്റെ വില 279 രൂപയാണ്, ഒരെണ്ണം 598 രൂപയ്ക്കും ലഭ്യമാണ്. ഏറ്റവും ഉയർന്ന പ്ലാനിൻ്റെ വില 1,729 രൂപയാണ്. ഓരോ പ്ലാനും വ്യത്യസ്ത ആനുകൂല്യങ്ങൾ വാഗ്ദാനം ചെയ്യുന്നതാണെങ്കിലും അവയിലെല്ലാം നിരവധി OTT പ്ലാറ്റ്‌ഫോമുകളിലേക്കുള്ള ആക്‌സസ് ഉൾപ്പെടുന്നു.

ഈ പുതിയ പായ്ക്കുകൾ ഉപയോക്താക്കൾക്ക് 25-ലധികം ജനപ്രിയ OTT പ്ലാറ്റ്‌ഫോമുകളിലേക്ക് ആക്‌സസ് നൽകുന്നുണ്ട്. നെറ്റ്ഫ്ലിക്സ്, ജിയോഹോട്ട്സ്റ്റാർ, Zee5, സോണി ലിവ്, ലയൺസ്ഗേറ്റ് പ്ലേ, AHA, Sun NXT, Hoichoi, Eros Now, ShemarooMe എന്നിവയാണ് ഉൾപ്പെടുത്തിയിരിക്കുന്ന പ്രധാന പ്ലാറ്റ്‌ഫോമുകളിൽ ചിലത്. ഉപയോക്താക്കൾക്ക് സിനിമകൾ, വെബ് സീരീസുകൾ മുതൽ ലൈവ് ഷോകൾ, ടിവി പ്രോഗ്രാമുകൾ വരെയുള്ള വൈവിധ്യമാർന്ന പരിപാടികൾ കാണാൻ കഴിയും.

ഈ പ്ലാനുകളിലൂടെ ലഭ്യമാകുന്ന കണ്ടൻ്റുകൾ 16-ലധികം ഇന്ത്യൻ ഭാഷകളിൽ ലഭ്യമാണ്. ഇത് രാജ്യത്തിന്റെ വിവിധ ഭാഗങ്ങളിൽ നിന്നുള്ള കാഴ്ചക്കാരെ ആകർഷിക്കും. OTT ആക്‌സസിന് പുറമേ, ഈ പ്ലാനുകളിൽ ചിലത് അൺലിമിറ്റഡ് 5G ഡാറ്റയും നൽകുന്നു. അതായത് ഡാറ്റ തീർന്നുപോകുമെന്ന് ആശങ്കപ്പെടാതെ ഉപയോക്താക്കൾക്ക് സ്ട്രീമിംഗ് ആസ്വദിക്കാൻ കഴിയും.

വിവിധ എയർടെൽ ഓൾ ഇൻ വൺ ഒടിടി പായ്ക്കുകളും അവ നൽകുന്ന സേവനങ്ങളും:

എയർടെല്ലിൻ്റെ ഒരു മാസത്തെ വാലിഡിറ്റിയുള്ള പുതിയ 279 രൂപയുടെ പ്രീപെയ്ഡ് റീചാർജ് പ്ലാൻ രൂപകൽപ്പന ചെയ്തിരിക്കുന്നത് ഓൺലൈനിൽ കണ്ടൻ്റുകൾ കാണുന്നത് ആസ്വദിക്കുന്ന ഉപയോക്താക്കൾക്കാണ്. ഇതിൽ നെറ്റ്ഫ്ലിക്സ് ബേസിക്, Zee5, ജിയോ
ഹോട്ട്സ്റ്റാർ, എയർടെൽ എക്സ്സ്ട്രീം പ്ലേ പ്രീമിയം തുടങ്ങിയ ജനപ്രിയ സ്ട്രീമിംഗ് പ്ലാറ്റ്‌ഫോമുകളിലേക്കുള്ള ആക്‌സസ് ഉൾപ്പെടുന്നു. എയർടെൽ പറയുന്നതനുസരിച്ച്, ഈ ഒടിടി സബ്‌സ്‌ക്രിപ്‌ഷനുകൾ750 രൂപ വിലമതിക്കുന്നതാണ്.

ഇതിനുപുറമെ, എയർടെൽ 279 രൂപയുടെ തന്നെ ഒരു മാസത്തെ വാലിഡിറ്റിയുള്ള ഒരു കണ്ടന്റ്-ഒൺലി പ്രീപെയ്ഡ് പായ്ക്കും വാഗ്ദാനം ചെയ്യുന്നു. ഈ പാക്കിൽ ഇതേ OTT ആനുകൂല്യങ്ങൾക്കു പുറമെ, 1GB മൊബൈൽ ഡാറ്റയും നൽകുന്നു. കോളുകൾക്കും ഡാറ്റയ്ക്കുമായി ഇതിനകം മറ്റൊരു പ്ലാനുള്ള, സ്ട്രീമിംഗ് സേവനങ്ങളിലേക്ക് ആക്‌സസ് ആഗ്രഹിക്കുന്നവർക്ക് ഈ ഓപ്ഷൻ അനുയോജ്യമാണ്.

ഇതിനു പുറമെ മൊബൈൽ സേവനങ്ങൾ പൂർണമായും ഉൾപ്പെടുന്ന മറ്റ് റീചാർജ് പ്ലാനുകളും എയർടെൽ അവതരിപ്പിച്ചിട്ടുണ്ട്. 598 രൂപയുടെ പ്രീപെയ്ഡ് പ്ലാൻ അൺലിമിറ്റഡ് 5G ഡാറ്റ, അൺലിമിറ്റഡ് വോയ്‌സ് കോളിംഗ്, നാല് OTT പ്ലാറ്റ്‌ഫോമുകളിലേക്കുള്ള ആക്‌സസ് എന്നിവ വാഗ്ദാനം ചെയ്യുന്നു. 28 ദിവസത്തെ വാലിഡിറ്റിയോടെയാണ് ഇത് വരുന്നത്.

ദീർഘകാലത്തേക്കുള്ള 1,729 രൂപയുടെ പ്രീപെയ്ഡ് പ്ലാനും എയർടെൽ അവതരിപ്പിച്ചിട്ടുണ്ട്. ഇത് അൺലിമിറ്റഡ് 5G ഡാറ്റ, അൺലിമിറ്റഡ് വോയ്‌സ് കോളുകൾ, നെറ്റ്ഫ്ലിക്സ് ബേസിക്, Zee5, ജിയോഹോട്ട്സ്റ്റാർ, എയർടെൽ എക്സ്സ്ട്രീം പ്ലേ പ്രീമിയം എന്നിവയിലേക്കുള്ള ആക്‌സസും നൽകുന്നു. 84 ദിവസമാണ് ഈ പ്ലാനിൻ്റെ വാലിഡിറ്റി.