ലോഞ്ചിങ്ങിനു തയ്യാറെടുത്ത് സാംസങ്ങ് ഗാലക്സി S26 സീരീസ്, ഗാലക്സി ബഡ്സ് 4 ലൈനപ്പ്; ഇന്ത്യയിലെ ലഭ്യത അറിയാം

ഈ വർഷത്തെ ഗാലക്‌സി അൺപാക്ക്ഡ് 2026 ഇവന്റ് ഫെബ്രുവരി 25-ന് കാലിഫോർണിയയിലെ സാൻ ഫ്രാൻസിസ്കോയിൽ നടക്കുമെന്ന് സാംസങ്ങ് ഔദ്യോഗികമായി സ്ഥിരീകരിച്ചു. കമ്പനിയുടെ ഏറ്റവും പുതിയ ഫ്ലാഗ്ഷിപ്പ് സ്മാർട്ട്‌ഫോണുകളും ഓഡിയോ പ്രൊഡക്റ്റുകളും ഈ പരിപാടിയിൽ ലോഞ്ച് ചെയ്യുമെന്ന് പ്രതീക്ഷിക്കുന്നു. വരാനിരിക്കുന്ന ലൈനപ്പിൽ സാംസങ്ങ് ഗാലക്സി S26, ഗാലക്സി S26+, ഗാലക്സി S26 അൾട്ര, ഗാലക്സി ബഡ്സ് 4, ഗാലക്സി ബഡ്സ് 4 പ്രോ എന്നിവ ഉൾപ്പെടാനുള്ള സാധ്യതയുണ്ട്. ലോഞ്ചിന് മുന്നോടിയായി, ഗാലക്സി അൺപാക്ക്ഡ് ഇവന്റിനു വേണ്ടിയുള്ള ഡെഡിക്കേറ്റഡ് മൈക്രോസൈറ്റുകൾ ഇന്ത്യയിൽ ആമസോണിലും ഫ്ലിപ്കാർട്ടിലും ലൈവായിട്ടുണ്ട്. ആഗോളതലത്തിൽ ലോഞ്ച് ചെയ്തതിനു പിന്നാലെ പുതിയ ഉപകരണങ്ങൾ ഇന്ത്യയിലും വാങ്ങാൻ ലഭ്യമാകുമെന്ന് ഇത് സൂചിപ്പിക്കുന്നു. പുതിയ ഡിവൈസുകളെ കുറിച്ചുള്ള പൂർണ്ണമായ വിവരങ്ങൾ സാംസങ്ങ് വെളിപ്പെടുത്തിയിട്ടില്ലെങ്കിലും, ഗാലക്സി S26 സീരീസിന്റെ നിരവധി സ്പെസിഫിക്കേഷനുകൾ ഇതിനകം ലീക്കായി പുറത്തു വന്നിട്ടുണ്ട്. ഔദ്യോഗിക വിൽപ്പന ആരംഭിക്കുന്നതിന് മുമ്പ് തന്നെ ഉപഭോക്താക്കൾക്ക് ആക്‌സസ് നൽകാനായി കമ്പനി ഇന്ത്യയിൽ പ്രീ-റിസർവ് ഓപ്ഷനും വാഗ്ദാനം ചെയ്യുന്നുണ്ട്.

ഗാലക്സി അൺപാക്ക്ഡ് ഇവൻ്റ്, ഇന്ത്യയിലെ ലഭ്യത മുതലായ വിവരങ്ങൾ:

സാംസങ്ങിന്റെ ഗാലക്‌സി അൺപാക്ക്ഡ് 2026 ഇവന്റ് ഫെബ്രുവരി 25-ന് ഇന്ത്യൻ സമയം രാവിലെ 10 മണിക്ക് (ET 1pm) നടക്കും. സാംസങ്ങ് ന്യൂസ്‌റൂം വെബ്‌സൈറ്റായ Samsung.com, അവരുടെ ഒഫീഷ്യൽ യൂട്യൂബ് ചാനൽ എന്നിവയിൽ കമ്പനി പരിപാടി തത്സമയം സംപ്രേഷണം ചെയ്യും.

ഇന്ത്യയിൽ, ആമസോൺ ഈ പരിപാടിക്കു വേണ്ടി രണ്ട് വ്യത്യസ്ത മൈക്രോസൈറ്റുകൾ സൃഷ്ടിച്ചിട്ടുണ്ട്. ഒരു പേജ് ഗാലക്‌സി സ്‌മാർട്ട്‌ഫോണുകൾക്കായി സമർപ്പിച്ചിരിക്കുന്നു, മറ്റൊന്ന് ഗാലക്‌സി ബഡ്‌സ് 4, ഗാലക്‌സി ബഡ്‌സ് 4 പ്രോ എന്നിവയെ എടുത്തു കാണിക്കുന്നു. ഫ്ലിപ്കാർട്ട് ഒരു ഡെഡിക്കേറ്റഡ് ഗാലക്‌സി അൺപാക്ക്ഡ് ലാൻഡിംഗ് പേജും പ്രസിദ്ധീകരിച്ചിട്ടുണ്ട്. ഗാലക്‌സി S26 സീരീസ് സ്മാർട്ട്‌ഫോണുകൾ ആമസോണിലൂടെയും ഫ്ലിപ്കാർട്ട് വഴിയും സാംസങ്ങിന്റെ ഔദ്യോഗിക ഓൺലൈൻ സ്റ്റോറിലൂടെയും ലഭ്യമാകുമെന്ന് ഇത് സ്ഥിരീകരിക്കുന്നു. അതേസമയം, ഗാലക്‌സി ബഡ്‌സ് 4 സീരീസ് ആമസോണിലും സാംസങ്ങിന്റെ വെബ്‌സൈറ്റിലും ലോഞ്ച് ചെയ്യുമെന്ന് സ്ഥിരീകരിച്ചു.

ഇന്ത്യയിൽ ഒരു ഗാലക്‌സി പ്രീ-റിസർവ് വിഐപി പാസും സാംസങ്ങ് വാഗ്ദാനം ചെയ്യുന്നു. ഉപഭോക്താക്കൾക്ക് ഗാലക്‌സി ഡിവൈസ് 999 രൂപ നൽകി റിസർവ് ചെയ്യാം. ഈ പാസിലൂടെ, വാങ്ങുന്നവർക്ക് വാങ്ങുന്ന സമയത്ത് 2,699 രൂപയുടെ ആനുകൂല്യങ്ങൾ ലഭിക്കും.

സാംസങ്ങ് ഗാലക്‌സി S26 സീരീസിൽ പ്രതീക്ഷിക്കുന്ന സവിശേഷതകൾ:

സാംസങ്ങ് ഔദ്യോഗികമായി സ്പെസിഫിക്കേഷനുകൾ വെളിപ്പെടുത്തിയിട്ടില്ലെങ്കിലും, ഗാലക്‌സി S26 സീരീസിനെക്കുറിച്ചുള്ള പ്രധാന വിവരങ്ങൾ, പ്രത്യേകിച്ച് ഗാലക്‌സി S26 അൾട്രയെക്കുറിച്ചുള്ളവ പുറത്തു വന്നിട്ടുണ്ട്. ക്വാൽകോം സ്നാപ്ഡ്രാഗൺ 8 എലൈറ്റ് ജെൻ 5 ചിപ്‌സെറ്റാണ് സാംസങ്ങ് ഗാലക്‌സി S26 അൾട്രയ്ക്ക് കരുത്ത് പകരുന്നത്. ഈ പ്രോസസർ 3nm പ്രോസസ്സിലാണ് നിർമ്മിച്ചിരിക്കുന്നതെന്ന് പറയപ്പെടുന്നു, ഇത് പ്രകടനവും പവർ കാര്യക്ഷമതയും മെച്ചപ്പെടുത്തും.

1,400x3,120 പിക്സൽ റെസല്യൂഷനുള്ള 6.9 ഇഞ്ച് ഡൈനാമിക് അമോലെഡ് 2X ഡിസ്‌പ്ലേ ഈ ഫോണിൽ ഉണ്ടായിരിക്കും. സുഗമമായ സ്ക്രോളിംഗിനും ഗെയിമിംഗിനും വേണ്ടി സ്‌ക്രീൻ 120Hz വരെ റിഫ്രഷ് റേറ്റിനെ പിന്തുണയ്ക്കുമെന്ന് പ്രതീക്ഷിക്കുന്നു. മികച്ച ഈടിനായി കോർണിംഗ് ഗൊറില്ല ആർമർ 2 പ്രൊട്ടക്ഷനും ഇതിൽ വന്നേക്കാം.

ക്യാമറകളുടെ കാര്യത്തിൽ, ഗാലക്‌സി S26 അൾട്രയിൽ മുൻഗാമിയുടേതിന് സമാനമായി ക്വാഡ് റിയർ ക്യാമറ സെറ്റപ്പ് ഉണ്ടായിരിക്കുമെന്ന് സൂചനയുണ്ട്. സെൻസർ വിശദാംശങ്ങൾ സ്ഥിരീകരിച്ചിട്ടില്ലെങ്കിലും, മെച്ചപ്പെട്ട ഇമേജ് പ്രോസസ്സിംഗിലും AI സവിശേഷതകളിലും സാംസങ്ങ് ശ്രദ്ധ കേന്ദ്രീകരിക്കുമെന്ന് പ്രതീക്ഷിക്കുന്നു. ഫോൺ 5,000mAh ബാറ്ററി പായ്ക്ക് ചെയ്തേക്കാം, ഫാസ്റ്റ് ചാർജിംഗ് പിന്തുണയും പ്രതീക്ഷിക്കുന്നു.

ഗാലക്‌സി S26, ഗാലക്‌സി S26+, പുതിയ ഗാലക്‌സി ബഡ്‌സ് 4 സീരീസ് എന്നിവയെക്കുറിച്ചുള്ള കൂടുതൽ വിവരങ്ങൾ കമ്പനി ഔദ്യോഗിക ലോഞ്ച് ഇവന്റിൽ വെളിപ്പെടുത്താൻ സാധ്യതയുണ്ട്.