വിവോയുടെ രണ്ടു ഫോണുകൾ ഇന്ത്യയിലേക്ക്; വിവോ V70, വിവോ T5x 5G എന്നിവയുടെ ലോഞ്ചിങ്ങ് ഉടനെയുണ്ടായേക്കും

ഇന്ത്യയിൽ വളരെയധികം ആരാധകരുള്ള സ്മാർട്ട്ഫോൺ ബ്രാൻഡായ വിവോ ഓഗസ്റ്റിൽ പുറത്തിറക്കിയ വിവോ V60-ന് ശേഷമുള്ള അടുത്ത മോഡലായി വിവോ V70 വികസിപ്പിച്ചു വരികയാണെന്നു റിപ്പോർട്ടുണ്ട്. ഒരു സർട്ടിഫിക്കേഷൻ വെബ്‌സൈറ്റിലെ പുതിയ ലിസ്റ്റിംഗ് ഈ ഫോണിനെക്കുറിച്ചുള്ള സൂചനകൾ വെളിപ്പെടുത്തിയിട്ടുണ്ട്. ലിസ്റ്റിംഗ് വിവോ V70 ഇന്ത്യൻ വിപണിയിലും അവതരിപ്പിക്കാൻ പദ്ധതിയുണ്ടെന്നും, കമ്പനി ഉടൻ തന്നെ ഫോൺ ലോഞ്ച് ചെയ്യാൻ സാധ്യതയുണ്ടെന്നും സൂചിപ്പിക്കുന്നു. അതേ സർട്ടിഫിക്കേഷൻ സൈറ്റിൽ, മറ്റൊരു വിവോ ഫോണും പ്രത്യക്ഷപ്പെടുന്നുണ്ട്. ഈ ഫോൺ വരാനിരിക്കുന്ന വിവോ T5x 5G ആയിരിക്കാമെന്ന് അറിയപ്പെടുന്ന ടിപ്‌സ്റ്റർ അവകാശപ്പെട്ടു. ലിസ്റ്റിംഗ് ഈ ഫോണിൻ്റെ പൂർണ്ണമായ സവിശേഷതകൾ കാണിക്കുന്നില്ല, പക്ഷേ രണ്ട് ഫോണുകളും നെറ്റ്‌വർക്കിനും സുരക്ഷാ മാനദണ്ഡങ്ങൾക്കുമായി ടെസ്റ്റ് ചെയ്യപ്പെടുന്നുണ്ടെന്ന് ഇതിലൂടെ സ്ഥിരീകരിക്കുന്നു. മെച്ചപ്പെട്ട ക്യാമറകൾ, വേഗതയേറിയ പ്രോസസ്സറുകൾ, പുതുക്കിയ ഡിസൈനുകൾ എന്നിവ ഉപയോഗിച്ച് വിവോ സാധാരണയായി അതിന്റെ മിഡ്-റേഞ്ച് ലൈനപ്പ് അപ്‌ഡേറ്റ് ചെയ്യുന്നതിനാൽ ഈ രണ്ട് മോഡലുകളും ഒരുമിച്ചു ലിസ്റ്റ് ചെയ്യപ്പെട്ടത് സ്മാർട്ട്‌ഫോൺ ആരാധകരിൽ ആകാംക്ഷ സൃഷ്ടിച്ചിട്ടുണ്ട്.

ബിഐഎസ് സർട്ടിഫിക്കേഷൻ ലിസ്റ്റിങ്ങിൽ വിവോ V70:

ബ്യൂറോ ഓഫ് ഇന്ത്യൻ സ്റ്റാൻഡേർഡ്സ് (BIS) വെബ്‌സൈറ്റിൽ ഒരു പുതിയ വിവോ സ്മാർട്ട്‌ഫോൺ കണ്ടെത്തിയെന്ന് ടിപ്‌സ്റ്റർ @ZionsAnvin ആണ് വെളിപ്പെടുത്തിയത്. V2538 എന്ന മോഡൽ നമ്പറിലാണ് ഉപകരണം ലിസ്റ്റ് ചെയ്തിരിക്കുന്നത്. ഈ നമ്പർ വരാനിരിക്കുന്ന വിവോ V70-ന്റേതാണെന്ന് വിശ്വസിക്കപ്പെടുന്നു. ഡിസംബർ 8-നാണ് ഫോൺ ലിസ്റ്റ് ചെയ്യപ്പെട്ടത്. BIS പേജിൽ സവിശേഷതകളോ ഹാർഡ്‌വെയർ വിശദാംശങ്ങളോ ഒന്നും കാണിക്കുന്നില്ലെങ്കിലും, വിവോ V60-ന് ശേഷമുള്ള അടുത്ത മോഡലായി ഫോൺ ഇന്ത്യയിൽ ലോഞ്ച് ചെയ്യാൻ തയ്യാറെടുക്കുകയാണെന്ന് ഇത് സൂചിപ്പിക്കുന്നു.

വിവോ V70-ന്റെ കൃത്യമായ സവിശേഷതകൾ ഇതുവരെ സ്ഥിരീകരിച്ചിട്ടില്ല. എന്നിരുന്നാലും, ഡിസംബർ 15-ന് ചൈനയിൽ ലോഞ്ച് ചെയ്യാൻ പോകുന്ന വിവോ S50-ന്റെ റീബാഡ്ജ് ചെയ്ത പതിപ്പായിരിക്കാം ഫോൺ എന്ന് നേരത്തെ പുറത്തു വന്ന റിപ്പോർട്ടുകൾ അവകാശപ്പെട്ടു. അതിനാൽ സമാനമായ ഡിസൈനും സവിശേഷതകളും പ്രതീക്ഷിക്കാം.

വിവോ V70 അടുത്തിടെ ഗീക്ക്ബെഞ്ചിലും കണ്ടെത്തിയിരുന്നു. ഒക്ടാ-കോർ ചിപ്‌സെറ്റാണ് ഫോണിന് കരുത്ത് പകരുന്നതെന്ന് ഈ ബെഞ്ച്മാർക്ക് ലിസ്റ്റിംഗ് കാണിച്ചു. 2.80GHz-ൽ പ്രവർത്തിക്കുന്ന ഒരു പ്രൈം കോർ, 2.40GHz-ൽ നാല് പെർഫോമൻസ് കോറുകൾ, 1.84GHz-ൽ നാല് എഫിഷ്യൻസി കോറുകൾ എന്നിവ ഇതിൽ ഉൾപ്പെടുന്നു. ലിസ്റ്റിംഗിൽ പരാമർശിച്ചിരിക്കുന്ന GPU അഡ്രിനോ 722 ആണ്, ഇത് സ്നാപ്ഡ്രാഗൺ 7 ജെൻ 4 പ്രോസസറിൽ മാത്രമേ ലഭ്യമാകൂ. ഇതിൽ നിന്നും ഫോണിൽ ഉപയോഗിച്ചിരിക്കുന്ന ചിപ്പ് ഏതാണെന്നു വ്യക്തമാണ്.

വിവോ T5x 5G ഫോണും ബിഐഎസ് സർട്ടിഫിക്കേഷൻ ലിസ്റ്റിങ്ങിൽ:

വിവോ V70 എന്നു പ്രതീക്ഷിക്കുന്ന ഫോണിനൊപ്പം, മറ്റൊരു വിവോ ഫോണും ബിഐഎസ് വെബ്‌സൈറ്റിൽ പ്രത്യക്ഷപ്പെട്ടിട്ടുണ്ട്. ഈ ഫോണിൻ്റെ മോഡൽ നമ്പർ V2545 ആണ്. ടിപ്‌സ്റ്റർ പറയുന്നതനുസരിച്ച്, വിവോ T5x 5G ആയിരിക്കാം ഈ മോഡൽ. എന്നാൽ ഇക്കാര്യം സ്ഥിരീകരിച്ചിട്ടില്ലെങ്കിലും ഈ വർഷം മാർച്ചിൽ ഇന്ത്യയിൽ ലോഞ്ച് ചെയ്ത വിവോ T4x 5G-യ്ക് ശേഷമുള്ള പതിപ്പായിരിക്കും ഈ ഫോൺ എന്ന് പ്രതീക്ഷിക്കുന്നു. വിവോ T5x 5G-യുടെ പൂർണ്ണമായ സവിശേഷതകളെക്കുറിച്ച് യാതൊരു സൂചനയുമില്ല. പക്ഷേ നിലവിലെ വിവോ T4x 5G-യെ അപേക്ഷിച്ച് മെച്ചപ്പെട്ട സവിശേഷതകൾ ഇതു വാഗ്ദാനം ചെയ്തേക്കും.

13,499 രൂപ വിലയുള്ള വിവോ T4x 5G, 120Hz റിഫ്രഷ് റേറ്റ് പിന്തുണയ്ക്കുന്ന 6.72 ഇഞ്ച് ഫുൾ HD+ LCD സ്‌ക്രീനുമായി വരുന്നു. ഇത് മീഡിയാടെക് ഡൈമൻസിറ്റി 7300 പ്രോസസറിൽ പ്രവർത്തിക്കുന്നു, കൂടാതെ 8GB വരെ റാമും 256GB UFS 3.1 സ്റ്റോറേജും വാഗ്ദാനം ചെയ്യുന്നുണ്ട്. ഫോണിൻ്റെ റിയർ ക്യാമറ യൂണിറ്റിൽ 50 മെഗാപിക്സൽ പ്രധാന ക്യാമറയും 2 മെഗാപിക്സൽ ഡെപ്ത് ക്യാമറയും ഉണ്ടാകും. 44W ഫാസ്റ്റ് ചാർജിംഗിനെ പിന്തുണയ്ക്കുന്ന 6,500mAh ബാറ്ററിയും ഇതിലുണ്ട്.