സ്മാർട്ട് ഔട്ട്ഫിറ്റുകളുമായി എച്ച്എംഡി ഫ്യൂഷൻ 2 വരുന്നു; ലീക്കായി പുറത്തു വന്ന സവിശേഷതകൾ അറിയാം

2016-നു ശേഷം നോക്കിയ ബ്രാൻഡിൻ്റെ ഫോണുകൾ പുറത്തിറക്കിയിരുന്ന ഫിന്നിഷ് കമ്പനിയായ എച്ച്എംഡി തങ്ങളുടെ നെക്സ്റ്റ് ജനറേഷൻ മോഡുലാർ സ്മാർട്ട്‌ഫോണുമായി എത്തുന്നു. എച്ച്എംഡി ഫ്യൂഷൻ 2 എന്ന പേരിലുള്ള പുതിയ ഫോൺ കമ്പനി വികസിപ്പിച്ചു കൊണ്ടിരിക്കുകയാണെന്നു റിപ്പോർട്ടുണ്ട്. ഇന്ത്യയിൽ അടുത്തിടെ പുറത്തിറക്കിയ എച്ച്എംഡി ഫ്യൂഷന്റെ വിജയമാണ് അതിൻ്റെ പിൻഗാമിയായി ഈ പുതിയ മോഡൽ പുറത്തിറക്കുന്നതിനു പ്രചോദനം നൽകിയതെന്നു വേണം കരുതാൻ. റിപ്പോർട്ടുകൾ പ്രകാരം, എച്ച്എംഡി ഫ്യൂഷൻ 2 ഫോണിനെക്കുറിച്ചുള്ള പ്രധാന വിവരങ്ങൾ ഇപ്പോൾ ലീക്കായി ഓൺലൈനിൽ പ്രത്യക്ഷപ്പെട്ടിട്ടുണ്ട്. ഇത് ഫോണിൻ്റെ പ്രധാന ഫീച്ചറുകളെ കുറിച്ചുള്ള സൂചനകൾ നൽകുന്നു. മുൻഗാമിയെപ്പോലെ വരാനിരിക്കുന്ന ഫോണിലും അപ്‌ഗ്രേഡ് ചെയ്‌ത സ്മാർട്ട് ഔട്ട്‌ഫിറ്റുകൾ ഉൾപ്പെടുമെന്ന് പ്രതീക്ഷിക്കുന്നു. ഈ സ്മാർട്ട് ഔട്ട്‌ഫിറ്റുകൾ ഉപയോക്താക്കളെ കണക്റ്റുചെയ്യാനും ഫോണിൽ വ്യത്യസ്ത മൊഡ്യൂളുകൾ ഉപയോഗിക്കാനും അനുവദിക്കുന്നു. കൂടാതെ, എച്ച്എംഡി ഫ്യൂഷൻ 2-വിന് ക്വാൽകോമിന്റെ ഏറ്റവും പുതിയ സ്‌നാപ്ഡ്രാഗൺ 6s ജെൻ 4 പ്രോസസറാണ് കരുത്തു നൽകുന്നതെന്നും റിപ്പോർട്ടുകൾ പറയുന്നു.

ലീക്കായി പുറത്തു വന്ന എച്ച്എംഡി ഫ്യൂഷൻ 2-ൻ്റെ സവിശേഷതകൾ:

സാമൂഹ്യമാധ്യമമായ എക്സിൽ HMD Meme ഷെയർ ചെയ്ത ഒരു പോസ്റ്റ് അനുസരിച്ച്, വരാനിരിക്കുന്ന എച്ച്എംഡി ഫ്യൂഷൻ 2-ൽ സ്മാർട്ട് ഔട്ട്‌ഫിറ്റ്‌സ് ജെൻ 2, പുതിയ പോഗോ പിൻ 2.0 കണക്ടർ എന്നിവ ഉൾപ്പെടുമെന്ന് പ്രതീക്ഷിക്കുന്നു. ആറ് സ്മാർട്ട് പിന്നുകൾ ഉപയോഗിച്ച് ഫോണുമായി ബന്ധിപ്പിക്കാൻ കഴിയുന്നതും കസ്റ്റമൈസ് ചെയ്യാനാവുന്നതുമായ അറ്റാച്ച്‌മെന്റുകളോ ബാക്ക് കവറുകളോ ആണ് സ്മാർട്ട് ഔട്ട്‌ഫിറ്റുകൾ. ഇതിലൂടെ, ഉപയോക്താക്കൾക്ക് അവരുടെ ആവശ്യങ്ങൾ അനുസരിച്ച് എളുപ്പത്തിൽ പുതിയ സവിശേഷതകൾ ചേർക്കാനോ ഫോണിന്റെ രൂപം മാറ്റാനോ കഴിയും.

മറ്റൊരു പോസ്റ്റിൽ, എച്ച്എംഡി പുതിയ സ്മാർട്ട് ഔട്ട്‌ഫിറ്റുകൾ അവതരിപ്പിക്കാൻ പദ്ധതിയിടുന്നതായും ഒരു ടിപ്‌സ്റ്റർ വെളിപ്പെടുത്തി. ബിൽറ്റ്-ഇൻ കിക്ക്‌സ്റ്റാൻഡ് ഉള്ള ഒരു കാഷ്വൽ ഔട്ട്‌ഫിറ്റ്, വയർലെസ് ചാർജിംഗ് ഔട്ട്‌ഫിറ്റ്, മികച്ച പ്രൊട്ടക്ഷൻ നൽകാനായി ഒരു റഗ്ഗഡ് ഔട്ട്‌ഫിറ്റ്, മെച്ചപ്പെട്ട ഗെയിമിംഗ് പെർഫോമൻസിനായി ഡിസൈൻ ചെയ്‌ത ഒരു ഗെയിമിംഗ് ഔട്ട്‌ഫിറ്റ് എന്നിവ ഇതിൽ ഉൾപ്പെടുന്നു. ഫോട്ടോഗ്രാഫി പ്രേമികൾക്കായി ഒരു ക്യാമറ ഗ്രിപ്പ് ഔട്ട്‌ഫിറ്റ്, സ്റ്റൈലിഷ് ലുക്കുള്ള ഒരു ഫ്ലാഷി ഔട്ട്‌ഫിറ്റ്, ഓഡിയോ മെച്ചപ്പെടുത്തുന്നതിനുള്ള ഒരു സ്പീക്കർ ഔട്ട്‌ഫിറ്റ്, ഒരു QR-ബാർകോഡ് ഔട്ട്‌ഫിറ്റ്, കൂടാതെ ഒരു സ്മാർട്ട് പ്രൊജക്ടർ ഔട്ട്‌ഫിറ്റ് എന്നിവയും ഇതിലുണ്ടാകും. വരാനിരിക്കുന്ന സ്മാർട്ട് ഔട്ട്ഫിറ്റുകൾ മുൻ ഫോണിലുണ്ടായിരുന്ന ഔട്ട്ഫിറ്റുകളുമായി പൊരുത്തപ്പെടുന്നവയല്ലെന്നും ടിപ്സ്റ്റർ വെളിപ്പെടുത്തി.

എച്ച്എംഡി ഫ്യൂഷൻ 2-വിൽ പ്രതീക്ഷിക്കുന്ന സവിശേഷതകൾ:

വരാനിരിക്കുന്ന എച്ച്എംഡി ഫ്യൂഷൻ 2 സ്മാർട്ട്‌ഫോണിന്റെ ചില പ്രധാന സവിശേഷതകളും ടിപ്‌സ്റ്റർ പങ്കുവച്ചു. ഫുൾ HD+ റെസല്യൂഷനോടുകൂടിയ 6.58 ഇഞ്ച് OLED ഡിസ്‌പ്ലേയും 120Hz റിഫ്രഷ് റേറ്റും ഫോണിൽ ഉണ്ടെന്ന് പറയപ്പെടുന്നു.

മികച്ച പെർഫോമൻസ് വാഗ്ദാനം ചെയ്യുന്ന, പുതുതായി പുറത്തിറക്കിയ ക്വാൽകോം സ്‌നാപ്ഡ്രാഗൺ 6s ജെൻ 4 പ്രോസസറാണ് ഈ ഉപകരണത്തിന് കരുത്ത് പകരുന്നത്. എച്ച്എംഡി ഫ്യൂഷൻ 2 ഡ്യുവൽ റിയർ ക്യാമറ സെറ്റപ്പുമായി വന്നേക്കാം, OIS (ഒപ്റ്റിക്കൽ ഇമേജ് സ്റ്റെബിലൈസേഷൻ) പിന്തുണയുള്ള 108 മെഗാപിക്സൽ മെയിൻ ക്യാമറയും 8 മെഗാപിക്സൽ അൾട്രാ വൈഡ് ആംഗിൾ ലെൻസും ഇതിൽ ഉൾപ്പെടുന്നു.

പൊടി, ജല പ്രതിരോധത്തിനുള്ള IP65 സർട്ടിഫിക്കേഷൻ, മികച്ച കണക്റ്റിവിറ്റിക്കായി ബ്ലൂടൂത്ത് 5.3, വ്യക്തമായ ശബ്ദത്തിനായി ഡ്യുവൽ സ്പീക്കറുകൾ, വയർഡ് ഓഡിയോയ്ക്കായി 3.5mm ഹെഡ്‌ഫോൺ ജാക്ക് എന്നിവയാണ് ഈ ഫോണിൽ പ്രതീക്ഷിക്കുന്ന മറ്റ് സവിശേഷതകൾ. ഇത്രയും വിവരങ്ങൾ ലീക്കായി പുറത്തു വന്നെങ്കിലും ഫോണിൻ്റെ ലോഞ്ച് തീയ്യതിയെ കുറിച്ച് യാതൊരു വിവരവുമില്ല.