വമ്പൻ സവിശേഷതകളുമായി വിവോ X300 സീരീസ് ആഗോള വിപണിയിൽ എത്തി; വില, സവിശേഷതകൾ അറിയാം

നിരവധി പേരുടെ വിശ്വസ്ത സ്മാർട്ട്ഫോൺ ബ്രാൻഡായ വിവോ അവരുടെ ഏറ്റവും പുതിയ ഫോൺ സീരീസ് ആഗോള വിപണികളിൽ ലോഞ്ച് ചെയ്തു. ചൈനയിൽ ആദ്യമായി അവതരിപ്പിച്ചു രണ്ടാഴ്ച കഴിഞ്ഞതിനു ശേഷമാണ് വിവോ X300 പ്രോ, വിവോ X300 എന്നീ സ്മാർട്ട്‌ഫോണുകൾ ആഗോളതലത്തിൽ ഔദ്യോഗികമായി പുറത്തിറക്കിയത്. രണ്ട് മോഡലുകളും കരുത്തുറ്റ 3nm ഒക്ടാ-കോർ മീഡിയടെക് ഡൈമെൻസിറ്റി 9500 ചിപ്‌സെറ്റുമായി വരുന്നു. ഫോട്ടോഗ്രാഫിക്കായുള്ള ട്രിപ്പിൾ റിയർ ക്യാമറ സെറ്റപ്പ് ഉൾപ്പെടെ രണ്ട് ഫോണുകളും സമാനമായ നിരവധി സവിശേഷതകൾ പങ്കിടുന്നുണ്ട്. രണ്ടു ഫോണിൻ്റെയും മുൻവശത്ത്, ഡിസ്‌പ്ലേയുടെ മുകളിൽ ഒരു ഹോൾ-പഞ്ച് കട്ടൗട്ടിൽ സ്ഥാപിച്ചിരിക്കുന്ന 50 മെഗാപിക്സൽ സെൽഫി ക്യാമറയുണ്ട്. ക്യാമറയുടെയും ഡിസ്‌പ്ലേ ക്വാളിറ്റിയുടെയും കാര്യത്തിൽ, സ്റ്റാൻഡേർഡ് X300-നെ അപേക്ഷിച്ച് X300 പ്രോയിൽ പ്രീമിയം അപ്‌ഗ്രേഡുകൾ ഉണ്ടാകുമെന്ന് പ്രതീക്ഷിക്കുന്നു. സമീപകാല റിപ്പോർട്ടുകൾ പ്രകാരം, ഡിസംബർ ആദ്യത്തോടെ X300 സീരീസ് ഇന്ത്യൻ വിപണിയിലേക്ക് കൊണ്ടുവരാനും വിവോ പദ്ധതിയിടുന്നുണ്ട്. ഫോൺ ഇന്ത്യൻ വിപണിയിൽ എത്തുന്നതിനു വേണ്ടി സ്മാർട്ട്ഫോൺ പ്രേമികളും കാത്തിരിക്കുകയാണ്.

വിവോ X300 സീരീസിൻ്റെ വില, ലഭ്യത മുതലായ വിവരങ്ങൾ:

16GB റാമും 512GB സ്റ്റോറേജുമുള്ള വിവോ X300 പ്രോയുടെ സിംഗിൾ വേരിയൻ്റിന് 1,399 യൂറോ (ഏകദേശം 1,43,000 രൂപ) ആണ് വില. സാധാരണ വിവോ X300-ൻ്റെ 12GB റാമും 256GB സ്റ്റോറേജുമുള്ള അടിസ്ഥാന മോഡലിന് 1,049 യൂറോ (ഏകദേശം 1,08,000 രൂപ) മുതൽ ആരംഭിക്കുന്നു. 16GB റാമും 512GB സ്റ്റോറേജുമുള്ള ഉയർന്ന മോഡലിന്റെ വില 1,099 യൂറോ (ഏകദേശം 1,13,000 രൂപ) ആണ്.

വിവോ X300 സീരീസിലെ രണ്ട് സ്മാർട്ട്‌ഫോണുകളും നവംബർ 3 മുതൽ വിവോയുടെ ഔദ്യോഗിക ഓൺലൈൻ സ്റ്റോർ വഴി യൂറോപ്പിൽ വാങ്ങാൻ ലഭ്യമാകും. വിവോ X300 പ്രോ ഡ്യൂൺ ബ്രൗൺ, ഫാന്റം ബ്ലാക്ക് എന്നീ രണ്ട് കളർ ഓപ്ഷനുകളിൽ ലഭിക്കും. അതേസമയം, വിവോ X300 ഹാലോ പിങ്ക്, ഫാന്റം ബ്ലാക്ക് ഷേഡുകളിലാണു ലഭ്യമാവുക.

വിവോ X300 സീരീസ് ഫോണുകളുടെ സവിശേഷതകൾ:

വിവോ X300 പ്രോ, വിവോ X300 എന്നിവ ഡ്യുവൽ സിം സ്മാർട്ട്‌ഫോണുകളാണ്. അവ ആൻഡ്രോയിഡ് 16 അടിസ്ഥാനമാക്കിയുള്ള ഒറിജിൻഒഎസ് 6-ൽ പ്രവർത്തിക്കുന്നു. മാലി G1-അൾട്രാ ജിപിയുവുമായി ജോടിയാക്കിയ ഏറ്റവും പുതിയ 3nm മീഡിയടെക് ഡൈമെൻസിറ്റി 9500 പ്രോസസറാണ് ഇവയ്ക്കു കരുത്ത് പകരുന്നത്. 16 ജിബി വരെ എൽപിഡിഡിആർ 5X റാമും 512 ജിബി വരെ യുഎഫ്എസ് 4.1 സ്റ്റോറേജും ഫോണുകൾ വാഗ്ദാനം ചെയ്യുന്നു,. ക്യാമറ പ്രോസസ്സിംഗ് മെച്ചപ്പെടുത്തുന്നതിനായി വിവോയുടെ V3+ ഇമേജിംഗ് ചിപ്പും രണ്ട് മോഡലുകളിലും ഉൾപ്പെടുന്നു.

കണക്റ്റിവിറ്റിയുടെ കാര്യത്തിൽ, രണ്ട് ഫോണുകളും വൈ-ഫൈ 7, ബ്ലൂടൂത്ത് 5.4, എൻ‌എഫ്‌സി, ജിപിഎസ്, യുഎസ്ബി ടൈപ്പ്-സി (3.2 ജെൻ 1) പോർട്ട് എന്നിവയെ പിന്തുണയ്ക്കുന്നു. ഇൻ-ഡിസ്‌പ്ലേ 3D അൾട്രാസോണിക് ഫിംഗർപ്രിന്റ് സെൻസർ, ലേസർ ഓട്ടോഫോക്കസ്, ഐആർ ബ്ലാസ്റ്റർ എന്നിവയുമായാണ് ഇവ വരുന്നത്. സ്റ്റീരിയോ സ്പീക്കറുകൾ, ആക്ഷൻ ബട്ടൺ, സിഗ്നൽ ആംപ്ലിഫയർ ചിപ്പ് എന്നിവയും ഇവയിൽ ഉൾപ്പെടുന്നു. വെള്ളം, പൊടി എന്നിവയെ പ്രതിരോധിക്കുന്നതിൽ രണ്ടു ഫോണിനും IP68 റേറ്റിംഗ് ഉണ്ട്. 50 മെഗാപിക്സൽ ഫ്രണ്ട് ക്യാമറയും ഇവയിലുണ്ടാകും.

വിവോ X300 പ്രോ

1.07 ബില്യൺ നിറങ്ങൾ, 120Hz റിഫ്രഷ് റേറ്റ്, HDR സപ്പോർട്ട് എന്നിവ വാഗ്ദാനം ചെയ്യുന്ന 6.78 ഇഞ്ച് Q10+ LTPO AMOLED ഡിസ്‌പ്ലേയാണ് വിവോ X300 പ്രോയിൽ വരുന്നത്. 90W വയർഡ്, 40W വയർലെസ് ചാർജിംഗുള്ള 5,440mAh ബാറ്ററി ഇതിലുൾപ്പെടുന്നു. 50 മെഗാപിക്സൽ മെയിൻ സെൻസർ, 50 മെഗാപിക്സൽ അൾട്രാവൈഡ് ലെൻസ്, 100x ഡിജിറ്റൽ സൂം ചെയ്യാൻ കഴിവുള്ള 200 മെഗാപിക്സൽ പെരിസ്‌കോപ്പ് ലെൻസ് എന്നിവയുള്ള ട്രിപ്പിൾ റിയർ ക്യാമറ സിസ്റ്റം ഇതിലുണ്ട്. ഫോണിന് 8K റെസല്യൂഷനിൽ വരെ വീഡിയോകൾ റെക്കോർഡുചെയ്യാൻ കഴിയും. X300 പ്രോയുടെ ഭാരം ഏകദേശം 226 ഗ്രാമും വലിപ്പം 161.98×75.48×7.99 മില്ലിമീറ്ററുമാണ്.

വിവോ X300

സ്റ്റാൻഡേർഡ് വിവോ X300-ൽ അതേ 120Hz റിഫ്രഷ് റേറ്റ്, കളർ ക്വാളിറ്റി എന്നിവയുള്ള, അൽപ്പം വലിപ്പം കുറഞ്ഞ 6.31ഇഞ്ച് Q10+ LTPO AMOLED ഡിസ്‌പ്ലേയുണ്ട്. ഈ ഫോണിൽ 5,360mAh ബാറ്ററിയാണുള്ളത്. ഇവ X300 പ്രോക്കു സമാനമായ ഫാസ്റ്റ് ചാർജിംഗ് ഓപ്ഷനുകളെ പിന്തുണയ്ക്കുന്നു. റിയർ ക്യാമറ സെറ്റപ്പിൽ OIS ഉള്ള 200 മെഗാപിക്സൽ മെയിൻ സെൻസർ, 50 മെഗാപിക്സൽ അൾട്രാവൈഡ് ലെൻസ്, 50 മെഗാപിക്സൽ പെരിസ്കോപ്പ് ക്യാമറ എന്നിവ ഉൾപ്പെടുന്നു. പ്രോ മോഡലിന്റെ അതേ 50 മെഗാപിക്സൽ സെൽഫി ക്യാമറയാണ് ഇതിലുമുള്ളത്. X300- ന് 150.57×71.92×7.95 മില്ലിമീറ്റർ വലിപ്പവും ഏകദേശം 190 ഗ്രാം ഭാരവുമുണ്ട്.