സാംസങ്ങിൻ്റെ രണ്ടു കിടിലൻ ഫ്ലാഗ്ഷിപ്പ് ഫോണുകൾ ഇന്ത്യയിലെത്തി

ലോകത്തിലെ തന്നെ ഏറ്റവും മികച്ച സ്മാർട്ട്ഫോൺ ബ്രാൻഡുകളിൽ ഒന്നായ സാംസങ്ങ് അവരുടെ സാംസങ് ഗാലക്‌സി S24 അൾട്രാ, ഗാലക്‌സി S24 എന്നിവയുടെ എൻ്റർപ്രൈസ് എഡിഷൻ വേരിയൻ്റുകൾ ഇന്ത്യൻ വിപണിയിൽ അവതരിപ്പിച്ചു. ഈ പുതിയ ഫ്ലാഗ്ഷിപ്പ് ഫോണുകൾ സാധാരണ ഗാലക്‌സി S24, ഗാലക്‌സി S24 അൾട്രാ മോഡലുകളുടെ അതേ സവിശേഷതകളാണു നൽകുന്നത്. അതിനു പുറമെ, എൻ്റർപ്രൈസ് വേരിയൻ്റുകൾ ബിസിനസ്സ് ഉപയോക്താക്കൾക്കായി പ്രത്യേകം രൂപകൽപ്പന ചെയ്‌ത അധിക സവിശേഷതകൾ വാഗ്ദാനം ചെയ്യുന്നു. ഈ ഫോണുകൾക്ക് മൂന്ന് വർഷത്തെ ഡിവൈസ് വാറൻ്റിയും കൂടാതെ ഏഴ് വർഷത്തെ സോഫ്‌റ്റ്‌വെയർ അപ്‌ഡേറ്റുകളും ലഭിക്കുമെന്ന് കമ്പനി ഉറപ്പു നൽകുന്നു. എൻ്റർപ്രൈസ് എഡിഷൻ മോഡലുകളിൽ സാംസങ്ങിൻ്റെ വിപുലമായ ഗാലക്‌സി Al ഫീച്ചറുകൾ ഉൾപ്പെടുന്നുണ്ട്. സെൻസിറ്റീവ് ബിസിനസ്സ് ഡാറ്റയ്ക്കും ആപ്ലിക്കേഷനുകൾക്കുമുള്ള സുരക്ഷ വർദ്ധിപ്പിക്കുന്ന സാംസങ്ങിൻ്റെ സെക്യൂരിറ്റി പ്ലാറ്റ്‌ഫോമായ നോക്‌സ് സ്യൂട്ടിലേക്കുള്ള ഒരു വർഷത്തെ സബ്‌സ്‌ക്രിപ്ഷനോടെയാണ് ഈ ഫോണുകൾ വരുന്നത്.

സാംസങ്ങ് ഗാലക്സി S24 അൾട്രാ, സാംസങ്ങ് ഗാലക്സി S24 എന്നിവയുടെ എൻ്റർപ്രൈസ് എഡിഷൻ്റെ വില:

എൻ്റർപ്രൈസ് എഡിഷൻ ഗാലക്‌സി S24 സ്മാർട്ട്ഫോണിൻ്റെ 8GB റാം + 256GB സ്റ്റോറേജ് പതിപ്പിന് 78,999 രൂപയാണ് ഇന്ത്യയിൽ വില വരുന്നത്. ഇത് ഓനിക്സ് ബ്ലാക്ക് നിറത്തിലാണ് വരുന്നത്. അതേസമയം, എൻ്റർപ്രൈസ് എഡിഷൻ ഗാലക്‌സി S24 അൾട്രായുടെ 12 ജിബി റാം + 256 ജിബി സ്റ്റോറേജ് മോഡലിന് 96,749 രൂപയാണു വില. ഇതു ടൈറ്റാനിയം ബ്ലാക്ക് നിറത്തിൽ ലഭ്യമാണ്. രണ്ട് മോഡലുകളും നിലവിൽ സാംസങ്ങിൻ്റെ കോർപ്പറേറ്റ്+ പോർട്ടൽ വഴി വാങ്ങാം.

സാംസങ്ങ് ഗാലക്സി S24 അൾട്രാ, സാംസങ്ങ് ഗാലക്സി S24 എന്നിവയുടെ എൻ്റർപ്രൈസ് എഡിഷൻ്റെ സവിശേഷതകൾ:

കോർപ്പറേറ്റ് ഉപഭോക്താക്കളെ ആകർഷിക്കുന്നതിനായി ഗ്യാലക്‌സി S24 അൾട്രാ, ഗാലക്‌സി S24 എൻ്റർപ്രൈസ് എഡിഷൻ സ്മാർട്ട്‌ഫോണുകൾ മൂന്ന് വർഷത്തെ പ്രത്യേക വാറൻ്റിയോടെ സാംസങ് വാഗ്ദാനം ചെയ്യുന്നു. ഈ ഉപകരണങ്ങൾ സാംസങ്ങിൻ്റെ നോക്‌സ് സ്യൂട്ടിൻ്റെ ഒരു വർഷത്തെ സൗജന്യ സബ്‌സ്‌ക്രിപ്‌ഷനോടെയാണ് വരുന്നത്, ഇത് സുരക്ഷയ്ക്കും എൻ്റർപ്രൈസ് മൊബിലിറ്റി മാനേജ്‌മെൻ്റിനും (EMM) സഹായിക്കുന്നു. രണ്ടാം വർഷം മുതൽ, 50% കിഴിവ് വിലയിൽ നോക്സ് സ്യൂട്ട് ഉപയോഗിക്കുന്നത് തുടരാം.

എൻ്റർപ്രൈസ് മോഡലുകളുടെ സുരക്ഷ ഉറപ്പു വരുത്താൻ ഏഴ് വർഷത്തെ OS അപ്‌ഡേറ്റുകളും സെക്യൂരിറ്റി പാച്ചുകളും സാംസങ് നൽകുന്നു. ഗാലക്സി S24, ഗാലക്സി S24 അൾട്രാ എൻ്റർപ്രൈസ് എഡിഷൻ മോഡലുകളിൽ ലൈവ് ട്രാൻസ്‌ലേഷൻ, ഇൻ്റർപ്രെറ്റർ, ചാറ്റ് അസിസ്റ്റ്, നോട്ട് അസിസ്റ്റ്, ട്രാൻസ്‌ക്രിപ്റ്റ് അസിസ്റ്റ്, സർക്കിൾ ടു ഗൂഗിൾ എന്നിവ പോലുള്ള AI സവിശേഷതകളും ഉൾപ്പെടുന്നു.

ഈ എൻ്റർപ്രൈസ് മോഡലുകൾ ബിസിനസ്സ് അധിഷ്ഠിത സവിശേഷതകളോടെയാണ് വരുന്നതെങ്കിലും, അവയുടെ ഹാർഡ്‌വെയർ സാധാരണ ഗാലക്‌സി S24, ഗാലക്‌സി S24 അൾട്രാ എന്നിവയ്ക്ക് സമാനമാണ്. ഗാലക്‌സി S24 അൾട്രായ്‌ക്ക് 1Hz മുതൽ 120Hz വരെയുള്ള അഡാപ്റ്റീവ് റീഫ്രഷ് റേറ്റുള്ള 6.8 ഇഞ്ച് എഡ്ജ് QHD+ ഡൈനാമിക് AMOLED 2X ഡിസ്‌പ്ലേയുണ്ട്. 6.2 ഇഞ്ച് ഫുൾ HD+ ഡിസ്‌പ്ലേയാണ് ഗ്യാലക്‌സി S24-ന് ഉള്ളത്. അൾട്രാ മോഡലിൽ സ്‌നാപ്ഡ്രാഗൺ 8 ജെൻ 3 ചിപ്പ്സെറ്റാണുള്ളത്, അതേസമയം സാധാരണ ഗാലക്‌സി S24 ഫോണിന് ഇന്ത്യയിൽ എക്‌സിനോസ് 2400 ചിപ്പാണുള്ളത്.

ക്യാമറകളുടെ കാര്യത്തിൽ, ഗാലക്‌സി S24 അൾട്രായ്ക്ക് ക്വാഡ് ക്യാമറ സജ്ജീകരണമുണ്ട്, പ്രധാന ലെൻസായി 200 മെഗാപിക്സൽ വൈഡ് ക്യാമറ ഇതിൽ നൽകിയിരിക്കുന്നു. 50 മെഗാപിക്സൽ വൈഡ് ക്യാമറയുള്ള ട്രിപ്പിൾ ക്യാമറ സജ്ജീകരണമാണ് ഗാലക്‌സി S24 ഫോണിൽ ഉള്ളത്. രണ്ട് മോഡലുകൾക്കും 12 മെഗാപിക്സൽ സെൽഫി ക്യാമറയുണ്ട്, കൂടാതെ പൊടി, ജലം എന്നിവയെ പ്രതിരോധിക്കുന്ന കാര്യത്തിൽ IP68 റേറ്റു ചെയ്തവയാണ്. ഗാലക്‌സി S24 അൾട്രായ്‌ക്ക് 5,000 mAh ബാറ്ററിയും ഗാലക്‌സി S24 ഫോണിൽ 4,000mAh ബാറ്ററിയുമാണുള്ളത്.