റിയൽമിയുടെ ലോവർ മിഡ്-റേഞ്ച് ഫോണെത്തുന്നു, റിയൽമി P3 ലൈറ്റ് 5G ഉടനെ ലോഞ്ച് ചെയ്യും

റിയൽമിയുടെ ഏറ്റവും പുതിയ ഫോണായ റിയൽമി P3 ലൈറ്റ് 5G സെപ്റ്റംബർ 13-നാണ് ഇന്ത്യയിൽ പുറത്തിറങ്ങാൻ പോകുന്നത്. ഔദ്യോഗിക റിലീസിന് തൊട്ടു മുൻപായി, ഫ്ലിപ്കാർട്ടിലെ ഒരു ലിസ്റ്റിംഗിലൂടെ ഈ ഫോണിന്റെ വില സംബന്ധിച്ച വിവരങ്ങൾ വെളിപ്പെടുത്തിയിട്ടുണ്ട്. മികച്ച പെർഫോമൻസ് വാഗ്ദാനം ചെയ്യുന്നതിനും മറ്റുമായി രൂപകൽപ്പന ചെയ്‌തിരിക്കുന്ന മീഡിയടെക് ഡൈമെൻസിറ്റി 6300 5G പ്രോസസറാണ് ഈ സ്മാർട്ട്‌ഫോണിന് കരുത്ത് പകരുന്നത്. 45W ഫാസ്റ്റ് ചാർജിംഗിനെ പിന്തുണയ്ക്കുന്ന വലിയ 6,000mAh ബാറ്ററിയാണ് ഫോണിന്റെ പ്രധാന ഹൈലൈറ്റുകളിൽ ഒന്ന്. 6.67 ഇഞ്ച് വലിപ്പമുള്ള ഡിസ്‌പ്ലേയും റിയൽമി P3 ലൈറ്റ് 5G-യിൽ ഉണ്ടായിരിക്കും. ഹാൻഡ്‌സെറ്റിൽ 32 മെഗാപിക്സൽ പിൻ ക്യാമറയും സെൽഫികൾക്കും വീഡിയോ കോളുകൾക്കുമായി 8 മെഗാപിക്സൽ മുൻ ക്യാമറയും ഉണ്ട്. ഈ ഫോൺ മൂന്ന് വ്യത്യസ്ത കളർ ഓപ്ഷനുകളിൽ ലഭ്യമാകും. ഇന്ത്യയിലെ സാധാരണക്കാരെ ലക്ഷ്യമിട്ടു കൊണ്ടാണ് റിയൽമി P3 ലൈറ്റ് 5G ലോഞ്ച് ചെയ്യാൻ പോകുന്നതെന്ന് വിലയിൽ നിന്നും മനസിലാക്കാം.

റിയൽമി P3 ലൈറ്റ് 5G-യുടെ ഇന്ത്യയിലെ വില:

സെപ്റ്റംബർ 13-ന് നടക്കുന്ന ലോഞ്ചിങ്ങിനു മുന്നോടിയായി ഫ്ലിപ്കാർട്ട് അവരുടെ വെബ്‌സൈറ്റിൽ റിയൽമി P3 ലൈറ്റ് 5G ലിസ്റ്റ് ചെയ്തിട്ടുണ്ട്. റാമും സ്റ്റോറേജ് ഓപ്ഷനുകളും സഹിതം ഇന്ത്യയിൽ ഈ ഫോണിൻ്റെ വില എത്രയാണെന്നു ലിസ്റ്റിംഗ് വെളിപ്പെടുത്തുന്നു. 4 ജിബി റാം + 128 ജിബി സ്റ്റോറേജ് മോഡലിന് 12,999 രൂപയും 6 ജിബി റാം + 128 ജിബി സ്റ്റോറേജ് മോഡലിന് 13,999 രൂപയുമാണ് വില.

ഫ്ലിപ്കാർട്ട് ആക്സിസ് ബാങ്ക് ക്രെഡിറ്റ് കാർഡ് അല്ലെങ്കിൽ ഫ്ലിപ്കാർട്ട് എസ്ബിഐ ക്രെഡിറ്റ് കാർഡ് ഉപയോഗിച്ച് നടത്തുന്ന പേയ്‌മെന്റുകളിലൂടെ ഉപഭോക്താക്കൾക്ക് 5% വരെ ക്യാഷ്ബാക്ക് നേടാമെന്ന് ഫ്ലിപ്കാർട്ട് പ്രൊഡക്റ്റ് പേജിൽ പരാമർശിക്കുന്നു. നിലവിൽ "ഉടൻ വരുന്നു" എന്ന ടാഗോടെയാണ് പേജിൽ ഫോൺകാണിച്ചിരിക്കുന്നത്. സെപ്റ്റംബർ 13-ന് നടക്കുന്ന ഔദ്യോഗിക ലോഞ്ചിനിടെ വിൽപ്പന തീയതി കമ്പനി പ്രഖ്യാപിക്കുമെന്ന് പ്രതീക്ഷിക്കുന്നു.

റിയൽമി P3 ലൈറ്റ് 5G-യുടെ സവിശേഷതകൾ:

റിയൽമി P3 ലൈറ്റ് 5G മൂന്ന് നിറങ്ങളിൽ ലഭ്യമാകും. ലില്ലി വൈറ്റ്, പർപ്പിൾ ബ്ലോസം, മിഡ്‌നൈറ്റ് ലില്ലി എന്നീ നിറങ്ങളിലാണ് ഇതു വിപണിയിലെത്തുക. ആൻഡ്രോയിഡ് 15 അടിസ്ഥാനമാക്കിയുള്ള റിയൽമി Ul 6.0-യിൽ പ്രവർത്തിക്കുന്ന ഫോണിൽ 720×1,604 പിക്‌സൽ റെസല്യൂഷനുള്ള 6.67 ഇഞ്ച് എച്ച്‌ഡി+ ഡിസ്‌പ്ലേയുണ്ട്. ഇത് 120Hz റിഫ്രഷ് റേറ്റ്, 625 നിറ്റ്‌സ് വരെ പീക്ക് ബ്രൈറ്റ്‌നസ് എന്നിവയെ പിന്തുണയ്ക്കുന്നു.

മികച്ച പെർഫോമൻസും 5G കണക്റ്റിവിറ്റിയും നൽകുന്നതിനായി രൂപകൽപ്പന ചെയ്‌തിരിക്കുന്ന ഒക്ടാ-കോർ മീഡിയടെക് ഡൈമെൻസിറ്റി 6300 ചിപ്‌സെറ്റാണ് ഉപകരണത്തിന് കരുത്ത് പകരുന്നത്. ഫോട്ടോഗ്രാഫിയുടെ കാര്യത്തിൽ, 32 മെഗാപിക്സൽ റിയർ ക്യാമറയും സെൽഫികൾക്കും വീഡിയോ കോളുകൾക്കുമായി 8 മെഗാപിക്സൽ മുൻ ക്യാമറയും ഫോണിൽ ഉൾപ്പെടും. പൊടി, വെള്ളം എന്നിവയെ പ്രതിരോധിക്കുന്ന കാര്യത്തിൽ IP64 റേറ്റിംഗാണ് ഈ ഫോണിനുള്ളത്.

റിയൽമി P3 ലൈറ്റ് 5G ഫോണിൻ്റെ മറ്റൊരു പ്രധാന ആകർഷണം അതിന്റെ വലിയ 6,000mAh ബാറ്ററിയാണ്. 45W ഫാസ്റ്റ് ചാർജിംഗിനെ പിന്തുണയ്ക്കുന്ന ഈ ഫോൺ, ഫാസ്റ്റ് പവർ ടോപ്പ്-അപ്പുകളും 5W റിവേഴ്‌സ് ചാർജിംഗും അനുവദിക്കുന്നു. അതുകൊണ്ടു തന്നെ മറ്റ് ഉപകരണങ്ങൾ ചാർജ് ചെയ്യാൻ ഒരു പവർബാങ്ക് പോലെ ഇത് ഉപയോഗിക്കാം. വലിയ ബാറ്ററി ഉണ്ടെങ്കിലും ഹാൻഡ്‌സെറ്റ് വളരെ മെലിഞ്ഞതാണ്, വെറും 7.94mm കനം മാത്രമാണ് ഇതിനുള്ളത്.