നത്തിങ്ങിൻ്റെ രണ്ടു ഫോണുകൾ വിപണിയിലേക്ക്

ബ്രിട്ടീഷ് സ്‌മാർട്ട്‌ഫോൺ ബ്രാൻഡായ നത്തിംഗ് മാർച്ച് 4-നു നടക്കുന്ന പരിപാടിയിൽ കുറഞ്ഞത് രണ്ട് പുതിയ സ്‌മാർട്ട്‌ഫോണുകളെങ്കിലും അവതരിപ്പിക്കുമെന്ന് കഴിഞ്ഞ ദിവസം പുറത്തു വന്ന ഒരു റിപ്പോർട്ട് സൂചിപ്പിക്കുന്നു. കഴിഞ്ഞ വർഷം പുറത്തിറങ്ങിയ ഫോൺ 2a-യുടെ പിൻഗാമിയായി നത്തിങ്ങ് ഫോൺ 3a എന്ന പുതിയ മോഡലാണ് കമ്പനി പുറത്തിറക്കാൻ തയ്യാറെടുക്കുന്നത്. നത്തിങ്ങിൻ്റെ ഇവൻ്റിൽ ഈ ഫോൺ ഔദ്യോഗികമായി വെളിപ്പെടുത്തുമെന്ന് പ്രതീക്ഷിക്കുന്നു. അതേ ഇവൻ്റിൽ രണ്ടാമത്തെ സ്മാർട്ട്‌ഫോൺ അവതരിപ്പിക്കാൻ സാധ്യതയുണ്ടെന്നും റിപ്പോർട്ട് സൂചിപ്പിക്കുന്നു. ഈ മോഡലിന് പേരിനൊപ്പം "പ്രോ" ടാഗ് ഉണ്ടെന്ന് റിപ്പോർട്ടുകളുണ്ട്. കമ്പനി ആദ്യമായാണ് ഫോൺ ലൈനപ്പിൽ പ്രോ മോഡൽ അവതരിപ്പിക്കുന്നത്. ഈ വർഷാവസാനം അടുത്ത ഫ്ലാഗ്ഷിപ്പ് മോഡലായ നത്തിങ്ങ് ഫോൺ 3 അനാവരണം ചെയ്യുന്നതിനു മുമ്പ് മൂന്ന് പുതിയ സ്മാർട്ട്‌ഫോണുകൾ പുറത്തിറക്കാൻ കമ്പനി പദ്ധതിയിടുന്നുണ്ടെന്ന് നേരത്തെ ഊഹാപോഹങ്ങൾ ഉണ്ടായിരുന്നു.

മാർച്ച് 4-ന് നത്തിങ്ങ് സ്മാർട്ട്ഫോണുകൾ ലോഞ്ച് ചെയ്യും:

ആൻഡ്രോയിഡ് ഹെഡ്‌ലൈൻസിൽ നിന്നുള്ള ഒരു റിപ്പോർട്ട് അനുസരിച്ച്, മാർച്ച് 4-ന് നടക്കാനിരിക്കുന്ന കമ്പനിയുടെ പ്രൊഡക്റ്റ് ഷോകേസിൽ നത്തിങ്ങ് ഫോൺ 3a, നത്തിങ്ങ് ഫോൺ 3a പ്രോ എന്നീ രണ്ട് പുതിയ ഫോണുകൾ അവതരിപ്പിക്കുമെന്ന് പ്രതീക്ഷിക്കുന്നു. ഫോൺ 3a-ക്കൊപ്പം "പ്ലസ്" പതിപ്പും ലോഞ്ച് ചെയ്യുമെന്ന് നേരത്തെ ലീക്കായ വിവരങ്ങൾ സൂചിപ്പിച്ചിരുന്നു. എന്നാൽ ഇപ്പോൾ അത് മാറ്റി പകരം "പ്രോ" മോഡൽ ആകുമെന്നാണു കരുതേണ്ടത്.

നത്തിങ്ങ് ഫോൺ 3a രണ്ട് കോൺഫിഗറേഷനുകളിൽ ലഭ്യമാകുമെന്ന് പ്രതീക്ഷിക്കുന്നു. 8GB RAM + 128GB സ്റ്റോറേജ്, 12GB RAM + 256GB സ്റ്റോറേജ് എന്നിവയാണത്. ഇത് ബ്ലാക്ക് ആൻഡ് വൈറ്റ് കളർ ഓപ്ഷനുകളിൽ വരാം.

12 ജിബി റാം + 256 ജിബി സ്റ്റോറേജുള്ള ഒരൊറ്റ വേരിയൻ്റിൽ മാത്രമാകും നത്തിങ്ങ് ഫോൺ 3a പ്രോ ലഭ്യമാവുക. ഫോൺ 3a-യിൽ നിന്ന് വ്യത്യസ്തമായി, ഈ മോഡൽ ഗ്രേ നിറത്തിൽ മാത്രമായിരിക്കാം പുറത്തു വരുന്നത്.

നത്തിങ്ങിൻ്റെ വരാനിരിക്കുന്ന ലോഞ്ച് ഇവൻ്റിന് "പവർ ഇൻ പെർസ്പെക്റ്റീവ്" എന്ന ടാഗ്‌ലൈൻ നൽകിയിട്ടുണ്ട്. ഈ ഫോണിൻ്റെ പുറകിൽ ലംബമായി അടുക്കി വച്ചിരിക്കുന്ന രണ്ട് ക്യാമറ റിംഗുകൾക്ക് ചുറ്റുമായി ഗ്ലിഫ് ഇൻ്റർഫേസ് (എൽഇഡി ലൈറ്റുകൾ) ഉണ്ടാകുമെന്ന് റിപ്പോർട്ടുകൾ പറയുന്നു. മുഴുവൻ സ്പെസിഫിക്കേഷനുകൾ ഇപ്പോഴും അറിയില്ലെങ്കിലും, ലോഞ്ച് ചെയ്യുന്നതിന് മുമ്പുള്ള ആഴ്ചകളിൽ കമ്പനി കൂടുതൽ വിശദാംശങ്ങൾ വെളിപ്പെടുത്താൻ സാധ്യതയുണ്ട്.

നത്തിങ്ങ് ഫോൺ 3a-യിൽ പ്രതീക്ഷിക്കുന്ന സവിശേഷതകൾ:

മികച്ച ദൃശ്യങ്ങൾക്കായി 120Hz റീഫ്രഷ് റേറ്റുള്ള 6.8 ഇഞ്ച് ഫുൾ HD+ AMOLED ഡിസ്‌പ്ലേയുമായി നത്തിങ്ങ് ഫോൺ 3a വരുമെന്ന് പ്രതീക്ഷിക്കുന്നു. ഇത് സ്നാപ്ഡ്രാഗൺ 7s ജെൻ 3 പ്രോസസറും 12 ജിബി വരെ റാമും 256 ജിബി വരെ ഇൻ്റേണൽ സ്റ്റോറേജും നൽകാനാണ് സാധ്യത. A059 എന്ന മോഡൽ നമ്പറാണ് ഫോണിനുള്ളതെന്ന് പറയപ്പെടുന്നു.

ക്യാമറകളുടെ കാര്യത്തിൽ, ഫോണിൽ ട്രിപ്പിൾ റിയർ ക്യാമറ സെറ്റപ്പ് ഉണ്ടായിരിക്കാം. ഇതിൽ 50 മെഗാപിക്സൽ പ്രധാന ക്യാമറ, 2x ഒപ്റ്റിക്കൽ സൂം ഉള്ള 50 മെഗാപിക്സൽ ടെലിഫോട്ടോ ലെൻസ്, 8 മെഗാപിക്സൽ അൾട്രാ വൈഡ് ക്യാമറ എന്നിവ ഉൾപ്പെടും. മുൻവശത്ത്, ഫോട്ടോകൾക്കും വീഡിയോ കോളുകൾക്കുമായി 32 മെഗാപിക്സൽ സെൽഫി ക്യാമറയും ഉണ്ടായിരിക്കാം.

മുൻ മോഡലിനെപ്പോലെ 45W ഫാസ്റ്റ് ചാർജിംഗിനെ പിന്തുണയ്‌ക്കുന്ന 5,000mAh ബാറ്ററിയാണ് നതിംഗ് ഫോൺ 3a പായ്ക്ക് ചെയ്യുമെന്ന് പ്രതീക്ഷിക്കുന്നത്. വയർലെസ് പേയ്‌മെൻ്റുകൾക്കും മറ്റ് സവിശേഷതകൾക്കുമായി ഇത് NFC പിന്തുണയോടെയും വന്നേക്കാം.