ചെന്നൈയിൽ നിർമിക്കുന്ന നത്തിങ്ങ് ഫോൺ 3 ഇന്ത്യൻ വിപണി കീഴടക്കാൻ ഒരുങ്ങുന്നു

ഇന്ത്യയിലും മറ്റ് ആഗോള വിപണികളിലും പുതിയ സ്മാർട്ട്ഫോൺ അവതരിപ്പിക്കാൻ നത്തിങ്ങ്. ആദ്യ മോഡലിൻ്റെ വിജയത്തിനു ശേഷം നത്തിങ്ങ് ഫോൺ 2, നത്തിങ്ങ് ഫോൺ 2a, നത്തിങ്ങ് ഫോൺ 2a+ എന്നിവ കമ്പനി പുറത്തിറക്കിയിരുന്നു. നത്തിങ്ങ് ഫോൺ 3-യാണ് കമ്പനി ഇനി പുറത്തിറക്കാൻ പോകുന്നത്. ഈ ഫോണുമായി ബന്ധപ്പെട്ട ടീസർ കമ്പനി പുറത്തു വിടുന്നുണ്ട്. ഗ്ലിഫ് ഇന്റർഫേസ് പുതിയ ഫോണിൽ ഉൾപ്പെടുത്തിയേക്കില്ല എന്നാണ് റിപ്പോർട്ടുകൾ സൂചിപ്പിക്കുന്നത്. മുൻ മോഡലായ നത്തിംഗ് ഫോൺ 2, അടുത്തിടെ പ്രഖ്യാപിച്ച ഫോൺ 3a സീരീസ് എന്നിവ പോലെ, പുതിയ ഫോൺ 3-യും ഇന്ത്യയിൽ നിർമ്മിക്കും. അടുത്തിടെ, നത്തിങ്ങിൻ്റെ വരാനിരിക്കുന്ന സ്മാർട്ട്‌ഫോണിന്റെ ലീക്കായ ഡിസൈൻ റെൻഡറുകൾ ഒരു ജേർണലിസ്റ്റ് പങ്കിട്ടിരുന്നു. ഫോൺ എങ്ങനെയായിരിക്കുമെന്ന് ഏകദേശം മനസിലാക്കാൻ ഇതിൽ നിന്നും കഴിയും. ഔദ്യോഗിക ഡിസൈൻ ഇതുവരെ പൂർണ്ണമായി വെളിപ്പെടുത്തിയിട്ടില്ലെങ്കിലും, ഈ പുതിയ മോഡലിൽ നത്തിംഗ് എന്തൊക്കെ മാറ്റങ്ങൾ കൊണ്ടുവരുമെന്ന് അറിയാൻ ആവേശത്തോടെ കാത്തിരിക്കയാണ് സ്മാർട്ട്ഫോൺ പ്രേമികൾ.

നത്തിങ്ങ് ഫോൺ 3-യുടെ ഡിസൈൻ സംബന്ധിച്ച സൂചനകൾ നൽകി കമ്പനി:

വരാനിരിക്കുന്ന നത്തിംഗ് ഫോൺ 3-യുടെ ഡിസൈനിനെ കുറിച്ചുള്ള സൂചനകൾ നൽകുന്ന ഒരു പോസ്റ്റ് നത്തിംഗ് അടുത്തിടെ സാമൂഹിക മാധ്യമമായ എക്സിൽ (മുമ്പ് ട്വിറ്റർ) പങ്കിട്ടു. ടീസർ ചിത്രത്തിൽ റിയർ പാനലിന്റെ ഒരു ചെറിയ ഭാഗം, പ്രത്യേകിച്ച് ഉപകരണത്തിന്റെ താഴെയുള്ള-വലത് മൂലയാണു കാണാൻ കഴിയുന്നത്. മോഡൽ നമ്പർ A024 നത്തിംഗ് ഫോൺ 3-യുടെ താണെന്നും ഇതിലൂടെ സ്ഥിരീകരിക്കപ്പെടുന്നു. ജൂലൈ 1-നാണ് ഇന്ത്യയിലും മറ്റ് ആഗോള വിപണികളിലും ഈ സ്മാർട്ട്‌ഫോൺ ലോഞ്ച് ചെയ്യാൻ തീരുമാനിച്ചിരിക്കുന്നത്.

എക്സിൽ പുറത്തുവിട്ട പോസ്റ്റിലൂടെ പുതിയ ഫോൺ 3 ഇന്ത്യയിൽ നിർമ്മിക്കുമെന്നും നത്തിങ്ങ് സ്ഥിരീകരിച്ചു. പ്രാദേശിക ഉൽ‌പാദനത്തിൽ ബ്രാൻഡ് ശ്രദ്ധ കേന്ദ്രീകരിക്കുന്നതു തുടരുന്നുവെന്ന് ഇതിൽ നിന്നും വ്യക്തം. അതിന്റെ മുൻ മോഡലുകളും ഇന്ത്യയിൽ തന്നെ അസംബിൾ ചെയ്തു എന്നതും കൂട്ടി വായിക്കുമ്പോൾ കമ്പനി മുന്നോട്ടുവെച്ച തന്ത്രങ്ങൾ കൃത്യമായി നടപ്പിലാക്കുന്നുണ്ട്.

എക്സിലെ മറ്റൊരു പോസ്റ്റിൽ, നത്തിംഗ് സഹസ്ഥാപകനായ അകിസ് ഇവാഞ്ചലിഡിസ് തമിഴ്നാട്ടിലെ ചെന്നൈയിലുള്ള കമ്പനിയുടെ നിർമ്മാണ പ്ലാന്റ് വീണ്ടും സന്ദർശിക്കാൻ പദ്ധതിയിടുന്നതായും പരാമർശിക്കുന്നുണ്ട്. നത്തിംഗ് സ്മാർട്ട്‌ഫോണുകൾ അസംബിൾ ചെയ്യുന്നത് ഇവിടെ വെച്ചാണ്. നിലവിൽ 500-ലധികം ആളുകൾ ഈ പ്ലാൻ്റിൽ ജോലി ചെയ്യുന്നു. കമ്പനിയുടെ ഇന്ത്യയിലെ പ്രവർത്തനങ്ങളിൽ ഈ ഫാക്ടറി ഒരു പ്രധാന പങ്ക് വഹിക്കുന്നുണ്ട്. രാജ്യത്ത് തങ്ങളുടെ സ്മാർട്ട്ഫോൺ വിപണി വളർത്താനുള്ള പദ്ധതികൾക്കും ഇതു സഹായം ചെയ്യുന്നു.

ഔദ്യോഗിക ടീസർ ലൈവ് ആയതിനാലും ലോഞ്ച് തീയതി സ്ഥിരീകരിച്ചതിനാലും, വരും ആഴ്ചകളിൽ നത്തിങ്ങ് ഫോൺ 3-യെക്കുറിച്ചുള്ള കൂടുതൽ വിവരങ്ങൾ കമ്പനി വെളിപ്പെടുത്തുമെന്നു പ്രതീക്ഷിക്കുന്നു.

നത്തിങ്ങ് ഫോൺ 3-യിൽ പ്രതീക്ഷിക്കാവുന്ന സവിശേഷതകൾ:

വരാനിരിക്കുന്ന നത്തിങ്ങ് ഫോൺ 3-യുടെ ഡിസൈൻ സംബന്ധിച്ച സൂചനകൾ കമ്പനി നൽകിയെങ്കിലും ഇതുവരെ ഹാൻഡ്സെറ്റിൻ്റെ ചെറിയ ഭാഗങ്ങൾ മാത്രമേ കാണിച്ചിട്ടുള്ളൂ. എന്നിരുന്നാലും, ഒരു ജേർണലിസ്റ്റ് ലീക്കാക്കി പുറത്തുവിട്ട ചിത്രങ്ങളിൽ സ്മാർട്ട്‌ഫോണിന്റെ റിയർ പാനൽ മുഴുവനായി കാണിക്കുന്നുണ്ട്. ഈ ചിത്രം കാണിക്കുന്നത് ഫോണിന് സുതാര്യമായ ഒരു പിൻഭാഗം ഉണ്ടായിരിക്കുമെന്നാണ്. നത്തിങ്ങിൻ്റെ മുൻ മോഡലുകളിലും ഇതുണ്ടായിരുന്നു. രസകരമായ കാര്യം, മുൻ മോഡലുകളെ മറ്റു കമ്പനിയുടെ ഫോണുകളിൽ നിന്നും വേറിട്ടു നിർത്തുന്ന സവിശേഷതയായ ഗ്ലിഫ് ലൈറ്റിംഗ് ഇന്റർഫേസ് ഇത്തവണയില്ല. ട്രിപ്പിൾ റിയർ ക്യാമറ സെറ്റപ്പുമായി വരുന്ന വൃത്താകൃതിയിലുള്ള ക്യാമറ മൊഡ്യൂൾ ആയിരിക്കും ഫോണിലുണ്ടാവുക.

നത്തിങ്ങ് ഫോൺ 3 ഫ്ലാഗ്ഷിപ്പ് നിലവാരമുള്ള സവിശേഷതകളോടെ വരുമെന്ന് മുൻ റിപ്പോർട്ടുകൾ സൂചിപ്പിക്കുന്നു. മീഡിയടെക്കിന്റെ ഡൈമെൻസിറ്റി 9400 ചിപ്‌സെറ്റോ ക്വാൽകോമിന്റെ സ്‌നാപ്ഡ്രാഗൺ 8 സീരീസിൽ നിന്നുള്ള പ്രോസസറോ ഇതിൽ ഉപയോഗിക്കുമെന്ന് പ്രതീക്ഷിക്കുന്നു. സാധാരണയായി പ്രീമിയം സ്മാർട്ട്‌ഫോണുകളിൽ കാണപ്പെടുന്ന ഈ ചിപ്പുകൾ മികച്ച പെർഫോമൻസിനു പേരുകേട്ടതാണ്.

നത്തിങ്ങിൻ്റെ സിഇഒ ആയ കാൾ പേയ് ഫോണിന്റെ വില ഏകദേശം GBP 800 ആയിരിക്കുമെന്ന് സൂചന നൽകിയിട്ടുണ്ട്, അതായത് ഇന്ത്യയിൽ ഏകദേശം 93,000 രൂപ. ഈ പ്രൈസ് റേഞ്ചിൽ വരുന്ന സാംസങ് ഗാലക്‌സി S25, വരാനിരിക്കുന്ന ഐഫോൺ 16 പോലുള്ള വമ്പൻ മോഡലുകളുമായി നത്തിംഗ് ഫോൺ 3 നേരിട്ട് മത്സരിക്കുമെന്നും ഉറപ്പിക്കാൻ കഴിയും.