ബാറ്ററിയും ക്യാമറയും വേറെ ലെവൽ; മോട്ടോ G86 പവർ 5G ഇന്ത്യൻ വിപണിയിലെത്തി

മോട്ടറോള തങ്ങളുടെ G സീരീസിൻ്റെ ഭാഗമായ ഏറ്റവും പുതിയ ഫോണായ മോട്ടോ G86 പവർ 5G ബുധനാഴ്ച ഇന്ത്യൻ വിപണിയിൽ ലോഞ്ച് ചെയ്തു. ഈ സെഗ്മെൻ്റിലെ ഏറ്റവും മികച്ച ഫീച്ചറുകളുള്ള ഈ സ്മാർട്ട്‌ഫോണിൽ 6,720mAh ബാറ്ററിയാണുള്ളത്. മീഡിയടെക് ഡൈമെൻസിറ്റി 7400 ചിപ്‌സെറ്റ് ഫോണിനു കരുത്തു നൽകുന്നു. ട്രിപ്പിൾ റിയർ ക്യാമറ സെറ്റപ്പുള്ള മോട്ടോ G86 പവറിൽ 50 മെഗാപിക്സൽ സോണി LYTIA-600 സെൻസറാണ് പ്രധാന ക്യാമറയായി നൽകിയിരിക്കുന്നത്. പൊടി, വെള്ളം എന്നിവയെ സംരക്ഷിക്കുന്നതിൽ IP68, IP69 റേറ്റിംഗുകളാണ് ഈ ഫോണിനുള്ളത്. ഡ്യൂറബിലിറ്റി ഉറപ്പു നൽകി MIL-STD-810H മിലിട്ടറി-ഗ്രേഡ് സർട്ടിഫിക്കേഷനുമായാണ് മോട്ടോ G86 പവർ ഇന്ത്യയിലേക്കു വരുന്നത്. ഇതിനു പല പരുക്കൻ സാഹചര്യങ്ങളെയും അതിജീവിക്കാൻ കഴിയും. ഡിസ്പ്ലേയ്‌ക്കുണ്ടാകുന്ന പോറലും കേടുപാടുകളും തടയാൻ ഫോൺ ഗൊറില്ല ഗ്ലാസ് 7i ഉപയോഗിച്ച് സംരക്ഷിക്കപ്പെട്ടിരിക്കുന്നു. മിഡ്-റേഞ്ച് നിരക്കിലുള്ള ഫോൺ എന്ന കാര്യം പരിഗണിക്കുമ്പോൾ ഏറ്റവും മികച്ച സവിശേഷതകളാണ് മോട്ടോ G86 പവർ നൽകുന്നത്.

മോട്ടോ G86 പവർ 5G ഫോണിൻ്റെ ഇന്ത്യയിലെ വില, ലഭ്യത മുതലായ വിവരങ്ങൾ:

മോട്ടോ G86 പവർ 5G-യുടെ 8 ജിബി റാമും 128 ജിബി സ്റ്റോറേജുമുള്ള മോഡലിന് 17,999 രൂപ എന്ന പ്രാരംഭ വിലയിലാണ് ഇന്ത്യയിൽ വിൽപ്പനയ്ക്കായി എത്തുന്നത്. ഓഗസ്റ്റ് 6 മുതൽ മോട്ടോറോള രാജ്യത്ത് ഫോൺ വിൽപ്പന ആരംഭിക്കും, മോട്ടറോള ഇന്ത്യ വെബ്‌സൈറ്റ് വഴിയോ ഫ്ലിപ്കാർട്ടിലൂടെയോ ഉപഭോക്താക്കൾക്ക് ഇത് വാങ്ങാം.

കോസ്മിക് സ്കൈ, ഗോൾഡൻ സൈപ്രസ്, സ്പെൽബൗണ്ട് എന്നീ മൂന്ന് നിറങ്ങളിലാണ് കമ്പനി ഈ സ്മാർട്ട്‌ഫോൺ വിപണിയിൽ വാഗ്ദാനം ചെയ്യുന്നത്. മികച്ച സവിശേഷതകളുള്ള ഒരു മിഡ്-റേഞ്ച് ഫോൺ തിരയുന്ന വാങ്ങുന്നവരെ ലക്ഷ്യം വച്ചുള്ളതാണ് മോട്ടോ G86 പവർ.

മോട്ടോ G86 പവർ 5G ഫോണിൻ്റെ പ്രധാന സവിശേഷതകൾ:

മോട്ടോ G86 പവർ 5G-യിൽ 1,220x2,712-പിക്സൽ റെസല്യൂഷനുള്ള 6.7 ഇഞ്ച് സൂപ്പർ HD AMOLED ഡിസ്‌പ്ലേയുണ്ട്. ഇത് 120Hz റിഫ്രഷ് റേറ്റ് വാഗ്ദാനം ചെയ്യുന്നതിനു പുറമെ മികച്ച നിറങ്ങൾക്കും കോൺട്രാസ്റ്റിനും HDR10+ പിന്തുണയുമുണ്ട്. ഡിസ്‌പ്ലേയ്ക്ക് 4,500 നിറ്റ്‌സ് പീക്ക് ബ്രൈറ്റ്‌നസ് എത്താൻ കഴിയും. അതിനാൽ തന്നെ തിളക്കമുള്ള സൂര്യപ്രകാശത്തിൽ പോലും ഇതുപയോഗിക്കാം. സ്ക്രീൻ ഗൊറില്ല ഗ്ലാസ് 7i കൊണ്ട് സംരക്ഷിക്കപ്പെട്ടിരിക്കുന്നു, കൂടാതെ ലോ ബ്ലൂ ലൈറ്റും ലോ മോഷൻ ബ്ലറും ഉറപ്പു നൽകുന്ന SGS സർട്ടിഫിക്കേഷനും ഇതിനുണ്ട്.

4nm മീഡിയടെക് ഡൈമെൻസിറ്റി 7400 ഒക്ടാ-കോർ പ്രോസസർ ഈ ഫോണിനു കരുത്തു നൽകുന്നു. 8GB LPDDR4X റാമും 128GB ഇന്റേണൽ സ്റ്റോറേജും ഇതിനുണ്ട്, ഇത് മൈക്രോ എസ്ഡി കാർഡ് ഉപയോഗിച്ച് 1TB വരെ വികസിപ്പിക്കാൻ കഴിയും. ആൻഡ്രോയ്ഡ് 15 അടിസ്ഥാനമാക്കിയുള്ള മോട്ടോറോളയുടെ ഹലോ UI-യിലാണ് മോട്ടോ G86 പവർ 5G പ്രവർത്തിക്കുന്നത്.

ഫോണിൽ ട്രിപ്പിൾ റിയർ ക്യാമറ സജ്ജീകരണമാണു നൽകിയിരിക്കുന്നത്. 50 മെഗാപിക്സൽ സോണി LYT-600 മെയിൻ ക്യാമറ, മാക്രോ ക്യാമറയായും പ്രവർത്തിപ്പിക്കാൻ കഴിയുന്ന 8 മെഗാപിക്സൽ അൾട്രാവൈഡ് ലെൻസ്, വ്യത്യസ്ത ലൈറ്റിംഗ് സാഹചര്യങ്ങളിൽ ഇമേജ് ക്വാളിറ്റി മെച്ചപ്പെടുത്തുന്നതിനുള്ള 3-ഇൻ-1 ഫ്ലിക്കർ സെൻസർ എന്നിവ ഇതിൽ ഉൾപ്പെടുന്നു. മുൻവശത്ത്, ഫോട്ടോകൾക്കും വീഡിയോ കോളുകൾക്കുമായി 32 മെഗാപിക്സൽ സെൽഫി ക്യാമറയുമുണ്ട്. വ്യക്തവും ആഴത്തിലുള്ളതുമായ ശബ്‌ദം നൽകുന്ന ഡോൾബി ഓഡിയോ, ഹൈ-റെസ് ഓഡിയോ സർട്ടിഫിക്കേഷനോടു കൂടിയ ഡ്യുവൽ സ്റ്റീരിയോ സ്പീക്കറുകൾ എന്നിവയും ഈ ഫോണിലുണ്ട്.

മോട്ടോ G86 പവർ 5G-യിൽ 33W ടർബോപവർ ഫാസ്റ്റ് ചാർജിംഗിനെ പിന്തുണയ്ക്കുന്ന 6,720mAh ബാറ്ററിയാണുള്ളത്. കണക്റ്റിവിറ്റി സവിശേഷതകളിൽ ഡ്യുവൽ നാനോ സിം, 5G, 4G, വൈ-ഫൈ 6, ബ്ലൂടൂത്ത് 5.4, GPS, യുഎസ്ബി ടൈപ്പ്-സി പോർട്ട് എന്നിവ ഉൾപ്പെടുന്നു. സുരക്ഷയ്ക്കായി, ഫോണിൽ ഇൻ-ഡിസ്പ്ലേ ഫിംഗർപ്രിന്റ് സെൻസറും സജ്ജീകരിച്ചിട്ടുണ്ട്.

പൊടി, ജലം എന്നിവയ പ്രതിരോധിക്കുന്നതിനായി IP68, IP69 റേറ്റിംഗുകളോടെയാണ് ഇത് വരുന്നത്, കൂടാതെ മിലിട്ടറി-ഗ്രേഡ് MIL-STD-810H സർട്ടിഫിക്കേഷനും ഇതിനുണ്ട്. മോട്ടോ G86 പവർ 5G-ക്ക് 161.21 x 74.74 x 8.6 മില്ലിമീറ്റർ വലിപ്പവും, 198 ഗ്രാം ഭാരവുമാണുള്ളത്.