ഇവൻ വിലയുടെ കാര്യത്തിലും സൂപ്പർ ലൈറ്റ്; ഐക്യൂ Z10 ലൈറ്റ് 5G ഇന്ത്യയിലെത്തി

സ്മാർട്ട്ഫോൺ വിപണിയിൽ ബജറ്റ് നിരക്കിലുള്ള ഫോണുകൾക്ക് യാതൊരു ക്ഷാമവുമില്ല. പ്രമുഖ കമ്പനികളിൽ ഭൂരിഭാഗവും വിവിധ വിലകളിൽ ബജറ്റ് സ്മാർട്ട്ഫോണുകൾ പുറത്തിറക്കുന്നുണ്ട്. ഈ വിഭാഗത്തിൽ മത്സരം ശക്തമാകുന്ന സാഹചര്യത്തിൽ വിപണിയിൽ ആധിപത്യം സ്ഥാപിക്കാൻ ഐക്യൂ പുതിയൊരു സ്മാർട്ട്ഫോണുമായി എത്തിയിട്ടുണ്ട്. ഐക്യൂ Z10 ലൈറ്റ് എന്ന സ്മാർട്ട്ഫോൺ കഴിഞ്ഞ ദിവസം ഇന്ത്യയിൽ ലോഞ്ച് ചെയ്തു. മുടക്കുന്ന തുകക്ക് മൂല്യം ഉറപ്പു നൽകുന്ന സവിശേഷതകളുമായാണ് ഐക്യൂവിൻ്റെ പുതിയ ഫോൺ എത്തുന്നത്. വിവോയുടെ സബ് ബ്രാൻഡായ ഐക്യൂവിൻ്റെ ഈ ഫോൺ മീഡിയാടെക് ഡൈമൻസിറ്റി 6300 ചിപ്പ്സെറ്റിലാണു പ്രവർത്തിക്കുന്നത്. 8GB വരെ റാമും 256GB വരെ സ്റ്റോറേജുമുള്ള വിവിധ വേരിയൻ്റുകളിൽ ലഭ്യമാകുന്ന ഈ ഫോണിൽ 6,000mAh ബാറ്ററിയാണുള്ളത്. രണ്ടു കളർ ഓപ്ഷനുകളിൽ മാത്രം ലഭ്യമാകുന്ന ഐക്യൂ Z10 ലൈറ്റ് 5G ഫോണിൽ 50 മെഗാപിക്സൽ മെയിൻ സെൻസറുള്ള ഡ്യൂവൽ ക്യാമറ സെറ്റപ്പുണ്ട്. Al പവേർഡ് ഇമേജ് എഡിറ്റിങ്ങ് ടൂളുകളും ഐക്യൂ Z10 ലൈറ്റ് 5G നൽകുന്നു.

ഐക്യൂ Z10 ലൈറ്റ് 5G ഫോണിൻ്റെ വില, ലഭ്യത, ഓഫറുകൾ മുതലായ വിവരങ്ങൾ:

മൂന്ന് വ്യത്യസ്ത സ്റ്റോറേജ്, റാം വേരിയന്റുകളോടെയാണ് ഐക്യൂ Z10 ലൈറ്റ് 5G ഇന്ത്യയിൽ ഔദ്യോഗികമായി പുറത്തിറക്കിയിരിക്കുന്നത്. 4GB റാമും 128GB സ്റ്റോറേജുമുള്ള അടിസ്ഥാന മോഡലിന്റെ വില 9,999 രൂപയാണ്. 6GB റാമും 128GB സ്റ്റോറേജുമുള്ള രണ്ടാമത്തെ വേരിയന്റിന് 10,999 രൂപയും 8GB റാമും 256GB സ്റ്റോറേജുമുള്ള ടോപ്പ്-എൻഡ് മോഡലിന് 12,999 രൂപയുമാണ് വില.

സൈബർ ഗ്രീൻ, ടൈറ്റാനിയം ബ്ലൂ എന്നീ രണ്ട് നിറങ്ങളിൽ ഫോൺ ലഭ്യമാകും. ജൂൺ 25 മുതൽ വിൽപ്പന ആരംഭിക്കുന്ന ഇത് ആമസോണിൽ നിന്നും ഐക്യൂ ഇന്ത്യയുടെ ഒഫിഷ്യൽ ഇ-സ്റ്റോറിൽ നിന്നും വാങ്ങാം. ബജറ്റ് നിരക്കിലുള്ള ഈ ഫോൺ വാങ്ങുമ്പോൾ വിലക്കിഴിവു ലഭിക്കുന്ന ചില ഓഫറുകളും ഐക്യൂ നൽകുന്നുണ്ട്. ലോഞ്ചിൻ്റെ ഭാഗമായി, ഉപഭോക്താക്കൾ ഫോൺ വാങ്ങുമ്പോൾ 500 രൂപയുടെ ഇൻസ്റ്റൻ്റ് ഡിസ്കൗണ്ട് ലഭിക്കും.

ഐക്യൂ Z10 ലൈറ്റ് 5G ഫോണിൻ്റെ പ്രധാന സവിശേഷതകൾ:

ബജറ്റ് നിരക്കിലുള്ള നിരവധി സ്മാർട്ട്ഫോണുകൾ വിപണിയിൽ ഉള്ളതിനാൽ മികച്ച സവിശേഷതകൾ നൽകി ആളുകളെ പുതിയ ഫോണിലേക്ക് ആകർഷിക്കുക എന്നതാണ് ഐക്യൂവിൻ്റെ തന്ത്രം. ഇതിനു മുൻപ് അവതരിപ്പിച്ച ബജറ്റ് നിരക്കിലുള്ള ഫോണുകൾക്ക് ലഭിച്ച സ്വീകാര്യതയും അവർക്ക് അത്മവിശ്വാസം നൽകും.

6,000mAh ബാറ്ററിയുമായാണ് ഐക്യൂ Z10 ലൈറ്റ് 5G എത്തുന്നത്. ഈ ബാറ്ററി 15W ചാർജിംഗിനെ പിന്തുണയ്ക്കുകയും 70 മണിക്കൂർ വരെ മ്യൂസിക് പ്ലേബാക്കും 37 മണിക്കൂർ വരെ ടോക്ക് ടൈമും വാഗ്ദാനം ചെയ്യുമെന്നും പറയപ്പെടുന്നു. 1,600 ചാർജിംഗ് സൈക്കിളുകൾക്ക് ശേഷവും, ബാറ്ററി അതിന്റെ ശേഷിയുടെ ഏകദേശം 80% നിലനിർത്തും. 10,000 രൂപ വില പരിധിയിൽ 6,000mAh ബാറ്ററി വാഗ്ദാനം ചെയ്യുന്ന ആദ്യത്തെ ഫോണാണിതെന്നും ഐക്യൂ അവകാശപ്പെടുന്നു.

90Hz റിഫ്രഷ് റേറ്റും 1,000nits വരെ പീക്ക് ബ്രൈറ്റ്‌നസും ഉള്ള 6.74-ഇഞ്ച് HD+ ഡിസ്‌പ്ലേ (720x1600 പിക്‌സലുകൾ) ഇതിനുണ്ട്. ആൻഡ്രോയ്ഡ് 15 അടിസ്ഥാനമാക്കിയ ഫൺടച്ച് OS 15-ൽ ഫോൺ പ്രവർത്തിക്കുന്നു. രണ്ട് വർഷത്തെ ആൻഡ്രോയിഡ് അപ്‌ഡേറ്റുകളും മൂന്ന് വർഷത്തെ സെക്യൂരിറ്റി അപ്‌ഡേറ്റുകളും ഇതു വാഗ്ദാനം ചെയ്യുന്നു.

8GB വരെ റാമുമായി ജോടിയാക്കിയ മീഡിയടെക് ഡൈമെൻസിറ്റി 6300 ചിപ്‌സെറ്റാണ് ഫോണിന് കരുത്ത് പകരുന്നത്. ആവശ്യമെങ്കിൽ ഈ റാം 8GB കൂടി വർദ്ധിപ്പിക്കാനും കഴിയും. സ്റ്റോറേജ് ഓപ്ഷനുകളിൽ 128GB, 256GB വേരിയന്റുകൾ ഉൾപ്പെടുന്നു.

ഐക്യൂ Z10 ലൈറ്റ് 5G-യിൽ 50MP സോണി AI മെയിൻ സെൻസറും 2MP ബൊക്കെ ലെൻസും ഉള്ള ഡ്യുവൽ റിയർ ക്യാമറ സെറ്റപ്പാണുള്ളത്. സെൽഫികൾക്കായി, ഇതിൽ 5MP ഫ്രണ്ട് ക്യാമറയുണ്ട്. ക്യാമറ ആപ്പിൽ AI ഇറേസ്, AI ഫോട്ടോ എൻഹാൻസ്, AI ഡോക്യുമെന്റ് മോഡ് തുടങ്ങിയ നിരവധി സവിശേഷതകൾ ഉൾപ്പെടുന്നു.

പൊടി, ജല പ്രതിരോധം എന്നിവയ്‌ക്കായി IP64 റേറ്റിംഗും SGS ഫൈവ്-സ്റ്റാർ ഡ്രോപ്പ് പ്രൊട്ടക്ഷനും ഫോണിന് സാക്ഷ്യപ്പെടുത്തിയിട്ടുണ്ട്. കൂടാതെ MIL-STD-810H മിലിട്ടറി-ഗ്രേഡ് ഡ്യൂറബിലിറ്റി സ്റ്റാൻഡേർഡും പാലിക്കുന്നു. കണക്റ്റിവിറ്റി സവിശേഷതകളിൽ 5G, ബ്ലൂടൂത്ത് 5.4, Wi-Fi 5, GPS, GLONASS, GALILEO, BeiDou, GNSS, QZSS, ഒരു USB ടൈപ്പ്-സി പോർട്ട് എന്നിവ ഉൾപ്പെടുന്നു. ഡ്യുവൽ സിം (നാനോ) കാർഡുകളെ ഈ ഫോൺ പിന്തുണയ്ക്കുന്നു.