വില തുച്ഛം, ഗുണം മെച്ചം; ഇൻഫിനിക്സ് ഹോട്ട് 60i 5G ഇന്ത്യയിൽ ഉടനെ ലോഞ്ച് ചെയ്യും

മിതമായ വിലയ്ക്ക് മികച്ച ഫോണുകൾ പുറത്തിറക്കി ഇന്ത്യൻ വിപണിയിൽ ശ്രദ്ധിക്കപ്പെട്ട ബ്രാൻഡായ ഇൻഫിനിക്സിൻ്റെ പുതിയ ഫോൺ ഇന്ത്യയിൽ ലോഞ്ച് ചെയ്യാൻ പോകുന്നു. ഇൻഫിനിക്സ് ഹോട്ട് സീരീസിലെ ആദ്യത്തെ ഫോണായ ഹോട്ട് 60i 5G ഈ മാസം തന്നെ ഇന്ത്യയിൽ ഔദ്യോഗികമായി പുറത്തിറങ്ങും. ജൂണിൽ ബംഗ്ലാദേശിൽ ആദ്യമായി 4G വേരിയൻ്റായി ലോഞ്ച് ചെയ്ത ഫോണിൻ്റെ ഇന്ത്യയിലെ ലോഞ്ച് തീയതി സ്ഥിരീകരിക്കുന്നതും, പ്രധാന സ്പെസിഫിക്കേഷനുകളുടെ പ്രിവ്യൂ നൽകുന്നതുമായ ഒരു സ്പെഷ്യൽ പ്രൊഡക്റ്റ് പേജ് കഴിഞ്ഞ ദിവസം ഒരു ഇന്ത്യൻ ഇ-കൊമേഴ്‌സ് വെബ്‌സൈറ്റിൽ ലൈവായി വന്നിട്ടുണ്ട്. അടുത്തിടെ, ഫോണിന്റെ പ്രോസസർ, ബാക്ക് പാനൽ ഡിസൈൻ, ബാറ്ററി വലുപ്പം എന്നിവയെക്കുറിച്ചുള്ള വിശദാംശങ്ങൾ കമ്പനി പങ്കിട്ടിരുന്നു. മീഡിയടെക് ഡൈമെൻസിറ്റി ചിപ്‌സെറ്റിലാണ് ഇൻഫിനിക്സ് ഹോട്ട് 60i 5G പ്രവർത്തിക്കുക. അതേസമയം, ബംഗ്ലാദേശിൽ അവതരിപ്പിച്ച ഹോട്ട് 60i യുടെ 4G പതിപ്പിൽ മീഡിയടെക് ഹീലിയോ പ്രോസസറാണുണ്ടായിരുന്നത്. അതിനാൽ ഇന്ത്യയിൽ ലോഞ്ച് ചെയ്യുന്ന 5G വേരിയന്റ് ഒരു നവീകരിച്ച മോഡലായിരിക്കും എന്നു പ്രതീക്ഷിക്കാം.

ഇൻഫിനിക്സ് ഹോട്ട് 60i 5G ഇന്ത്യയിൽ ലോഞ്ച് ചെയ്യുന്ന തീയ്യതി, പ്രതീക്ഷിക്കുന്ന വില എന്നീ വിവരങ്ങൾ:

ഇൻഫിനിക്സ് ഹോട്ട് 60i 5G ഓഗസ്റ്റ് 16-ന് ഇന്ത്യയിൽ ലോഞ്ച് ചെയ്യുമെന്ന് ഫ്ലിപ്കാർട്ട് മൈക്രോസൈറ്റ് സ്ഥിരീകരിച്ചു. ഷാഡോ ബ്ലൂ, മൺസൂൺ ഗ്രീൻ, സ്ലീക്ക് ബ്ലാക്ക്, പ്ലം റെഡ് എന്നീ നിറങ്ങളിൽ ഈ ഫോൺ ലഭ്യമാകും. ഇന്ത്യയിൽ, ഇത് ഫ്ലിപ്കാർട്ടിലൂടെയും ഇൻഫിനിക്സ് ഔദ്യോഗിക വെബ്‌സൈറ്റിലൂടെയും ലഭ്യമാകും.

ട്രാൻസ്ഷൻ ഹോൾഡിംഗ്സിന്റെ ഉടമസ്ഥതയിലുള്ള ഇൻഫിനിക്സ് ജൂണിൽ ബംഗ്ലാദേശിൽ ഹോട്ട് 60i യുടെ 4G വേരിയൻ്റ് ലോഞ്ച് ചെയ്തിരുന്നു. ആ മോഡലിൽ 6 ജിബി റാമും 128 ജിബി സ്റ്റോറേജുമാണ് ഉണ്ടായിരുന്നത്. BDT 13,999 (ഏകദേശം 10,000 ഇന്ത്യൻ രൂപ) ആയിരുന്നു അതിന്റെ വില.

ഹോട്ട് 60i 5G-യുടെ ഇന്ത്യയിലെ വില ഇതുവരെ വെളിപ്പെടുത്തിയിട്ടില്ല. അതു 4G മോഡലിന് സമാനമോ അതിൽ കുറച്ചു കൂടുതലോ ആയിരിക്കുമെന്നാണു പ്രതീക്ഷിക്കുന്നത്. 5G അപ്‌ഗ്രേഡ് ഇന്റർനെറ്റ് വേഗതയും മികച്ച പെർഫോമൻസും വാഗ്ദാനം ചെയ്യും. ഔദ്യോഗിക ലോഞ്ചിന്റെ സമയത്ത് മുഴുവൻ സവിശേഷതകളും വിലയും പ്രഖ്യാപിക്കുന്നുണ്ടാകും.

ഇൻഫിനിക്സ് ഹോട്ട് 60i 5G-യിൽ പ്രതീക്ഷിക്കുന്ന പ്രധാന സവിശേഷതകൾ:

സാധാരണക്കാരുടെ സ്മാർട്ട്ഫോൺ ബ്രാൻഡായ ഇൻഫിനിക്സ് പുതിയ ഫോണിൽ മികച്ച ഫീച്ചറുകളാണ് ഒരുക്കിയിരിക്കുന്നത്. ഏറ്റവും പുതിയ ആൻഡ്രോയിഡ് 15 ഓപ്പറേറ്റിംഗ് സിസ്റ്റത്തെ അടിസ്ഥാനമാക്കിയുള്ള XOS 15-ലാണ് ഇൻഫിനിക്സ് ഹോട്ട് 60i 5G പ്രവർത്തിക്കുക. HD+ റെസല്യൂഷനോടുകൂടിയ 6.75 ഇഞ്ച് ഡിസ്‌പ്ലേ 120Hz റീഫ്രഷ് റേറ്റിനെ പിന്തുണയ്ക്കുന്നു.

മികച്ച പെർഫോമൻസിനും 5G കണക്റ്റിവിറ്റിക്കുമായി രൂപകൽപ്പന ചെയ്‌തിരിക്കുന്ന മീഡിയടെക് ഡൈമെൻസിറ്റി 6400 ചിപ്‌സെറ്റാണ് ഫോണിന് കരുത്ത് പകരുന്നത്. 6,000mAh ബാറ്ററിയാണ് ഇതിന്റെ ഏറ്റവും വലിയ ഹൈലൈറ്റുകളിൽ ഒന്ന്. ഇൻഫിനിക്‌സിന്റെ അഭിപ്രായത്തിൽ, ഈ പ്രൈസ് റേഞ്ചിൽ ഇത്രയും വലിയ ബാറ്ററി വാഗ്ദാനം ചെയ്യുന്ന ആദ്യത്തെ ഫോണാണിത്. ഒറ്റ ചാർജിൽ 128 മണിക്കൂർ വരെ മ്യൂസിക് പ്ലേബാക്ക് നൽകാൻ ഇതിനു കഴിയുമെന്നും കമ്പനി അവകാശപ്പെടുന്നു.

ഫോട്ടോഗ്രാഫിക്ക്, ഇൻഫിനിക്സ് ഹോട്ട് 60i 5G ഫോണിൽ ഡ്യുവൽ റിയർ ക്യാമറ സെറ്റപ്പ് ഉണ്ടായിരിക്കും. ഡ്യുവൽ എൽഇഡി ഫ്ലാഷ് ലൈറ്റുകളുടെ പിന്തുണയുള്ള 50 മെഗാപിക്സൽ സെൻസറായിരിക്കും പ്രൈമറി ലെൻസ്. സ്റ്റേബിൾ ലൈറ്റിംഗിനായി HDR മോഡ്, വിശാലമായ ദൃശ്യങ്ങൾ പകർത്തുന്നതിനുള്ള പനോരമ മോഡ് തുടങ്ങിയ സവിശേഷതകൾ ക്യാമറയിലുണ്ടാകും. റിയർ ഡിസൈനിൽ ചതുരാകൃതിയിലുള്ള ക്യാമറ ഐലൻഡ് ഉൾപ്പെടുന്നു, റിയർ പാനലിൽ വളരെ മിനുസമാർന്ന മാറ്റ് ഫിനിഷും ഉണ്ടാകും.

പൊടി, വെള്ളത്തുള്ളികൾ എന്നിവയെ പ്രതിരോധിക്കുക്കുന്നതിൽ IP64 റേറ്റിങ്ങാണ് ഈ ഫോണിനുള്ളത്. മൊബൈൽ ഡാറ്റയോ നെറ്റ്‌വർക്ക് കവറേജോ ഇല്ലാതിരിക്കുന്ന സമയത്തും നേരിട്ട് ആശയവിനിമയം നടത്താൻ അനുവദിക്കുന്ന ബ്ലൂടൂത്ത് വഴിയുള്ള വാക്കി-ടോക്കി കണക്റ്റിവിറ്റിയാണ് ഇതിന്റെ മറ്റൊരു പ്രധാന പ്രത്യേകത. കൂടാതെ, വിവിധ AI- പവർ ടാസ്‌ക്കുകൾ വേഗത്തിൽ കൈകാര്യം ചെയ്യുന്നതിനായി രൂപകൽപ്പന ചെയ്‌തിരിക്കുന്ന വൺ-ടാപ്പ് ഇൻഫിനിക്‌സ് AI ടൂളും ഇതിനൊപ്പമുണ്ടാകും.