ഇനി മറ്റാർക്കുമിവിടെ സ്ഥാനമുണ്ടാകില്ല; വാവെയ് പ്യുറ 80 സീരീസ് എത്തി

മികച്ച സ്മാർട്ട്ഫോണുകൾ കൊണ്ട് ഏവരെയും അമ്പരപ്പിക്കാറുള്ള വാവെയ് ബുധനാഴ്ച ചൈനയിൽ തങ്ങളുടെ പുതിയ സ്മാർട്ട്ഫോൺ സീരീസ് ഔദ്യോഗികമായി പുറത്തിറക്കി. വാവെയ് പ്യുറ 80 എന്ന സീരീസിൻ്റെ ഭാഗമായി വാവെയ് പ്യുറ 80 ബേയ്സ് മോഡൽ, പ്യുറ 80 പ്രോ, പ്യുറ 80 പ്രോ+ എന്നിവയും ടോപ്പ്-എൻഡ് മോഡലായ പ്യുറ 80 അൾട്രായും അടക്കം നാലു ഫോണുകളാണു പുറത്തു വന്നിരിക്കുന്നത്. 50 മെഗാപിക്സൽ മെയിൽ ക്യാമറയും മികച്ച സൂം ഇൻ അനുവദിക്കുന്ന 12 മെഗാപിക്സൽ പെരിസ്‌കോപ്പ് ടെലിഫോട്ടോ ക്യാമറയും പ്യുറ 80 എന്ന സ്റ്റാൻഡേർഡ് മോഡലിൽ സജ്ജീകരിച്ചിരിക്കുന്നു. അതേസമയം, പ്യുറ 80 പ്രോ, പ്യുറ 80 പ്രോ+ എന്നിവയിൽ 1 ഇഞ്ച് സെൻസറുള്ള 50 മെഗാപിക്സൽ പ്രൈമറി ക്യാമറയുണ്ട്. സീരീസിലെ ഹൈ എൻഡ് മോഡലായ പ്യുറ 80 അൾട്രായിലും ഇതേ മെയിൻ സെൻസറാണെങ്കിലും ക്യാമറ മൊഡ്യൂളിലെ മറ്റു ലെൻസുകളിൽ അമ്പരപ്പിക്കുന്ന സവിശേഷതകളുണ്ട്. ഇതെല്ലാം വിശദമായി മനസിലാക്കാം.

വാവെയ് പ്യുറ 80 സീരീസിലെ ഫോണുകളുടെ വില:

വാവെയ് പ്യുറ 80 അൾട്രാ യുടെ 16GB + 512GB വേരിയൻ്റിന് CNY 9,999 (ഏകദേശം 1,18,900 രൂപ), 16GB + 1TB മോഡലിന് CNY 10,999 (ഏകദേശം 1,30,800 രൂപ) എന്നിങ്ങനെയാണ് വില.

വാവെയ് പ്യുറ 80 പ്രോ+ ഫോണിന്റെ 16GB + 512GB പതിപ്പിന് CNY 7,999 (ഏകദേശം 95,100 രൂപ), 16GB + 1TB മോഡലിന് CNY 8,999 (ഏകദേശം 1,07,000 രൂപ) എന്നിങ്ങനെയും വില വരുന്നു.

വാവെയ് പ്യുറ 80 പ്രോയുടെ 12GB + 256GB മോഡലിന് CNY 6,499 (ഏകദേശം 77,300 രൂപ) ആണ് വില. 12GB + 512GB, 12GB + 1TB വേരിയൻ്റുകൾക്ക് യഥാക്രമം CNY 6,999 (ഏകദേശം 83,200 രൂപ), CNY 7,999 (ഏകദേശം 95,100 രൂപ) എന്നിങ്ങനെയാണ് വില.

വാവെയ് പ്യുറ 80 പ്രോ, പ്രോ+, അൾട്രാ മോഡലുകൾ ചൈനയിൽ വാവെയ് VMall വഴി വാങ്ങാനാകും. അതേസമയം വാവെയ് പ്യുറ 80 അടിസ്ഥാന മോഡലിന്റെ വിലയോ ലഭ്യതയോ കമ്പനി ഇതുവരെ പങ്കിട്ടിട്ടില്ല.

വാവെയ് പ്യുറ 80 സീരീസ് ഫോണുകളുടെ സവിശേഷതകൾ:

വാവെയ് പ്യുറ 80 അൾട്രയിൽ ഫുൾ-എച്ച്ഡി+ റെസല്യൂഷനോടുകൂടിയ 6.8 ഇഞ്ച് LTPO OLEDഡിസ്‌പ്ലേയുണ്ട്. ഹാർമണി OS 5.1-ൽ പ്രവർത്തിക്കുന്ന ഇത് 100W വയർഡ്, 80W വയർലെസ് ചാർജിംഗ് എന്നിവയെ പിന്തുണയ്ക്കുന്ന 5,700mAh ബാറ്ററിയാണ് നൽകുന്നത്. ഫോണിന്റെ മറ്റൊരു ഹൈലൈറ്റ് അതിലെ സ്വിച്ചബിൾ ടെലിഫോട്ടോ ക്യാമറ സിസ്റ്റമാണ്. രണ്ട് ഒപ്റ്റിക്കൽ സൂം ലെവലുകളുള്ള ഒരു പ്രത്യേക 50MP സെൻസർ ഇതിൽ ഉപയോഗിക്കുന്നു. ഈ സൂം ലെവലുകളിലേക്കു പരസ്പരം മാറാൻ കഴിയും. 1 ഇഞ്ച് 50MP പ്രധാന ക്യാമറ, 40MP അൾട്രാവൈഡ് ക്യാമറ, 1.5MP റെഡ് മേപ്പിൾ സ്പെക്ട്രൽ സെൻസർ, 13MP ഫ്രണ്ട് ക്യാമറ എന്നിവയും ഇതിൽ ഉൾപ്പെടുന്നു.

വാവെയ് പ്യുറ 80 പ്രോ+, പ്യുറ 80 പ്രോ എന്നിവയ്ക്ക് അൾട്രാ മോഡലിന്റെ അതേ ഡിസ്‌പ്ലേ, സോഫ്റ്റ്‌വെയർ, ബാറ്ററി, ചാർജിംഗ് സവിശേഷതകൾ എന്നിവയുണ്ട്. എന്നിരുന്നാലും, സ്വിച്ചബിൾ ടെലിഫോട്ടോ സിസ്റ്റത്തിന് പകരം, ഈ ഫോണുകളിൽ 4x ഒപ്റ്റിക്കൽ സൂം പിന്തുണയ്ക്കുന്ന 48MP മാക്രോ ടെലിഫോട്ടോ ക്യാമറയാണുള്ളത്. അൾട്രാ വേരിയന്റിനെപ്പോലെ ഈ മോഡലുകളും ഡ്യുവൽ സാറ്റലൈറ്റ് കമ്മ്യൂണിക്കേഷനെ (ബീഡോ, ടിയാൻടോംഗ്) പിന്തുണയ്ക്കുന്നു.

സ്റ്റാൻഡേർഡ് വാവെയ് പ്യുറ 80-ന് 6.6 ഇഞ്ച് ഡിസ്‌പ്ലേയും 66W വയർഡ്, 50W വയർലെസ് ചാർജിംഗുള്ള 5,600mAh ബാറ്ററിയുമാണുള്ളത്. മറ്റ് മോഡലുകളുടെ അതേ സോഫ്റ്റ്‌വെയറും 13MP ഫ്രണ്ട് ക്യാമറയുമാണ് ഇതിലുമുള്ളത്. പിന്നിൽ, 50MP പ്രധാന ക്യാമറ, 5.5x ഒപ്റ്റിക്കൽ സൂമുള്ള 12MP പെരിസ്‌കോപ്പ് ടെലിഫോട്ടോ ലെൻസ്, 13MP അൾട്രാവൈഡ് ക്യാമറ, 1.5MP റെഡ് മേപ്പിൾ സെൻസർ എന്നിവയുമുണ്ട്.