യുപിഐ പേയ്മെൻ്റുകൾ നടത്താൻ ബയോമെട്രിക് ഓതൻ്റിക്കേഷൻ; പുതിയ ഫീച്ചർ കൂട്ടിച്ചേർത്ത് ആമസോൺ പേ

ഇന്ത്യയിലെ ആമസോൺ പേ ഉപയോക്താക്കൾക്കു വേണ്ടി ബയോമെട്രിക് ഓതൻ്റിക്കേഷൻ ഫീച്ചർ അവതരിപ്പിച്ച് ആമസോൺ. ഈ അപ്‌ഡേറ്റ് ഉപയോഗിച്ച്, ഉപയോക്താക്കൾക്ക് അവരുടെ യുപിഐ പിൻ നൽകുന്നതിനു പകരം ഫിംഗർപ്രിന്റ് അല്ലെങ്കിൽ ഫേഷ്യൽ റെക്കഗ്നിഷൻ ഉപയോഗിച്ച് യുപിഐ പേയ്‌മെന്റുകൾ നടത്താനും പണം അയയ്ക്കാനും കഴിയും. ബുധനാഴ്ചയാണ് കമ്പനി ഈ മാറ്റം പ്രഖ്യാപിച്ചത്. ഡിജിറ്റൽ പേയ്‌മെന്റുകൾ കൂടുതൽ സുരക്ഷിതവും സൗകര്യപ്രദവും ആക്കുന്നതിനു വേണ്ടിയാണ് ഈ സവിശേഷത രൂപകൽപ്പന ചെയ്‌തിരിക്കുന്നതെന്നും കമ്പനി പറഞ്ഞു. നേരത്തെ, ആമസോൺ പേ ഉപയോക്താക്കൾ ഇടപാട് പൂർത്തിയാക്കുമ്പോഴെല്ലാം അവരുടെ യുപിഐ പിൻ ടൈപ്പ് ചെയ്യണമായിരുന്നു. മറ്റാരെങ്കിലും പിൻ കണ്ടെത്തുകയോ മോഷ്ടിക്കുകയോ ചെയ്താൽ, ഉപയോക്താവ് അറിയാതെ അവർക്ക് പേയ്‌മെന്റുകൾ നടത്താൻ കഴിയും. ബയോമെട്രിക് ഓതൻ്റിക്കേഷൻ ഫീച്ചർ ഉപയാഗിക്കുന്നതോടെ, ഇടപാടുകൾ നടത്താൻ വിരലടയാളമോ മുഖമോ വേണ്ടി വരും. ഈ സംവിധാനം യുപിഐ ഇടപാടുകൾക്ക് അധിക സുരക്ഷ നൽകുന്നുവെന്ന് യുഎസ് ആസ്ഥാനമായുള്ള കമ്പനി പറയുന്നു. ഈ സവിശേഷത ഇനി മുതൽ ആമസോൺ പേ ആപ്പിൽ ലഭ്യമാകും.

യുപിഐ പേയ്മൻ്റുകൾക്കായി ഫിംഗർപ്രിൻ്റ്, ഫേസ് റെക്കഗ്നിഷൻ എന്നിവയെ പിന്തുണച്ച് ആമസോൺ പേ:

ഇന്ത്യയിലെ ആമസോൺ പേ ഉപയോക്താക്കൾക്കായി ആരംഭിച്ച പുതിയ ബയോമെട്രിക് ഓതൻ്റിക്കേഷൻ ഫീച്ചറിനെ കുറിച്ച് കമ്പനി കൂടുതൽ വിവരങ്ങൾ പങ്കുവച്ചിട്ടുണ്ട്. ഈ അപ്‌ഡേറ്റ് ഉപയോഗിച്ച്, ഉപയോക്താക്കൾക്ക് ഓരോ ഇടപാടിനും അവരുടെ യുപിഐ പിൻ നൽകുന്നതിന് പകരം ഫേസ് റെക്കഗ്നിഷൻ അല്ലെങ്കിൽ ഫിംഗർപ്രിൻ്റ് വെരിഫിക്കേഷൻ ഉപയോഗിച്ച് യുപിഐ പേയ്‌മെന്റുകൾ പൂർത്തിയാക്കാൻ കഴിയും. മറ്റൊരാൾക്ക് പണം അയയ്ക്കുമ്പോഴും, ഫിസിക്കൽ സ്റ്റോറുകളിൽ പേയ്‌മെന്റുകൾ നടത്തുമ്പോഴും, ബാങ്ക് അക്കൗണ്ട് ബാലൻസ് പരിശോധിക്കുമ്പോഴും, ആമസോണിന്റെ ഇ-കൊമേഴ്‌സ് പ്ലാറ്റ്‌ഫോമിൽ ഉൽപ്പന്നങ്ങൾ വാങ്ങുമ്പോഴും ഈ ഓപ്ഷൻ ഉപയോഗിക്കാം.

പേയ്‌മെന്റുകൾ അംഗീകരിക്കുന്നതിന് ഫേഷ്യൽ, ഫിംഗർപ്രിൻ്റ് വെരിഫിക്കേഷൻ സുരക്ഷിതമായ ഡിജിറ്റൽ കീ പോലെ പ്രവർത്തിക്കുമെന്ന് കമ്പനി പറഞ്ഞു. എന്നിരുന്നാലും, 5,000 രൂപ വരെയുള്ള ഇടപാടുകൾക്ക് മാത്രമേ ബയോമെട്രിക് ഓപ്ഷൻ ലഭ്യമാകൂ. പേയ്‌മെന്റ് തുക ഈ പരിധിയേക്കാൾ കൂടുതലാണെങ്കിൽ, ഇടപാട് പൂർത്തിയാക്കാൻ ഉപയോക്താക്കൾ അവരുടെ യുപിഐ പിൻ തന്നെ നൽകേണ്ടതുണ്ട്.

പുതിയ സവിശേഷതയിലൂടെ പേയ്‌മെന്റുകൾ വേഗത്തിലാവുകയും ഒരു കൈ കൊണ്ട് ആപ്പ് ഉപയോഗിക്കുന്നത് എളുപ്പമാവുകയും ചെയ്യുമെന്ന് ആമസോൺ പ്രസ്താവിച്ചു. പണം അയയ്ക്കുക, സ്‌കാൻ & പേ, മർച്ചന്റ് പേയ്‌മെന്റുകൾ തുടങ്ങിയ ആമസോൺ പേ ആപ്പിനുള്ളിലെ സേവനങ്ങളിലുടനീളം ബയോമെട്രിക് ഓതൻ്റിക്കേഷൻ സംയോജിപ്പിച്ചിട്ടുണ്ടെന്നും അവർ കൂട്ടിച്ചേർത്തു.

യുപിഐ ആപ്പുകളിൽ ബയോമെട്രിക്ക് ഓതൻ്റിക്കേഷൻ ഇതാദ്യമായല്ല:

യുപിഐ പേയ്‌മെന്റുകൾക്ക് ബയോമെട്രിക് ഓതൻ്റിക്കേഷൻ വാഗ്ദാനം ചെയ്യുന്ന ഇന്ത്യയിലെ ആദ്യത്തെ പ്ലാറ്റ്‌ഫോമല്ല ആമസോൺ പേ. ഒക്ടോബറിൽ, നവി UPI അതിന്റെ ഡിജിറ്റൽ പേയ്‌മെന്റ് ആപ്പിനായി പുതിയ അപ്‌ഡേറ്റുകൾ പ്രഖ്യാപിച്ചപ്പോൾ, അതിൽ UPI ഇടപാടുകൾക്കായി ഫേസ് റെക്കഗ്നിഷൻ, ഫിംഗർപ്രിൻ്റ് വെരിഫിക്കേഷൻ ഫീച്ചറുകൾ ഉണ്ടായിരുന്നു. സെക്യൂരിറ്റി പിൻ നൽകാതെ തന്നെ ഉപയോക്താക്കളെ പേയ്‌മെന്റുകൾ നടത്താൻ അനുവദിക്കുന്ന ഫീച്ചർ അവതരിപ്പിച്ച ആദ്യത്തെ കമ്പനി തങ്ങളാണെന്ന് അക്കാലത്ത് നവി അവകാശപ്പെട്ടു.

അതേ മാസം തന്നെ, റിസർവ് ബാങ്ക് ഓഫ് ഇന്ത്യയുടെ പിന്തുണയുള്ള നാഷണൽ പേയ്‌മെന്റ്സ് കോർപ്പറേഷൻ ഓഫ് ഇന്ത്യ (NPCI), UPI ഇടപാടുകൾക്കായി ബയോമെട്രിക് ഓതൻ്റിക്കേഷൻ പുറത്തിറക്കി. ഈ അപ്‌ഡേറ്റിൽ ഫിംഗർപ്രിൻ്റ്, ഫേസ് റെക്കഗ്നിഷൻ, വെയറബിൾ ഗ്ലാസ് ബേസ്ഡ് ഓതൻ്റിക്കേഷൻ രീതികൾ എന്നിവയ്ക്കുള്ള പിന്തുണയും ഉൾപ്പെടുത്തിയിരുന്നു.

ഒക്ടോബർ അവസാനത്തോടെ, UPI പേയ്‌മെന്റുകൾക്കായി ബയോമെട്രിക് ഓതൻ്റിക്കേഷൻ ചേർക്കുന്ന അപ്‌ഡേറ്റ് സാംസങ്ങ് വാലറ്റിനും ലഭിച്ചു. ഈ മാറ്റത്തോടെ, ഡിജിറ്റൽ ഇടപാടുകളിൽ അധിക സുരക്ഷക്കായി ഫിംഗർപ്രിൻ്റും ഫേസ് റെക്കഗ്നിഷനും സാംസങ്ങ് വാലറ്റും വാഗ്ദാനം ചെയ്യാൻ തുടങ്ങി.