ഏവരും ആഗ്രഹിച്ച ഫീച്ചറുമായി വാട്സ്ആപ്പ് എത്തുന്നു; വാട്സ്ആപ്പ് വെബിൽ വോയ്സ്, വീഡിയോ കോളുകൾ ഉടൻ ആരംഭിക്കും

ഏവരും വളരെ ആഗ്രഹിച്ചിരുന്ന, വെബ് ബ്രൗസറിൽ നിന്നും നേരിട്ട് വോയ്‌സ്, വീഡിയോ കോളുകൾ ചെയ്യാൻ ഉപയോക്താക്കളെ അനുവദിക്കുന്ന ഒരു ഫീച്ചർ ആരംഭിക്കാൻ പ്രശ്സ്ത മെസേജിങ്ങ് പ്ലാറ്റ്ഫോമായ വാട്ട്‌സ്ആപ്പ് പ്രവർത്തിക്കുന്നതായി റിപ്പോർട്ട്. ഇതുവരെ, ടെക്സ്റ്റ് സന്ദേശങ്ങൾ അയയ്ക്കുന്നതിനും ഫോട്ടോകൾ, വീഡിയോകൾ, ഡോക്യുമെന്റുകൾ എന്നിവ പങ്കിടുന്നതിനുമാണ് വാട്ട്‌സ്ആപ്പ് വെബ് പ്രധാനമായും ഉപയോഗിച്ചിരുന്നത്. വോയ്‌സ് അല്ലെങ്കിൽ വീഡിയോ കോളുകൾ ചെയ്യേണ്ട ഉപയോക്താക്കൾ വിൻഡോസിലോ മാക്കിലോ വാട്ട്‌സ്ആപ്പ് ഡെസ്‌ക്‌ടോപ്പ് ആപ്പ് ഇൻസ്റ്റാൾ ചെയ്യണമായിരുന്നു. ഈ പരിമിതിയിൽ ഉടൻ മാറ്റമുണ്ടാകുമെന്നാണ് ഇപ്പോഴത്തെ റിപ്പോർട്ടുകൾ. സമീപകാല റിപ്പോർട്ടുകൾ പ്രകാരം, തിരഞ്ഞെടുത്ത ബീറ്റ ഉപയോക്താക്കൾക്കായി വാട്ട്‌സ്ആപ്പ് വെബിൽ വോയ്‌സ്, വീഡിയോ കോളിംഗ് സപ്പോർട്ട് പുറത്തിറക്കാൻ കമ്പനി ആരംഭിച്ചു. ഏകദേശം ഒരു വർഷമായി ഈ ഫീച്ചർ വികസിപ്പിച്ചു കൊണ്ടിരിക്കുകയാണ്, ഇതിപ്പോൾ സാവധാനം ടെസ്റ്റേഴ്സിലേക്ക് എത്തിയിട്ടുണ്ട്. ഇത് എല്ലാവരിലേക്കും എത്തിയാൽ, ബ്രൗസറിലൂടെ വാട്ട്‌സ്ആപ്പ് ഉപയോഗിക്കാൻ ഇഷ്ടപ്പെടുന്നവർക്കും ഡെസ്‌ക്‌ടോപ്പ് ആപ്പ് സപ്പോർട്ട് പരിമിതമായ ലിനക്സ് പോലുള്ള ഓപ്പറേറ്റിംഗ് സിസ്റ്റങ്ങൾ ഉപയോഗിക്കുന്നവർക്കും വളരെയധികം ഉപയോഗപ്രദമാകും.

വാട്ട്‌സ്ആപ്പ് വെബിൽ വോയ്‌സ്, വീഡിയോ കോളിംഗ് സപ്പോർട്ട് വരുന്നു:

WABetaInfo റിപ്പോർട്ട് ചെയ്യുന്നതു പ്രകാരം, വാട്ട്‌സ്ആപ്പ് വെബിൽ വോയ്‌സ്, വീഡിയോ കോളിംഗ് സവിശേഷതകൾ പുറത്തിറക്കാൻ ആരംഭിച്ചിട്ടുണ്ട്. വാട്ട്‌സ്ആപ്പ് വെബ് ബീറ്റ പ്രോഗ്രാമിൽ ചേർന്നിട്ടുള്ള പരിമിതമായ എണ്ണം ഉപയോക്താക്കൾക്ക് മാത്രമേ നിലവിൽ അപ്‌ഡേറ്റ് ലഭ്യമാകൂ. കോളിംഗ് ഫീച്ചർ വൺ-ടു-വൺ ചാറ്റുകളെ മാത്രമേ ഇപ്പോൾ പിന്തുണയ്ക്കൂ, ഗ്രൂപ്പ് കോളുകൾ ഇതിൽ ഉൾപ്പെടുന്നില്ല.

ഈ അപ്‌ഡേറ്റ് വരുന്നതോടെ, വാട്ട്‌സ്ആപ്പിൻ്റെ ഡെസ്‌ക്‌ടോപ്പ് ആപ്ലിക്കേഷൻ ഇൻസ്റ്റാൾ ചെയ്യാതെ തന്നെ ഉപയോക്താക്കൾക്ക് അവരുടെ വെബ് ബ്രൗസറിൽ നിന്ന് നേരിട്ട് കോളുകൾ ചെയ്യാൻ കഴിയും. കോൾ ആരംഭിക്കാൻ, ഉപയോക്താക്കൾ ഒരു ചാറ്റ് തുറന്ന് സ്‌ക്രീനിന്റെ മുകളിൽ വലത് കോണിലുള്ള വോയ്‌സ് അല്ലെങ്കിൽ വീഡിയോ കോൾ ഐക്കണിൽ ടാപ്പ് ചെയ്താൽ മതി. മൊബൈൽ, ഡെസ്‌ക്‌ടോപ്പ് ആപ്പുകളിൽ കോൾ ചെയ്യുന്ന അതേ രീതി തന്നെയാണ് ഇതിലുമുണ്ടാവുക.

ഈ ഫീച്ചർ വളരെക്കാലമായി വാട്ട്‌സ്ആപ്പിന്റെ വിൻഡോസ്, മാക് ആപ്പുകളിൽ ലഭ്യമാണ്. പുതിയ ഫീച്ചർ വരുന്നതോടെ വാട്ട്‌സ്ആപ്പ് വെബിന് ഒരു കംപ്ലീറ്റ് മെസേജിങ്ങ് എക്സ്പീരിയൻസ് വാഗ്ദാനം ചെയ്യാൻ കഴിയും. ഫീച്ചർ എല്ലാവരിലേക്കും എത്തിയാൽ, ബ്രൗസറുകളിൽ ഒരുപാടു സമയം ചെലവഴിക്കുന്ന ഉപയോക്താക്കൾക്ക് കൂടുതൽ ഗുണം ചെയ്യും.

എൻഡ്-ടു-എൻഡ് എൻക്രിപ്ഷനും വരാനിരിക്കുന്ന വാട്ട്‌സ്ആപ്പ് ഫീച്ചറുകളും:

ആൻഡ്രോയിഡ്, ഐഒഎസ്, ഡെസ്‌ക്‌ടോപ്പ് പ്ലാറ്റ്‌ഫോമുകളിൽ ഉപയോഗിക്കുന്ന അതേ തലത്തിലുള്ള സെക്യൂരിറ്റിയായ എൻഡ്-ടു-എൻഡ് എൻക്രിപ്ഷൻ ഉപയോഗിച്ച് വാട്ട്‌സ്ആപ്പ് വെബ് വഴിയുള്ള കോളുകളും സംരക്ഷിക്കപ്പെടുമെന്ന് റിപ്പോർട്ടുകളുണ്ട്. 2016 മുതൽ നിലവിലുണ്ടായിരുന്ന സിഗ്നൽ പ്രോട്ടോക്കോൾ ഉപയോഗിച്ചാണ് പ്ലാറ്റ്ഫോമിലെ സന്ദേശങ്ങൾ, വോയ്‌സ് കോളുകൾ, വീഡിയോ കോളുകൾ, സ്റ്റാറ്റസ് അപ്‌ഡേറ്റുകൾ എന്നിവ വാട്ട്‌സ്ആപ്പ് സുരക്ഷിതമാക്കുന്നത്. കോളിൽ ഉൾപ്പെട്ടിരിക്കുന്ന ആളുകൾക്ക് മാത്രമേ സംഭാഷണം ആക്‌സസ് ചെയ്യാൻ കഴിയൂവെന്ന് ഇതിലൂടെ ഉറപ്പാക്കുന്നു.

കോളിംഗിനു പുറമേ, വീഡിയോ കോളിലെ സ്‌ക്രീൻ ഷെയറിങ്ങ് ഫീച്ചർ ഉണ്ടാകുമെന്നും പറയപ്പെടുന്നു. ഈ ഫീച്ചർ ലൈവായി അവരുടെ സ്‌ക്രീൻ പങ്കിടാൻ ഉപയോക്താക്കളെ അനുവദിക്കുന്നു. ഇത് വർക്ക് മീറ്റിംഗുകൾ, പ്രസൻ്റേഷൻസ്, അല്ലെങ്കിൽ റിമോട്ട് സപ്പോർട്ട് എന്നിവയ്‌ക്ക് ഉപയോഗപ്രദമാക്കുന്നു.

വെബ് കോളിംഗിന് പുറമേ, വാട്ട്‌സ്ആപ്പിനായി മെറ്റാ നിരവധി പുതിയ ഫീച്ചറുകൾ വികസിപ്പിച്ചു വരികയാണെന്ന് റിപ്പോർട്ടുണ്ട്. സ്റ്റാറ്റസ് അപ്‌ഡേറ്റുകൾക്കായി ക്ലോസ് ഫ്രണ്ട്സ് ഓപ്ഷൻ ഇതിൽ ഉൾപ്പെടുന്നു. ഇതിലൂടെ തിരഞ്ഞെടുത്ത കോൺടാക്റ്റുകളുമായി മാത്രം സ്റ്റാറ്റസ് പങ്കിടാൻ ഉപയോക്താക്കൾക്കു കഴിയും. എക്സ്ട്രാ പേഴ്സണലൈസേഷൻ, പ്രൊഡക്റ്റിവിറ്റി ടൂളുകൾ എന്നിവ വാഗ്ദാനം ചെയ്യുന്ന ഒരു പ്രീമിയം സബ്‌സ്‌ക്രിപ്‌ഷൻ പ്ലാനിലും കമ്പനി പ്രവർത്തിക്കുന്നുണ്ടെന്ന് പറയപ്പെടുന്നു.

വാട്ട്‌സ്ആപ്പ് ഇതുവരെ ഔദ്യോഗികമായ റിലീസ് തീയതി പ്രഖ്യാപിച്ചിട്ടില്ലെങ്കിലും, വരും ദിവസങ്ങളിൽ വെബ് കോളിംഗ് ഫീച്ചർ കൂടുതൽ ഉപയോക്താക്കളിലേക്ക് എത്തുമെന്ന് പ്രതീക്ഷിക്കുന്നു.