ഒന്നും മറച്ചുവെക്കാൻ ഞങ്ങളില്ല; ട്രാൻസ്പരൻ്റ് ഡിസൈനുമായി നത്തിങ്ങ് ഹെഡ്ഫോൺ 1 ഇന്ത്യയിലെത്തി

നിരവധി പേർ ആകാംക്ഷയോടെ കാത്തിരുന്ന നത്തിങ്ങ് ഫോൺ 3 ഇന്ത്യയിൽ കഴിഞ്ഞ ദിവസം ലോഞ്ച് ചെയ്തിരുന്നു. യുകെ ആസ്ഥാനമായുള്ള കമ്പനി ഇതിനൊപ്പം മറ്റൊരു പ്രൊഡക്റ്റ് കൂടി ഇന്ത്യയിലും മറ്റു ചില രാജ്യങ്ങളിലും അവതരിപ്പിച്ചിട്ടുണ്ട്. കമ്പനിയുടെ ചരിത്രത്തിലെ ആദ്യത്തെ ഓവർ ദി ഇയർ ഹെഡ്ഫോണായ നത്തിങ്ങ് ഹെഡ്ഫോൺ 1 ആണ് ഇന്ത്യയുൾപ്പെടെയുള്ള രാജ്യങ്ങളിൽ എത്തിയിരിക്കുന്നത്. സംസാരിക്കുമ്പോൾ പുറത്തു നിന്നുള്ള അനാവശ്യമായ ശബ്ദങ്ങളെ തടയാനുള്ള ആക്റ്റീവ് നോയ്സ് ക്യാൻസലേഷൻ (ANC) സംവിധാനം ഈ ഹെഡ്ഫോണിലുണ്ട്. 40mm ഡൈനാമിക് ഡ്രൈവറുകൾ സജ്ജീകരിച്ചിട്ടുള്ള നത്തിങ്ങ് ഹെഡ്ഫോൺ 1-ലെ ഓഡിയോ ബ്രിട്ടൻ ആസ്ഥാനമായുള്ള ഓഡിയോ ബ്രാൻഡായ KEF പ്രത്യേകമായി ട്യൂൺ ചെയ്തതാണ്. AAC കോഡെക് ഉപയോഗിക്കുമ്പോൾ ഈ ഹെഡ്ഫോണുകൾക്ക് 80 മണിക്കൂർ വരെ ബാറ്ററി ലൈഫ് ലഭിക്കുമെന്ന് കമ്പനി അവകാശപ്പെടുന്നു. അതേസമയം LDAC കോഡെക് ആണ് ഉപയോഗിക്കുന്നത് എങ്കിൽ ബാറ്ററി ലൈഫ് അൽപ്പം കുറവായിരിക്കും, 54 മണിക്കൂർ വരെ മാത്രമായിരിക്കും ഹെഡ്ഫോൺ പ്രവർത്തിക്കുക.

നത്തിങ്ങ് ഹെഡ്ഫോൺ 1-ൻ്റെ ഇന്ത്യയിലെ വില, ലഭ്യത മുതലായ വിവരങ്ങൾ:

ഇന്ത്യയിൽ നത്തിംഗ് ഹെഡ്‌ഫോൺ 1-ന്റെ വില 21,990 രൂപയാണ്. ജൂലൈ 15 മുതൽ ഇത് വാങ്ങാൻ ലഭ്യമാകും. ഫ്ലിപ്കാർട്ട്, ഫ്ലിപ്കാർട്ട് മിനിറ്റ്സ്, വിജയ് സെയിൽസ്, മൈന്ത്ര, ക്രോമ, കൂടാതെ രാജ്യത്തുടനീളമുള്ള മറ്റ് പ്രധാന റീട്ടെയിൽ സ്റ്റോറുകൾ എന്നിവയിൽ നിന്ന് നിങ്ങൾക്ക് ഈ ഫോൺ വാങ്ങാൻ കഴിയും.

ബ്ലാക്ക്, വൈറ്റ് എന്നിങ്ങനെ രണ്ടു നിറങ്ങളിൽ ഈ ഹെഡ്‌ഫോൺ ലഭ്യമാണ്. പ്രത്യേക ലോഞ്ച് ഡേ ഓഫറിന്റെ ഭാഗമായി, ഉപഭോക്താക്കൾക്ക് 19,999 രൂപ എന്ന ഡിസ്കൗണ്ട് വിലയ്ക്ക് ഹെഡ്‌ഫോണുകൾ സ്വന്തമാക്കാം. ഈ ഓഫർ വിൽപ്പനയുടെ ആദ്യ ദിവസം മാത്രമായിരിക്കും ഉണ്ടാവുകയെന്നു പ്രത്യേകം ശ്രദ്ധിക്കുക.

നത്തിങ്ങ് ഹെഡ്ഫോൺ 1-ൻ്റെ പ്രധാന സവിശേഷതകൾ:

ട്രാൻസ്പരൻ്റ് ഡിസൈനിലുള്ള വയർലെസ് ഓവർ-ദി-ഇയർ ഹെഡ്‌ഫോണാണ് നത്തിംഗ് ഹെഡ്‌ഫോൺ 1. ഇതിന്റെ ചതുരാകൃതിയിലുള്ള ബോഡിയുടെ മധ്യഭാഗത്ത് അൽപ്പം ഉയർന്നു നിൽക്കുന്ന ഓവൽ ആകൃതിയിലുള്ള മൊഡ്യൂൾ ഉണ്ട്. മികച്ച ശബ്‌ദം നൽകുന്നതിനായി പ്രശസ്ത ബ്രിട്ടീഷ് ഓഡിയോ കമ്പനിയായ KEF ട്യൂൺ ചെയ്‌ത 40mm ഡൈനാമിക് ഡ്രൈവറുകൾ ഹെഡ്‌ഫോണിൽ സജ്ജീകരിച്ചിരിക്കുന്നു. 42dB വരെ ആക്റ്റീവ് നോയ്‌സ് ക്യാൻസലേഷനെയും (എഎൻസി) ഇതു പിന്തുണയ്ക്കുന്നു.

കോൾ നിലവാരം മെച്ചപ്പെടുത്തുന്നതിന്, നാല് ബിൽറ്റ്-ഇൻ മൈക്രോഫോണുകളുടെ സഹായത്തോടെയുള്ള എൻവയോൺമെന്റൽ നോയ്‌സ് ക്യാൻസലേഷൻ (ഇഎൻസി) ഈ ഹെഡ്ഫോൺ ഉപയോഗിക്കുന്നു. വോയ്‌സ് കോളുകൾക്കിടയിലുള്ള പശ്ചാത്തല ശബ്‌ദം തടഞ്ഞ് സംഭാഷണങ്ങൾ കൂടുതൽ വ്യക്തവും സുഖകരവുമാക്കാൻ ഇതു സഹായിക്കുന്നു.

കണക്റ്റിവിറ്റിക്കായി, നത്തിംഗ് ഹെഡ്‌ഫോൺ 1 ബ്ലൂടൂത്ത് 5.3-നെയും AAC, SBC, LDAC പോലുള്ള ഓഡിയോ കോഡെക്കുകളെയും സപ്പോർട്ട് ചെയ്യുന്നു. ഒരേസമയം രണ്ട് ഉപകരണങ്ങളിലേക്ക് കണക്റ്റുചെയ്യാൻ നിങ്ങളെ അനുവദിക്കുന്ന ഡ്യുവൽ-ഡിവൈസ് കണക്റ്റിവിറ്റിയും ഇതു വാഗ്ദാനം ചെയ്യുന്നു. ആൻഡ്രോയിഡ് 5.1 അല്ലെങ്കിൽ അതിനുശേഷമുള്ളത്, iOS 13 അല്ലെങ്കിൽ അതിനുശേഷമുള്ളതുമായ വേരിയൻ്റുകളിൽ പ്രവർത്തിക്കുന്ന സ്മാർട്ട്‌ഫോണുകളിലും ടാബ്‌ലെറ്റുകളിലും ഇവ അനുയോജ്യമാണ്.

ടച്ച് സെൻസിറ്റീവ് കൺട്രോളുകൾക്കു പകരം, ഹെഡ്‌ഫോണുകളിൽ ഫിസിക്കൽ ബട്ടണുകൾ ഉണ്ട്. വോളിയം നിയന്ത്രിക്കാൻ ഒരു റോളർ, മീഡിയ ട്രാക്കുകൾ മാറ്റാൻ ഒരു പാഡിൽ, ANC മോഡുകൾക്കിടയിൽ മാറാൻ ഒരു ബട്ടൺ എന്നിവയെല്ലാം ഇതിലുൾപ്പെടുന്നു.

1,040mAh ബാറ്ററിയാണ് ഹെഡ്‌ഫോണുകൾക്ക് കരുത്ത് പകരുന്നത്. യുഎസ്ബി ടൈപ്പ്-സി പോർട്ട് വഴി ഏകദേശം 120 മിനിറ്റിനുള്ളിൽ ഇത് പൂർണ്ണമായും ചാർജ് ചെയ്യാൻ കഴിയും. ആവശ്യമുള്ളപ്പോൾ വയർഡ് ലിസണിംഗിനായി 3.5mm ഓഡിയോ ജാക്കും ഉണ്ട്. കൂടാതെ, ANC ഓഫാക്കിയാൽ 5 മിനിറ്റ് സമയത്തെ ചാർജിൽ തന്നെ 5 മണിക്കൂർ പ്ലേബാക്ക് സമയം ലഭിക്കുമെന്ന് കമ്പനി അവകാശപ്പെടുന്നു.

എങ്ങനെ ഉപയോഗിക്കുന്നു എന്നതിനെ ആശ്രയിച്ച് നത്തിങ്ങ് ഹെഡ്‌ഫോൺ 1-ന്റെ ബാറ്ററി ലൈഫ് വ്യത്യാസപ്പെടുന്നു. ANC ഇല്ലാതെ, AAC ഓഡിയോ ഉപയോഗിച്ചാൽ ഒറ്റ ചാർജിൽ 80 മണിക്കൂർ വരെ പ്ലേബാക്ക് ലഭിക്കും. ANC ഇല്ലാതെ LDAC ഓഡിയോ ഉപയോഗിക്കുകയാണെങ്കിൽ, ബാറ്ററി 54 മണിക്കൂർ വരെ നീണ്ടുനിൽക്കും. ANC ഓണാക്കിയിട്ടുണ്ടെങ്കിൽ, AAC ഓഡിയോ പ്ലേ ചെയ്യുമ്പോൾ 35 മണിക്കൂർ വരെയും LDAC ഓഡിയോ പ്ലേ ചെയ്യുമ്പോൾ 30 മണിക്കൂർ വരെയും ബാറ്ററി ലൈഫ് ഇതു വാഗ്ദാനം ചെയ്യുന്നു.

ഹെഡ്‌ഫോണുകളുടെ വലിപ്പം 173.8 x 78 x 189.2 മില്ലിമീറ്ററും ഭാരം 329 ഗ്രാമും ആണ്. ഹെഡ്‌ഫോണുകൾ സുരക്ഷിതമായി കൊണ്ടു നടക്കാൻ ഒരു സോഫ്റ്റ്‌ഷെൽ സ്റ്റോറേജ് കേസും ബോക്സിലുണ്ടാകും.