സെൽഫി പ്രേമികൾക്ക് 50 എംപി ക്യാമറ; മോട്ടറോളയുടെ പുത്തൻ സ്മാർട്ട്‌ഫോൺ

മോട്ടറോളയുടെ എഡ്ജ് 70 സീരീസിലെ ഏറ്റവും പുതിയ ഫോണായ മോട്ടറോള എഡ്ജ് 70 ഫ്യൂഷൻ പ്ലസ്  വിപണിയിലെത്തി. നേരത്തെയുള്ള എഡ്ജ് 70 ഫ്യൂഷന് സമാനമായ സവിശേഷതകളാണ് ഇതിലുമുള്ളതെങ്കിലും, ക്യാമറയിലാണ് പ്രധാന മാറ്റങ്ങൾ വരുത്തിയിരിക്കുന്നത്. 50 മെഗാപിക്സൽ സോണി ലിറ്റിയ 710 മെയിൻ സെൻസർ, 50 മെഗാപിക്സൽ അൾട്രാ വൈഡ് ലെൻസ്, 10 മെഗാപിക്സൽ ടെലിഫോട്ടോ ലെൻസ് എന്നിവയടങ്ങുന്ന മികച്ച ക്യാമറ സെറ്റപ്പാണ് ഇതിൽ നൽകിയിരിക്കുന്നത്. സ്നാപ്ഡ്രാഗൺ 7s ജെൻ 4 പ്രോസസറും 144Hz അമോലെഡ് ഡിസ്‌പ്ലേയും ഫോണിലുണ്ട്. വേഗത്തിൽ ചാർജ് ചെയ്യാവുന്ന 5,200mAh ബാറ്ററിയാണ് ഇതിൽ ഉപയോഗിച്ചിരിക്കുന്നത്.

മോട്ടറോള എഡ്ജ് 70 ഫ്യൂഷൻ പ്ലസ് ഫോണിന്റെ ബ്രസീലിലെ വില ഏകദേശം 52,900 രൂപയാണ് (2,969 ബിആർഎൽ). നിലവിൽ മോട്ടറോളയുടെ വെബ്സൈറ്റിൽ 12ജിബി റാമും 256ജിബി സ്റ്റോറേജുമുള്ള ഒരു വേരിയന്റ് മാത്രമാണ് കാണിച്ചിരിക്കുന്നത്. പാന്റോൺ ഓറിയന്റ് ബ്ലൂ, പാന്റോൺ ബ്ലൂ സർഫ് എന്നീ രണ്ട് നിറങ്ങളിൽ ഈ ഫോൺ ലഭ്യമാണ്. ബ്രസീലിൽ ഇപ്പോൾ ഈ ഫോൺ വാങ്ങാൻ സാധിക്കും. മോട്ടറോള എഡ്ജ് 70 ഫ്യൂഷൻ പ്ലസ് ഫോണിൽ 6.8 ഇഞ്ച് വലിപ്പമുള്ള 1.5കെ സൂപ്പർ എച്ച്ഡി അമോലെഡ് ഡിസ്‌പ്ലേയാണുള്ളത്. 144Hz റിഫ്രഷ് റേറ്റും എച്ച്ഡിആർ 10 പ്ലസ് പിന്തുണയും ഈ ഡിസ്‌പ്ലേയ്ക്കുണ്ട്. ക്വാൽകോം സ്നാപ്ഡ്രാഗൺ 7s ജെൻ 4 ചിപ്‌സെറ്റും അഡ്രിനോ 810 ജിപിയുമാണ് ഈ ഫോണിന്റെ കരുത്ത്. 12ജിബി റാമും 256ജിബി സ്റ്റോറേജുമുള്ള ഈ ഫോൺ ആൻഡ്രോയിഡ് 16 അടിസ്ഥാനമാക്കിയുള്ള ഹലോ യുഐയിലാണ് പ്രവർത്തിക്കുന്നത്.

ഫോട്ടോഗ്രാഫിക്കായി മോട്ടറോള എഡ്ജ് 70 ഫ്യൂഷൻ പ്ലസിൽ മൂന്ന് പിൻ ക്യാമറകളാണ് നൽകിയിരിക്കുന്നത്. എഫ്/1.8 അപ്പേർച്ചറും ഒപ്റ്റിക്കൽ ഇമേജ് സ്റ്റെബിലൈസേഷനും അൾട്രാ പിക്സൽ സാങ്കേതികവിദ്യയുമുള്ള 50 മെഗാപിക്സൽ സോണി ലിറ്റിയ 710 സെൻസറാണ് ഇതിലെ പ്രധാന ക്യാമറ. കൂടാതെ 122 ഡിഗ്രി വ്യൂ ലഭിക്കുന്ന 50 മെഗാപിക്സൽ അൾട്രാ വൈഡ് ക്യാമറയും, 3x ഒപ്റ്റിക്കൽ സൂമും 10x ഡിജിറ്റൽ സൂമുമുള്ള 10 മെഗാപിക്സൽ ടെലിഫോട്ടോ ക്യാമറയും ഇതിലുണ്ട്. സെൽഫികൾക്കും വീഡിയോ കോളുകൾക്കുമായി 4K വീഡിയോ റെക്കോർഡിംഗ് സൗകര്യമുള്ള 50 മെഗാപിക്സൽ ഫ്രണ്ട് ക്യാമറയാണ് ഫോണിൽ ഉൾപ്പെടുത്തിയിരിക്കുന്നത്.

മോട്ടറോള എഡ്ജ് 70 ഫ്യൂഷൻ പ്ലസിൽ 5,200mAh ബാറ്ററിയും 68W ടർബോപവർ ഫാസ്റ്റ് ചാർജിംഗ് സൗകര്യവുമാണുള്ളത്. ഈ ഫോണിൽ 5ജി, 4ജി എൽടിഇ, ബ്ലൂടൂത്ത് 6.0, എൻഎഫ്സി, വൈ-ഫൈ 6ഇ, ജിപിഎസ്, യുഎസ്ബി ടൈപ്പ്-സി എന്നിവ പ്രവർത്തിക്കും. നാനോ സിമ്മിനൊപ്പം ഇ-സിം കൂടി ഉപയോഗിക്കാവുന്ന ഡ്യുവൽ സിം സൗകര്യവും ഇതിലുണ്ട്. പൊടിയെയും വെള്ളത്തെയും പ്രതിരോധിക്കാൻ ഐപി68, ഐപി69 റേറ്റിംഗുകൾ ഫോണിനുണ്ട്. ഗ്ലാസ് ഫൈബർ റൈൻഫോഴ്സ്ഡ് പോളിമർ കൊണ്ടാണ് ഇതിന്റെ പിൻഭാഗം നിർമ്മിച്ചിരിക്കുന്നത്. സുരക്ഷയ്ക്കായി ഇൻ-ഡിസ്‌പ്ലേ ഫിംഗർപ്രിന്റ് സെൻസറും ഫേസ് റെക്കഗ്നിഷൻ ഫീച്ചറും ഫോണിലുണ്ട്. 162.76 x 75.60 x 7.21 എംഎം വലിപ്പമുള്ള ഈ ഫോണിന് ഏകദേശം 177 ഗ്രാം തൂക്കമാണുള്ളത്.