കീശ കീറാതെ മികച്ചൊരു ടാബ് സ്വന്തമാക്കാം; റെഡ്മി പാഡ് 2 ഇന്ത്യൻ വിപണിയിലെത്തി

മടിയിൽ കനമില്ലാത്തതു കൊണ്ട് മികച്ചൊരു ടാബ് വാങ്ങാൻ കഴിയാതെ വിഷമിച്ചിരിക്കുന്നവരാണോ നിങ്ങൾ. എങ്കിൽ നിങ്ങൾക്കൊപ്പം റെഡ്മിയുണ്ട്. താങ്ങാവുന്ന വിലയ്ക്ക്, വലിയ സ്ക്രീനും മികച്ച ബാറ്ററി കപ്പാസിറ്റിയുമുള്ള ഒരു ടാബുമായി റെഡ്മി ഇന്ത്യൻ വിപണിയിൽ എത്തിയിട്ടുണ്ട്. റെഡ്മി പാഡ് 2 എന്ന ഈ ടാബ്‌ലറ്റ് ബുധനാഴ്ചയാണ് ഇന്ത്യയിൽ ലോഞ്ച് ചെയ്തത്. 11 ഇഞ്ച് വലിപ്പമുള്ള 2.5K ഡിസ്പ്ലേയുമായി എത്തുന്ന ഈ ടാബിൽ 9,000mAh ബാറ്ററിയാണുള്ളത്. 15,000 രൂപയിൽ താഴെയുള്ള വിലയ്ക്ക് ഇതിൻ്റെ അടിസ്ഥാന മോഡൽ സ്വന്തമാക്കാൻ കഴിയുമെന്നത് ആശ്ചര്യപ്പെടുത്തുന്ന കാര്യം തന്നെയാണ്. 8GB LPDDR4X റാമുമായി ജോഡിയാക്കിയ 6nm ഒക്ട-കോർ മീഡിയാടെക് ഹീലിയോ G100 അൾട്രാ ചിപ്പ് ഈ ഫോണിനു കരുത്തു നൽകുന്നു. ഗൂഗിളിൻ്റെ സർക്കിൾ ടു സെർച്ചിനെ പിന്തുണക്കുന്ന ആദ്യത്തെ ടാബ്‌ലറ്റ് ആയിരിക്കും ഇതെന്ന് റെഡ്മി അവകാശപ്പെടുന്നു. അധികം ചെലവില്ലാതെ മികച്ച സ്ക്രീനും ബാറ്ററിയും മൾട്ടിമീഡിയ അനുഭവവും ആഗ്രഹിക്കുന്നവരെ ലക്ഷ്യമിട്ടാണ് റെഡ്മി പുതിയ ടാബ് പുറത്തിറക്കിയിരിക്കുന്നത്.

റെഡ്മി പാഡ് 2 ടാബ്‌ലറ്റിൻ്റെ ഇന്ത്യയിലെ വില, ലഭ്യത തുടങ്ങിയ വിവരങ്ങൾ:

ഇന്ത്യയിൽ പുറത്തിറങ്ങിയ റെഡ്മി പാഡ് 2-വിൻ്റെ അടിസ്ഥാന മോഡലിന് 13,999 രൂപയാണ് വില വരുന്നത്. ഈ വേരിയന്റിൽ 4 ജിബി റാമും 128 ജിബി സ്റ്റോറേജും ഉണ്ട്, ഇത് വൈ-ഫൈ മാത്രമേ പിന്തുണയ്ക്കൂ എന്ന കാര്യം ശ്രദ്ധിക്കണം. പ്രധാനമായും വീട്ടിലോ വൈ-ഫൈ ആക്‌സസ് ഉള്ള മറ്റു സ്ഥലങ്ങളിലോ ടാബ്‌ലെറ്റ് ഉപയോഗിക്കുന്ന ഉപയോക്താക്കൾക്കായി ഇത് രൂപകൽപ്പന ചെയ്‌തിരിക്കുന്നു.

വൈ-ഫൈയും 4G കണക്റ്റിവിറ്റിയും ആവശ്യമുള്ള ഉപയോക്താക്കൾക്ക്, രണ്ട് മോഡലുകൾ ലഭ്യമാണ്. 6 ജിബി റാം + 128 ജിബി സ്റ്റോറേജ് വേരിയന്റിന് 15,999 രൂപയും, 8 ജിബി റാം + 256 ജിബി സ്റ്റോറേജുമുള്ള ടോപ് എൻഡ് മോഡലിന് 17,999 രൂപയുമാണ് വില. മികച്ച പെർഫോമൻസ് ആഗ്രഹിക്കുന്നവർക്കും യാത്രയ്ക്കിടെ ഇന്റർനെറ്റ് ആക്‌സസ് ആവശ്യമുള്ളവർക്കും ഈ വേരിയൻ്റുകൾ കൂടുതൽ അനുയോജ്യമാണ്.

റെഡ്മി പാഡ് 2 ബ്ലൂ, ഗ്രേ എന്നീ രണ്ട് നിറങ്ങളിൽ ലഭ്യമാകും. ജൂൺ 24 മുതൽ വിൽപ്പനയ്‌ക്കെത്തുന്ന ഈ ടാബ്‌ലറ്റ് Mi ഒഫീഷ്യൽ ഓൺലൈൻ സ്റ്റോർ, ആമസോൺ, തിരഞ്ഞെടുത്ത ഓഫ്‌ലൈൻ റീട്ടെയിൽ സ്റ്റോറുകൾ എന്നിവയിലൂടെ വാങ്ങാൻ കഴിയും.

ടാബ്‌ലെറ്റിനുള്ള ആക്‌സസറികളും ഷവോമി വാഗ്ദാനം ചെയ്യുന്നുണ്ട്. റെഡ്മി സ്മാർട്ട് പെന്നിൻ്റെ വില 3,299 രൂപയാണ്, റെഡ്മി പാഡ് 2 കവർ 1,299 രൂപയ്ക്കും ലഭ്യമാണ്. ടാബ്‌ലെറ്റ് വിൽക്കുന്ന അതേ പ്ലാറ്റ്‌ഫോമുകളിലൂടെയാണ് ഈ ആക്‌സസറികളും വിൽക്കുന്നത്.

റെഡ്മി പാഡ് 2 ടാബ്‌ലറ്റിൻ്റെ പ്രധാന സവിശേഷതകൾ അറിയാം:

90Hz റിഫ്രഷ് റേറ്റും 11 ഇഞ്ച് വലിപ്പവുമുള്ള 2.5K 10-ബിറ്റ് ഡിസ്പ്ലേയാണ് റെഡ്മി പാഡ് 2-വിലുള്ളത്. ഇതിന് 600 നിറ്റ്‌സ് വരെ പീക്ക് ബ്രൈറ്റ്നസ് ലെവലുണ്ട്. കണ്ണുകളുടെ സംരക്ഷണത്തിനായി ടാബ്‌ലെറ്റിന് ട്രിപ്പിൾ TÜV റൈൻ‌ലാൻഡ് സർട്ടിഫിക്കേഷനുണ്ട്, കൂടാതെ വെറ്റ് ടച്ച് ടെക്നോളജിയെയും ഇതു പിന്തുണയ്ക്കുന്നു.

മീഡിയടെക് ഹീലിയോ G100-അൾട്രാ പ്രോസസർ കരുത്തു നൽകുന്ന ഈ ടാബിൽ 8GB വരെ LPDDR4X റാമും 256GB വരെ ഇന്റേണൽ UFS 2.2 സ്റ്റോറേജുമുണ്ട്. ആൻഡ്രോയ്സ് 15 അടിസ്ഥാനമാക്കിയ ഷവോമിയുടെ ഹൈപ്പർ OS 2.0-ൽ ഇതു പ്രവർത്തിക്കുന്നു. ഫോട്ടോകൾ എടുക്കുന്നതിനും ഡോക്യുമെന്റുകൾ സ്കാൻ ചെയ്യുന്നതിനുമായി 8 മെഗാപിക്സൽ റിയർ ക്യാമറയും വീഡിയോ കോളുകൾക്കും സെൽഫികൾക്കുമായി 5 മെഗാപിക്സൽ ഫ്രണ്ട് ക്യാമറയും ഇതിലുണ്ട്.

റെഡ്മി പാഡ് 2-ൽ ഡോൾബി അറ്റ്‌മോസിനെ പിന്തുണയ്ക്കുന്ന ക്വാഡ്-സ്പീക്കറാണുള്ളത്. വരയ്ക്കുന്നതിനും നോട്ട്സ് എടുക്കുന്നതിനും സ്‌ക്രീനിൽ നാവിഗേറ്റ് ചെയ്യുന്നതിനും ഉപയോഗപ്രദമാകുന്ന സ്മാർട്ട് പെന്നിനെയും ഇത് പിന്തുണയ്ക്കുന്നു. നൂതനമായ സോഫ്റ്റ്‌വെയർ സവിശേഷതകളിൽ ഗൂഗിളിന്റെ സർക്കിൾ ടു സെർച്ച്, ജെമിനി AI ഇൻ്റഗ്രേഷൻ എന്നിവയും ഉൾപ്പെടുന്നു. 9,000mAh ബാറ്ററിയുള്ള ഈ ടാബ്‌ലറ്റ് 18W വയർഡ് ചാർജിംഗിനെ പിന്തുണയ്ക്കുന്നു. 4G, Wi-Fi, ബ്ലൂടൂത്ത്, 3.5mm ഹെഡ്‌ഫോൺ ജാക്ക്, ഒരു USB ടൈപ്പ്-സി പോർട്ട് എന്നീ കണക്റ്റിവിറ്റി ഓപ്ഷനുകളും ഇതിൽ ഉൾപ്പെടുന്നു.

ആക്‌സിലറോമീറ്റർ, വെർച്വൽ ആംബിയന്റ് ലൈറ്റ് സെൻസർ, ഹാൾ സെൻസർ എന്നീ സെൻസറുകളും ഇതിലുണ്ട്. 254.58 x 166.04 x 7.36mm വലിപ്പവും ഏകദേശം 510 ഗ്രാം ഭാരവുമാണ് ഈ ടാബിനുള്ളത്.