മൂന്നായി മടക്കാവുന്ന സാംസങ്ങ് ഗാലക്സി Z ട്രൈഫോൾഡ് വരുന്നു; ഇന്ത്യയിലെയും മറ്റു വിപണികളിലെയും വില വിവരങ്ങൾ പുറത്ത്

ദക്ഷിണ കൊറിയൻ ടെക് കമ്പനിയായ സാംസങ്ങ് ചൊവ്വാഴ്ച ലോഞ്ച് ചെയ്ത ഏറ്റവും പുതിയ സ്മാർട്ട്ഫോണായ ഗാലക്‌സി Z ട്രൈഫോൾഡിലൂടെ സ്മാർട്ട്‌ഫോൺ പ്രേമികളെ അത്ഭുതപ്പെടുത്തി എന്നതിൽ സംശയമില്ല. ഇത് സാംസങ്ങിന്റെ ആദ്യത്തെ മൾട്ടി-ഫോൾഡിംഗ് സ്മാർട്ട്ഫോണാണ്. മുഴുവനായി തുറക്കുമ്പോൾ ടാബ്‌ലെറ്റ് പോലുള്ള 10.0 ഇഞ്ച് മെയിൻ ഡിസ്‌പ്ലേയും, സാധാരണ ഫോൺ ഉപയോഗത്തിനായി 6.5 ഇഞ്ച് കവർ സ്‌ക്രീനും ഈ മോഡൽ വാഗ്ദാനം ചെയ്യുന്നു. ഇതിൻ്റെ ആഗോളതലത്തിലെ വില വിവരങ്ങൾ ഇതുവരെ പങ്കിട്ടിട്ടില്ലെങ്കിലും, ദക്ഷിണ കൊറിയൻ വിപണിയിലെ വില മറ്റ് വിപണികളിൽ എന്തു പ്രതീക്ഷിക്കാം എന്നതിനെ കുറിച്ചുള്ള സൂചനകൾ നൽകുന്നുണ്ട്. മൂന്നു ക്യാമറകളുമായാണ് ഗാലക്‌സി Z ട്രൈഫോൾഡ് വരുന്നത്. നിലവിൽ ലഭ്യമായ ഏറ്റവും നൂതനമായ പ്രോസസ്സറുകളിൽ ഒന്നായ സ്‌നാപ്ഡ്രാഗൺ 8 എലൈറ്റ് ചിപ്‌സെറ്റ് ഇതിന് കരുത്ത് പകരുന്നു. ആൻഡ്രോയ്ഡ് 16 അടിസ്ഥാനമാക്കിയ വൺ യുഐ 8.0-ലാണ് ഈ ഫോൺ പ്രവർത്തിക്കുന്നത്. 5,600mAh ബാറ്ററിയും ഈ ഫോണിൽ സാംസങ് ഉൾപ്പെടുത്തിയിട്ടുണ്ട്.

സാംസങ്ങ് ഗാലക്സി Z ട്രൈഫോൾഡിൻ്റെ വില, ലഭ്യത മുതലായ വിവരങ്ങൾ:

കൊറിയയിലെ സാംസങ്ങിന്റെ ഔദ്യോഗിക ന്യൂസ്റൂം പോസ്റ്റ് അനുസരിച്ച്, 16 ജിബി റാമും 512 ജിബി സ്റ്റോറേജുമുള്ള മോഡലിന് ഗാലക്‌സി Z ട്രൈഫോൾഡിന്റെ വില KRW 3,594,000 ആണ്, അതായത് ഏകദേശം 2.2 ലക്ഷം ഇന്ത്യൻ രൂപ. പ്രാദേശികമായുള്ള നികുതികളോ അധികം ചാർജുകളോ കൂട്ടിച്ചേർക്കാതെ ഈ തുക യൂറോപ്പ്, യുഎസ്, ഇന്ത്യൻ വിപണികളിലേക്കു പരിവർത്തനം ചെയ്യുമ്പോൾ യഥാക്രമം 2,100 യൂറോ, 2,400 ഡോളർ, 2,20,400 രൂപ എന്നിങ്ങനെയാണു വരുന്നത്.

കൊറിയയിലെ ഈ വില ഗാലക്‌സി Z ട്രൈഫോൾഡിനെ കമ്പനിയുടെ മുൻപത്തെ മോഡലായ ഗാലക്‌സി Z ഫോൾഡ് 7-നേക്കാൾ (12GB + 512GB) 30% കൂടുതൽ വിലയേറിയതാക്കുന്നുവെന്ന് GSMArena റിപ്പോർട്ട് ചെയ്യുന്നു. ആ ഫോണിൻ്റെ വില KRW 2,537,700 (ഏകദേശം 1,55,000 ഇന്ത്യൻ രൂപ) ആയിരുന്നു. ഈ കണക്കുകളുടെ അടിസ്ഥാനത്തിൽ, ട്രൈഫോൾഡിന്റെ യുഎസ്സിലെ വില ഏകദേശം 2,990 ഡോളർ ആയിരിക്കും. യുകെ, യൂറോപ്പ്, ഇന്ത്യ എന്നിവിടങ്ങളിൽ ട്രിപ്പിൾ സ്‌ക്രീൻ ഫോൾഡബിളിന് യഥാക്രമം GBP 2,680, EUR 2,680, 2,44,000 രൂപ എന്നിങ്ങനെ വിലവരും. ഇത് റിപ്പോർട്ട് ചെയ്യുന്ന വില വിവരങ്ങൾ മാത്രമാണ്, സാംസങ്ങ് ഇതൊന്നും ഔദ്യോഗികമായി സ്ഥിരീകരിച്ചിട്ടില്ല.

ഗാലക്‌സി Z ട്രൈഫോൾഡ് ഡിസംബർ 12 മുതൽ കൊറിയയിൽ വിൽപ്പനയ്‌ക്കെത്തും. ചൈന, തായ്‌വാൻ, സിംഗപ്പൂർ, യുഎഇ തുടങ്ങിയ മറ്റ് വിപണികളിൽ ഈ മാസം അവസാനവും ഫോൺ എത്തും. അതേസമയം, യുഎസിലെ ഉപഭോക്താക്കൾക്ക് 2026-ലെ ആദ്യ പാദം വരെ ഇതിനായി കാത്തിരിക്കേണ്ടി വന്നേക്കാം. ക്രാഫ്റ്റഡ് ബ്ലാക്ക് എന്ന ഒറ്റ കളർ ഓപ്ഷനിലാണ് ഫോൺ വരുന്നത്.

സാംസങ്ങ് ഗാലക്സി Z ട്രൈഫോൾഡിൻ്റെ സവിശേഷതകൾ:

ഗാലക്‌സി Z ട്രൈഫോൾഡിൽ വ്യത്യസ്ത വലുപ്പത്തിലുള്ള രണ്ട് ഹിഞ്ചുകൾ ഉണ്ട്, ശക്തമായ ഡ്യുവൽ-റെയിൽ ഘടനയോടെ നിർമ്മിച്ചിരിക്കുന്ന ഇത് അകത്തേക്ക് മടക്കുന്ന തരത്തിലാണുള്ളത്. തുറക്കുമ്പോൾ, ഇതിന് 10 ഇഞ്ച് വലിപ്പമുള്ള മെയിൻ ഡിസ്‌പ്ലേയുണ്ട്, മടക്കുമ്പോൾ, നിങ്ങൾക്ക് ഒരു സാധാരണ ഫോണിലെ 6.5 ഇഞ്ച് കവർ ഡിസ്‌പ്ലേയായി ഉപയോഗിക്കാം. ഗാലക്‌സി ചിപ്‌സെറ്റിനായുള്ള 3nm സ്‌നാപ്ഡ്രാഗൺ 8 എലൈറ്റിൽ ഉപകരണം പ്രവർത്തിക്കുന്നു, കൂടാതെ 1TB വരെ ഇന്റേണൽ സ്റ്റോറേജും 16GB റാമും ഇതിൽ ഉൾപ്പെടുന്നു.

ഫോട്ടോകൾക്കും വീഡിയോകൾക്കും, ഫോണിൽ ട്രിപ്പിൾ റിയർ ക്യാമറ സജ്ജീകരണമുണ്ട്. ഇതിൽ 200 മെഗാപിക്സൽ പ്രധാന ക്യാമറ, 12 മെഗാപിക്സൽ അൾട്രാവൈഡ് ക്യാമറ, 10 മെഗാപിക്സൽ ടെലിഫോട്ടോ ക്യാമറ എന്നിവ ഉൾപ്പെടുന്നു. സെൽഫികൾക്കായി, മെയിൻ സ്‌ക്രീനിലും കവർ സ്‌ക്രീനിലും 10 മെഗാപിക്സൽ ഫ്രണ്ട് ക്യാമറയും സാംസങ്ങ് ചേർത്തിട്ടുണ്ട്. ഗാലക്‌സി Z ട്രൈഫോൾഡിൽ 5,600mAh ബാറ്ററിയാണുള്ളത്. ഇത് 45W വയർഡ് ഫാസ്റ്റ് ചാർജിംഗും 15W വയർലെസ് ഫാസ്റ്റ് ചാർജിംഗും പിന്തുണയ്ക്കുന്നു.