നത്തിംഗ്, സിഎംഎഫ് എന്നിവയുടെ വ്യാജ പ്രൊഡക്റ്റുകൾ പിടിച്ചെടുത്ത് ഡെൽഹി പോലീസ്; ഉപയോക്താക്കൾ ശ്രദ്ധ പുലർത്തണമെന്നു കമ്പനി

യുകെ ആസ്ഥാനമായുള്ള സ്മാർട്ട്‌ഫോൺ ബ്രാൻഡായ നത്തിംഗ് ഇന്ത്യയിൽ വളർന്നു കൊണ്ടിരിക്കുകയാണ്. എന്നാൽ വിപണിയെ ബാധിക്കുന്ന ഗുരുതരമായ ഒരു പ്രശ്നത്തെക്കുറിച്ച് കമ്പനി ഇപ്പോൾ ആശങ്ക പങ്കുവെച്ചിട്ടുണ്ട്. കൗണ്ടർപോയിന്റ് റിസർച്ചിന്റെ കണക്കനുസരിച്ച്, 2025-ലെ നാലാം പാദത്തിൽ ഇന്ത്യയിലെ സ്മാർട്ട്‌ഫോൺ കയറ്റുമതിയിൽ വർഷം തോറും 32 ശതമാനം വളർച്ചയാണ് നത്തിംഗ് രേഖപ്പെടുത്തിയത്. കാൾ പെയുടെ നേതൃത്വത്തിലുള്ള ബ്രാൻഡ്, ബെംഗളൂരുവിൽ ആദ്യത്തെ ഔദ്യോഗിക ബ്രാൻഡഡ് സ്റ്റോർ തുറക്കുകയും അതിന്റെ സബ്-ബ്രാൻഡായ സിഎംഎഫിന്റെ പ്രവർത്തനങ്ങൾ രാജ്യത്തേക്ക് മാറ്റി ഇന്ത്യയിൽ ശ്രദ്ധ കേന്ദ്രീകരിക്കാൻ ആരംഭിക്കുകയും ചെയ്തിരുന്നു. എന്നാൽ, ഈ വിപുലീകരണത്തിനൊപ്പം, തങ്ങളുടെ ബ്രാൻഡിൻ്റെ പേരിൽ വ്യാജ ഉൽപ്പന്നങ്ങൾ ഇന്ത്യൻ വിപണികളിൽ വ്യാപിക്കുന്നതായി നത്തിംഗ് മുന്നറിയിപ്പ് നൽകുന്നു. യഥാർത്ഥ നത്തിംഗ്, സിഎംഎഫ് ഉൽപ്പന്നങ്ങളുമായി സാമ്യതയുള്ള ചാർജിംഗ് അഡാപ്റ്ററുകളും ട്രൂ വയർലെസ് സ്റ്റീരിയോ (ടിഡബ്ല്യുഎസ്) ഇയർഫോണുകളും വ്യാജ ഉപകരണങ്ങളിൽ ഉൾപ്പെടുന്നു. ഇത് തങ്ങളുടെ ബ്രാൻഡിനെ ദോഷകരമായി ബാധിക്കുക മാത്രമല്ല, മോശം ഗുണനിലവാരവും സുരക്ഷാ പ്രശ്നങ്ങളും കാരണം ഉപഭോക്താക്കളെ അപകടത്തിലാക്കുകയും ചെയ്യുന്നുവെന്ന് കമ്പനി പറയുന്നു.

വ്യാജ നത്തിംഗ്, സിഎംഎഫ് ഉൽപ്പന്നങ്ങൾ പിടിച്ചെടുത്ത് ഡെൽഹി പോലീസ്:

സോഷ്യൽ മീഡിയയിൽ അടുത്തിടെ പങ്കിട്ട ഒരു ബോധവൽക്കരണ വീഡിയോയിൽ, നത്തിംഗ് ഇന്ത്യ സഹസ്ഥാപകനും പ്രസിഡന്റുമായ അകിസ് ഇവാഞ്ചലിഡിസ് ഇന്ത്യയിൽ ബ്രാൻഡിൻ്റെ വ്യാജ ഉൽപ്പന്നങ്ങൾ വർദ്ധിച്ചുവരുന്നതിനെ എടുത്തുകാണിച്ചു. കഴിഞ്ഞ വർഷം വിറ്റഴിക്കപ്പെട്ട വ്യാജ നത്തിംഗ്, സിഎംഎഫ് ഉപകരണങ്ങളുടെ കുത്തനെയുള്ള വർദ്ധനവ് കമ്പനിയുടെ ശ്രദ്ധയിൽ പെട്ടിട്ടുണ്ടെന്ന് അദ്ദേഹം പറഞ്ഞു. ഈ ഉൽപ്പന്നങ്ങളിൽ ചിലത് കൃത്യമായ പകർപ്പുകളായിരുന്നു, മറ്റുള്ളവ കമ്പനി ഔദ്യോഗികമായി ലോഞ്ച് ചെയ്തിട്ടില്ലാത്ത ഇനങ്ങളോ കളർ ഓപ്ഷനുകളോ ആയിരുന്നു.

ഈ പ്രശ്നം പരിഹരിക്കുന്നതിനായി, നിരവധി ഇന്ത്യൻ നഗരങ്ങളിലുടനീളമുള്ള നിയമ നിർവ്വഹണ അധികാരികളെ നത്തിംഗ് സമീപിക്കുകയുണ്ടായി. ഈ ശ്രമങ്ങളുടെ ഭാഗമായി, ഡൽഹി പോലീസ് ദേശീയ തലസ്ഥാനത്തെ പ്രാദേശിക ഇലക്ട്രോണിക്സ് വിപണികളിൽ നിരവധി റെയ്ഡുകളും നടത്തി. കഴിഞ്ഞ വർഷം ആരംഭിച്ച ഈ റെയ്ഡുകളിൽ 1,100-ലധികം വ്യാജ ഉൽപ്പന്നങ്ങൾ പിടിച്ചെടുത്തു. പിടിച്ചെടുത്ത ഇനങ്ങളിൽ നത്തിംഗ്, സിഎംഎഫ് എന്നിവയുടെ ബ്രാൻഡിങ്ങുള്ള വ്യാജ ചാർജിംഗ് അഡാപ്റ്ററുകളും ടിഡബ്ല്യുഎസ് ഇയർഫോണുകളും ഉൾപ്പെടുന്നു.

രാജ്യത്ത് പ്രവർത്തിക്കുന്ന വ്യാജ വിതരണ ശൃംഖലകളെ തിരിച്ചറിയാനും അവരെ തടയാനുമുള്ള വലിയ പദ്ധതിയുടെ ഭാഗമാണ് ഈ നടപടികളെന്ന് കമ്പനി പറഞ്ഞു.

അത്തരം വ്യാജ ഉൽപ്പന്നങ്ങൾ സുരക്ഷാ പ്രശ്നങ്ങൾ സൃഷ്ടിക്കുമെന്നും യഥാർത്ഥ ഉൽപ്പന്നങ്ങളുമായി താരതമ്യപ്പെടുത്തുമ്പോൾ മോശം കസ്റ്റമർ എക്സ്പീരിയൻസ് നൽകുമെന്നും ഇവാഞ്ചലിഡിസ് പറഞ്ഞു.

ഓൺലൈൻ മാർക്കറ്റ്പ്ലേസുകളും നിരീക്ഷണത്തിൽ:

വ്യാജ ഉൽപ്പന്നങ്ങൾ ഓഫ്‌ലൈൻ വിപണികളിൽ മാത്രമായി ഒതുങ്ങുന്നില്ലെന്നും നത്തിംഗ് ചൂണ്ടിക്കാട്ടി. നത്തിംഗ്, സിഎംഎഫ് ബ്രാൻഡിംഗ് എന്നിവ ഉപയോഗിക്കുന്ന നിരവധി വ്യാജ ഉൽപ്പന്നങ്ങൾ ജനപ്രിയ ഇ-കൊമേഴ്‌സ് പ്ലാറ്റ്‌ഫോമുകളിൽ പ്രത്യക്ഷപ്പെട്ടിട്ടുണ്ട്. ഈ ഉൽപ്പന്നങ്ങൾ നത്തിംഗ് സ്മാർട്ട്‌ഫോണുകളുമായും ആക്‌സസറികളുമായും പൊരുത്തപ്പെടുന്നതാണെന്ന് ചില ലിസ്റ്റിംഗുകൾ തെറ്റായ അവകാശം ഉന്നയിക്കുകയും ചെയ്യുന്നു.

ഓൺലൈനിൽ ഷോപ്പിംഗ് നടത്തുമ്പോൾ ജാഗ്രത പാലിക്കണമെന്ന് കമ്പനി ഉപഭോക്താക്കളോട് അഭ്യർത്ഥിച്ചു. വാങ്ങുന്നതിനുമുമ്പ് ഉൽപ്പന്നത്തിൻ്റെ റേറ്റിംഗുകളും റിവ്യൂകളും പരിശോധിക്കാൻ ഇവാഞ്ചലിഡിസ് ഉപദേശിച്ചു. വ്യാജ ഉൽപ്പന്നങ്ങൾക്ക് സാധാരണയായി വളരെ കുറച്ച് റിവ്യൂകളോ കുറഞ്ഞ റേറ്റിംഗുകളോ മാത്രമേ ഉണ്ടാകൂ എന്ന് അദ്ദേഹം അഭിപ്രായപ്പെട്ടു, ഇതൊരു വ്യക്തമായ സൂചനയാണ്.

ബെംഗളൂരുവിലെ 100 ഫീറ്റ് റോഡിൽ നത്തിംഗ് അതിന്റെ ആദ്യത്തെ ഇന്ത്യൻ ബ്രാൻഡഡ് സ്റ്റോർ തുറന്നതിന് തൊട്ടുപിന്നാലെയാണ് ഈ മുന്നറിയിപ്പ് വരുന്നത്. ആദ്യകാല പ്രൊഡക്റ്റ് ലോഞ്ചുകൾ ഹോസ്റ്റു ചെയ്തതിലൂടെയും രജിസ്റ്റർ ചെയ്ത ഇന്ത്യൻ സ്ഥാപനമായി സിഎംഎഫിന്റെ പ്രവർത്തനങ്ങൾ രാജ്യത്തേക്ക് മാറ്റുന്നതിലൂടെയും കമ്പനി ഇന്ത്യയ്ക്ക് പ്രത്യേക പ്രാധാന്യം നൽകുന്നുണ്ട്. വ്യാജന്മാരുടെ വെല്ലുവിളി ഉണ്ടായിരുന്നിട്ടും, നത്തിംഗിന്റെ ശക്തമായ വളർച്ച കാണിക്കുന്നത് ബ്രാൻഡിന്റെ ഭാവി പദ്ധതികൾക്ക് ഇന്ത്യ ഒരു പ്രധാന വിപണിയായിരിക്കും എന്നാണ്.