ഇനി മൂഡ് അനുസരിച്ച് ഇഷ്ടമുള്ള സിനിമകൾ കണ്ടെത്താനാകും; ചാറ്റ്ജിപിടി സേവനം ഇനിമുതൽ ജിയോഹോട്ട്സ്റ്റാറിലും

ഇന്ത്യൻ സ്ട്രീമിംഗ് പ്ലാറ്റ്‌ഫോമായ ജിയോഹോട്ട്‌സ്റ്റാർ, ഇന്ത്യയിൽ നടക്കുന്ന Al ഇംപാക്ട് ഉച്ചകോടിയിൽ വെച്ച് ഓപ്പൺഎഐയുമായി പുതിയ പങ്കാളിത്തം പ്രഖ്യാപിച്ചു. ഈ സഹകരണത്തിന്റെ ഭാഗമായി, ചാറ്റ്ജിപിടിയിൽ പ്രവർത്തിക്കുന്ന ഒരു വോയ്‌സ്, ടെക്സ്റ്റ് അസിസ്റ്റന്റ് ഉടൻ തന്നെ ജിയോഹോട്ട്‌സ്റ്റാർ ആപ്പിലേക്ക് കൂട്ടിച്ചേർക്കും. ഉപയോക്താക്കൾക്ക് കണ്ടൻ്റുകൾ കണ്ടെത്തുന്നത് എളുപ്പവും സ്വാഭാവികവുമാക്കുന്നതിനാണ് ഈ പുതിയ സവിശേഷത രൂപകൽപ്പന ചെയ്‌തിരിക്കുന്നതെന്ന് കമ്പനി പറയുന്നു. ചെറിയ കീവേഡുകൾ ടൈപ്പ് ചെയ്യുന്നതിനും സിനിമകളുടെ ടൈറ്റിലുകളിലൂടെ സ്ക്രോൾ ചെയ്യുന്നതിനും പകരം, എന്താണ് കാണാൻ ആഗ്രഹിക്കുന്നതെന്ന് കണ്ടെത്താൻ കാഴ്ചക്കാർക്ക് മുഴുവൻ വാചകങ്ങൾ സംസാരിക്കാനും ടൈപ്പ് ചെയ്യാനും ഇതിലൂടെ കഴിയും. അസിസ്റ്റന്റ് ഒന്നിലധികം ഇന്ത്യൻ ഭാഷകളെ പിന്തുണയ്ക്കുകയും സന്ദർഭം, മാനസികാവസ്ഥ, സാഹചര്യങ്ങൾ എന്നിവ മനസ്സിലാക്കുകയും ചെയ്യും. സ്വാഭാവിക സംഭാഷണങ്ങളെ അടിസ്ഥാനമാക്കിയുള്ള വ്യക്തിഗത ശുപാർശകൾ ഈ ടൂൾ വാഗ്ദാനം ചെയ്യുമെന്ന് ജിയോഹോട്ട്‌സ്റ്റാർ അവകാശപ്പെടുന്നു. തിരഞ്ഞെടുത്ത ലൈവ്, ഓൺ ഡിമാൻ്റ് കണ്ടൻ്റുകളോടെയാണ് ഈ റോൾഔട്ട് ആരംഭിക്കുക, വരും മാസങ്ങളിൽ പ്ലാറ്റ്‌ഫോമിലുടനീളം ഘട്ടം ഘട്ടമായി ഇതു വിപുലീകരിക്കും.

ചാറ്റ്ജിപിടി കരുത്തു നൽകുന്ന മൾട്ടിലിംഗ്വൽ ഡിസ്കവറി ടൂൾ:

ഈ പങ്കാളിത്തത്തിന്റെ കാതൽ OpenAI API-കൾ ഉപയോഗിച്ച് നിർമ്മിച്ച ഒരു ചാറ്റ്ജിപിടി അധിഷ്ഠിത ഇന്റർഫേസാണ്. കമ്പനികൾ വിശദമായ സാങ്കേതിക വിവരങ്ങൾ പങ്കിട്ടിട്ടില്ലെങ്കിലും, സിസ്റ്റം ടെക്സ്റ്റ് ജനറേഷൻ, സ്പീച്ച്-ടു-ടെക്സ്റ്റ്, ടെക്സ്റ്റ്-ടു-സ്പീച്ച് ടെക്നോളജി എന്നിവ സംയോജിപ്പിക്കുമെന്ന് പ്രതീക്ഷിക്കുന്നു. വോയ്‌സും ടെക്സ്റ്റും ഉപയോഗിച്ച് പ്ലാറ്റ്‌ഫോമുമായി സംവദിക്കാൻ ഇത് ഉപയോക്താക്കളെ അനുവദിക്കും.

ഈ സവിശേഷതയെ ഒരു " മൾട്ടിലിംഗ്വൽ കോഗ്നിറ്റീവ് സെർച്ച്" ടൂൾ എന്നാണ് ജിയോഹോട്ട്‌സ്റ്റാറും ഓപ്പൺഎഐയും വിശേഷിപ്പിക്കുന്നത്. ഇത് തങ്ങളുടെ ഉദ്ദേശ്യം സ്വാഭാവിക ഭാഷയിൽ പ്രകടിപ്പിക്കാൻ ഉപയോക്താക്കളെ അനുവദിക്കുന്നു. ഉദാഹരണത്തിന്, ഒരു ഉപയോക്താവിന് "എന്റെ മാതാപിതാക്കൾ സന്ദർശിക്കുന്നു, എല്ലാവർക്കും ഒരുമിച്ച് കാണാൻ കഴിയുന്ന എന്തെങ്കിലും നിർദ്ദേശിക്കുക" അല്ലെങ്കിൽ "ഞങ്ങൾ ഇരട്ടകളാണ്, ഇരട്ടകളെക്കുറിച്ചുള്ള സിനിമകൾ കാണണം" എന്ന് പറയാൻ കഴിയും. കീവേഡുകൾ പൊരുത്തപ്പെടുക എന്നതിനു പകരം, അഭ്യർത്ഥനയ്ക്ക് പിന്നിലെ ആഴത്തിലുള്ള അർത്ഥം അസിസ്റ്റന്റ് മനസ്സിലാക്കും. ജിയോഹോട്ട്‌സ്റ്റാറിന്റെ കാറ്റലോഗിൽ നിന്ന് അനുയോജ്യമായ കണ്ടൻ്റുകൾ നിർദ്ദേശിക്കുന്നതിനായി മാനസികാവസ്ഥ, സാംസ്കാരിക സന്ദർഭം, ലെയേർഡ് പ്രോംപ്റ്റുകൾ എന്നിവ ഇത് വിശകലനം ചെയ്യും.

ഉപയോക്താക്കൾ പരിഗണിച്ചിട്ടില്ലാത്ത റിലേറ്റഡ് കണ്ടൻ്റുകൾ അസിസ്റ്റന്റിന് മുൻകൂട്ടി കാണാൻ കഴിയുമെന്ന് കമ്പനി പറയുന്നു. ആരെങ്കിലും ഒരു ഫാമിലി ഫ്രണ്ട്ലി സിനിമയ്ക്കായി തിരയുകയാണെങ്കിൽ, അതിനോടു പൊരുത്തപ്പെടുന്ന ട്രെൻഡിംഗ് ഷോകളോ ക്ലാസിക്കുകളോ സിസ്റ്റം ശുപാർശ ചെയ്തേക്കാം. തിരയുന്നതിനായി ചെലവഴിക്കുന്ന സമയം കുറയ്ക്കുന്നതിനും എന്ത് കാണണമെന്ന് വേഗത്തിൽ തീരുമാനിക്കാൻ ഉപയോക്താക്കളെ സഹായിക്കുന്നതിനും വേണ്ടിയാണ് ഈ സമീപനം.

ബഹുഭാഷാ ശേഷി ഈ സവിശേഷതക്കു വളരെ പ്രാധാന്യം നൽകുന്നു. ഇന്ത്യയിലുടനീളമുള്ള ഉപയോക്താക്കൾക്ക് വ്യത്യസ്ത പ്രാദേശിക ഭാഷകളിൽ സംവദിക്കാൻ കഴിയും. ഇത് ഇംഗ്ലീഷിൽ ടൈപ്പ് ചെയ്യുന്നതിനേക്കാൾ സ്വന്തം ഭാഷയിൽ സംസാരിക്കാൻ ഇഷ്ടപ്പെടുന്നവർക്ക്, പ്ലാറ്റ്‌ഫോം കൂടുതൽ ആക്‌സസ് ചെയ്യാൻ സഹായിക്കുമെന്ന് പ്രതീക്ഷിക്കുന്നു.

ലൈവ് സ്പോർട്സ് അടക്കമുള്ളവയ്ക്കായി വോയ്സ് ഇൻ്ററാക്ഷൻ നടത്താം:

ചാറ്റ്ജിപിടിയിൽ പ്രവർത്തിക്കുന്ന അസിസ്റ്റൻ്റിൻ്റെ പ്രവർത്തനം സിനിമകൾക്കും സീരിസുകൾക്കും മാത്രമായി പരിമിതപ്പെടുത്തിയിട്ടില്ല. ലൈവ് സ്‌പോർട്‌സ് ഇവൻ്റ് സമയത്തും ഈ ടൂൾ സഹായിക്കുമെന്ന് ജിയോഹോട്ട്‌സ്റ്റാർ പറയുന്നു. തത്സമയം നടന്നുകൊണ്ടിരിക്കുന്ന മത്സരങ്ങളെക്കുറിച്ച് കാഴ്ചക്കാർക്ക് ചോദ്യങ്ങൾ ചോദിക്കാൻ കഴിയും. ഉദാഹരണത്തിന്, ഒരു മത്സരം കാണുമ്പോൾ ഉപയോക്താക്കൾക്ക് പ്രധാന നിമിഷങ്ങൾ, കളിക്കാരുടെ ഹൈലൈറ്റുകൾ, നിലവിലെ സ്‌കോറുകൾ അല്ലെങ്കിൽ സ്ഥിതിവിവരക്കണക്കുകൾ എന്നിവക്കായി അഭ്യർത്ഥിക്കാൻ കഴിയും.

വിവരങ്ങൾക്കായി സ്ട്രീം വിടുന്നതിന് പകരം, കാഴ്ചക്കാർക്ക് ആപ്പിനുള്ളിൽ തന്നെ ചോദിക്കാൻ കഴിയും. കാഴ്ചാനുഭവത്തെ തടസ്സപ്പെടുത്താതെ അസിസ്റ്റന്റ് സന്ദർഭോചിതമായ ഉൾക്കാഴ്ചകൾ നൽകും. ലൈവ് സ്‌പോർട്‌സിനെ കൂടുതൽ സംവേദനാത്മകവും വിജ്ഞാനപ്രദവും ആക്കുക എന്നതാണ് ഈ സവിശേഷതയുടെ ലക്ഷ്യം.

ഓപ്പൺഎഐയുടെ ആപ്ലിക്കേഷൻസ് സിഇഒ ഫിഡ്ജി സിമോയുടെ പ്രസ്താവന പ്രകാരം, ഈ സംയോജനം കാഴ്ചക്കാരെ കാണുന്നതിൽ നിന്ന് ചോദ്യങ്ങൾ ചോദിക്കുന്നതിലേക്കും ജിജ്ഞാസയിൽ നിന്ന് സന്ദർഭത്തിലേക്കും സ്വാഭാവികതയോടെ നീങ്ങാൻ അനുവദിക്കും. സുഗമവും വ്യക്തിഗതവുമായ അനുഭവം നൽകുക എന്നതാണ് ലക്ഷ്യം.

തിരഞ്ഞെടുത്ത ലൈവ്, ഓൺ ഡിമാൻഡ് എക്സ്പീരിയൻസ് ഉപയോഗിച്ചാണ് റോൾഔട്ട് ആരംഭിക്കുന്നതെന്ന് ജിയോഹോട്ട്‌സ്റ്റാർ സ്ഥിരീകരിച്ചു. കാലക്രമേണ, ഇന്ത്യയിലുടനീളമുള്ള കൂടുതൽ ഉപയോക്താക്കൾക്ക് വോയ്‌സ്, ടെക്സ്റ്റ് ബേസ്ഡ് സെർച്ച് ടൂൾസ് വാഗ്ദാനം ചെയ്ത് പ്ലാറ്റ്‌ഫോമിന്റെ കൂടുതൽ വിഭാഗങ്ങളിലേക്ക് AI അസിസ്റ്റന്റ് വിപുലീകരിക്കപ്പെടും.