പുതിയ മെമ്പർക്ക് ഗ്രൂപ്പിലെ പഴയ മെസേജുകൾ കാണാനാകും; ഗ്രൂപ്പ് മെസേജ് ഹിസ്റ്ററി ഫീച്ചർ പുറത്തിറക്കി വാട്സ്ആപ്പ്

ഗ്രൂപ്പുകളിലെ സംഭാഷണങ്ങൾ കൈകാര്യം ചെയ്യുന്നത് എളുപ്പമാക്കുന്നതിനു വേണ്ടി രൂപകൽപ്പന ചെയ്ത ഒരു പുതിയ ഫീച്ചർ വാട്ട്‌സ്ആപ്പ് അവതരിപ്പിച്ചു. ഗ്രൂപ്പിൽ ചേരുന്ന പുതിയ അംഗങ്ങൾക്കാണ് ഈ ഫീച്ചർ ഫലപ്രദമാവുക. ഓഫീസ് ചർച്ചകൾ, കമ്മ്യൂണിറ്റി അപ്‌ഡേറ്റുകൾ, സ്കൂളുകളിലെ ആശയവിനിമയം, കുടുംബത്തിലെ വർത്തമാനങ്ങൾ എന്നിവക്കെല്ലാം ഗ്രൂപ്പ് ചാറ്റുകൾ വ്യാപകമായി ഉപയോഗിക്കുന്നുണ്ട്. എന്നിരുന്നാലും, പുതിയ അംഗങ്ങൾ ഗ്രൂപ്പിൽ ചേരുമ്പോൾ അവർക്ക് അതിനു മുമ്പ് അയച്ച സന്ദേശങ്ങൾ കാണാൻ കഴിയില്ല എന്നതൊരു പൊതുവായ പ്രശ്നം ആയിരുന്നു. ഇത് പലപ്പോഴും ആശയക്കുഴപ്പം സൃഷ്ടിക്കുകയും മറ്റുള്ള അംഗങ്ങൾക്ക് പ്രധാനപ്പെട്ട ടെക്സ്റ്റുകൾ, ചിത്രങ്ങൾ അല്ലെങ്കിൽ ഫയലുകൾ എന്നിവ വീണ്ടും ഗ്രൂപ്പിലോ വ്യക്തിപരമായോ കൈമാറേണ്ടി വരികയും ചെയ്തിരുന്നു. ഈ പ്രശ്നം പരിഹരിക്കുന്നതിനു വേണ്ടിയാണ്, ഗ്രൂപ്പ് മെസേജ് ഹിസ്റ്ററി എന്ന സവിശേഷത വാട്സ്ആപ്പ് ആരംഭിച്ചത്. സ്വകാര്യതയെ ബാധിക്കാതെ ഒരു പരിധി വരെയുള്ള പഴയ സന്ദേശങ്ങൾ കാണാൻ പുതിയ അംഗങ്ങളെ ഈ സവിശേഷത അനുവദിക്കുന്നു. അതേസമയം, പ്ലാറ്റ്‌ഫോം അതിന്റെ എൻഡ്-ടു-എൻഡ് എൻക്രിപ്ഷൻ മാനദണ്ഡങ്ങൾ പാലിക്കുന്നത് തുടരും.

ഗ്രൂപ്പ് മെസേജ് ഹിസ്റ്ററി എങ്ങിനെ പ്രവർത്തിക്കുന്നു:

പുതിയ അംഗങ്ങൾ ഗ്രൂപ്പിൽ ചേരുന്നതിന് മുൻപു ഗ്രൂപ്പിൽ വന്ന സന്ദേശങ്ങൾ കാണാൻ ഗ്രൂപ്പ് മെസേജ് ഹിസ്റ്ററി ഫീച്ചർ അനുവദിക്കുന്നു. മുമ്പ്, ഉപയോക്താക്കൾക്ക് ചാറ്റിന്റെ ഭാഗമായതിനു ശേഷം വരുന്ന സന്ദേശങ്ങൾ മാത്രമേ വായിക്കാൻ കഴിയുമായിരുന്നുള്ളൂ. മുൻപു നടന്ന ചർച്ചകളെക്കുറിച്ച് പുതിയ അംഗങ്ങൾക്ക് അറിയാത്തതിനാൽ ഇത് പലപ്പോഴും ആശയക്കുഴപ്പം സൃഷ്ടിച്ചിരുന്നു.

പുതിയ അപ്‌ഡേറ്റിലൂടെ, പുതുതായി വന്ന അംഗങ്ങളുമായി മുമ്പത്തെ സന്ദേശങ്ങൾ പങ്കിടണോ വേണ്ടയോ എന്ന് ഗ്രൂപ്പ് അഡ്മിൻമാർക്ക് തീരുമാനിക്കാം. ഈ ഓപ്ഷൻ ഓട്ടോമാറ്റിക്കല്ല. ഇത് പൂർണ്ണമായും നിയന്ത്രിക്കുന്നത് അഡ്മിനാണ്. ഒരു ഗ്രൂപ്പിലേക്ക് ഒരാളെ ചേർക്കുമ്പോൾ, ചാറ്റ് ഹിസ്റ്ററിയുടെ ഒരു ഭാഗം അഡ്മിന് തിരഞ്ഞെടുത്തു പങ്കിടാം. പങ്കിടുന്ന സന്ദേശങ്ങളുടെ എണ്ണം 25-ൽ നിന്നാണ് ആരംഭിക്കുക. മുൻഗണന അനുസരിച്ച് സന്ദേശങ്ങളുടെ എണ്ണം വർദ്ധിപ്പിക്കാനാകും.

ഇത്തരമൊരു ഓപ്ഷൻ ഉള്ളതിനാൽ വ്യത്യസ്ത തരം ഗ്രൂപ്പുകൾക്ക് ഈ സവിശേഷത വലിയ ഗുണം ചെയ്യും. ഉദാഹരണത്തിന്, പ്രൊഫഷണൽ ഗ്രൂപ്പുകളിൽ, അഡ്മിൻമാർക്ക് സമീപകാല അപ്‌ഡേറ്റുകൾ മാത്രമേ പങ്കിടാൻ കഴിയൂ. കമ്മ്യൂണിറ്റിയിലോ കുടുംബ ഗ്രൂപ്പുകളിലോ, മികച്ച ധാരണ ലഭിക്കാൻ കൂടുതൽ സന്ദേശങ്ങൾ പങ്കിടാനായി അവർക്ക് തിരഞ്ഞെടുക്കാം. ഷെയർ ചെയ്ത ഹിസ്റ്ററി വെവ്വേറെ ദൃശ്യമാകുകയും സാധാരണ ചാറ്റ് സന്ദേശങ്ങളിൽ നിന്ന് ദൃശ്യപരമായി വ്യത്യസ്തതയോടെ നിൽക്കുകയും ചെയ്യുന്നതിനാൽ പഴയ ചാറ്റ് തിരിച്ചറിയാൻ എളുപ്പമാണ്.

മെസേജ് ഹിസ്റ്ററി പങ്കിടുമ്പോൾ, നിലവിലുള്ള ഗ്രൂപ്പ് അംഗങ്ങളെ അറിയിക്കും. പുതിയ അംഗവുമായി പഴയ സന്ദേശങ്ങൾ പങ്കുവെച്ചിട്ടുണ്ടെന്ന് അവർക്ക് കാണാൻ കഴിയും. ഷെയർ ചെയ്യുന്ന സന്ദേശങ്ങൾ യഥാർത്ഥ സമയവും അയച്ചയാളുടെ വിവരങ്ങളും കാണിക്കുന്നു. ഇത് ഗ്രൂപ്പിനുള്ളിൽ സുതാര്യത ഉറപ്പാക്കുന്നു.

സ്വകാര്യതയെയും ലഭ്യതയെയും കുറിച്ചുള്ള വിവരങ്ങൾ:

വാട്ട്‌സ്ആപ്പിന്റെ മാതൃ കമ്പനിയായ മെറ്റയുടെ അഭിപ്രായത്തിൽ, സ്വകാര്യത ഈ ഫീച്ചറിൻ്റെ ഒരു പ്രധാന ശ്രദ്ധാകേന്ദ്രമായി തുടരുന്നു. പ്ലാറ്റ്‌ഫോമിലെ നിലവിലുള്ള എൻഡ്-ടു-എൻഡ് എൻക്രിപ്ഷൻ സിസ്റ്റത്തിന് കീഴിലാണ് ഗ്രൂപ്പ് മെസേജ് ഹിസ്റ്ററി ഫീച്ചർ പ്രവർത്തിക്കുന്നത്. അതായത് ഗ്രൂപ്പ് അംഗങ്ങൾക്ക് മാത്രമേ പങ്കിട്ട സന്ദേശങ്ങൾ വായിക്കാൻ കഴിയൂ. അപ്‌ഡേറ്റ് എൻക്രിപ്ഷനെ ദുർബലപ്പെടുത്തുകയോ പുറത്തു നിന്നുള്ള കക്ഷികൾക്ക് ആക്‌സസ് നൽകുകയോ ചെയ്യുന്നില്ലെന്ന് കമ്പനി പറയുന്നു.

ചാറ്റ് ഹിസ്റ്ററി പങ്കിടാനുള്ള തീരുമാനം ഗ്രൂപ്പിനുള്ളിൽ തന്നെ തുടരും. പുതിയ അംഗങ്ങളെ ചേർക്കുമ്പോൾ അഡ്മിൻസിന് മാത്രമേ ഇത് ആക്റ്റിവേറ്റ് ചെയ്യാനും ഡീആക്റ്റിവേറ്റ് ചെയ്യാനും കഴിയൂ. മുൻ സന്ദേശങ്ങൾ പങ്കിടേണ്ടെന്ന് അഡ്മിൻ തീരുമാനിച്ചാൽ, പുതിയ മെമ്പർക്ക് മുമ്പത്തെപ്പോലെ ചേർന്നതിനു ശേഷം അയക്കുന്ന സന്ദേശങ്ങൾ മാത്രമേ കാണാനാകൂ.

വാട്ട്‌സ്ആപ്പ് ആഗോളതലത്തിൽ ഈ സവിശേഷത പുറത്തിറക്കാൻ തുടങ്ങി. ആപ്പിന്റെ ആൻഡ്രോയിഡ്, iOS പതിപ്പുകളിൽ ഇത് ലഭ്യമാകും. ഇത് ആക്‌സസ് ചെയ്യുന്നതിന് ഉപയോക്താക്കൾ അവരുടെ ആപ്പ് ഏറ്റവും പുതിയ പതിപ്പിലേക്ക് അപ്‌ഡേറ്റ് ചെയ്യേണ്ടി വന്നേക്കാം. ഘട്ടം ഘട്ടമായാണ് റോൾഔട്ട് നടക്കുന്നത്. അതിനാൽ പ്രദേശത്തെയും ഉപകരണത്തെയും ആശ്രയിച്ച് ലഭ്യത വ്യത്യാസപ്പെടാം.

ഗ്രൂപ്പ് മെസേജ് ഹിസ്റ്ററിയിലൂടെ, ഉപയോക്താക്കളുടെ സ്വകാര്യതക്കു യാതൊരു പ്രശ്നങ്ങളുമില്ലാതെ ഗ്രൂപ്പ് ആശയവിനിമയം മെച്ചപ്പെടുത്താനുള്ള വാട്ട്‌സ്ആപ്പിൻ്റെ പ്രവർത്തനങ്ങൾ നമുക്കു മനസിലാക്കാം. ഈ സവിശേഷത മാനുവൽ ഫോർവേഡിംഗിന്റെ ആവശ്യകത ഇല്ലാതാക്കുകയും നിലവിലുള്ള സംഭാഷണങ്ങളെ ശല്യപ്പെടുത്താതെ, പഴയ സന്ദേശങ്ങൾ വേഗത്തിൽ കണ്ടെത്താൻ പുതിയ അംഗങ്ങളെ സഹായിക്കുകയും ചെയ്യുന്നു.