ഐഫോൺ 17e, വില കുറഞ്ഞ മാക്ബുക്ക് എന്നിവ ലോഞ്ച് ചെയ്തേക്കും; ആപ്പിളിൻ്റെ 'സ്പെഷ്യൽ എക്സ്പീരിയൻസ്' ഇവൻ്റ് മാർച്ച് 4-ന്

ആപ്പിൾ ആരാധകരിലും മറ്റും ആവേശം സൃഷ്ടിച്ച് മാർച്ച് ആദ്യവാരത്തിൽ കമ്പനി ഒരു "സ്പെഷ്യൽ ആപ്പിൾ എക്സ്പീരിയൻസ്" ഇവൻ്റിനു തയ്യാറെടുക്കുന്നുണ്ടെന്നു റിപ്പോർട്ട്. കമ്പനി ഔദ്യോഗികമായി ഇവന്റ് സ്ഥിരീകരിച്ചിട്ടില്ലെങ്കിലും, മാർച്ച് 4-ന് ന്യൂയോർക്കിൽ ഇത് നടക്കുമെന്ന് ഒന്നിലധികം റിപ്പോർട്ടുകൾ സൂചിപ്പിക്കുന്നു, ഷാങ്ഹായിലും ലണ്ടനിലും സമാന്തരമായി ഇതേ ഇവൻ്റ് നടക്കാനും സാധ്യതയുണ്ട്. ഇവൻ്റിൻ്റെ ക്ഷണക്കത്തിൽ വർണ്ണാഭമായ 3D ആപ്പിൾ ലോഗോ ഉൾപ്പെടുത്തിയിട്ടുണ്ട്. ഇവൻ്റിൽ പുതിയ ആപ്പിൾ ഡിവൈസുകൾ അവതരിപ്പിക്കും എന്നാണു റിപ്പോർട്ട്. ഐഫോണുകളിലും മാക്ബുക്കുകളിലും ഈ പരിപാടി ശ്രദ്ധ കേന്ദ്രീകരിക്കുമെന്ന് പ്രതീക്ഷിക്കുന്നു. പ്രതീക്ഷിക്കുന്ന പ്രഖ്യാപനങ്ങളിൽ പുതിയ ഐഫോൺ 17e, അടുത്ത തലമുറ M5 ചിപ്പുകളുള്ള അപ്‌ഡേറ്റ് ചെയ്ത മാക്ബുക്ക് എയർ, മാക്ബുക്ക് പ്രോ മോഡലുകൾ, ആപ്പിളിന്റെ ആദ്യത്തെ കുറഞ്ഞ വിലയുള്ള മാക്ബുക്ക് എന്നിവ ഉൾപ്പെടുന്നു. റിപ്പോർട്ടുകൾ കൃത്യമാണെങ്കിൽ, മാർച്ച് ഇവന്റ് ആപ്പിളിന്റെ സമീപ വർഷങ്ങളിലെ ഏറ്റവും വൈവിധ്യമാർന്ന ഉൽപ്പന്നങ്ങളുടെ പ്രദർശനങ്ങളിലൊന്നായി മാറിയേക്കാം. ആരാധകർ കാത്തിരിക്കുന്ന ഇവൻ്റിനെ കുറിച്ചുള്ള വിശദമായ വിവരങ്ങൾ ഇതാ.

ആപ്പിളിൻ്റെ സ്പെഷ്യൽ എക്സ്പീരിയൻസ് ഇവൻ്റ് മാർച്ച് 4-ന്:

റിപ്പോർട്ടുകൾ പ്രകാരം, മാർച്ച് 4-ന് രാവിലെ 9 മണിക്കാണ് ന്യൂയോർക്കിൽ പരിപാടി നടക്കുക. ഷാങ്ഹായിലും ലണ്ടനിലും സമാനമായ പരിപാടികൾ അതേ ദിവസം തന്നെ നടക്കുമെന്ന് സോഷ്യൽ മീഡിയ പോസ്റ്റുകൾ സൂചിപ്പിക്കുന്നു. ആപ്പിൾ ഔദ്യോഗികമായി വിവരങ്ങൾ പങ്കുവെച്ചിട്ടില്ലെങ്കിലും, ഈ പരിപാടിയെ "സ്പെഷ്യൽ ആപ്പിൾ എക്സ്പീരിയൻസ്" എന്നാണ് വിശേഷിപ്പിക്കുന്നത്, അതായത് പ്രൊഡക്റ്റുകളുടെ പ്രദർശനങ്ങളും പ്രായോഗിക സെഷനുകളും ഇതിൽ ഉൾപ്പെട്ടേക്കാം.

യെല്ലോ, ഗ്രീൻ, ബ്ലൂ ഡിസ്കുകൾ കൊണ്ട് നിർമ്മിച്ച ഒരു 3D ആപ്പിൾ ലോഗോ ക്ഷണക്കത്തിൽ ഉൾപ്പെടുത്തിയിട്ടുണ്ടെന്ന് ബ്ലൂംബെർഗിലെ മാർക്ക് ഗുർമാൻ അഭിപ്രായപ്പെട്ടു. ആപ്പിളിന്റെ വരാനിരിക്കുന്ന കുറഞ്ഞ വിലയുള്ള മാക്ബുക്കിന്റെ ലീക്കായ കളർ ഓപ്ഷനുകളുമായി ഈ നിറങ്ങൾ പൊരുത്തപ്പെടുന്നുണ്ട്. ഏറ്റവും വില കുറഞ്ഞ ലാപ്ടോപ് ഈ പരിപാടിയിൽ ലോഞ്ച് ചെയ്യുമെന്ന അഭ്യൂഹത്തിന് ഇത് ശക്തി പകരുന്നു.

കുറഞ്ഞ വിലയുള്ള മാക്ബുക്കിന്റെ വില 1,000 ഡോളറിൽ താഴെയായിരിക്കുമെന്ന് പറയപ്പെടുന്നു. ഇത് ആപ്പിൾ ലൈനപ്പിലെ ഏറ്റവും താങ്ങാനാവുന്ന മാക്ബുക്കായി മാറും. ചെലവ് കുറയ്ക്കാൻ, ഐഫോൺ 16 പ്രോ മോഡലുകൾക്ക് കരുത്തു നൽകുന്ന അതേ പ്രോസസറായ A18 പ്രോ ചിപ്പ് ലാപ്ടോപുകളിൽ ആപ്പിൾ ഉപയോഗിച്ചേക്കാം. ലാപ്‌ടോപ്പിന് 13 ഇഞ്ചിൽ താഴെ വലിപ്പമുള്ള ചെറിയ ഡിസ്‌പ്ലേ ഉണ്ടായിരിക്കാമെന്നും റിപ്പോർട്ടുകൾ സൂചിപ്പിക്കുന്നു.

ആപ്പിളിന്റെ പതിവ് മ്യൂട്ട് ഷേഡുകളിൽ നിന്ന് വ്യത്യസ്തമായി, പുതിയ ഫോൺ ലൈറ്റ് യെല്ലോ, ലൈറ്റ് ഗ്രീൻ, ബ്ലൂ, പിങ്ക്, സിൽവർ, ഡാർക്ക് ഗ്രേ തുടങ്ങിയ രസകരമായ നിറങ്ങളിൽ വരുമെന്ന് പറയപ്പെടുന്നു. ആപ്പിൾ സാധാരണയായി മാക്ബുക്കുകൾക്കു നൽകാറുള്ള ഡിസൈനിൽ നിന്നും ഇതിനു മാറ്റമുണ്ടാകും.

ഐഫോൺ 17e, പുതിയ M5 മാക്ബുക്കുകൾ ലോഞ്ച് ചെയ്തേക്കും:

ഐഫോൺ 17eയുടെ ലോഞ്ചിങ്ങ് ആയിരിക്കും ഈ പരിപാടിയുടെ മറ്റൊരു പ്രധാന ആകർഷണം. ഫെബ്രുവരിയിൽ ഈ ഫോൺ പുറത്തിറക്കുമെന്ന് നേരത്തെ പ്രതീക്ഷിച്ചിരുന്നെങ്കിലും മാർച്ചിലാകും അതുണ്ടാവുക. ഐഫോൺ 17e അതിന്റെ മുൻഗാമിയുടേതിനു സമാനമായ ഡിസൈൻ നിലനിർത്താൻ സാധ്യതയുണ്ട്. നോച്ചിന് പകരം ഡൈനാമിക് ഐലൻഡ് ഇതിൽ ഉൾപ്പെടുത്തുമെന്ന അഭ്യൂഹങ്ങൾ തള്ളിക്കളഞ്ഞതായും റിപ്പോർട്ടുണ്ട്.

അപ്‌ഗ്രേഡുകളുടെ കാര്യത്തിൽ, വേഗതയേറിയതും കൂടുതൽ സ്ഥിരതയുള്ളതുമായ നെറ്റ്‌വർക്ക് കണക്റ്റിവിറ്റിക്കായി ഐഫോൺ 17e-യിൽ ആപ്പിളിന്റെ പുതിയ C1X മോഡം ഉൾപ്പെടുത്താം. വേഗതയേറിയ വയർലെസ് ചാർജിംഗും മികച്ച ആക്‌സസറി അനുയോജ്യതയും അനുവദിക്കുന്ന മാഗ്‌സേഫ് ചാർജിംഗിനെ ഇത് പിന്തുണയ്ക്കുമെന്നും പ്രതീക്ഷിക്കുന്നു.

ഐഫോണിനൊപ്പം, ആപ്പിൾ മാക് ലൈനപ്പും പുതുക്കുമെന്ന് പ്രതീക്ഷിക്കുന്നു. M5 ചിപ്പ് നൽകുന്ന ഒരു പുതിയ മാക്ബുക്ക് എയർ കമ്പനി പ്രഖ്യാപിച്ചേക്കാം. കൂടാതെ, M5 പ്രോ, M5 മാക്സ് ചിപ്‌സെറ്റുകൾ ഉൾക്കൊള്ളുന്ന അപ്‌ഡേറ്റ് ചെയ്ത മാക്ബുക്ക് പ്രോ മോഡലുകളും പുറത്തിറങ്ങിയേക്കാം. ഇവൻ്റുമായി ബന്ധപ്പെട്ട കൂടുതൽ ഔദ്യോഗിക വിശദാംശങ്ങൾ വരും ദിവസങ്ങളിൽ പുറത്തുവരുമെന്ന് പ്രതീക്ഷിക്കുന്നു.