മെമ്മറി ഭാഗങ്ങളുടെ വിലക്കയറ്റം; ഗാലക്സി S26-ന് വില വർദ്ധിപ്പിക്കാൻ സാംസങ്ങ് നിർബന്ധിതരാകും

2025-ൽ പുറത്തിറക്കിയ മുൻഗാമികളെ അപേക്ഷിച്ച് ഉയർന്ന വിലയുമായി സാംസങ്ങ് ഗാലക്‌സി S26 സീരീസ് ലോഞ്ച് ചെയ്യുമെന്നാണ് പ്രതീക്ഷിക്കുന്നത്. വിലയുമായി ബന്ധപ്പെട്ട വിശദാംശങ്ങളൊന്നും കമ്പനി ഔദ്യോഗികമായി സ്ഥിരീകരിച്ചിട്ടില്ലെങ്കിലും, ദക്ഷിണ കൊറിയയിൽ നിന്നുള്ള റിപ്പോർട്ടുകൾ സൂചിപ്പിക്കുന്നത് ആഭ്യന്തര ചർച്ചകളിൽ ഇതിനകം തന്നെ വില വർദ്ധിപ്പിക്കാനുള്ള നീക്കങ്ങൾ നടക്കുന്നുണ്ടെന്നാണ്. ഫ്ലാഗ്ഷിപ്പ് സ്മാർട്ട്‌ഫോണുകളുടെ ഒരു പ്രധാന ഭാഗമായ DRAM, NAND പോലുള്ള മെമ്മറി ചിപ്പുകൾക്കു വേണ്ടിയുള്ള ചെലവുകൾ വർദ്ധിച്ചുവരുന്നതാണ് ഈ സമ്മർദ്ദത്തിന് കാരണമെന്ന് റിപ്പോർട്ടുണ്ട്. കഴിഞ്ഞ വർഷം, സമാനമായ ആശങ്കകൾക്കിടയിൽ ഗാലക്‌സി S25 ലൈനപ്പിൻ്റെ വില സ്ഥിരതയോടെ നിലനിർത്താൻ സാംസങ്ങിന്റെ മൊബൈൽ മേധാവിയായ ടി എം റോഹ് ഇടപെട്ടിരുന്നു. എന്നാൽ മെമ്മറി ചിലവുകൾ വർദ്ധിച്ചതിനാൽ ഇത്തവണ അങ്ങിനെയൊരു ഇടപെടൽ ഉണ്ടാകാൻ സാധ്യതയില്ല. നിലവിലെ സാഹചര്യങ്ങൾ നിലനിൽക്കുകയാണെങ്കിൽ, ഈ മാസം അവസാനത്തോടെ സാംസങ്ങ് തങ്ങളുടെ അടുത്ത തലമുറ ഫ്ലാഗ്ഷിപ്പ് ഉപകരണങ്ങൾ ലോഞ്ച് ചെയ്യുമ്പോൾ മിക്ക ആഗോള വിപണികളിലും വിലയിൽ ഒരു ചെറിയ വർദ്ധനവ് കാണാൻ കഴിയും.

മെമ്മറി ഭാഗങ്ങളുടെ വിലക്കയറ്റം കാരണം സാംസങ്ങിനു മറ്റു വഴികളില്ല:

വില വർദ്ധിപ്പിക്കുന്നതിനു പിന്നിലെ ഏറ്റവും പ്രധാനപ്പെട്ട കാരണം മെമ്മറി വിലകളിലെ കുതിച്ചുചാട്ടമാണ്. DRAM, NAND ഫ്ലാഷ് ചെലവുകൾ ക്രമാനുഗതമായി വർദ്ധിച്ചുകൊണ്ടിരിക്കുകയാണ്, ഇത് മൊത്തത്തിലുള്ള സ്മാർട്ട്‌ഫോൺ നിർമ്മാണ ചെലവുകളെ നേരിട്ട് ബാധിക്കുന്നു. ഫ്ലാഗ്ഷിപ്പ് ഉപകരണങ്ങൾ സാധാരണയായി ഉയർന്ന പ്രകടനമുള്ള മെമ്മറി കോൺഫിഗറേഷനുകളാണ് ഉപയോഗിക്കുന്നത്, ഇത് ചെലവ് കൂടുതൽ വർദ്ധിപ്പിക്കുന്നു.

മുൻ വർഷങ്ങളിൽ നിന്ന് വ്യത്യസ്തമായി, സപ്ലൈ ചെയിൻ

ഒപ്റ്റിമൈസേഷനിലൂടെയോ ഇൻ്റേണൽ കംപോണൻ്റ് സോഴ്സിങ്ങിലൂടെയോ ഈ വർദ്ധിച്ചുവരുന്ന ചെലവുകൾ നികത്താൻ സാംസങ്ങിന് ബുദ്ധിമുട്ടായിരിക്കും. സാംസങ്ങ് സ്വന്തമായി നിരവധി ഭാഗങ്ങൾ നിർമ്മിക്കുന്നുണ്ടെങ്കിലും, ആഗോള തലത്തിലുണ്ടായ വിലക്കയറ്റം കമ്പനിയുടെ പ്രവർത്തനങ്ങളെയും സ്വാധീനിക്കുന്നു. അതിനാൽ, കഴിഞ്ഞ വർഷത്തെ വില തന്നെ നിലനിർത്തിയാൽ ഗാലക്‌സി S26 സീരീസിൻ്റെ ലാഭത്തിൻ്റെ മാർജിൻ ഗണ്യമായി കുറയും.

ഗാലക്‌സി S25 ലൈനപ്പിനു വില ഉയർത്താൻ സാംസങ്ങ് തുടക്കത്തിൽ പരിഗണിച്ചിരുന്നതായി റിപ്പോർട്ടുകൾ സൂചിപ്പിക്കുന്നു. എന്നിരുന്നാലും, വില മാറ്റമില്ലാതെ നിലനിർത്താൻ അവസാന ഘട്ടത്തിൽ ടി.എം.റോഹ് ഇടപെട്ടതായി റിപ്പോർട്ടുണ്ട്. ഇത്തവണ, വിപണി സാഹചര്യങ്ങൾ കൂടുതൽ വെല്ലുവിളി നിറഞ്ഞതാണ് എന്നാണു കരുതേണ്ടത്.

ആപ്പിളിൻ്റെ പദ്ധതികൾ സാംസങ്ങിൻ്റെ തീരുമാനത്തെ സ്വാധീനിച്ചേക്കാം:

മുഖ്യ എതിരാളിയായ ആപ്പിളിനെതിരെയുള്ള മത്സരമാണ് സാംസങ്ങിന്റെ മറ്റൊരു ആശങ്ക. ഐഫോൺ 17 മോഡലുകളെ അപേക്ഷിച്ച് ആപ്പിൾ അതിന്റെ വരാനിരിക്കുന്ന ഐഫോൺ 18 ലൈനപ്പിന്റെ വില മാറ്റമില്ലാതെ നിലനിർത്തിയേക്കാമെന്ന് റിപ്പോർട്ടുകൾ സൂചിപ്പിക്കുന്നു. അങ്ങനെ സംഭവിച്ചാൽ, അതു സാംസങ്ങിന് ഉപയോക്താക്കളുടെ ഇടയിൽ ഒരു തിരിച്ചടി സംഭവിക്കാൻ സാധ്യതയുണ്ട്. ഘടകങ്ങളുടെ ചെലവുകൾ കൊണ്ട് ന്യായീകരിക്കപ്പെട്ടാലും ഗാലക്‌സി S26-ന്റെ ഉയർന്ന ലോഞ്ച് വില, ആപ്പിളിന് നേട്ടം നൽകിയേക്കാം. സാംസങ്ങ് ലാഭവും ആപ്പിളിനോടുള്ള മത്സരവും ശ്രദ്ധാപൂർവ്വം സന്തുലിതമാക്കി നിർത്തേണ്ടതുണ്ട്.

ഫെബ്രുവരി 25-ന് ഗാലക്‌സി S26 സീരീസ് ഔദ്യോഗികമായി ലോഞ്ച് ചെയ്യുമെന്ന് പ്രതീക്ഷിക്കുന്നു, പ്രഖ്യാപനത്തിന് തൊട്ടുപിന്നാലെ പ്രീ-ഓർഡറുകൾ ആരംഭിക്കും. മാർച്ച് രണ്ടാം വാരത്തിൽ ഫോണുകൾ ലഭ്യമായേക്കും. കൃത്യമായ വില വർദ്ധനവ് വ്യക്തമല്ലെങ്കിലും, മിക്ക വിപണികളിലും വിലയിൽ കുതിച്ചുചാട്ടം ഉണ്ടായേക്കാമെന്നാണ് എല്ലാ സൂചനകളും വിരൽ ചൂണ്ടുന്നത്. ഗാലക്സി S26 സീരീസ് വാങ്ങാൻ ആഗ്രഹിക്കുന്നവർ കൂടുതൽ തുക കയ്യിൽ കരുതേണ്ടി വരും എന്നർത്ഥം.