വാവെയുടെ കിടിലൻ വാച്ച് ഇന്ത്യയിലെത്തി

വാവെയ് വാച്ച് ഫിറ്റ് 3 സ്മാർട്ട് വാച്ച് ഇന്ത്യയിൽ പുറത്തിറക്കി. 1.82 ഇഞ്ച് വലിപ്പമുള്ള, ചതുരാകൃതിയിലുള്ള സ്‌ക്രീനുള്ള ഈ സ്മാർട്ട്‌ഫോൺ ബ്ലൂടൂത്ത് കോളിംഗിനെ പിന്തുണയ്ക്കുന്നു. ഈ വാച്ചിന് 5 ATM വാട്ടർ റെസിസ്റ്റൻസ് റേറ്റിംഗ് ഉണ്ട്. വാച്ച് ഫിറ്റ് 3 ആൻഡ്രോയിഡ്, iOS ഉപകരണങ്ങളിൽ പ്രവർത്തിക്കാൻ രൂപകൽപ്പന ചെയ്‌തിരിക്കുന്നു. വാച്ച് കൂടുതൽ എളുപ്പത്തിൽ നാവിഗേറ്റ് ചെയ്യാൻ സഹായിക്കുന്ന ഒരു റൊട്ടേറ്റിങ്ങ് ക്രൗണും (വശത്ത് ഒരു ചെറിയ ഡയൽ) ഇതിലുണ്ട്. പ്രധാന ഹൈലൈറ്റുകളിൽ ഒന്ന് ഈ വാച്ചിന്റെ ബാറ്ററി ലൈഫാണ് - ഉപയോഗത്തെ ആശ്രയിച്ച് ഒറ്റ ചാർജിൽ 10 ദിവസം വരെ ഇത് നിലനിൽക്കുമെന്ന് വാവെയ് അവകാശപ്പെടുന്നു. ഉപയോക്താക്കൾക്ക് മ്യൂസിക്ക് പ്ലേബാക്ക് നിയന്ത്രിക്കാനും അവരുടെ ഫോണിൽ നിന്ന് ചിത്രങ്ങൾ എടുക്കാൻ ഒരു റിമോട്ട് ഷട്ടറായും ഈ വാച്ച് ഉപയോഗിക്കാൻ കഴിയും. കൂടാതെ, സ്മാർട്ട് വാച്ചിൽ ഹാർട്ട് റേറ്റ് മോണിറ്ററിങ്ങ്, സ്ലീപ്പ് ട്രാക്കിംഗ്, ആക്റ്റിവിറ്റി ട്രാക്കിംഗ് തുടങ്ങിയ സവിശേഷതകളും ഉൾപ്പെടുന്നു.

വാവെയ് വാച്ച് ഫിറ്റ് 3-യുടെ വിലയും ലഭ്യതയും സംബന്ധിച്ച വിവരങ്ങൾ:

വാവെയ് വാച്ച് ഫിറ്റ് 3-ക്ക് ഇന്ത്യയിൽ 14,999 രൂപയാണ് പ്രാരംഭ വില. ഗ്രീൻ, മിഡ്‌നൈറ്റ് ബ്ലാക്ക്, മൂൺ വൈറ്റ്, നെബുല പിങ്ക് എന്നീ നാല് നിറങ്ങളിലാണ് ഇത് വരുന്നത്. ഇവയിലെല്ലാം ഫ്ലൂറോഎലാസ്റ്റോമർ സ്ട്രാപ്പുകൾ ഉണ്ട്. ഗ്രേ നൈലോൺ സ്ട്രാപ്പുള്ള ഒരു പ്രത്യേക സ്‌പേസ് ഗ്രേ വേരിയൻ്റും ഉണ്ട്. ഈ മോഡലിന് 15,999 രൂപയാണു വില വരുന്നത്.

നിലവിൽ, വാവെയ് വാച്ച് ഫിറ്റ് 3-യുടെ എല്ലാ വേരിയൻ്റുകളും ആമസോണിൽ 10,999 രൂപ എന്ന ഡിസ്കൗണ്ട് വിലയ്ക്ക് ലഭ്യമാണ്. ഇതൊരു പരിമിത സമയത്തേക്കു മാത്രമുള്ള ഓഫറാണ്. അതിനാൽ താൽപ്പര്യമുള്ളവർ ഡീൽ അവസാനിക്കുന്നതിന് മുമ്പ് വേഗത്തിൽ ഇതു സ്വന്തമാക്കേണ്ടതുണ്ട്.

വാവെയ് വാച്ച് ഫിറ്റ് 3-യുടെ പ്രധാന സവിശേഷതകൾ:

വാവെയ് വാച്ച് ഫിറ്റ് 3-ക്ക് 1.82 ഇഞ്ച് വലിപ്പമുള്ള ചതുരാകൃതിയിലുള്ള AMOLED സ്‌ക്രീൻ ഉണ്ട്. ഇത് 60Hz റിഫ്രഷ് റേറ്റ് പിന്തുണയ്ക്കുന്നു. സ്‌ക്രീൻ-ടു-ബോഡി റേഷ്യോ 77.4% ഉള്ള ഈ വാച്ചിൻ്റെ ഡിസ്പ്ലേക്ക് ഇഞ്ചിന് 347 പിക്‌സലുകൾ ഉള്ള 480x408 പിക്‌സൽ റെസല്യൂഷൻ ഉണ്ട്. സ്‌ക്രീൻ 1,500nits പീക്ക് ബ്രൈറ്റ്നസ് ലെവൽ സപ്പോർട്ടു ചെയ്യുന്നു, കൂടാതെ എപ്പോഴും ഓൺ ഡിസ്‌പ്ലേയെയും പിന്തുണയ്ക്കുന്നു.

വാച്ച് ഫിറ്റ് 3-ക്ക് നിങ്ങളുടെ ഹൃദയമിടിപ്പ്, രക്തത്തിലെ ഓക്‌സിജൻ (SpO2) അളവ്, ശ്വസന നിരക്ക് എന്നിവ ട്രാക്ക് ചെയ്യാൻ കഴിയും. നിങ്ങളുടെ ആർത്തവചക്രവും ഉറക്കവും ട്രാക്ക് ചെയ്യുന്നതിനുള്ള സവിശേഷതകളും ഇതിൽ ഉൾപ്പെടുന്നു. PPG സെൻസർ ഉപയോഗിച്ച്, A-fib (ഏട്രിയൽ ഫൈബ്രിലേഷൻ), ക്രമരഹിതമായ ഹൃദയമിടിപ്പ് എന്നിവയുടെ ലക്ഷണങ്ങൾ ഇതിന് പരിശോധിക്കാൻ കഴിയും. വാച്ച് കലോറി ഉപഭോഗം ട്രാക്ക് ചെയ്യുകയും പോഷകാഹാരങ്ങളെ സംബന്ധിച്ച വിശകലനം നൽകുകയും ചെയ്യുന്നു. നിങ്ങൾ കൂടുതൽ നേരം അലസമായിരുന്നാൽ എന്തെങ്കിലും ചെയ്യാനുള്ള ഓർമ്മപ്പെടുത്തലും ഇതിലുണ്ട്. ബിൽറ്റ്-ഇൻ GPS സഹിതമാണ് ഇത് വരുന്നത്, കൂടാതെ നിരവധി പ്രീസെറ്റ് വർക്ക്ഔട്ട് മോഡുകളും ഇതിലുണ്ട്.

ഈ സ്മാർട്ട് വാച്ചിൽ 400mAh ബാറ്ററിയുണ്ട്. ഒരു ചാർജിൽ 10 ദിവസം വരെ ഇത് നിലനിൽക്കുമെന്ന് വാവെയ് പറയുന്നു. സാധാരണ ഉപയോഗത്തിൽ, ഇത് ഏകദേശം 7 ദിവസവും, Always-On Display ഓണാക്കിയിട്ടുണ്ടെങ്കിൽ 4 ദിവസവും പ്രവർത്തിക്കും.

വാവെയ് വാച്ച് ഫിറ്റ് 3 ബ്ലൂടൂത്ത് കോളിംഗിനെ പിന്തുണയ്ക്കുന്നു. സംഗീതവും ഫോണിന്റെ ക്യാമറയും നിയന്ത്രിക്കാനും നിങ്ങൾക്ക് ഇത് ഉപയോഗിക്കാം. ഇതിന് 5 ATM വാട്ടർ റെസിസ്റ്റൻസ് റേറ്റിംഗ് ഉണ്ട്, അതായത് 50 മീറ്റർ വരെയുള്ള ജല സമ്മർദ്ദം കൈകാര്യം ചെയ്യാൻ ഇതിന് കഴിയും. എളുപ്പത്തിലുള്ള കൺട്രോളുകൾക്കായി ഒരു റൊട്ടേറ്റിങ്ങ് ക്രൗൺ വാച്ചിന്റെ വലതുവശത്തും, അതിനു താഴെ ഒരു ഫംഗ്ഷൻ ബട്ടണും ഉണ്ട്. ഈ വാച്ചിന് 9.9mm കനവും 26 ഗ്രാം ഭാരവുമുണ്ട്.