ഇന്ത്യൻ സ്മാർട്ട്ഫോൺ വിപണിയിലേക്ക് സാംസങ്ങ് ഗാലക്സി F16 എത്തുന്നു

സാംസങ് ഗാലക്‌സി F16 എന്ന ഏറ്റവും പുതിയ സ്മാർട്ട്‌ഫോൺ ഉടൻ തന്നെ ഇന്ത്യയിൽ അവതരിപ്പിക്കും. കമ്പനി ഇതുവരെ ലോഞ്ച് തീയതി ഔദ്യോഗികമായി പ്രഖ്യാപിച്ചിട്ടില്ലെങ്കിലും ഫോണിൻ്റെ സവിശേഷതകളും പ്രതീക്ഷിക്കുന്ന വിലയും സംബന്ധിച്ച ചില വിശദാംശങ്ങൾ ഇതിനകം ഓൺലൈനിൽ പ്രത്യക്ഷപ്പെട്ടിട്ടുണ്ട്. ലീക്കുകളിൽ നിിന്നുള്ള വിവരങ്ങൾ അനുസരിച്ച്, സാംസങ് ഗാലക്‌സി F16 മീഡിയടെക് ഡൈമെൻസിറ്റി 6300 പ്രൊസസറുമായാണ് വരുന്നത്, ഫോണിന് ട്രിപ്പിൾ റിയർ ക്യാമറ സെറ്റപ്പും ഉണ്ടാകുമെന്ന് പ്രതീക്ഷിക്കുന്നു, മെയിൻ ക്യാമറ 50 മെഗാപിക്സലാണ്. ഉയർന്ന നിലവാരമുള്ള ഫോട്ടോകൾ എടുക്കാൻ ഇത് സഹായിക്കും. ഗാലക്സി F16 ഇതിനു മുൻപു പുറത്തു വന്ന ഗാലക്സി A16 5G ഫോണിൻ്റെ റീബ്രാൻഡഡ് പതിപ്പായിരിക്കുമെന്ന് റിപ്പോർട്ടുകൾ സൂചിപ്പിക്കുന്നു. ഇതിനർത്ഥം രണ്ട് ഫോണുകൾക്കും സമാനമായ സവിശേഷതകൾ ഉണ്ടായിരിക്കാം എന്നാണ്. ഇത് ശരിയാണെങ്കിൽ, F16 5G കണക്റ്റിവിറ്റിയെ പിന്തുണയ്‌ക്കും. ബജറ്റ് ഫ്രണ്ട്ലി 5G ഫോണിനായി തിരയുന്ന ഉപയോക്താക്കൾക്ക് ഇതു മികച്ചൊരു തിരഞ്ഞെടുപ്പായി മാറും.

ഇന്ത്യയിൽ സാംസങ്ങ് ഗാലക്സി F16 ഫോണിനു പ്രതീക്ഷിക്കുന്ന വില:

ടിപ്സ്റ്ററായ ദേബയാൻ റോയ് (@Gadgetsdata) സാമൂഹ്യമാധ്യമമായ എക്സിൽ സാംസങ്ങ് ഗാലക്സി F16 ഫോണിനെ കുറിച്ചുള്ള ചില വിശദാംശങ്ങൾ പങ്കിട്ടു. അദ്ദേഹത്തിൻ്റെ പോസ്റ്റ് അനുസരിച്ച്, ഇന്ത്യയിൽ ഗാലക്സി F16 ഫോണിൻ്റെ വില 15,000 രൂപയിൽ താഴെയായിരിക്കും. താരതമ്യം ചെയ്യുകയാണെങ്കിൽ, 8 ജിബി റാമും 128 ജിബി സ്റ്റോറേജുമുള്ള ഗാലക്‌സി A16 2024 ഒക്ടോബറിൽ 18,999 രൂപയ്ക്കാണ് സാംസങ് ഇന്ത്യയിൽ അവതരിപ്പിച്ചത്.

സാംസങ്ങ് ഗാലക്സി F16 ഫോണിനു പ്രതീക്ഷിക്കുന്ന സവിശേഷതകൾ:

ഗാലക്സി F16 ഫോണിന് 6.7 ഇഞ്ച് ഫുൾ HD+ AMOLED ഡിസ്‌പ്ലേ, 90Hz റിഫ്രഷ് റേറ്റ് എന്നിവ ഉണ്ടായിരിക്കുമെന്ന് പ്രതീക്ഷിക്കുന്നു. ഇത് മീഡിയടെക്കിൻ്റെ ഡൈമെൻസിറ്റി 6300 പ്രൊസസറിൽ (6nm) പ്രവർത്തിക്കുകയും 8GB LPDDR4X റാമുമായി വരികയും ചെയ്തേക്കാം. 50 മെഗാപിക്സൽ പ്രധാന ക്യാമറ, 5 മെഗാപിക്സൽ അൾട്രാ വൈഡ് ക്യാമറ, മൂന്നാമതൊരു സെൻസർ (ഇതിൻ്റെ വിശദാംശങ്ങൾ വ്യക്തമാക്കിയിട്ടില്ല) എന്നിവയുൾപ്പെടെ ട്രിപ്പിൾ റിയർ ക്യാമറ സജ്ജീകരണമാണ് ഫോണിൻ്റെ സവിശേഷത.

സെൽഫികൾക്കും വീഡിയോ കോളുകൾക്കുമായി, ഫോണിന് 13 മെഗാപിക്സൽ ഫ്രണ്ട് ക്യാമറ ഉണ്ടായിരിക്കാം. ഇതിന് 25W ഫാസ്റ്റ് ചാർജിംഗിനെയും പിന്തുണയ്ക്കാൻ കഴിയും. രസകരമെന്നു പറയട്ടെ, ഈ സവിശേഷതകൾ ഗാലക്സി A16 ഫോണിന് സമാനമാണ്.

അടുത്തിടെ, ഫ്ലിപ്പ്കാർട്ട് ഇന്ത്യയിൽ ഒരു പുതിയ ഗാലക്‌സി F സീരീസ് ഫോൺ ലോഞ്ച് ചെയ്യാൻ പോകുന്നതിനെ കുറിച്ചുള്ള സൂചനകൾ നൽകിയിരുന്നു. ഇത് ഗാലക്‌സി F16 5G ആയിരിക്കാനുള്ള സാധ്യതയുണ്ട്. ഗാലക്സി F16 (മോഡൽ നമ്പർ SM-E166P/DS) എന്നതിനായുള്ള ഒരു സപ്പോർട്ടിങ്ങ് പേജ് ഇപ്പോൾ സാംസങ് ഇന്ത്യയുടെ വെബ്‌സൈറ്റിൽ ലൈവ് ആയിട്ടുണ്ട്. ഡ്യുവൽ-ബാൻഡ് വൈ-ഫൈ കണക്റ്റിവിറ്റിയെ പിന്തുണയ്ക്കുമെന്ന് സ്ഥിരീകരിക്കുന്ന വൈഫൈ അലയൻസ് ഡാറ്റാബേസിലും ഈ ഫോണിനെ കണ്ടെത്തിയിട്ടുണ്ട്.