ഇന്ത്യൻ വിപണിയിലേക്ക് റിയൽമി P4x ഉടനെയെത്തും; റിയൽമി വാച്ച് 5-ഉം ഒപ്പമുണ്ടാകും

റിയൽമിയുടെ പുതിയ സ്മാർട്ട്ഫോണായ റിയൽമി P4x 5G ഡിസംബറിൻ്റെ തുടക്കത്തിൽ ഇന്ത്യയിൽ എത്തുമെന്നും പുതിയ റിയൽമി വാച്ച് 5-നൊപ്പം ഇത് പുറത്തിറങ്ങുമെന്നും കമ്പനി സ്ഥിരീകരിച്ചു. ബുധനാഴ്ചയാണ് കമ്പനി ഈ അപ്‌ഡേറ്റ് പങ്കുവെച്ചത്. ഫ്ലിപ്കാർട്ടിൽ ഫോണിനായുള്ള ഒരു പ്രത്യേക പ്രൊഡക്റ്റ് പേജ് ഇതിനകം ലൈവ് ആയിട്ടുണ്ട്, ഔദ്യോഗികമായി ലോഞ്ച് ചെയ്തു കഴിഞ്ഞാൽ ഫോൺ ഫ്ലിപ്കാർട്ടിലൂടെ വിൽക്കപ്പെടുമെന്ന സൂചന ഇതു നൽകുന്നു. P4x 5G-യുടെ ചില പ്രധാന സവിശേഷതകളും റിയൽമി വെളിപ്പെടുത്തുന്നുണ്ട്. ഇതുവരെ പങ്കിട്ട വിശദാംശങ്ങൾ അനുസരിച്ച്, ഈ സ്മാർട്ട്‌ഫോൺ മീഡിയടെക് ഡൈമെൻസിറ്റി 7000 സീരീസ് പ്രോസസറിൽ പ്രവർത്തിക്കും. ഫോണിന്റെ ഏറ്റവും വലിയ ഹൈലൈറ്റുകളിൽ ഒന്ന് അതിന്റെ വലിയ 7,000mAh ബാറ്ററിയാണ്. കൂടാതെ ഉപയോക്താക്കൾക്ക് വേഗത്തിൽ റീചാർജ് ചെയ്യാൻ കഴിയുന്ന തരത്തിൽ 45W വയർഡ് ഫാസ്റ്റ് ചാർജിംഗിനുള്ള പിന്തുണയും റിയൽമി ചേർക്കുന്നു. ലോഞ്ച് അടുക്കുന്തോറും ഫോണിൻ്റെ വില, ഡിസൈൻ, ക്യാമറ, സോഫ്റ്റ്‌വെയർ എന്നിവയെക്കുറിച്ചുള്ള കൂടുതൽ വിവരങ്ങൾ പുറത്തു വരുമെന്നു പ്രതീക്ഷിക്കുന്നു.

റിയൽമി P4x, റിയൽമി വാച്ച് 5 എന്നിവയുടെ ഇന്ത്യയിലെ ലോഞ്ച് തീയ്യതി:

ഇന്ത്യയിൽ പുതിയ സ്മാർട്ട്‌ഫോണും സ്മാർട്ട് വാച്ചും ഉടനെ പുറത്തിറക്കുമെന്ന് റിയൽമി സ്ഥിരീകരിച്ചു. റിയൽമി P4x 5G എന്ന ഫോണും റിയൽമി വാച്ച് 5 എന്ന സ്മാർട്ട് വാച്ചുമാണു ലോഞ്ചിങ്ങിന് ഒരുങ്ങുന്നത്. ഡിസംബർ 4-ന് ഉച്ചയ്ക്ക് 12 മണിക്ക് ലോഞ്ച് ഇവന്റ് നടക്കും. ലോഞ്ചിന് മുന്നോടിയായി രണ്ട് ഡിവൈസുകളുടെയും ചില പ്രധാന സവിശേഷതകളും കമ്പനി പങ്കുവച്ചിട്ടുണ്ട്. പ്രഖ്യാപനമനുസരിച്ച്, ഫോണും സ്മാർട്ട് വാച്ചും ഫ്ലിപ്പ്കാർട്ടിലൂടെ ഇന്ത്യയിൽ ലഭ്യമാകും.

റിയൽമി P4x, റിയൽമി വാച്ച് 5 എന്നിവയുടെ സവിശേഷതകൾ:

പെർഫോമൻസിൽ ശ്രദ്ധ കേന്ദ്രീകരിക്കുന്ന ഉപയോക്താക്കളെ ലക്ഷ്യം വച്ച്, വരാനിരിക്കുന്ന റിയൽമി P4x 5G-യുടെ വിശദമായ സവിശേഷതകൾ കമ്പനി പങ്കുവച്ചിട്ടുണ്ട്. AnTuTu ബെഞ്ച്മാർക്ക് ടെസ്റ്റിൽ 7,80,000 പോയിന്റുകൾ നേടിയതായി കമ്പനി പറയുന്ന മീഡിയാടെക് ഡൈമൻസിറ്റി 7400 അൾട്രാ 5G ചിപ്‌സെറ്റിലാണ് ഫോൺ പ്രവർത്തിക്കുക. 144Hz റിഫ്രഷ് റേറ്റുള്ള ഡിസ്‌പ്ലേയും ഈ ഫോണിൽ ഉണ്ടായിരിക്കും, ഇത് സ്ക്രോളിംഗും ആനിമേഷനുകളും സുഗമമാക്കുന്നു. 18GB വരെ ഡൈനാമിക് റാമും 256GB ഇന്റേണൽ സ്റ്റോറേജും ഫോൺ വാഗ്ദാനം ചെയ്യുമെന്നും റിയൽമി കൂട്ടിച്ചേർക്കുന്നു.

റിയൽമി P4x 5G-യിൽ വലിയ 7,000mAh ടൈറ്റൻ ബാറ്ററി ഉൾപ്പെടും, ഇത് 45W വയർഡ് ഫാസ്റ്റ് ചാർജിംഗിനെ പിന്തുണയ്ക്കുകയും ചെയ്യും. ഗെയിമർമാർക്ക്, ബാറ്റിൽഗ്രൗണ്ട്സ് മൊബൈൽ ഇന്ത്യയിൽ (BGMI) 90fps വരെയും ഫ്രീ ഫയറിൽ 120fps വരെയും ഗെയിംപ്ലേയെ ഈ ഹാൻഡ്സെറ്റ് പിന്തുണയ്ക്കുമെന്ന് പറയപ്പെടുന്നു. നീണ്ട ഗെയിമിംഗ് സെഷനുകളിൽ അമിതമായി ചൂടാകുന്നത് തടയാൻ, റിയൽമി 5,300 ചതുരശ്ര മില്ലീമീറ്റർ വിസ്തീർണ്ണമുള്ള ഒരു വേപ്പർ ചേമ്പർ കൂളിംഗ് സിസ്റ്റം ചേർത്തിട്ടുണ്ട്. ഈ ഡിസൈനിന് സിപിയു ടെംപറേച്ചർ 20 ഡിഗ്രി സെൽഷ്യസ് വരെ കുറയ്ക്കാൻ കഴിയുമെന്ന് കമ്പനി അവകാശപ്പെടുന്നു.

ഇതിനൊപ്പം റിയൽമി വാച്ച് 5-ഉം ലോഞ്ച് ചെയ്യാൻ ഒരുങ്ങുകയാണ് റിയൽമി. 1.97 ഇഞ്ച് അമോലെഡ് ഡിസ്‌പ്ലേയും ചതുരാകൃതിയിലുള്ള ഫ്രെയിമും ഈ സ്മാർട്ട് വാച്ചിൽ ഉണ്ടാകും. 2D ഫ്ലാറ്റ് ഗ്ലാസ് കവർ, അലുമിനിയം അലോയ് ക്രൗൺ, മെറ്റാലിക് യൂണി-ബോഡി ഡിസൈൻ എന്നിവ ഇതിൽ ഉൾപ്പെടുന്നു. വാച്ച് 5- ഹണികോമ്പ്-സ്റ്റൈൽ സ്പീക്കർ ഹോളുകളും ഉണ്ടായിരിക്കും. ഈ വാച്ച് ലൈറ്റ് മോഡിൽ 20 ദിവസം വരെ ബാറ്ററി ലൈഫ് നൽകുമെന്ന് റിയൽമി അവകാശപ്പെടുന്നു.