സ്പേസ് എക്സ് റോക്കറ്റ് ചന്ദ്രനിൽ പതിക്കാനൊരുങ്ങുന്നു: അപൂർവ്വ ബഹിരാകാശ നിമിഷത്തിന് സാക്ഷ്യം വഹിക്കാൻ ശാസ്ത്രലോകം

സ്‌പേസ് എക്‌സിന്റെ റോക്കറ്റ് ചന്ദ്രനിൽ പതിക്കാൻ പോകുന്നു! അതെ, ഇലോൺ മസ്‌കിന്റെ കമ്പനിയായ സ്‌പേസ് എക്‌സ് നിർമ്മിച്ച റോക്കറ്റുകളിലൊന്ന് ചന്ദ്രന്റെ ഉപരിതലത്തിൽ പതിക്കുമെന്നാണ് പ്രതീക്ഷിക്കുന്നത്. റിപ്പോർട്ടുകൾ പ്രകാരം, ഈ സംഭവം ഭൂമിയിൽ നിന്നും നിരീക്ഷിക്കാൻ സാധിച്ചേക്കാം. വരും ദിവസങ്ങളിൽ ചന്ദ്രനുമായി കൂട്ടിയിടിക്കുമെന്ന് കരുതപ്പെടുന്നത് ഫാൽക്കൺ 9 റോക്കറ്റിന്റെ അപ്പർ സ്റ്റേജ് (മുകൾ ഭാഗം) ആയിരിക്കും. 2025 ജനുവരി 15-നാണ് സ്‌പേസ് എക്‌സ് ഈ റോക്കറ്റ് വിക്ഷേപിച്ചത്. ചന്ദ്രനിലേക്ക് ലൂണാർ ലാൻഡറുകളെ എത്തിക്കുകയായിരുന്നു ഇതിന്റെ ലക്ഷ്യം. ദൗത്യം വിജയകരമായിരുന്നെങ്കിലും റോക്കറ്റിന്റെ അപ്പർ സ്റ്റേജ് ബഹിരാകാശത്ത് തന്നെ അവശേഷിച്ചു.

വരും ദിവസങ്ങളിൽ നടക്കാൻ സാധ്യതയുള്ള ഈ കൂട്ടിയിടി ഭൂമിയിൽ നിന്നും നിരീക്ഷിക്കാൻ സാധിച്ചേക്കും. 2025 ജനുവരി 15-ന് സ്‌പേസ് എക്‌സ് രണ്ട് ലൂണാർ ലാൻഡറുകൾ വിക്ഷേപിച്ചപ്പോൾ ബഹിരാകാശത്ത് ഉപേക്ഷിക്കപ്പെട്ട റോക്കറ്റിന്റെ അപ്പർ സ്റ്റേജ്, അന്നുമുതൽ ചന്ദ്രനെ വലംവെച്ചു വരികയായിരുന്നു. 12 മീറ്റർ നീളവും 4 മീറ്റർ വീതിയും 4,000 കിലോഗ്രാം ഭാരവുമുള്ള ഈ ഭാഗമാണ് ഇപ്പോൾ ചന്ദ്രന്റെ ഉപരിതലത്തിൽ പതിക്കാൻ പോകുന്നത്. 2026 ഓഗസ്റ്റ് 5-ന് മണിക്കൂറിൽ ഏകദേശം 8,700 കിലോമീറ്റർ വേഗതയിലായിരിക്കും ഇത് ചന്ദ്രനിൽ ചെന്ന് ഇടിക്കുക എന്ന് കണക്കാക്കപ്പെടുന്നു.

ചന്ദ്രന്റെ ഉപരിതലത്തിൽ ഏകദേശം 30 മീറ്റർ വീതിയും 5 മീറ്റർ ആഴവുമുള്ള വലിയൊരു ഗർത്തം സൃഷ്ടിക്കാൻ മാത്രം ശക്തമായിരിക്കും ഈ കൂട്ടിയിടിയെന്നാണ് ശാസ്ത്രജ്ഞർ കണക്കാക്കുന്നത്. റോക്കറ്റ് ചെന്ന് ഇടിക്കുന്നതോടെ വലിയ അളവിൽ പൊടിയും അവശിഷ്ടങ്ങളും ഉയർന്നു പൊങ്ങാൻ സാധ്യതയുണ്ട്. എന്നാൽ, കൃത്രിമ വെളിച്ചങ്ങളോ പ്രകാശമലിനീകരണമോ ഇല്ലാത്ത ഇരുണ്ട സ്ഥലങ്ങളിൽ, തെളിഞ്ഞ ആകാശമുള്ളപ്പോൾ മാത്രമേ ഒരു ടെലിസ്‌കോപ്പിന്റെ സഹായത്തോടെ ഭൂമിയിൽ നിന്ന് ഇത് നിരീക്ഷിക്കാൻ സാധിക്കൂ.

ഈ കൂട്ടിയിടി ചന്ദ്രന്റെ അന്തരീക്ഷത്തിലും ഉപരിതലത്തിലും ഉണ്ടാക്കുന്ന മാറ്റങ്ങളെക്കുറിച്ച് പഠിക്കാമെന്ന ആവേശത്തിലാണ് ശാസ്ത്രജ്ഞർ. ബഹിരാകാശ പ്രേമികൾക്കും വാനശാസ്ത്ര കൗതുകമുള്ളവർക്കും ടെലിസ്‌കോപ്പിലൂടെ കണ്ടുസ്വയം അനുഭവിക്കാവുന്ന അപൂർവ്വമായ ഒരു ബഹിരാകാശ പ്രതിഭാസമായിരിക്കും ഇത്.