ആപ്പിൾ എയർടാഗിന് ബദലായി ഗൂഗിൾ പിക്സൽ ടാഗ്: അറിയേണ്ടതെല്ലാം

ആപ്പിൾ എയർടാഗിന് ശക്തമായ വെല്ലുവിളിയുയർത്തി ഗൂഗിളിന്റെ ആദ്യ ബ്ലൂടൂത്ത് ട്രാക്കറായ 'ഗൂഗിൾ പിക്സൽ ടാഗ്' ഇന്ത്യയിൽ പുറത്തിറങ്ങി. ബുധനാഴ്ച ഔദ്യോഗികമായി അവതരിപ്പിച്ച ഈ ഉപകരണം, ഇന്ത്യൻ വിപണിക്ക് പുറമെ മറ്റ് അന്താരാഷ്ട്ര വിപണികളിലും ലഭ്യമാകും. ഈ വർഷം അവസാനത്തോടെ ഗൂഗിളിന്റെ ഔദ്യോഗിക ഓൺലൈൻ സ്റ്റോറിലൂടെ വിൽപന ആരംഭിക്കുമെങ്കിലും, ഉപകരണത്തിന്റെ വിലയും മറ്റ് പ്രധാന സവിശേഷതകളും കമ്പനി ഇപ്പോൾത്തന്നെ വെളിപ്പെടുത്തിയിട്ടുണ്ട്.

ഇന്ത്യയിൽ ഒരെണ്ണമായിട്ടോ നാലെണ്ണത്തിന്റെ സെറ്റായോ ഉപഭോക്താക്കൾക്ക് പിക്സൽ ടാഗ് സ്വന്തമാക്കാം. ചെറിയൊരു ആറ്റുകല്ലിന്റെ (pebble) ആകൃതിയിൽ മനോഹരമായി ഡിസൈൻ ചെയ്തിരിക്കുന്ന കേസിന്റെ മുൻവശത്തായി ഗൂഗിളിന്റെ ലോഗോയും എൽ.ഇ.ഡി (LED) ഇൻഡിക്കേറ്ററും നൽകിയിട്ടുണ്ട്.

ഗൂഗിൾ പിക്സൽ ടാഗ്: ഇന്ത്യയിലെ വിലയും ലഭ്യതയും

ഇന്ത്യൻ വിപണിയിൽ ഗൂഗിൾ പിക്സൽ ടാഗിന്റെ സിംഗിൾ പാക്കിന് 3,799 രൂപയാണ് വില. നാലെണ്ണമടങ്ങിയ പാക്കിന് 12,900 രൂപയും നൽകണം. തങ്ങളുടെ ആദ്യ ബ്ലൂടൂത്ത് ട്രാക്കർ വരും നവംബറിൽ ഗൂഗിൾ ഇന്ത്യയുടെ ഔദ്യോഗിക ഓൺലൈൻ സ്റ്റോർ വഴി ലഭ്യമാകുമെന്ന് കമ്പനി പ്രഖ്യാപിച്ചു. 'ഫോഗ്' (Fog) എന്ന ഒരൊറ്റ കളർ ഓപ്ഷനിൽ മാത്രമാണ് ഇത് വിൽപ്പനയ്‌ക്കെത്തുന്നത്.

ഗൂഗിൾ പിക്സൽ ടാഗ്: പ്രധാന സവിശേഷതകൾ

ഗൂഗിളിന്റെ ആദ്യ ബ്ലൂടൂത്ത് ട്രാക്കറായ 'ഗൂഗിൾ പിക്സൽ ടാഗ്', വസ്തുക്കളുടെ കൃത്യമായ സ്ഥാനം കണ്ടെത്താനായി ബ്ലൂടൂത്ത് ചാനൽ സൗണ്ടിംഗ് (Bluetooth Channel Sounding), അൾട്രാ-വൈഡ്ബാൻഡ് (Ultra-Wideband) സാങ്കേതികവിദ്യകളോടെയാണ് എത്തുന്നത്. കമ്പനിയുടെ 'ഫൈൻഡ് ഹബ്ബുമായി' (Find Hub) ഇത് സംയോജിപ്പിച്ചിട്ടുള്ളതിനാൽ, കൃത്യമായ ദിശാസൂചനകൾ പിന്തുടർന്ന് ഉപഭോക്താക്കൾക്ക് ഇത് വളരെ എളുപ്പത്തിൽ തിരഞ്ഞുപിടിക്കാം. കൂടാതെ, മറ്റ് ഗൂഗിൾ പിക്സൽ ഡിവൈസുകളുമായി നിമിഷനേരം കൊണ്ട് കണക്റ്റ് ചെയ്യാൻ സഹായിക്കുന്ന 'ഫാസ്റ്റ് പെയർ' (Fast Pair) സവിശേഷതയും ഈ ട്രാക്കറിലുണ്ട്.

ഇൻ-ബിൽറ്റ് സ്പീക്കറോടെയാണ് ഗൂഗിളിന്റെ ഈ പുതിയ ബ്ലൂടൂത്ത് ട്രാക്കർ എത്തുന്നത്. ടാ​ഗ് എവിടെയാണെന്ന് കണ്ടെത്താൻ പിക്സൽ ഫോണിലെ 'ഫൈൻഡ് ഹബ്' (Find Hub) ആപ്പ് വഴി റിമോട്ടായി അലാറം മുഴക്കാൻ ഉപഭോക്താക്കൾക്ക് സാധിക്കും. ഇതുകൂടാതെ, ഫോൺ എവിടെയെങ്കിലും വെച്ച് മറന്നാൽ അത് കണ്ടുപിടിക്കാൻ സഹായിക്കുന്ന ഒരു പ്രത്യേക ബട്ടണും ടാഗിലുണ്ട്. ഫോൺ സൈലന്റ് മോഡിലാണെങ്കിൽ പോലും ഈ ബട്ടൺ അമർത്തിയാൽ ഫോണിൽ അലാറം ശബ്ദിക്കും.

കൂടാതെ, പിക്സൽ ഫോണിലൂടെ ജെമിനി (Gemini) എഐ അസിസ്റ്റന്റിനോട് ആവശ്യപ്പെട്ടും പിക്സൽ ടാഗ് റിംഗ് ചെയ്യിക്കാം. ഉപഭോക്താക്കൾക്ക് തന്നെ എളുപ്പത്തിൽ മാറ്റിസ്ഥാപിക്കാവുന്ന CR2032 കോയിൻ സെൽ ബാറ്ററിയാണ് ഇതിൽ നൽകിയിട്ടുള്ളത്. ഒരു വർഷത്തിലധികം ഈ ബാറ്ററി ആയുസ്സ് ലഭിക്കുമെന്നാണ് കമ്പനി അവകാശപ്പെടുന്നത്. പൊടിയെയും വെള്ളത്തെയും പ്രതിരോധിക്കാൻ IP67 റേറ്റിംഗുള്ള ഈ ഉപകരണത്തിന്, ഒരു മീറ്റർ ആഴമുള്ള വെള്ളത്തിൽ 30 മിനിറ്റ് വരെ കേടുപാടുകൾ കൂടാതെ ഇരിക്കാൻ സാധിക്കും.

ആൻഡ്രോയിഡ് 9 അല്ലെങ്കിൽ അതിനുശേഷമുള്ള പതിപ്പുകളിൽ പ്രവർത്തിക്കുന്ന ഫോണുകളിൽ ഗൂഗിൾ പിക്സൽ ടാഗ് ഉപയോഗിക്കാം. പോളികാർബണേറ്റും മെറ്റലും ചേർത്ത് നിർമ്മിച്ചിരിക്കുന്ന ഇതിൽ ഒരു ആക്സിലറോമീറ്ററും ഉൾപ്പെടുത്തിയിട്ടുണ്ട്. ഒരു വർഷത്തെ വാറണ്ടിയാണ് ഈ ട്രാക്കറിന് ഗൂഗിൾ നൽകുന്നത്. 28x46.1x5.4 മില്ലീമീറ്റർ വലിപ്പമുള്ള ഈ ഉപകരണത്തിന് ഏകദേശം 11.8 ഗ്രാം മാത്രമാണ് ഭാരം.