റെഡ്മി K90 സീരീസിലെ മൂന്നാമൻ എത്തുന്നു; റെഡ്മി K90 അൾട്രയുടെ സവിശേഷതകൾ പുറത്ത്

റെഡ്മി K90, K90 പ്രോ മാക്സ് എന്നീ ഫോണുകൾ ഒക്ടോബറിലാണ് ചൈനയിൽ ലോഞ്ച് ചെയ്തത്. ഈ സീരീസിൻ്റെ ഭാഗമായി റെഡ്മി K90 അൾട്രാ എന്ന ഫോൺ കൂടി പുറത്തു വരുമെന്ന് നേരത്തെ തന്നെ അഭ്യൂഹങ്ങൾ ഉണ്ടായിരുന്നു. ഇപ്പോൾ ഈ അൾട്രാ മോഡലുമായി ബന്ധപ്പെട്ടുള്ള ഷവോമിയുടെ പദ്ധതികൾ ടിപ്സ്റ്ററായ ഡിജിറ്റൽ ചാറ്റ് സ്റ്റേഷൻ പുറത്തു വിട്ടിട്ടുണ്ട്. ഇതുവരെ ഒരു വിവരവും ഔദ്യോഗികമായി സ്ഥിരീകരിച്ചിട്ടില്ലെങ്കിലും നിലവിലുള്ള ഫോണുകളുടെ കൂടുതൽ മെച്ചപ്പെടുത്തിയ ഒരു വേരിയൻ്റിൽ ഷവോമി പ്രവർത്തിക്കുന്നുണ്ടെന്ന് റിപ്പോർട്ടുകൾ സൂചിപ്പിക്കുന്നു. ലീക്കുകൾ പ്രകാരം, റെഡ്മി K90 അൾട്രാ വലുതും സുഗമവുമായ ഡിസ്പ്ലേ, മികച്ച ബാറ്ററി, ഉയർന്ന പെർഫോമൻസ് ലക്ഷ്യമിട്ടുള്ള ഹാർഡ്‌വെയർ എന്നിവയുമായി വന്നേക്കാം. ഈ അപ്‌ഗ്രേഡുകൾ ഇതിനെ K സീരീസ് ലൈനപ്പിലെ ഏറ്റവും ശക്തമായ മോഡലുകളിൽ ഒന്നാക്കി മാറ്റാൻ സാധ്യതയുണ്ട്. മുമ്പത്തെ K90 മോഡലുകൾ ഷവോമിയുടെ ഹൈപ്പർഒഎസ് 3-ൽ പ്രവർത്തിക്കുകയും ബോസ്-ട്യൂൺ ചെയ്ത സ്പീക്കറുകൾ അവതരിപ്പിക്കുകയും ചെയ്തിരുന്നു, അതിനാൽ അൾട്രാ പതിപ്പിലും ഇതൊക്കെ പ്രതീക്ഷിക്കുന്നു.

റെഡ്മി K90 അൾട്രയിൽ പ്രതീക്ഷിക്കുന്ന സവിശേഷതകൾ:

ടിപ്‌സ്റ്റർ ഡിജിറ്റൽ ചാറ്റ് സ്റ്റേഷൻ്റെ പുതിയ വെയ്‌ബോ പോസ്റ്റ് അവകാശപ്പെടുന്നത് റെഡ്മി K90 അൾട്രായിൽ 6.81 ഇഞ്ച് മുതൽ 6.89 ഇഞ്ച് വരെ വലുപ്പമുള്ള എൽ‌ടി‌പി‌എസ് ഒ‌എൽ‌ഇഡി ഡിസ്‌പ്ലേ ഉണ്ടാകുമെന്നാണ്. സ്‌ക്രീനിൽ 1.5K റെസല്യൂഷൻ, 165 ഹെർട്‌സ് റിഫ്രഷ് റേറ്റ്, റൗണ്ടഡ് എഡ്ജസ് എന്നിവ ഉണ്ടാകുമെന്നാണ് പ്രതീക്ഷിക്കുന്നത്. ഫോൺ കൂടുതൽ ശക്തമാക്കാൻ ഷവോമി ഒരു മെറ്റൽ മിഡിൽ ഫ്രെയിമും ഉപയോഗിച്ചേക്കാം. മികച്ച വാട്ടർ റെസിസ്റ്റൻസ്, ഡിസ്‌പ്ലേയ്ക്ക് കീഴിലുള്ള അൾട്രാസോണിക് ഫിംഗർപ്രിന്റ് സെൻസർ, അപ്‌ഗ്രേഡുചെയ്‌ത സ്പീക്കറുകൾ എന്നിവയാണ് മറ്റ് സവിശേഷതകൾ.

റെഡ്മി K90 അൾട്രായിലെ ബാറ്ററി 8,000mAh, അല്ലെങ്കിൽ അതിനേക്കാൾ വലുത് ആയിരിക്കാൻ സാധ്യതയുണ്ട്. K90 പ്രോ മാക്സിലും പഴയ അൾട്രാ മോഡലുകളിലും കാണുന്ന 7,560mAh ബാറ്ററിയെ അപേക്ഷിച്ചു നോക്കുമ്പോൾ ഇതൊരു അപ്ഗ്രേഡാണ്. മികച്ച കസ്റ്റമർ എക്സ്പീരിയൻസിനായി, പ്രത്യേകിച്ച് ഗെയിമിംഗ് സമയത്ത്, ഫോൺ ഒരു പ്രത്യേക ഹൈ-ഫ്രെയിം-റേറ്റ് സോഫ്റ്റ്‌വെയർ ലെയറും ഉപയോഗിച്ചേക്കാം.

ഫോൺ മീഡിയടെക് ഡൈമെൻസിറ്റി 9-സീരീസ് പ്രോസസറിലാകും പ്രവർത്തിക്കുക. ഒരുപക്ഷേ വരാനിരിക്കുന്ന ഡൈമെൻസിറ്റി 9500 പ്ലസ് ആയിരിക്കാം ഇതിലെ പ്രോസസർ. ക്യാമറയുമായി ബന്ധപ്പെട്ട വിശദാംശങ്ങളൊന്നും ഇതുവരെ അറിവായിട്ടില്ല, പക്ഷേ ഫോട്ടോഗ്രാഫിയേക്കാൾ പെർഫോമൻസിലാണ് ഷവോമി കൂടുതൽ ശ്രദ്ധ കേന്ദ്രീകരിക്കുന്നതെന്ന് ടിപ്സ്റ്റർ വിശ്വസിക്കുന്നു. ഷവോമി K80 അൾട്രയുടെ ഷെഡ്യൂൾ പിന്തുടർന്ന് 2026 മധ്യത്തോടെ റെഡ്മി K90 അൾട്ര ചൈനയിൽ ലോഞ്ച് ചെയ്തേക്കാം, അതിനു ശേഷം ഒരു കസ്റ്റമൈസ്ഡ് ഗ്ലോബൽ മോഡലും പുറത്തു വരും.

റെഡ്മി K90, K90 പ്രോ മാക്സ് എന്നിവയുടെ സവിശേഷതകൾ:

റെഡ്മി K90 പ്രോ മാക്സിൽ സ്നാപ്ഡ്രാഗൺ 8 എലൈറ്റ് ജെൻ 5 പ്രോസസറാണുള്ളത്. 3,500nits പീക്ക് ബ്രൈറ്റ്നസുള്ള 6.9 ഇഞ്ച് OLED സ്ക്രീനും ഇതിലുണ്ട്. ഇതിൽ TSMC യുടെ D2 AI ഡിസ്പ്ലേ ചിപ്പും ഉൾപ്പെടുന്നു. 16GB വരെ LPDDR5x റാം, 1TB UFS 4.1 സ്റ്റോറേജ്, സ്പെഷ്യൽ വൂഫറുള്ള ബോസ്-ട്യൂൺ ചെയ്ത 2.1 സ്റ്റീരിയോ സ്പീക്കറുകൾ എന്നിവ ഈ ഫോൺ വാഗ്ദാനം ചെയ്യുന്നു. 50 മെഗാപിക്സൽ മെയിൻ ക്യാമറ, 5x ഒപ്റ്റിക്കൽ സൂമുള്ള 50 മെഗാപിക്സൽ പെരിസ്കോപ്പ് ടെലിഫോട്ടോ ലെൻസ്, 50 മെഗാപിക്സൽ അൾട്രാവൈഡ് ക്യാമറ എന്നിങ്ങനെ ട്രിപ്പിൾ റിയർ ക്യാമറ സിസ്റ്റമാണ് ഇതിലുള്ളത്.

100W വയർഡ് ചാർജിംഗ്, 50W വയർഡ് ചാർജിംഗ്, റിവേഴ്സ് ചാർജിംഗ് എന്നിവയെ പിന്തുണയ്ക്കുന്ന 7,560mAh ബാറ്ററിയാണ് K90 പ്രോ മാക്സിന് ഉള്ളത്. ഇൻ-ഡിസ്പ്ലേ ഫിംഗർപ്രിന്റ് സെൻസർ, 5G, വൈ-ഫൈ 7, ബ്ലൂടൂത്ത് 5.4, NFC, വിശ്വസനീയമായ GNSS പൊസിഷനിംഗ് എന്നിവയാണ് മറ്റ് സവിശേഷതകൾ.

ഒഎൽഇഡി സ്ക്രീനുള്ള സാധാരണ റെഡ്മി K90 ഹൈപ്പർഒഎസ് 3-യിൽ പ്രവർത്തിക്കുന്നു. പക്ഷേ അതിന്റെ ഡിസ്പ്ലേ 6.59 ഇഞ്ച് മാത്രമാണുള്ളത്. സ്നാപ്ഡ്രാഗൺ 8 എലൈറ്റ് ചിപ്പ് ഉപയോഗിച്ചു പ്രവർത്തിക്കുന്ന ഇത് 16 ജിബി റാമും 1 ടിബി സ്റ്റോറേജും പിന്തുണയ്ക്കുന്നു. 50 മെഗാപിക്സൽ മെയിൻ ക്യാമറ, 50 മെഗാപിക്സൽ ടെലിഫോട്ടോ ലെൻസ്, 8 മെഗാപിക്സൽ അൾട്രാവൈഡ് ക്യാമറ എന്നിവയുള്ള റിയർ ക്യാമറ യൂണിറ്റും മുൻവശത്ത് 20 മെഗാപിക്സൽ സെൽഫി ക്യാമറയുമാണ് ഇതിലുള്ളത്.

റെഡ്മി K90 ഫോണിൽ 100W ഫാസ്റ്റ് ചാർജിംഗും വയർഡ് റിവേഴ്സ് ചാർജിംഗും പിന്തുണയ്ക്കുന്ന 7,100mAh ബാറ്ററിയുണ്ട്. രണ്ട് മോഡലുകളിലും ബോസ്-ട്യൂൺഡ് സ്പീക്കറുകളും വൈഡ് കണക്റ്റിവിറ്റി ഓപ്ഷനുകളും ഉണ്ട്.