റെനോ സീരീസിലെ ആദ്യത്തെ കോംപാക്റ്റ് ഫോൺ; ഓപ്പോ റെനോ 15 പ്രോ മിനിയുടെ ലോഞ്ചിങ്ങ് ഉടനെ

ഇന്ത്യയിലും മറ്റ് ആഗോള വിപണികളിലും തങ്ങളുടെ മിഡ്-റേഞ്ച് റെനോ സ്മാർട്ട്‌ഫോൺ സീരീസ് ഉടൻ അപ്‌ഡേറ്റ് ചെയ്യാൻ ഓപ്പോ ഒരുങ്ങുകയാണ്. ഇത്തവണ കമ്പനി അല്പം വ്യത്യസ്തമായ സമീപനം സ്വീകരിച്ചേക്കാമെന്നാണു റിപ്പോർട്ടുകൾ. ഇൻഡസ്ട്രി സോഴ്സുകളെ അടിസ്ഥാനമാക്കി 91mobiles പറയുന്നതനുസരിച്ച്, റെനോ 15 പ്രോ മിനി എന്ന പേരിൽ ഒരു പുതിയ ഫോൺ പുറത്തിറക്കാൻ ഓപ്പോ പദ്ധതിയിടുന്നുണ്ട്. റെനോ സീരീസിനു കീഴിൽ ഓപ്പോ ഒരു കോം‌പാക്റ്റ്-സൈസ് സ്മാർട്ട്‌ഫോൺ അവതരിപ്പിക്കുന്നത് ഇതാദ്യമായിരിക്കും. വലിപ്പം കുറഞ്ഞതും എളുപ്പത്തിൽ കൈവശം വയ്ക്കാൻ കഴിയുന്നതുമായ സ്മാർട്ട്‌ഫോണുകൾ വീണ്ടും ജനപ്രിയമാകുന്ന സമയത്താണ് ഈ ലോഞ്ച്. വലിയ ഡിസ്‌പ്ലേകളില്ലാതെ, ഒരു കൈകൊണ്ട് സുഖമായി ഉപയോഗിക്കാൻ കഴിയുന്ന ഫോണുകൾ നിരവധി ഉപയോക്താക്കൾ തിരയുന്നുണ്ട്. പല ബ്രാൻഡുകളും ഇപ്പോൾ വലിയ ഡിസ്പ്ലേയുള്ള ഫോണുകളിൽ നിന്നും മാറി കോം‌പാക്റ്റ് ഡിസൈനുകളിൽ ശ്രദ്ധ കേന്ദ്രീകരിക്കുന്നു. ഈ മാറിവരുന്ന പ്രവണതയുടെ സമീപകാല ഉദാഹരണങ്ങളിൽ വൺപ്ലസ് 13s, വിവോ X200 പ്രോ മിനി, വിവോ X300 എന്നിവ പോലുള്ള മോഡലുകൾ ഉൾപ്പെടുന്നു.

ഓപ്പോ റെനോ 15 പ്രോ മിനിയുടെ ഡിസ്പ്ലേ, ഡിസൈൻ, കളർ ഓപ്ഷൻസ് അറിയാം:

ഇൻഡസ്ട്രി സോഴ്സുകളിൽ നിന്നുള്ള എക്സ്ക്ലൂസീവ് വിവരങ്ങൾ സൂചിപ്പിക്കുന്നത്, റെനോ സീരീസിൻ്റെ പ്രീമിയം ലുക്ക് നഷ്ടപ്പെടുത്താതെ ഒപ്പോ റെനോ 15 പ്രോ മിനി ഒരു കോം‌പാക്റ്റ് ഡിസൈനുമായി വരും എന്നാണ്. 6.32 ഇഞ്ച് അമോലെഡ് ഡിസ്‌പ്ലേയാണ് ഈ സ്മാർട്ട്‌ഫോണിൽ പ്രതീക്ഷിക്കുന്നത്. നിലവിലെ സാഹചര്യത്തിൽ ഇതൊരു കോംപാക്റ്റ് ഫോണിൻ്റെ വലുപ്പമാണ്. ചെറിയ വലിപ്പമായതിനാൽ ഫോൺ ഒരു സോളിഡ് ഇൻ-ഹാൻഡ് ഫീൽ വാഗ്ദാനം ചെയ്യുമെന്ന് പറയപ്പെടുന്നു. ഇതിന് ഏകദേശം 187 ഗ്രാം ഭാരവും 7.99 മില്ലിമീറ്റർ കനവും പ്രതീക്ഷിക്കുന്നു. 1.6mm മാത്രം കനമുള്ള വളരെ സ്ലിം ആയ ബെസലുകൾ ആയിരിക്കും ഫോണിനെന്നും സൂചനയുണ്ട്.

ഡിസൈനിന്റെ കാര്യത്തിൽ, റെനോ 15 പ്രോ മിനി ഗ്ലേസിയർ വൈറ്റ് കളർ ഓപ്ഷനിൽ പുറത്തിറങ്ങുമെന്ന് പ്രതീക്ഷിക്കുന്നു. ഈ വേരിയന്റിൽ ഒരു യുണീക് റിബൺ-സ്റ്റൈൽ ഡിസൈൻ ഉണ്ടായിരിക്കും, ഇത് വൈറ്റ് മോഡലിന് മാത്രമായിരിക്കും. റെനോ ലൈനപ്പിന്റെ പ്രീമിയം ഫീൽ നിലനിർത്തിക്കൊണ്ട് സ്മാർട്ട്‌ഫോണിൽ ഒരു ഗ്ലാസ് ബാക്ക് ഉണ്ടായിരിക്കുമെന്നും പ്രതീക്ഷിക്കുന്നു. റെനോ സീരീസിൽ സ്റ്റൈലിഷായ ഡിസൈൻ ഫിനിഷുകൾ പരീക്ഷിക്കുന്നതിൻ്റെ പേരിൽ ഓപ്പോ നേരത്തെ ശ്രദ്ധിക്കപ്പെട്ടതാണ്.

ഓപ്പോ റെനോ 15 പ്രോ മിനിയുടെ മറ്റു വിശേഷങ്ങൾ:

പൊടി, വെള്ളം എന്നിവയിൽ നിന്നുള്ള സംരക്ഷണത്തിനായി ഈ ഫോണിന് IP66, IP67, IP69 റേറ്റിംഗുകളാണുള്ളത്. നേരത്തെയുള്ള റിപ്പോർട്ടുകൾ പ്രകാരം, ഈ നിരയിലെ കോം‌പാക്റ്റ് മോഡലിനെയാണ് ഓപ്പോ റെനോ 15 പ്രോ മിനി എന്ന് വിളിക്കുന്നത്. എന്നാൽ, പിന്നീട് പുറത്തുവന്ന ലീക്കായ വിവരങ്ങൾ സ്റ്റാൻഡേർഡ് റെനോ 15 തന്നെ കോം‌പാക്റ്റ് ഫോണായിരിക്കാമെന്ന സൂചന നൽകുന്നു.

ഓപ്പോ റെനോ 15 സീരീസ് ഇതിനകം ചൈനയിൽ ലോഞ്ച് ചെയ്തിട്ടുണ്ട്, ഇതിൽ സാധാരണ റെനോ 15, റെനോ 15 പ്രോ മോഡലുകൾ ഉൾപ്പെടുന്നു. ഈ ഫോണുകൾ AMOLED ഡിസ്‌പ്ലേ, മികച്ച ബാറ്ററി, മെച്ചപ്പെട്ട ക്യാമറ യൂണിറ്റ് എന്നിവയുമായാണ് വരുന്നത്. ഓപ്പോ ചൈനയിൽ ഒരു പ്രോ മിനി മോഡൽ പുറത്തിറക്കിയിട്ടില്ല. അതിനർത്ഥം തിരഞ്ഞെടുത്ത കുറച്ച് വിപണികൾക്ക് മാത്രമേ റെനോ 15 പ്രോ മിനി ലഭ്യമാകൂ എന്നാണ്.

നിലവിൽ, റെനോ 15 പ്രോ മിനിയുടെ പൂർണ്ണ സവിശേഷതകൾ അറിവായിട്ടില്ല. എന്നിരുന്നാലും, ലീക്കുകൾ സൂചിപ്പിക്കുന്നത് ഓപ്പോ ഒരു പ്രദേശത്തെ അടിസ്ഥാനമാക്കിയുള്ള തന്ത്രം പിന്തുടരുമെന്നാണ്. റെനോ 15-ന്റെ ആഗോള പതിപ്പിൽ സ്നാപ്ഡ്രാഗൺ 7 ജെൻ 4 പ്രോസസർ ഉപയോഗിക്കാം, അതേസമയം ചൈന വേരിയന്റിൽ മീഡിയടെക് ഡൈമെൻസിറ്റി 8450 ചിപ്പ് ആയിരിക്കാം. 6,500mAh ബാറ്ററി, 80W ഫാസ്റ്റ് വയർഡ് ചാർജിംഗ്, 50MP ടെലിഫോട്ടോ ലെൻസുള്ള ട്രിപ്പിൾ റിയർ ക്യാമറ സെറ്റപ്പ് എന്നിവയാണ് ലീക്കായ മറ്റു വിശദാംശങ്ങൾ. ഡിസംബറിൽ സീരീസ് ഇന്ത്യയിൽ ലോഞ്ച് ചെയ്യുമെന്നും റിപ്പോർട്ടുകൾ സൂചിപ്പിക്കുന്നു.