ബാറ്ററിയും പെർഫോമൻസും വേറെ ലെവൽ തന്നെ; വൺപ്ലസ് ടർബോ സീരീസ് ഉടനെ ലോഞ്ച് ചെയ്യും

തങ്ങളുടെ പുതിയ ടർബോ സീരീസ് ലോഞ്ച് ചെയ്യുന്നതായി വൺപ്ലസ് ഔദ്യോഗികമായി സ്ഥിരീകരിച്ചു. നിരവധി മാസങ്ങളായി നീണ്ടുനിന്ന ലീക്കുകൾക്കും ഡിവൈസിനെ കുറിച്ചുള്ള ഊഹാപോഹങ്ങൾക്കും ശേഷം തിങ്കളാഴ്ച വൺപ്ലസ് ചൈനയുടെ പ്രസിഡന്റ് ലി ജി ലൂയിസ് ആണ് ഇതേക്കുറിച്ചു പ്രഖ്യാപനം നടത്തിയത്. ടർബോ ബ്രാൻഡിംഗ് ഒരു സ്മാർട്ട്‌ഫോണിൽ മാത്രമായി പരിമിതപ്പെടുത്തിയിട്ടില്ലെന്നും അദ്ദേഹം പറഞ്ഞു. പകരം, വൺപ്ലസ് ഒരു ടർബോ സീരീസ് തന്നെ വികസിപ്പിച്ചു കൊണ്ടിരിക്കുകയാണ്, ഇതിൽ ഒന്നിലധികം മോഡലുകൾ ഉൾപ്പെടും. വൺപ്ലസ് ഒരു ടർബോ ഫോണിൽ പ്രവർത്തിക്കുന്നുണ്ടെന്ന് നേരത്തെ കിംവദന്തികൾ ഉണ്ടായിരുന്നു, എന്നാൽ ഇത് ഒരു പ്രത്യേക പ്രൊഡക്റ്റ് സീരീസ് ആയിരിക്കുമെന്ന് കമ്പനി ഇപ്പോൾ വ്യക്തമാക്കിയിട്ടുണ്ട്. എക്സിക്യൂട്ടീവ് പറയുന്നതനുസരിച്ച്, ഇതു വികസിപ്പിക്കാനുള്ള പ്രവർത്തനങ്ങൾ ഇതിനകം നടന്നുകൊണ്ടിരിക്കുകയാണ്, കൂടാതെ സമീപഭാവിയിൽ കമ്പനി പുതിയ സീരീസ് അവതരിപ്പിക്കാനും തയ്യാറെടുക്കുന്നു. വൺപ്ലസ് ടർബോ സീരീസ് ചൈനയിൽ മാത്രമായിരിക്കില്ലെന്നു മുൻ റിപ്പോർട്ടുകൾ സൂചിപ്പിച്ചിരുന്നു. അടുത്ത രണ്ട് മാസത്തിനുള്ളിൽ ഇന്ത്യയിൽ ലൈനപ്പിനു ലോഞ്ച് ചെയ്യാൻ കഴിയുമെന്ന് ഈ റിപ്പോർട്ടുകൾ അവകാശപ്പെട്ടു.

പെർഫോമൻസിനും ബാറ്ററിക്കും പ്രാധാന്യം നൽകി വൺപ്ലസ് ടർബോ സീരീസ്:

വൺപ്ലസ് ചൈനയുടെ പ്രസിഡന്റ് ലി ജി വെയ്‌ബോയിൽ പങ്കുവെച്ച ഒരു പോസ്റ്റിൽ, ഞായറാഴ്ച നടന്ന കമ്പനിയുടെ 12-ആം വാർഷിക പരിപാടിയിൽ വൺപ്ലസ് ടർബോ സീരീസ് ഔദ്യോഗികമായി പ്രഖ്യാപിച്ചതായി പറഞ്ഞു. വരാനിരിക്കുന്ന ഫോണുകളുടെ വിശദമായ സ്പെസിഫിക്കേഷനുകളൊന്നും അദ്ദേഹം പങ്കുവെച്ചില്ല. എന്നിരുന്നാലും, ടർബോ സീരീസ് അതിന്റെ സെഗ്‌മെന്റിലെ ഏറ്റവും ശക്തമായ ബാറ്ററി ലൈഫും വളരെ മികച്ച പ്രകടനവും വാഗ്ദാനം ചെയ്യുമെന്ന് അദ്ദേഹം അവകാശപ്പെട്ടു.

വൺപ്ലസ് ടർബോ സീരീസ് വൺപ്ലസ് ഫ്ലാഗ്ഷിപ്പ് സ്മാർട്ട്‌ഫോണുകളുടെ അതേ "പെർഫോമൻസ് ജീനുകൾ" വഹിക്കുമെന്നും ലി ജി പറഞ്ഞു. വൺപ്ലസ് 15-ൽ ഉപയോഗിച്ചിരിക്കുന്ന അതേ പ്രോസസ്സറായ സ്നാപ്ഡ്രാഗൺ 8 എലൈറ്റ് ജെൻ 5 ചിപ്‌സെറ്റ് ഫോണുകൾക്ക് കരുത്തു നൽകുമെന്ന് ഇത് സൂചിപ്പിക്കുന്നു. ടർബോ സീരീസ് ഗെയിമിംഗ് കേന്ദ്രീകരിച്ചുള്ള ഒരു ലൈനപ്പായിരിക്കുമെന്ന് അദ്ദേഹം സ്ഥിരീകരിച്ചു. അതേസമയം, സീരീസിന്റെ വില പരിധി അദ്ദേഹം വെളിപ്പെടുത്തുകയോ നിലവിലെ വൺപ്ലസ് പ്രൊഡക്റ്റ് ലൈനപ്പിൽ ഇതിനെ എവിടെ സ്ഥാപിക്കുമെന്ന് വിശദീകരിക്കുകയോ ചെയ്തില്ല.

ചൈനീസ് വിപണിക്കായി വൺപ്ലസ് ഏയ്സ് 6 ടർബോ എന്ന സ്മാർട്ട്‌ഫോണിൽ വൺപ്ലസ് പ്രവർത്തിക്കുന്നുണ്ടെന്ന് നേരത്തെ റിപ്പോർട്ടുകൾ പരാമർശിച്ചിരുന്നു. ചർച്ച ചെയ്യപ്പെടുന്ന ടർബോ ഫോണാണ് ഈ ഡിവൈസ് എന്ന് പലരും വിശ്വസിച്ചു. എന്നിരുന്നാലും, ലി ജിയുടെ പോസ്റ്റ് വ്യക്തമാക്കുന്നത് ടർബോ ഒരു സീരീസാണെന്നും ഒറ്റ ഫോണല്ലെന്നും ആണ്. ഇതിനർത്ഥം റിപ്പോർട്ട് ചെയ്യപ്പെട്ട ഉപകരണം ഏയ്സ് 6 അല്ലെങ്കിൽ ഏയ്സ് 6T ലൈനപ്പിൻ്റെ ഭാഗമാകണമെന്നില്ല, പകരം ടർബോ സീരീസിൽ ഉൾപ്പെട്ടേക്കാമെന്നാണ്.

വൺപ്ലസ് ടർബോ സീരീസ് ഫോണുകളുടെ സവിശേഷതകൾ:

1.5K റെസല്യൂഷൻ വാഗ്ദാനം ചെയ്യുന്ന 6.78 ഇഞ്ച് LTPS OLED ഡിസ്‌പ്ലേയുമായിട്ടാണ് ഈ സ്മാർട്ട്‌ഫോൺ എത്തുക. ഇത് 144Hz അല്ലെങ്കിൽ 165Hz എന്ന ഉയർന്ന റിഫ്രഷ് റേറ്റ് പിന്തുണച്ചേക്കാം. ശക്തമായ ബാറ്ററി ലൈഫും ഗെയിമിംഗ് കേന്ദ്രീകരിച്ചുള്ള ഡിസൈനും സംബന്ധിച്ച വൺപ്ലസിന്റെ മുൻ അവകാശവാദങ്ങളുമായി പൊരുത്തപ്പെടുന്ന തരത്തിൽ വലിയ 9,000mAh ബാറ്ററി ഈ ഫോണിൽ ഉണ്ടാകുമെന്ന് പറയപ്പെടുന്നു.

റിപ്പോർട്ട് ചെയ്ത ലോഞ്ച് ഷെഡ്യൂളും ഈ വിശദാംശങ്ങളുമായി യോജിക്കുന്നതായി തോന്നുന്നു. വൺപ്ലസ് ഏയ്സ് 6 ടർബോ എന്ന് വിശ്വസിക്കപ്പെടുന്ന ഉപകരണം 2026 ജനുവരിയിലോ ഫെബ്രുവരിയിലോ ചൈനയിൽ ലോഞ്ച് ചെയ്യുമെന്നാണു പ്രതീക്ഷിക്കുന്നത്. എന്നിരുന്നാലും, മുൻ റിപ്പോർട്ടുകൾ സൂചിപ്പിക്കുന്നത് ഇത് ഒരു മിഡ്-റേഞ്ച് സ്മാർട്ട്‌ഫോൺ ആയാകും അവതരിപ്പിക്കുകയെന്നും ഫ്ലാഗ്ഷിപ്പ് പ്രോസസറിന് പകരം മീഡിയടെക് ഡൈമെൻസിറ്റി 8500 ചിപ്‌സെറ്റ് ഉപയോഗിച്ചേക്കാമെന്നുമാണ്. ഈ വിവരങ്ങൾ ഇപ്പോഴും ആദ്യകാല ലീക്കുകളെയും കിംവദന്തികളെയും അടിസ്ഥാനമാക്കിയുള്ളതാണ്. പുതിയ ടർബോ സീരീസിനെ കുറിച്ചുള്ള ഔദ്യോഗിക വിശദാംശങ്ങൾ വൺപ്ലസ് പങ്കിടുമ്പോൾ കൂടുതൽ വ്യക്തത ലഭിക്കുമെന്നു പ്രതീക്ഷിക്കുന്നു.