വെറും കൂളല്ല, മാസ് കൂൾ! 8K വിസി ഐസ് ഡോം കൂളിങ്ങ് സിസ്റ്റവുമായി ഐക്യൂ 15 എത്തുമെന്നു സ്ഥിരീകരിച്ചു

ഇന്ത്യയിലെ എല്ലാ വിഭാഗം ആളുകളുടെ ഇടയിലും ഒരുപോലെ ശ്രദ്ധിക്കപ്പെട്ട സ്മാർട്ട്ഫോൺ ബ്രാൻഡുകളിൽ ഒന്നാണ് ഐക്യൂ. പെർഫോമൻസും മികച്ച വിൽപ്പനാനന്തര സേവനവുമാണ് ഐക്യൂ പ്രിയപ്പെട്ട ബ്രാൻഡുകളിൽ ഒന്നായി മാറാൻ കാരണം. ഒക്ടോബർ 20-ന് നടക്കുന്ന ചടങ്ങിൽ ഐക്യൂ പാഡ് 5e ടാബ്‌ലറ്റിനൊപ്പം പുതിയ സ്മാർട്ട്ഫോണായ ഐക്യൂ 15-നും ലോഞ്ച് ചെയ്യുമെന്നു കമ്പനി സ്ഥിരീകരിച്ചിരുന്നു. ഔദ്യോഗിക റിലീസിന് മുമ്പ്, ഫോണിൻ്റെ കളർ, ഡിസൈൻ എന്നിവ സംബന്ധിച്ചുള്ള വിവരങ്ങൾ കമ്പനി പങ്കുവെച്ചിട്ടുണ്ട്. കൂടുതൽ നേരം ഫോൺ ഉപയോഗിക്കുമ്പോൾ താപനില നിയന്ത്രിക്കാൻ സഹായിക്കുന്ന കൂളിംഗ് സംവിധാനവുമായി ഐക്യൂ 15 എത്തുമെന്ന് പുതിയ ടീസർ വ്യക്തമാക്കുന്നു. പുതിയ സ്നാപ്ഡ്രാഗൺ 8 എലീറ്റ് ജെൻ 5 പ്രോസസറാണ് ഈ ഫ്ലാഗ്ഷിപ്പ് സ്മാർട്ട്‌ഫോണിന് കരുത്ത് പകരുന്നത്. 144Hz റിഫ്രഷ് റേറ്റുള്ള വലിയ 6.85 ഇഞ്ച് 2K 8T LTPO ഡിസ്‌പ്ലേയും ഗെയിമിംഗ് പെർഫോമൻസും മൊത്തത്തിലുള്ള വേഗതയും മെച്ചപ്പെടുത്തുന്നതിനായുള്ള ഐക്യൂവിന്റെ കസ്റ്റം Q3 ഗെയിമിംഗ് ചിപ്‌സെറ്റും ഈ ഫോണിൽ ഉൾപ്പെടുത്തിയിട്ടുണ്ട്.

ഐഫോൺ 17 പ്രോ മാക്സിനെ വെല്ലുന്ന കൂളിങ്ങ് ടെക്നോളജിയുമായി ഐക്യൂ 15:

വെയ്‌ബോയിലെ ഒരു പുതിയ പോസ്റ്റിൽ, ഐക്യുഒഒ 15 ഫോണിൽ 8K വേപ്പർ ചേമ്പർ (വിസി) ഡോം കൂളിംഗ് സിസ്റ്റം ഉണ്ടായിരിക്കുമെന്ന് ഐക്യൂ പ്രഖ്യാപിച്ചു. ഇതുവരെ നിർമ്മിച്ചതിൽ വച്ച് ഏറ്റവും വലിയ വിസി കൂളിംഗ് സിസ്റ്റമാണിതെന്ന് കമ്പനി അവകാശപ്പെടുന്നു. ഈ പുതിയ സിസ്റ്റം അൾട്രാ-ഹൈ തെർമൽ കണ്ടക്ടിവിറ്റി ഗ്രാഫൈറ്റിന്റെ രണ്ട് പാളികൾ ഉപയോഗിക്കുന്നുണ്ട്. മുൻ മോഡലിനെ അപേക്ഷിച്ച് ഇത് 47 ശതമാനം കൂളിംഗ് പെർഫോമൻസ് മെച്ചപ്പെടുത്തുമെന്നും പറയപ്പെടുന്നു.

ഐക്യൂ 15-ലെ വിസി ഹീറ്റ് സിങ്ക് ഐഫോൺ 17 പ്രോ മാക്സിനേക്കാൾ മൂന്നിരട്ടിയിലധികം വലുതാണെന്ന് പോസ്റ്റിൻ്റെ കമൻ്റ് സെഷനിൽ ഐക്യൂ പ്രൊഡക്റ്റ് മാനേജർ പരാമർശിക്കുകയും ചെയ്തിട്ടുണ്ട്.

ഐക്യൂ 15-ൻ്റെ മറ്റു സവിശേഷതകൾ:

X, Z ആക്സിലുകളിൽ വൈബ്രേഷൻസ് നൽകുന്ന വാർഹാമ്മർ മാക്സ് ഡ്യുവൽ-ആക്സിസ് മോട്ടോറുമായാണ് ഐക്യൂ 15 വരുന്നത്. ഇത് മികച്ച ഗെയിമിംഗ് അനുഭവം നൽകുന്നു. വാർ ഡ്രം മാസ്റ്റർ പ്രോ സിമെട്രിക് ഡ്യുവൽ സ്പീക്കറുകളും ഇതിലുണ്ടാകും.

QNSS എഞ്ചിനോടൊപ്പം ഐക്യൂവിൻ്റെ സ്വന്തം ഗെയിമിംഗ് ചിപ്പായ Q3-യും ഈ ഫോണിൽ ഉൾപ്പെടും. 144fps-ൽ 2K റെസല്യൂഷനോടു കൂടിയ ഗെയിമിംഗിനെ ഇത് പിന്തുണയ്ക്കും. 23 ആന്റിനകൾ ഉപയോഗിക്കുന്ന ഒരു യൂണിവേഴ്സൽ എസ്‌പോർട്‌സ് നെറ്റ്‌വർക്ക് സിസ്റ്റം 2.0-ഉം ഐക്യൂ പുറത്തിറക്കിയിട്ടുണ്ട്.

മികച്ച ഫോൺ പ്രോസസറുകൾ പുറത്തു വരുമ്പോൾ അവയുപയോഗിച്ചു പുതിയ ഫോൺ പുറത്തിറക്കുകയെന്ന പതിവ് ഐക്യൂ തെറ്റിച്ചില്ല. ഐക്യൂ 15-ന് സ്‌നാപ്ഡ്രാഗൺ 8 എലീറ്റ് ജെൻ 5 പ്രോസസർ കരുത്ത് പകരും. 144Hz റിഫ്രഷ് റേറ്റ് ഉള്ള 6.85-ഇഞ്ച് 2K 8T LTPO സാംസങ് "എവറസ്റ്റ്" ഡിസ്‌പ്ലേയാണ് ഇതിൽ ഉണ്ടാവുക. ഡിസ്‌പ്ലേയ്ക്ക് 6,000nits വരെ പീക്ക് ബ്രൈറ്റ്‌നസ് എത്താൻ കഴിയും. 7,000mAh-ൽ കൂടുതൽ ബാറ്ററിയുമായി വരുന്ന ഫോൺ വയർലെസ് ചാർജിംഗിനെയും പിന്തുണയ്‌ക്കും.

പൊടി, വെള്ളം എന്നിവയെ പ്രതിരോധിക്കുന്നതിൽ ഇതിന് IP69 റേറ്റിംഗാണുള്ളത്. iQOO 15-ൽ ഒരു 3D അൾട്രാസോണിക് ഫിംഗർപ്രിന്റ് സ്കാനറും ഉൾപ്പെടുന്നു.

ഒക്ടോബർ 20-ന് ചൈനയിൽ ഐക്യൂ 15 ലോഞ്ച് ചെയ്യും. പ്രാദേശിക സമയം വൈകുന്നേരം 7 മണിക്കാണ് (IST സമയം വൈകുന്നേരം 4:30) പരിപാടി ആരംഭിക്കുക. ഐക്യൂ പാഡ് 5e, ഐക്യൂ വാച്ച് GT 2, ഐക്യൂ TWS 5 ഇയർഫോണുകൾ തുടങ്ങിയ പ്രൊഡക്റ്റുകളും ഈ ഇവൻ്റിൽ ലോഞ്ച് ചെയ്യും. ഇവയെല്ലാം നിലവിൽ ചൈനയിൽ പ്രീ-ഓർഡറിന് ലഭ്യമാണ്.