ഹെഡ്‌ഫോൺ പ്രേമികൾക്ക് ആവേശം; സോണി 1000X The ColleXion മെയ് 19-ന്

സോണി അവരുടെ 1000എക്സ് സീരീസിൽ പുതിയൊരു പ്രീമിയം ഓഡിയോ ഉൽപ്പന്നം അവതരിപ്പിക്കാനൊരുങ്ങുന്നതായി റിപ്പോർട്ടുകൾ. ഈ സീരീസിലെ ഏറ്റവും ഉയർന്ന മോഡലായിരിക്കും ഇതെന്നാണ് പ്രാഥമിക വിവരങ്ങൾ സൂചിപ്പിക്കുന്നത്. കമ്പനി ഡബ്ല്യുഎഫ് 1000എക്സ്എം6 ഇയർബഡ്‌സ് പുറത്തിറക്കി മാസങ്ങൾക്കും ഫ്ലാഗ്ഷിപ്പ് ഹെഡ്‌ഫോണായ ഡബ്ല്യുഎച്ച് 1000എക്സ്എം6 വിപണിയിലെത്തി ഏകദേശം ഒൻപത് മാസങ്ങൾക്കും ശേഷമാണ് പുതിയ ഉൽപ്പന്നത്തിന്റെ വരവ്. നിലവിലുള്ള മോഡലുകളിൽ നിന്ന് വ്യത്യസ്തമായി പ്രീമിയം വിഭാഗത്തെ ലക്ഷ്യമിട്ടായിരിക്കും ഈ പുതിയ ഉപകരണം പുറത്തിറക്കുക. പുതിയ ഉൽപ്പന്നങ്ങൾ അവതരിപ്പിക്കുന്നതിലൂടെ ഹൈ എൻഡ് വയർലെസ് ഓഡിയോ ശ്രേണി വിപുലീകരിക്കാനാണ് സോണി ലക്ഷ്യമിടുന്നത്.

സോണിയുടെ 'The ColleXion' ഹെഡ്‌ഫോണുകൾക്ക് 600 യൂറോയിലധികം വില വന്നേക്കാം

Dealabs-ന്റെ (ഫ്രഞ്ച് ഭാഷയിലുള്ള) ഒരു റിപ്പോർട്ട് പ്രകാരം, 1000X The ColleXion എന്ന പേര് ജപ്പാനിലെയും കാനഡയിലെയും ട്രേഡ്‌മാർക്ക് ഫയലിംഗുകളിൽ TheWalkmanBlog നേരത്തെ കണ്ടെത്തിയിരുന്നു. ഹെഡ്‌ഫോണുകൾ, ഇയർഫോണുകൾ, പോർട്ടബിൾ ഓഡിയോ പ്ലെയറുകൾ തുടങ്ങിയ വിഭാഗങ്ങളെ ഉൾക്കൊള്ളുന്നതാണ് ഈ ഫയലിംഗ്. ഇത് സോണിയുടെ പ്രീമിയം ഓഡിയോ വിഭാഗത്തിൽപ്പെട്ട ഉൽപ്പന്നമാണെന്ന് സൂചിപ്പിക്കുന്നു. ട്രേഡ്‌മാർക്ക് പ്രത്യക്ഷപ്പെട്ടതിന് ശേഷം ഈ ഉൽപ്പന്നത്തെക്കുറിച്ചുള്ള ചോർച്ചകളോ റിപ്പോർട്ടുകളോ ഇതുവരെ പുറത്തുവന്നിരുന്നില്ല.

പുതിയ റിപ്പോർട്ടുകൾ പ്രകാരം സോണി പുറത്തിറക്കാനിരിക്കുന്ന 1000X The ColleXion ഒരു ഹൈ-എൻഡ് ഓവർ-ഇയർ ഹെഡ്‌സെറ്റ് ആയിരിക്കും. ആദ്യഘട്ടത്തിൽ കറുപ്പ് നിറത്തിൽ മാത്രമായിരിക്കും ഇത് ലഭ്യമാകുക എന്നാണ് കരുതപ്പെടുന്നത്. ഇതിന് യൂറോപ്പിൽ ഏകദേശം 629 യൂറോ (ഏകദേശം 67,600 രൂപ) വില പ്രതീക്ഷിക്കുന്നു. 449 യൂറോയ്ക്ക് (ഏകദേശം 44,200 രൂപ) വിപണിയിലെത്തിയ സോണി WH-1000XM6 ഹെഡ്‌ഫോണുകളേക്കാൾ വലിയൊരു തുകയാണിത്. നിലവിലുള്ള മോഡലുകളുടെ നേരിട്ടുള്ള തുടർച്ച എന്നതിലുപരി, ഒരു ലിമിറ്റഡ് എഡിഷൻ ഉൽപ്പന്നമായോ പ്രത്യേക ശേഖരമായോ ആയിരിക്കും സോണി ഇതിനെ അവതരിപ്പിക്കാൻ സാധ്യത.

മെയ് 19-ന് യൂറോപ്പിലും മറ്റ് ആഗോള വിപണികളിലും സോണി ഈ പുതിയ ഹെഡ്‌സെറ്റ് പുറത്തിറക്കുമെന്നാണ് സൂചനകൾ. ഇതിന്റെ കൂടുതൽ ഫീച്ചറുകളെക്കുറിച്ചുള്ള വിവരങ്ങൾ പുറത്തിറങ്ങുന്ന തീയതിയോട് അടുപ്പിച്ച് ലഭ്യമാകുമെന്ന് പ്രതീക്ഷിക്കുന്നു.

ഇതിനോടൊപ്പം തന്നെ, സോണി WH-1000XM6 മോഡലിനായി പുതിയൊരു കളർ വേരിയന്റ് കൂടി സോണി തയ്യാറാക്കുന്നുണ്ടെന്ന് റിപ്പോർട്ടുകൾ സൂചിപ്പിക്കുന്നു. സാൻഡ്‌സ്റ്റോൺ (Sandstone) എന്ന് വിളിക്കപ്പെടുന്ന ഈ പുതിയ ഫിനിഷ് ഒരു സാൻഡി ബീജ് ഷേഡിലായിരിക്കും വരുന്നത്. പുതിയ ഹെഡ്‌ഫോണിനൊപ്പം അതേ ദിവസം തന്നെ ഇതും പുറത്തിറക്കുമെന്നാണ് പ്രതീക്ഷിക്കുന്നത്. നിലവിലുള്ള കറുപ്പ്, മിഡ്‌നൈറ്റ് ബ്ലൂ, പ്ലാറ്റിനം സിൽവർ എന്നീ നിറങ്ങളുടെ അതേ വിലയിൽ തന്നെയായിരിക്കും പുതിയ സാൻഡ്‌സ്റ്റോൺ പതിപ്പും ലഭ്യമാകുക എന്നും റിപ്പോർട്ട് വ്യക്തമാക്കുന്നു.