അതിശയിപ്പിക്കാൻ സാംസങ്! ബോധക്ഷയം പ്രവചിക്കുന്ന ലോകത്തെ ആദ്യ സ്മാർട്ട് വാച്ച് വരുന്നു

സ്മാർട്ട് വാച്ചുകൾ ഉപയോഗിച്ച് ബോധക്ഷയം (Fainting) മുൻകൂട്ടി പ്രവചിക്കാൻ കഴിയുമെന്ന് സാംസങ് നടത്തിയ പുതിയ പഠനം വ്യക്തമാക്കുന്നു. ദക്ഷിണ കൊറിയയിലെ ചുങ്-ആങ് സർവകലാശാല ഗ്വാങ്‌മിയോങ് ഹോസ്പിറ്റലുമായി സഹകരിച്ച് നടത്തിയ ഈ ഗവേഷണം, പ്രധാനമായും ഹൃദയമിടിപ്പിലും രക്തസമ്മർദ്ദത്തിലും പെട്ടെന്നുണ്ടാകുന്ന കുറവ് മൂലം സംഭവിക്കുന്ന 'വാസോവാഗൽ സിൻകോപ്പ്' എന്ന അവസ്ഥയെ കുറിച്ചായിരുന്നു. വിപണിയിൽ ലഭ്യമായ ഒരു സാധാരണ സ്മാർട്ട് വാച്ച് ഉപയോഗിച്ച് ഇത്തരം ശാരീരിക മാറ്റങ്ങൾ തിരിച്ചറിയാമെന്നും ബോധക്ഷയം ഉണ്ടാകുന്നതിന് മുൻപ് തന്നെ അത് പ്രവചിക്കാമെന്നും പഠനം തെളിയിക്കുന്നു. 'യൂറോപ്യൻ ഹാർട്ട് ജേണൽ ഡിജിറ്റൽ ഹെൽത്തിൽ' പ്രസിദ്ധീകരിച്ച ഈ കണ്ടെത്തൽ ഇത്തരത്തിലുള്ള ലോകത്തിലെ ആദ്യത്തെ വിജയകരമായ പരീക്ഷണമാണെന്ന് സാംസങ് അവകാശപ്പെടുന്നു. എങ്കിലും, ഈ പുത്തൻ ഫീച്ചർ എപ്പോൾ മുതൽ ഉപയോക്താക്കൾക്ക് ലഭ്യമാകുമെന്ന കാര്യത്തിൽ കമ്പനി ഇതുവരെ ഔദ്യോഗിക സ്ഥിരീകരണം നൽകിയിട്ടില്ല.

വാസോവാഗൽ സിൻകോപ്പും സാംസങ്ങിന്റെ പുതിയ ഗവേഷണവും

ഗാലക്സി വാച്ച് 6 ഉപയോഗിച്ച് നടത്തിയ ഒരു ക്ലിനിക്കൽ പഠനത്തിലൂടെ ബോധക്ഷയത്തിലേക്ക് നയിക്കുന്ന ശാരീരിക മാറ്റങ്ങൾ മുൻകൂട്ടി തിരിച്ചറിയാൻ കഴിയുമെന്ന് സാംസങ് അറിയിച്ചു. നിലവിൽ ഗാലക്സി വാച്ച് 6-ൽ മാത്രമാണ് ഈ പഠനം നടന്നിട്ടുള്ളതെങ്കിലും, പിപിജി (PPG) സെൻസറുകളും ഹൃദയമിടിപ്പിലെ വ്യത്യാസങ്ങൾ (Heart rate variability) നിരീക്ഷിക്കാൻ ശേഷിയുള്ളതുമായ പുതിയ ഗാലക്സി വാച്ച് മോഡലുകളിലും ഭാവിയിൽ ഈ ഫീച്ചർ ലഭ്യമായേക്കും. വാസോവാഗൽ സിൻകോപ്പ് ലക്ഷണങ്ങളുള്ള 132 രോഗികളിലാണ് മെഡിക്കൽ മേൽനോട്ടത്തിൽ ഈ പരീക്ഷണം നടത്തിയത്. പരിശോധനാ വേളയിൽ ഇവരുടെ ഹൃദയമിടിപ്പിലെ വ്യതിയാനങ്ങൾ ഗാലക്സി വാച്ചിലെ ഫോട്ടോപ്ലെത്തിസ്മോഗ്രാഫി (PPG) സെൻസർ വഴി കൃത്യമായി നിരീക്ഷിച്ചു.

ഈ ഡാറ്റ ഒരു ആർട്ടിഫിഷ്യൽ ഇന്റലിജൻസ് (AI) മോഡൽ ഉപയോഗിച്ച് വിശകലനം ചെയ്തപ്പോൾ, ബോധക്ഷയം ഉണ്ടാകുന്നതിന് അഞ്ച് മിനിറ്റ് മുമ്പ് വരെ മുന്നറിയിപ്പ് നൽകാൻ കഴിഞ്ഞതായി സാംസങ് അവകാശപ്പെടുന്നു. 84.6 ശതമാനം കൃത്യതയോടെയാണ് (Accuracy) ഈ സിസ്റ്റം പ്രവർത്തിച്ചത്. ഇതിൽ 90 ശതമാനം സെൻസിറ്റിവിറ്റിയും 64 ശതമാനം സ്പെസിഫിസിറ്റിയും രേഖപ്പെടുത്തിയിട്ടുണ്ട്. മാനസിക സമ്മർദ്ദം, വേദന, ഭയം അല്ലെങ്കിൽ വൈകാരികമായ ആഘാതങ്ങൾ എന്നിവ മൂലം സംഭവിക്കാവുന്ന ഒന്നാണ് വാസോവാഗൽ സിൻകോപ്പ്. ഈ അവസ്ഥ നേരിട്ട് ജീവന് ഭീഷണിയല്ലെങ്കിലും, ബോധരഹിതനായി പെട്ടെന്ന് വീഴുന്നത് തലയ്ക്കേറ്റ പരിക്കുകൾക്കോ അസ്ഥി ഒടിയുന്നതിനോ കാരണമായേക്കാം.

ബോധക്ഷയം ഉണ്ടാകുന്നതിന് മുൻപ് തന്നെ മുന്നറിയിപ്പ് ലഭിക്കുന്നത് രോഗികൾക്ക് സുരക്ഷിതമായ ഒരിടത്തേക്ക് മാറാനോ സഹായത്തിനായി ആരെയെങ്കിലും വിളിക്കാനോ സമയം നൽകുമെന്ന് ചുങ്-ആങ് സർവകലാശാലയിലെ പ്രൊഫസർ ജുൻഹ്വാൻ ചോ പറഞ്ഞു. വരും കാലങ്ങളിൽ പ്രമുഖ മെഡിക്കൽ സ്ഥാപനങ്ങളുമായി സഹകരിച്ച് തങ്ങളുടെ വെയറബിൾ ഉപകരണങ്ങളിലൂടെ കൂടുതൽ ആരോഗ്യ പരിരക്ഷാ സൗകര്യങ്ങൾ കൊണ്ടുവരാൻ സാംസങ് ലക്ഷ്യമിടുന്നുണ്ട്.