44 മണിക്കൂർ ബാറ്ററി ലൈഫുമായി റെഡ്മി ബഡ്‌സ് 8 എത്തി; മികച്ച ശബ്ദാനുഭവത്തിനായി 11mm ഡ്രൈവറുകൾ

റെഡ്മിയുടെ ഏറ്റവും പുതിയ ഇയർഫോണുകളായ റെഡ്മി ബഡ്‌സ് 8 ചൈനീസ് വിപണിയിലെത്തി. 11mm ഡയനാമിക് ഡ്രൈവറുകൾ, ആക്റ്റീവ് നോയ്‌സ് ക്യാൻസലേഷൻ (ANC), ബ്ലൂടൂത്ത് 5.4, LHDC ഓഡിയോ കോഡെക് തുടങ്ങിയ അത്യാധുനിക ഫീച്ചറുകൾ ഈ ടക്സണിലുണ്ട്. കൂടാതെ ഹൈ-റെസ് ഓഡിയോ ക്വാളിറ്റിയും AI സാങ്കേതികവിദ്യയിൽ പ്രവർത്തിക്കുന്ന നോയ്‌സ് റിഡക്ഷനും ഇതിന്റെ പ്രത്യേകതകളാണ്. റെഡ്മി K90 മാക്സ് സ്മാർട്ട്‌ഫോൺ, കെ പാഡ് 2 ടാബ്‌ലെറ്റ്, റെഡ്മി ബുക്ക് പ്രോ 2026 ലാപ്ടോപ്പ് എന്നിവയ്‌ക്കൊപ്പമാണ് ഇവ പുറത്തിറക്കിയത്.

റെഡ്മി ബഡ്‌സ് 8: വിലയും നിറങ്ങളും

പുതുതായി പുറത്തിറങ്ങിയ റെഡ്മി ബഡ്‌സ് 8-ന് ചൈനയിൽ 229 യുവാൻ (ഏകദേശം 3,100 രൂപ) ആണ് വില. സിയാൻ (Cyan), ഡസ്ക് ബ്ലാക്ക് (Dusk Black), വൈറ്റ് (White) എന്നീ നിറങ്ങളിൽ ഷവോമി ചൈന വെബ്സൈറ്റ് വഴി ഇവ ലഭ്യമാണ്.

റെഡ്മി ബഡ്‌സ് 8: സവിശേഷതകൾ

റെഡ്മി ബഡ്‌സ് 8-ൽ 11mm ഡയനാമിക് ഡ്രൈവറുകളാണ് നൽകിയിരിക്കുന്നത്. 20Hz മുതൽ 40kHz വരെയുള്ള ഫ്രീക്വൻസി റെസ്‌പോൺസ് റേഞ്ചും ഹൈ-റെസ് ഓഡിയോ വയർലെസ് സർട്ടിഫിക്കേഷനും ഈ ഇയർഫോണുകളുടെ പ്രത്യേകതയാണ്. ഉയർന്ന നിലവാരമുള്ള ഓഡിയോ അനുഭവം നൽകുന്നതിനായി LHDC, SBC, AAC എന്നീ കോഡെക്കുകളെ ഇവ പിന്തുണയ്ക്കുന്നു.

50dB വരെയുള്ള ആക്റ്റീവ് നോയ്‌സ് ക്യാൻസലേഷൻ (ANC) ആണ് റെഡ്മി ബഡ്‌സ് 8 വാഗ്ദാനം ചെയ്യുന്നത്. ഇതിലെ മൂന്ന് മൈക്രോഫോണുകളും AI സാങ്കേതികവിദ്യയും ചേർന്ന് കാറ്റിൽ നിന്നുള്ള ശബ്‌ദം (12m/s വേഗത വരെ) കുറയ്ക്കുകയും തെളിമയുള്ള കോളുകൾ ഉറപ്പാക്കുകയും ചെയ്യുന്നു. ഡെപ്ത്, ബാലൻസ്ഡ്, ലൈറ്റ്, അഡാപ്റ്റീവ് എന്നിങ്ങനെ വിവിധ നോയ്‌സ് ക്യാൻസലേഷൻ മോഡുകളും ഉപഭോക്താക്കൾക്ക് തിരഞ്ഞെടുക്കാം. കൂടാതെ സ്റ്റാൻഡേർഡ്, വോക്കൽ എൻഹാൻസ്‌മെന്റ്, എൻവയോൺമെന്റൽ എൻഹാൻസ്‌മെന്റ് എന്നിങ്ങനെ മൂന്ന് ട്രാൻസ്പരൻസി മോഡുകളും ഇതിലുണ്ട്.

തുറസ്സായ സ്ഥലങ്ങളിൽ 10 മീറ്റർ വരെ ദൂരപരിധിയുള്ള ബ്ലൂടൂത്ത് 5.4 സാങ്കേതികവിദ്യയാണ് റെഡ്മി ബഡ്‌സ് 8-ൽ ഉപയോഗിച്ചിരിക്കുന്നത്. ഒരേസമയം രണ്ട് ഉപകരണങ്ങളുമായി ബന്ധിപ്പിക്കാനും (Dual device pairing) അവയ്ക്കിടയിൽ എളുപ്പത്തിൽ മാറാനും ഇതിൽ സാധിക്കും. ഷവോമി ഹെഡ്‌ഫോൺസ് ആപ്പ് വഴി നിയന്ത്രണങ്ങൾ ക്രമീകരിക്കാമെന്നതിനൊപ്പം, വൺ-ടച്ച് ഫോട്ടോ ക്യാപ്‌ചർ പോലുള്ള അത്യാധുനിക ജെസ്റ്റർ കൺട്രോളുകളും ഇതിലുണ്ട്.

ബാറ്ററി ലൈഫിന്റെ കാര്യമെടുത്താൽ, ഓരോ ഇയർബഡിലും 54mAh ബാറ്ററിയും ചാർജിംഗ് കേസിൽ 475mAh ബാറ്ററിയുമാണുള്ളത്. ANC ഓഫ് ചെയ്യുമ്പോൾ ഒറ്റ ചാർജിൽ 11 മണിക്കൂറും കേസ് സഹിതം 44 മണിക്കൂറും ബാറ്ററി ലഭിക്കും. എന്നാൽ ANC ഓൺ ചെയ്യുമ്പോൾ ഇത് യഥാക്രമം 6.5 മണിക്കൂറും 28 മണിക്കൂറുമായി ചുരുങ്ങും. ടൈപ്പ്-സി പോർട്ട് വഴിയാണ് ചാർജിംഗ് സൗകര്യം ഒരുക്കിയിരിക്കുന്നത്. പൊടിയെയും വെള്ളത്തെയും പ്രതിരോധിക്കാൻ IP54 റേറ്റിംഗുള്ള ഈ ഇയർഫോണുകൾക്ക് കേസ് ഉൾപ്പെടെ വെറും 44.5 ഗ്രാം മാത്രമാണ് ഭാരം.