ഹെൽത്ത് ഗാർഡിയൻ ഫീച്ചറുകളുമായി ഗൂഗിൾ പിക്സൽ വാച്ച് 5 എത്തി; അറിയേണ്ടതെല്ലാം

കമ്പനിയുടെ ഏറ്റവും പുതിയ സ്മാർട്ട്‌വാച്ചായ ഗൂഗിൾ പിക്സൽ വാച്ച് 5 ബുധനാഴ്ച ഇന്ത്യയിൽ അവതരിപ്പിച്ചു. കൂടുതൽ തെളിച്ചമുള്ള 3,000 നൈറ്റ്സ് ഡിസ്പ്ലേയും വേഗതയേറിയ ക്വാൽകോം സ്നാപ്ഡ്രാഗൺ ഡബ്ല്യു5 ജെൻ 2 ആക്സിലറേറ്റഡ് പ്രൊസസറുമാണ് ഇതിൽ നൽകിയിരിക്കുന്നത്. ശ്വസന സംബന്ധമായ അടിയന്തര സാഹചര്യങ്ങൾ തിരിച്ചറിയൽ, പ്രതിമാസ ആരോഗ്യ ട്രെൻഡ് സംഗ്രഹങ്ങൾ എന്നിവയുൾപ്പെടെയുള്ള പുതിയ ഹെൽത്ത് ഗാർഡിയൻ ഫീച്ചറുകൾ അവതരിപ്പിക്കുന്നതിനൊപ്പം കൂടുതൽ മികച്ച ജെമിനി ഇന്റഗ്രേഷനും ഈ സ്മാർട്ട്‌വാച്ചിലുണ്ട്. ഒറ്റ ചാർജിൽ 40 മണിക്കൂർ വരെ ബാറ്ററി ലൈഫ് നൽകാൻ പിക്സൽ വാച്ച് 5-ന് സാധിക്കുമെന്നും കമ്പനി അവകാശപ്പെടുന്നു.

ഗൂഗിൾ പിക്സൽ വാച്ച് 5 ഇന്ത്യയിലെ വിലയും ലഭ്യതയും

ഗൂഗിൾ പിക്സൽ വാച്ച് 5-ന്റെ 41 മില്ലീമീറ്റർ വേരിയന്റിന് ഇന്ത്യയിൽ 42,999 രൂപ മുതലാണ് വില ആരംഭിക്കുന്നത്, ഇത് 130 മുതൽ 210 മില്ലീമീറ്റർ വരെ അളവുള്ള കൈത്തണ്ടകൾക്ക് അനുയോജ്യമാണ്. 150 മുതൽ 215 മില്ലീമീറ്റർ വരെ അളവുള്ള കൈത്തണ്ടകൾക്കായി രൂപകൽപ്പന ചെയ്ത വലിയ 45 മില്ലീമീറ്റർ മോഡലിന് 45,999 രൂപയാണ് വില.

ഓരോ വേരിയന്റിലും രണ്ട് ഓപ്ഷനുകളിലാണ് ഗൂഗിൾ പിക്സൽ വാച്ച് 5 നൽകിയിരിക്കുന്നത്. 41 മില്ലീമീറ്റർ മോഡൽ പോളിഷ്ഡ് സിൽവർ അലുമിനിയം കേസ് വിത്ത് ഫോഗ് ആക്റ്റീവ് ബാന്റ്, ഷാംപെയ്ൻ ഗോൾഡ് അലുമിനിയം കേസ് വിത്ത് കാന്യൻ ആക്റ്റീവ് ബാന്റ് എന്നീ പതിപ്പുകളിൽ വാങ്ങാനാകും. അതേസമയം 45 മില്ലീമീറ്റർ വേരിയന്റ് സാറ്റിൻ പൈറൈറ്റ് അലുമിനിയം കേസ് വിത്ത് ഒലിവ് ആക്റ്റീവ് ബാന്റ്, മാറ്റ് ബ്ലാക്ക് അലുമിനിയം കേസ് വിത്ത് ഒബ്സിഡിയൻ ആക്റ്റീവ് ബാന്റ് എന്നീ ഓപ്ഷനുകളിൽ ലഭ്യമാണ്.

ആഗോള വിപണിയിൽ 45 മില്ലീമീറ്റർ വലുപ്പത്തിൽ സ്റ്റീഫൻ കറി സ്പെഷ്യൽ എഡിഷനും കമ്പനി അവതരിപ്പിച്ചിട്ടുണ്ട്. വിയർപ്പ് എളുപ്പത്തിൽ വലിച്ചെടുക്കുന്ന പെർഫോമൻസ് ലൂപ്പ് ബാൻഡോടെയാണ് ഈ പ്രത്യേക പതിപ്പ് എത്തുന്നത്. 579 ഡോളർ, അതായത് ഏകദേശം 55,000 രൂപയാണ് ഇതിന്റെ വില വരുന്നത്. ഗൂഗിൾ പിക്സൽ വാച്ച് 5 നിലവിൽ പ്രീ-ഓർഡർ ചെയ്യാവുന്നതാണ്. ഓഗസ്റ്റ് 20 മുതലാണ് വാച്ചിന്റെ വിൽപന ആരംഭിക്കുന്നത്.

ഗൂഗിൾ പിക്സൽ വാച്ച് 5 ഫീച്ചറുകളും സ്പെസിഫിക്കേഷനുകളും

പഴയ മോഡലിന്റെ അതേ വൃത്താകൃതിയിലുള്ള ഡിസൈനിലാണ് വരുന്നതെങ്കിലും ഹാർഡ്‌വെയറിലും സോഫ്റ്റ്‌വെയറിലും വൻ മാറ്റങ്ങളോടെയാണ് ഗൂഗിൾ പിക്സൽ വാച്ച് 5 എത്തുന്നത്. 3,000 നൈറ്റ്സ് വരെ പീക്ക് ബ്രൈറ്റ്‌നസ്, 320 പിപിഐ പിക്സൽ ഡെൻസിറ്റി, 60 ഹെർട്സ് വരെയുള്ള അഡാപ്റ്റീവ് റിഫ്രഷ് റേറ്റ്, ഓൾവേസ്-ഓൺ ഡിസ്പ്ലേ പിന്തുണ എന്നിവയുള്ള ഡോംഡ് ആക്റ്റുവ 360 അമോലെഡ് എൽടിപിഒ ഡിസ്പ്ലേയാണ് ഇതിൽ നൽകിയിരിക്കുന്നത്. പോറലുകൾ ഏൽക്കാത്ത പ്രത്യേക കോർണിംഗ് ഗൊറില്ല ഗ്ലാസ് സംരക്ഷണവും ഡിസ്പ്ലേയ്ക്ക് ലഭിക്കുന്നുണ്ട്.

ക്വാൽകോം സ്നാപ്ഡ്രാഗൺ ഡബ്ല്യു5 ജെൻ 2 ആക്സിലറേറ്റഡ് പ്ലാറ്റ്‌ഫോമും കോർട്ടെക്‌സ്-എം55 കോ-പ്രൊസസറുമാണ് വാച്ചിന് കരുത്തേകുന്നത്. പിക്‌സൽ വാച്ച് 4-നെ അപേക്ഷിച്ച് 20 ശതമാനം മികച്ച പ്രകടനവും 50 ശതമാനം കൂടുതൽ റാമും 12 ശതമാനം വേഗതയേറിയ സിപിയു കരുത്തും നൽകാൻ ഈ ഡ്യുവൽ ചിപ്പ് സംവിധാനത്തിന് സാധിക്കുമെന്ന് ഗൂഗിൾ വ്യക്തമാക്കുന്നു. 64ജിബി ഇഎംഎംസി ഇൻബിൽറ്റ് സ്റ്റോറേജും ഇതിൽ നൽകിയിട്ടുണ്ട്.

കൂടുതൽ ആഴത്തിലുള്ള ജെമിനി എഐ പിന്തുണയാണ് മറ്റൊരു പ്രത്യേകത. കൈ ഉയർത്തി നേരിട്ട് ജെമിനിയോട് സംസാരിക്കാനും ജിമെയിൽ, കലണ്ടർ തുടങ്ങിയ സേവനങ്ങളിൽ നിന്നുള്ള പ്രധാന വിവരങ്ങൾ മുൻകൂട്ടി സ്ക്രീനിൽ ലഭിക്കാനും ഇത് സഹായിക്കും.

ആരോഗ്യ നിരീക്ഷണത്തിനായി എഎഫ്ഐബി തിരിച്ചറിയാൻ കഴിയുന്ന ഇസിജി, ഹൃദയമിടിപ്പിലെ വ്യതിയാനങ്ങൾക്കുള്ള മുന്നറിയിപ്പുകൾ, റെസ്റ്റിംഗ് ഹാർട്ട് റേറ്റ്, രക്തത്തിലെ ഓക്സിജൻ അളവ്, ശ്വസന നിരക്ക്, ശരീര താപനില വ്യതിയാനങ്ങൾ, റിയൽ-ടൈം സ്ട്രെസ് ട്രാക്കിംഗ് എന്നിവയെല്ലാം ഇതിലുണ്ട്. കൂടാതെ ശ്വസന ക്രമം വിശകലനം ചെയ്ത് നൽകുന്ന വ്യക്തിഗത സ്ലീപ്പ് സ്കോർ അടക്കമുള്ള ഉറക്ക നിരീക്ഷണ ഫീച്ചറുകളും സ്മാർട്ട്‌വാച്ച് പിന്തുണയ്ക്കുന്നു.

രക്തസമ്മർദ്ദ വ്യതിയാനങ്ങൾ, ഉറക്കത്തിലെ ശ്വസന ഗുണനിലവാരം, ഇൻസുലിൻ റെസിസ്റ്റൻസ് ട്രെൻഡുകൾ എന്നിവയുടെ പ്രതിമാസ അവലോകനം നൽകുന്ന ഹെൽത്ത് ഗാർഡിയൻ ആണ് ഇതിലെ പ്രധാന ആകർഷണം. തത്സമയ മെഡിക്കൽ റീഡിംഗുകൾക്ക് പകരം ദീർഘകാല ആരോഗ്യ മാറ്റങ്ങൾ വ്യക്തമാക്കാനാണ് ഈ ഫീച്ചർ സഹായിക്കുന്നത്.

സ്മാർട്ട്‌വാച്ച് രംഗത്ത് ആദ്യമായി അവതരിപ്പിക്കുന്ന ബ്രീത്തിംഗ് എമർജൻസി ഡിറ്റക്ഷൻ ആണ് മറ്റൊരു ശ്രദ്ധേയമായ സവിശേഷത. പിപിജി, ആക്‌സിലറോമീറ്റർ, ബാരോമീറ്റർ സെൻസറുകളും ഓൺ-ഡിവൈസ് എഐ സാങ്കേതികവിദ്യയും ഉപയോഗിച്ച് രക്തത്തിലെ ഓക്‌സിജൻ അളവിലുണ്ടാകുന്ന ഗുരുതരമായ കുറവുകൾ വേഗത്തിൽ തിരിച്ചറിയാൻ ഇതിന് സാധിക്കും.

50-ലധികം കായിക വിനോദങ്ങൾ, തത്സമയ ഓഡിയോ-വിഷ്വൽ നിർദ്ദേശങ്ങൾ, പ്രതിവാര കാർഡിയോ ലക്ഷ്യങ്ങൾ, ഡെയ്‌ലി റെഡിനസ് സ്‌കോർ എന്നിവയെല്ലാം ഈ സ്മാർട്ട്‌വാച്ച് പിന്തുണയ്ക്കുന്നുണ്ട്. പഴയ മോഡലുകളെ അപേക്ഷിച്ച് രണ്ടിരട്ടി കൃത്യതയുള്ള ഡ്യുവൽ-ഫ്രീക്വൻസി ജിപിഎസും ഇതിന്റെ ഭാഗമാണ്.

41 മില്ലീമീറ്റർ വേരിയന്റിൽ 30 മണിക്കൂറും 45 മില്ലീമീറ്റർ മോഡലിൽ 40 മണിക്കൂറും വരെ ബാറ്ററി ലൈഫ് കമ്പനി വാഗ്ദാനം ചെയ്യുന്നു. 15 മിനിറ്റ് മാത്രം ചാർജ് ചെയ്താൽ 15 മണിക്കൂർ വരെ ഉപയോഗിക്കാം. പൊടിയും വെള്ളവും പ്രതിരോധിക്കാൻ ഐപി68 റേറ്റിംഗും നൽകിയിട്ടുണ്ട്.