വാച്ചിലുണ്ട് വാട്സ്ആപ്പ്! ഗാർമിൻ സ്മാർട്ട് വാച്ചുകളിൽ ഇനി കണക്ട് ഐക്യു വഴി സന്ദേശങ്ങൾ അയക്കാം

തിരഞ്ഞെടുത്ത ഗാർമിൻ സ്മാർട്ട് വാച്ചുകളിൽ വാട്സ്ആപ്പ് സേവനം ഔദ്യോഗികമായി ലഭ്യമായിത്തുടങ്ങി. ഫോൺ ഉപയോഗിക്കാതെ തന്നെ വാച്ചിലൂടെ നേരിട്ട് സന്ദേശങ്ങൾ വായിക്കാനും അവയ്ക്ക് മറുപടി നൽകാനും ഈ പുതിയ ഫീച്ചർ ഉപയോക്താക്കളെ സഹായിക്കുന്നു. ഗാർമിൻ്റെ കണക്ട് ഐക്യു പ്ലാറ്റ്‌ഫോമിൽ ലഭ്യമായ പുതിയ ആപ്പ് ഇൻസ്റ്റാൾ ചെയ്യുന്നതിലൂടെ ഈ സേവനം പ്രയോജനപ്പെടുത്താം. വെറും നോട്ടിഫിക്കേഷനുകൾ ലഭിക്കുന്നതിനപ്പുറം, വാച്ചിലൂടെയുള്ള ആശയവിനിമയ സാധ്യതകൾ വർദ്ധിപ്പിക്കുന്ന ഒരു പ്രധാന ചുവടുവെപ്പാണിത്. സ്മാർട്ട്ഫോണുമായി ബന്ധിപ്പിച്ചിട്ടുള്ള തിരഞ്ഞെടുത്ത ഗാർമിൻ മോഡലുകളിൽ മാത്രമേ നിലവിൽ ഈ സൗകര്യം പ്രവർത്തിക്കുകയുള്ളൂ. വ്യായാമ വേളകളിലും യാത്രകളിലും മറ്റും ഫോൺ കയ്യിലെടുക്കാൻ കഴിയാത്തവർക്ക് ഈ സംവിധാനം ഏറെ പ്രയോജനപ്പെടും.

ഇനി ഫോൺ വേണ്ട, വാച്ച് മതി! ഗാർമിൻ വാച്ചുകളിലേക്ക് വാട്സ്ആപ്പ് എത്തുന്നു;

ഗാർമിൻ പുറത്തിറക്കിയ വാർത്താക്കുറിപ്പ് പ്രകാരം കണക്ട് ഐക്യു സ്റ്റോർ വഴി വാട്സ്ആപ്പ് സൗജന്യമായി ഡൗൺലോഡ് ചെയ്യാം. ഫീനിക്സ്, ഫോർറണ്ണർ, വേനു, വിവോആക്ടീവ് സീരീസുകളിലെ തിരഞ്ഞെടുത്ത മോഡലുകളിലാണ് ഈ സേവനം ലഭ്യമാകുന്നത്. ഫോണിൽ വാട്സ്ആപ്പ് ഇൻസ്റ്റാൾ ചെയ്തിരിക്കണമെന്നും ബ്ലൂടൂത്ത് വഴി വാച്ചുമായി ബന്ധിപ്പിച്ചിരിക്കണമെന്നും നിബന്ധനയുണ്ട്.

ഫീച്ചർ ട്രാക്കർ ആയ വാബീറ്റ ഇൻഫോയുടെ റിപ്പോർട്ട് പ്രകാരം എൻഡ്യൂറോ 3, ഫീനിക്സ് 8, ഫീനിക്സ് 8 പ്രോ, ഫീനിക്സ് ഇ, ഫോർറണ്ണർ 570, ഫോർറണ്ണർ 970, ക്വാട്ടിക്സ് 8, ടാക്ടിക്സ് 8, വേനു 4, വേനു എക്സ്1, വിവോആക്ടീവ് 6 എന്നീ മോഡലുകളിലാണ് ഈ സൗകര്യം ലഭ്യമാകുന്നത്.

ആൻഡ്രോയിഡ് അല്ലെങ്കിൽ ഐഒഎസ് ഉപയോക്താക്കൾ വാട്സ്ആപ്പിന്റെ 2.26.70 വേർഷനോ അതിന് ശേഷമുള്ള പുതിയ വേർഷനോ ആണ് ഉപയോഗിക്കേണ്ടത്. ഇതിനൊപ്പം ഗാർമിൻ ആപ്പിന്റെ 26.10.105 വേർഷനും അപ്‌ഡേറ്റ് ചെയ്യേണ്ടതുണ്ട്. ഐഫോൺ ഉപയോഗിക്കുന്നവർ സിസ്റ്റം സെറ്റിങ്‌സ് വഴി വാട്സ്ആപ്പിന് ബ്ലൂടൂത്ത് ആക്സസ് നൽകിയാൽ മാത്രമേ നോട്ടിഫിക്കേഷനുകൾ കൃത്യമായി ലഭിക്കുകയുള്ളൂ.

 വാച്ചിലെ ക്രമീകരണങ്ങൾ പൂർത്തിയാക്കിയാൽ വാട്സ്ആപ്പ് സന്ദേശങ്ങൾ തത്സമയം ലഭിച്ചുതുടങ്ങും. ഉപയോക്താക്കൾക്ക് സംഭാഷണങ്ങൾ തുറക്കാനും സന്ദേശം അയച്ച വ്യക്തിയെ തിരിച്ചറിയാനും സന്ദേശങ്ങൾ പൂർണ്ണരൂപത്തിൽ വായിക്കാനും സാധിക്കും. വാച്ചിലെ കീബോർഡ് ഉപയോഗിച്ചോ, നേരത്തെ തയ്യാറാക്കി വെച്ച മറുപടികൾ വഴിയോ, ഇമോജികൾ ഉപയോഗിച്ചോ സന്ദേശങ്ങൾക്ക് മറുപടി നൽകാവുന്നതാണ്. വാച്ചിന്റെ സ്ക്രീനിൽ ഒരേസമയം ഏറ്റവും പുതിയ പത്ത് സംഭാഷണങ്ങൾ വരെ കാണാൻ സാധിക്കും. വാട്സ്ആപ്പ് കോളുകൾ വരുമ്പോൾ വാച്ചിൽ തെളിയുമെങ്കിലും അവ നിരസിക്കാൻ മാത്രമേ നിലവിൽ സൗകര്യമുള്ളൂ. ചിത്രങ്ങളും മറ്റും വാച്ചിൽ കാണാൻ സാധിക്കുമെങ്കിലും ഫോട്ടോകളോ വീഡിയോകളോ തിരിച്ച് അയക്കാൻ കഴിയില്ല. ഗാർമിൻ സന്ദേശങ്ങളും കോളുകളും എൻഡ്-ടു-എൻഡ് എൻക്രിപ്റ്റഡ് ആയി തുടരുമെന്ന് കമ്പനി അറിയിച്ചു. എന്നാൽ നിലവിൽ പേഴ്സണൽ അക്കൗണ്ടുകൾക്ക് മാത്രമാണ് ഈ സേവനം ലഭ്യമാകുക. വാട്സ്ആപ്പ് ബിസിനസ് അക്കൗണ്ടുകൾക്ക് ഈ ഫീച്ചർ ഉപയോഗിക്കാൻ സാധിക്കില്ല.

ഗാർമിൻ സ്മാർട്ട് വാച്ചുകളിൽ ലഭ്യമാകുന്ന ആദ്യത്തെ തേർഡ് പാർട്ടി മെസ്സേജിംഗ് ആപ്പാണ് വാട്സ്ആപ്പ് എന്ന് കമ്പനി വ്യക്തമാക്കി. ഗാർമിൻ്റെ കണക്ട് ഐക്യു പ്ലാറ്റ്‌ഫോമിലൂടെയും ഡെവലപ്പർ പ്രോഗ്രാമിലൂടെയുമാണ് ഈ സൗകര്യം ഒരുക്കിയിരിക്കുന്നത്. ഗൂഗിൾ പ്ലേ സ്റ്റോർ, ആപ്പിൾ ആപ്പ് സ്റ്റോർ എന്നിവ വഴി കണക്ട് ഐക്യു സ്റ്റോർ ലഭ്യമാണ്. ഇതിലൂടെ അനുയോജ്യമായ ഉപകരണങ്ങൾക്കായി വിവിധ ആപ്പുകൾ, വാച്ച് ഫേസുകൾ, മറ്റ് സേവനങ്ങൾ എന്നിവ ഡൗൺലോഡ് ചെയ്യാവുന്നതാണ്.