ഇനി ബാഗിലൊതുങ്ങും ഈ 'മാജിക്' ഡ്രയർ; ഡൈസൺ സൂപ്പർസോണിക് ട്രാവൽ വിപണിയിൽ!

ഡൈസന്റെ പ്രമുഖ ഹെയർ ഡ്രയർ മോഡലിന്റെ കൂടുതൽ ഒതുങ്ങിയ പതിപ്പായ ഡൈസൺ സൂപ്പർസോണിക് ട്രാവൽ വിപണിയിലെത്തി. യാത്രകൾക്കും ജിം ഉപയോഗങ്ങൾക്കും അനുയോജ്യമായ രീതിയിൽ വളരെ ഭാരം കുറഞ്ഞും വലിപ്പം കുറച്ചുമാണ് ഇത് രൂപകൽപ്പന ചെയ്തിരിക്കുന്നത്. വലിപ്പത്തിൽ മാറ്റം വരുത്തിയെങ്കിലും ഡൈസണിന്റെ തനതായ എയർഫ്ലോ സംവിധാനവും താപനിയന്ത്രണവും ഇതിലും ഉറപ്പാക്കിയിട്ടുണ്ട്. സാധാരണ സൂപ്പർസോണിക് ഡ്രയറിനേക്കാൾ കനം കുറഞ്ഞ ഈ മോഡലിൽ പഴയ മോഡലിലെ അറ്റാച്ച്‌മെന്റുകളും ഉപയോഗിക്കാനാകും.

ഡൈസൺ സൂപ്പർസോണിക് ട്രാവൽ: വിലയും ലഭ്യതയും

ഡൈസൺ സൂപ്പർസോണിക് ട്രാവൽ ഹെയർ ഡ്രയർ തിരഞ്ഞെടുത്ത ആഗോള വിപണികളിൽ ഏകദേശം 28,000 രൂപയ്ക്ക് (299.99 ഡോളർ) അവതരിപ്പിച്ചു. ഇന്ത്യയിലെ ഇതിന്റെ വില വിവരങ്ങൾ നിലവിൽ ലഭ്യമായിട്ടില്ല. ഇന്ത്യയിൽ എന്നുമുതൽ ഈ ഉൽപ്പന്നം ലഭിക്കുമെന്നത് സംബന്ധിച്ച ഔദ്യോഗിക പ്രഖ്യാപനം ഉടൻ ഉണ്ടാകുമെന്നാണ് കരുതുന്നത്.

ഡൈസൺ സൂപ്പർസോണിക് ട്രാവൽ: സവിശേഷതകൾ

പഴയ മോഡലിനേക്കാൾ 32 ശതമാനം വലിപ്പവും 25 ശതമാനം ഭാരവും കുറഞ്ഞതാണ് പുതിയ ഡൈസൺ സൂപ്പർസോണിക് ട്രാവൽ. വെറും 330 ഗ്രാം ഭാരമുള്ള ഈ ഡ്രയർ, വലിപ്പത്തിൽ ചെറുതാണെങ്കിലും പ്രകടനം മെച്ചപ്പെട്ടതാണ്. വേഗത്തിലുള്ള ഹെയർ ഡ്രൈയിംഗിനായി ഇതിൽ മികച്ച എയർഫ്ലോ സംവിധാനമാണ് ഒരുക്കിയിരിക്കുന്നത്.

ഉപയോക്താക്കൾക്ക് ഇഷ്ടാനുസൃതമായി ക്രമീകരിക്കാവുന്ന മൂന്ന് ഹീറ്റ് സെറ്റിംഗുകളും രണ്ട് സ്പീഡ് മോഡുകളും ഇതിലുണ്ട്. സെക്കൻഡിൽ 11.6 ലിറ്റർ എയർഫ്ലോ ഇത് പ്രദാനം ചെയ്യുന്നു. 100–240V എന്ന ഗ്ലോബൽ വോൾട്ടേജ് കോംപാറ്റിബിലിറ്റി ഉള്ളതിനാൽ, യാത്രക്കാർക്ക് പ്രത്യേക വോൾട്ടേജ് അഡ്ജസ്റ്റ്‌മെന്റുകൾ ഇല്ലാതെ തന്നെ വിവിധ രാജ്യങ്ങളിൽ ഇത് അനായാസം ഉപയോഗിക്കാം.

പുതിയ ഉൽപ്പന്നത്തെക്കുറിച്ച് ഡൈസൺ സ്ഥാപകൻ ജെയിംസ് ഡൈസൺ വ്യക്തമാക്കുന്നത് ഇങ്ങനെയാണ്: "മുടിക്ക് അമിതമായ ചൂടേൽക്കാതെ തന്നെ മികച്ച സ്റ്റൈലിംഗ് നൽകാൻ സൂപ്പർസോണിക് ട്രാവലിന് സാധിക്കും. പ്രകടനം, കൊണ്ടുനടക്കാനുള്ള എളുപ്പം, മുടിയുടെ ആരോഗ്യം എന്നിവയ്ക്കാണ് ഞങ്ങൾ ഇതിൽ പ്രാധാന്യം നൽകിയിരിക്കുന്നത്."

മുടിയുടെ സംരക്ഷണത്തിനായി അത്യാധുനികമായ ഇന്റലിജന്റ് ഹീറ്റ് കൺട്രോൾ സംവിധാനം ഈ ഡ്രയറിൽ ഒരുക്കിയിട്ടുണ്ട്. ഓരോ സെക്കൻഡിലും നൂറ് തവണയോളം വായുവിന്റെ താപനില പരിശോധിച്ച് മുടിക്ക് കേടുപാടുകൾ സംഭവിക്കുന്നത് ഇത് തടയുന്നു. മിനിറ്റിൽ 1,10,000rpm വേഗതയുള്ള മോട്ടോറും എയർ മൾട്ടിപ്ലയർ സാങ്കേതികവിദ്യയും ചേരുന്നതോടെ മുടി വളരെ വേഗത്തിൽ ഉണക്കാൻ ആവശ്യമായ വായുപ്രവാഹം ലഭിക്കുമെന്ന് കമ്പനി പറയുന്നു.

കൃത്യമായ സ്റ്റൈലിംഗിനായി ഒരു സ്റ്റൈലിംഗ് കോൺസെൻട്രേറ്റർ അറ്റാച്ച്‌മെന്റും ഇതിനൊപ്പം ലഭിക്കും. പഴയ ഡൈസൺ സൂപ്പർസോണിക്, സൂപ്പർസോണിക് നുറൽ മോഡലുകളുടെ ആക്സസറികൾ ഇതിലും ഉപയോഗിക്കാം എന്നത് ഇതിന്റെ വലിയൊരു സവിശേഷതയാണ്.