ഫ്രണ്ട്ഷിപ്പ് ഡേയ്ക്ക് നൽകാൻ മികച്ച 5 ഡിജിറ്റൽ സമ്മാനങ്ങൾ

ഇന്ത്യയിൽ ഓഗസ്റ്റ് മാസത്തിലെ ആദ്യ ഞായറാഴ്ചയാണ് സൗഹൃദദിനമായി ആഘോഷിക്കുന്നത്. ഇത്തവണ അത് 2026 ഓഗസ്റ്റ് 2-നാണ് വരുന്നത്. പ്രിയ കൂട്ടുകാരന് നൽകാൻ ഇതുവരെ സമ്മാനമൊന്നും വാങ്ങിയിട്ടില്ലെങ്കിൽ ഒട്ടും വിഷമിക്കേണ്ട, ധാരാളം ഡിജിറ്റൽ സമ്മാനങ്ങൾ ഇന്ന് വിരൽത്തുമ്പിൽ ലഭ്യമാണ്. പഴയതുപോലെ കടകളിൽ കയറിയിറങ്ങി സമയം കളയുന്നതിന് പകരം ഇമെയിൽ വഴിയോ മെസ്സേജിംഗ് ആപ്പുകൾ വഴിയോ സബ്‌സ്‌ക്രിപ്‌ഷനുകളോ ഗിഫ്റ്റ് വൗച്ചറുകളോ എളുപ്പത്തിൽ അയച്ചുനൽകാം. ഇത് പുറത്തുപോയി ഷോപ്പിംഗ് ചെയ്യാനുള്ള ബുദ്ധിമുട്ടും ഒഴിവാക്കാൻ സഹായിക്കും. സൗഹൃദദിനത്തിൽ നൽകാൻ പറ്റിയ മികച്ച ചില ഡിജിറ്റൽ ഗിഫ്റ്റ് ആശയങ്ങൾ ഇതാ:

ആമസോൺ പ്രൈം മെമ്പർഷിപ്പ്

നിങ്ങളുടെ കൂട്ടുകാരന് ഓൺലൈൻ ഷോപ്പിംഗും സിനിമകളും ടിവി ഷോകളും കാണുന്നതും ഇഷ്ടമാണെങ്കിൽ, ആമസോൺ പ്രൈം മെമ്പർഷിപ്പ് നൽകുന്നത് വളരെ ഉപകാരപ്രദമായിരിക്കും. പ്രതിവർഷം ₹1,499 നിരക്കിൽ ലഭിക്കുന്ന ഇതിൽ പ്രൈം വീഡിയോ, ആമസോൺ മ്യൂസിക്, പ്രൈം റീഡിംഗ്, വേഗതയേറിയ ഡെലിവറി ആനുകൂല്യങ്ങൾ എന്നിവ ഉൾപ്പെടുന്നു. ആനുകൂല്യങ്ങൾ കുറവാണെങ്കിലും പ്രൈം ലൈറ്റ്, പ്രൈം ഷോപ്പിംഗ് എഡിഷൻ എന്നിവയും ആമസോൺ വാഗ്ദാനം ചെയ്യുന്നുണ്ട്.

ഗൂഗിൾ പ്ലേ ഗിഫ്റ്റ് കാർഡ്

ആൻഡ്രോയിഡ് ഉപയോക്താക്കളായ കൂട്ടുകാർക്ക് നൽകാൻ പറ്റിയ ഏറ്റവും മികച്ച സമ്മാനങ്ങളില ഒന്നാണിത്. ഗൂഗിൾ പ്ലേ സ്റ്റോർ വഴി ഇഷ്ടമുള്ള ആപ്പുകൾ, ഗെയിമുകൾ, സിനിമകൾ, പുസ്തകങ്ങൾ എന്നിവ വാങ്ങാനും ആപ്പുകളിലെ ഇൻ-ആപ്പ് പർച്ചേസുകൾ നടത്താനും ഈ തുക ഉപയോഗിക്കാം. ഇന്ത്യയിൽ ₹100 മുതൽ ₹1,500 വരെ ഈ ഗിഫ്റ്റ് കാർഡുകൾ ലഭ്യമാണ്.

ബുക്ക്മൈഷോ ഗിഫ്റ്റ് കാർഡ്

സിനിമകളും ലൈവ് ഷോകളും മ്യൂസിക് കൺസെർട്ടുകളും സ്പോർട്സ് മത്സരങ്ങളുമൊക്കെ ആസ്വദിക്കാൻ ഇഷ്ടപ്പെടുന്ന കൂട്ടുകാർക്ക് നൽകാൻ ബുക്ക്മൈഷോ ഗിഫ്റ്റ് കാർഡ് അനുയോജ്യമാണ്. ഏതെങ്കിലും ഒരു പരിപാടി നിങ്ങൾ തന്നെ തിരഞ്ഞെടുത്ത് നൽകുന്നതിന് പകരം, കൂട്ടുകാരന്റെ ഇഷ്ടത്തിനനുസരിച്ച് അനുയോജ്യമായ ഷോ തിരഞ്ഞെടുക്കാൻ ഇത് അവസരമൊരുക്കുന്നു. 12 മാസമാണ് ഈ ഗിഫ്റ്റ് കാർഡുകളുടെ വാലിഡിറ്റി.

പ്ലേസ്റ്റേഷൻ സ്റ്റോർ ഗിഫ്റ്റ് കാർഡ്

ഗെയിമിംഗ് ഇഷ്ടപ്പെടുന്ന നിങ്ങളുടെ കൂട്ടുകാരന്റെ പക്കൽ PS5 അല്ലെങ്കിൽ PS4 ഉണ്ടെങ്കിൽ, കൊടുക്കാൻ പറ്റിയ ഒന്നാന്തരം സമ്മാനമാണ് പ്ലേസ്റ്റേഷൻ സ്റ്റോർ ഗിഫ്റ്റ് കാർഡ്. പുതിയ ഡിജിറ്റൽ ഗെയിമുകൾ, ഗെയിം ആഡ്-ഓണുകൾ, വെർച്വൽ കറൻസി, പ്ലേസ്റ്റേഷൻ പ്ലസ് മെമ്പർഷിപ്പുകൾ എന്നിവയൊക്കെ വാങ്ങാൻ ഈ കാർഡ് ഉപയോഗിക്കാം. ഇന്ത്യയിൽ ₹670, ₹2,000 എന്നീ തുകകളിൽ ഈ ഗിഫ്റ്റ് കാർഡുകൾ ലഭിക്കും. വൗച്ചർ കോഡുകൾ ഓരോ രാജ്യത്തിനും (region-specific) പ്രത്യേകമായുള്ളതിനാൽ, വാങ്ങുന്നതിന് മുമ്പ് കൂട്ടുകാരന്റേത് ഇന്ത്യൻ പ്ലേസ്റ്റേഷൻ അക്കൗണ്ട് തന്നെയാണെന്ന് ഉറപ്പുവരുത്തുക.

സ്പോട്ടിഫൈ പ്രീമിയം പ്രീപെയ്ഡ് പ്ലാൻ

എപ്പോഴും പാട്ടുകൾ ആസ്വദിക്കുന്ന കൂട്ടുകാർക്ക് നൽകാൻ പറ്റിയ മികച്ചൊരു ഓപ്ഷനാണ് സ്പോട്ടിഫൈ പ്രീമിയം പ്രീപെയ്ഡ് പ്ലാൻ. പരസ്യങ്ങളുടെ ശല്യമില്ലാത്ത സ്ട്രീമിംഗ്, പാട്ടുകൾ ഡൗൺലോഡ് ചെയ്ത് ഓഫ്‌ലൈനായി കേൾക്കാനുള്ള സൗകര്യം എന്നിവയൊക്കെ ഇതിലൂടെ ആസ്വദിക്കാം. നിലവിൽ ₹1,390 നിരക്കിൽ ഒരു വർഷത്തെ പ്രീമിയം സ്റ്റാൻഡേർഡ് പ്ലാൻ സ്പോട്ടിഫൈ വാഗ്ദാനം ചെയ്യുന്നുണ്ട്.

ശ്രദ്ധിക്കേണ്ട പ്രധാന കാര്യങ്ങൾ

• ഡിജിറ്റൽ ഗിഫ്റ്റ് വൗച്ചറുകൾ വാങ്ങിയാൽ ഭൂരിഭാഗവും പണം തിരികെ ലഭിക്കാറില്ല (non-refundable). അതിനാൽ വൗച്ചർ അയക്കുന്നതിന് മുൻപ് കൂട്ടുകാരന്റെ കൃത്യമായ ഇമെയിൽ വിലാസമോ ഫോൺ നമ്പറോ തന്നെയാണ് നൽകിയതെന്ന് ഉറപ്പാക്കുക.

• അക്കൗണ്ട് റീജിയൺ, ഡിവൈസ് കോംപാറ്റിബിലിറ്റി, വൗച്ചറിന്റെ കാലാവധി, കൂട്ടുകാരന് നിലവിൽ ആ ആപ്പിൽ സബ്‌സ്‌ക്രിപ്‌ഷൻ ഉണ്ടോ എന്നിവ മുൻകൂട്ടി പരിശോധിക്കുന്നത് നന്നായിരിക്കും.

• അപരിചിതരിൽ നിന്നോ വിശ്വസിക്കാൻ കൊള്ളാത്ത വെബ്‌സൈറ്റുകളിൽ നിന്നോ വിലക്കുറവിൽ വൗച്ചർ കോഡുകൾ വാങ്ങുന്നത് ഒഴിവാക്കുക. എപ്പോഴും അംഗീകൃത പ്ലാറ്റ്‌ഫോമുകളിൽ നിന്ന് മാത്രം ഇവ വാങ്ങാൻ ശ്രദ്ധിക്കുക.