999 രൂപ നൽകി സാംസങ് ഗാലക്സി ഫോൾഡബിൾ ഫോണുകൾ പ്രീ-ബുക്ക് ചെയ്യൂ; കിടിലൻ ഓഫറുകൾ സ്വന്തമാക്കൂ!

പുതിയ ഗാലക്സി ഫോൾഡബിൾ ഫോണുകൾക്കായി ഇന്ത്യയിൽ പ്രീ റിസർവേഷൻ ആരംഭിച്ചതായി സാംസങ് പ്രഖ്യാപിച്ചു.

999 രൂപയുടെ റീഫണ്ടബിൾ ടോക്കൺ തുക നൽകി ഉപഭോക്താക്കൾക്ക് ഈ ഫോണുകൾ മുൻകൂട്ടി റിസർവ് ചെയ്യാം. സാംസങ് വെബ്സൈറ്റ്, സാംസങ് എക്സ്ക്ലൂസീവ് സ്റ്റോറുകൾ, ആമസോൺ, ഫ്ലിപ്പ്കാർട്ട്, രാജ്യത്തെ പ്രമുഖ റീട്ടെയിൽ ഔട്ട്‌ലെറ്റുകൾ എന്നിവ വഴി പ്രീ റിസർവേഷൻ നടത്താവുന്നതാണ്. പ്രീ റിസർവ് ചെയ്യുന്നവർക്ക് ഫോൺ വാങ്ങുമ്പോൾ 2799 രൂപയുടെ ആനുകൂല്യങ്ങൾ ലഭിക്കും.

ഫോൾഡബിൾ ഫോണുകൾ കൂടുതൽ മെലിഞ്ഞതും ഭാരം കുറഞ്ഞതും കരുത്തുറ്റതുമാക്കാനാണ് സാംസങ് മുൻഗണന നൽകുന്നത്. ആർട്ടിഫിഷ്യൽ ഇന്റലിജൻസ് സംവിധാനങ്ങളെ നൂതനമായ രൂപകൽപ്പനയുമായി സംയോജിപ്പിച്ച് ഉപഭോക്താക്കൾക്ക് മികച്ച അനുഭവം നൽകാനാണ് കമ്പനി ലക്ഷ്യമിടുന്നത്.

ജൂലൈ 22 ന് ലണ്ടനിൽ നടക്കുന്ന ഗാലക്സി അൺപാക്ക്ഡ് ചടങ്ങ് ഇന്ത്യൻ സമയം വൈകിട്ട് 6.30 മുതൽ സാംസങ് വെബ്സൈറ്റ്, സാംസങ് ന്യൂസ്‌റൂം, സാംസങ്ങിന്റെ യൂട്യൂബ് ചാനൽ എന്നിവയിലൂടെ തത്സമയം കാണാം.