എല്ലാവർക്കും ഇനി വഴിമാറി നിൽക്കാം; സാംസങ്ങ് ഗാലക്സി M36 5G ഇന്ത്യയിലേക്ക്

ഇലക്ട്രോണിക്സ് ഉൽപന്നങ്ങളുടെ ബ്രാൻഡിലെ അതികായന്മാരിൽ ഒരാളാണ് സാംസങ്ങ്. മത്തൻ കുത്തിയാൽ കുമ്പളം മുളക്കില്ലെന്നു പറഞ്ഞ് സാംസങ്ങിൻ്റെ സ്മാർട്ട്ഫോണുകളിൽ വിശ്വാസമർപ്പിക്കുന്ന നിരവധി പേരുണ്ട്. ഇന്ത്യൻ വിപണിയിൽ ഓളമുണ്ടാക്കാൻ പോകുന്ന സാംസങ്ങിൻ്റെ ഏറ്റവും പുതിയ ഫോണായ ഗാലക്‌സി M36 5G ഇന്ത്യയിൽ ലോഞ്ച് ചെയ്യുന്ന തീയതി സ്ഥിരീകരിച്ചു. വരാനിരിക്കുന്ന സ്മാർട്ട്‌ഫോണിന്റെ ഡിസൈൻ വെളിപ്പെടുത്തുകയും പ്രൈസ് റേഞ്ചിനെക്കുറിച്ച് സൂചന നൽകുകയും ചെയ്യുന്ന ഒരു ടീസർ കമ്പനി അടുത്തിടെ പങ്കിട്ടിരുന്നു. ഇപ്പോൾ, ഫോണിന്റെ ചില പ്രധാന സവിശേഷതകളും ഔദ്യോഗികമായി വെളിപ്പെടുത്തിയിട്ടുണ്ട്. ക്യാമറ, ഡിസൈൻ, വലിപ്പം എന്നിവയെക്കുറിച്ചുള്ള വിവരങ്ങൾ ഇതിൽ ഉൾപ്പെടുന്നു. 2024 ജൂലൈയിൽ ഇന്ത്യയിൽ ലോഞ്ച് ചെയ്ത ഗാലക്‌സി M35 5G-യുടെ പിൻഗാമിയായിരിക്കും ഗാലക്‌സി M36 5G എന്നാണു പ്രതീക്ഷിക്കുന്നത്. പുതിയ മോഡൽ ട്രിപ്പിൾ റിയർ ക്യാമറ സെറ്റപ്പുമായാണ് ഈ ഫോൺ വരുന്നത്. ഫീച്ചറിലും ഡിസൈനിലും മെച്ചപ്പെടുത്തലുകൾ വരുത്തിക്കൊണ്ട്, ഗാലക്‌സി M36 5G അതിന്റെ മുൻഗാമിയെ അപേക്ഷിച്ച് മികച്ച അനുഭവം വാഗ്ദാനം ചെയ്യാനാണു ലക്ഷ്യമിടുന്നത്.

സാംസങ്ങ് ഗാലക്സി M36 5G-യുടെ ലോഞ്ച് തീയ്യതിയും പ്രതീക്ഷിക്കുന്ന വിലയും:

ജൂൺ 27-ന് ഇന്ത്യയിൽ ഗാലക്‌സി M36 5G പുറത്തിറക്കുമെന്ന് സാംസങ് ഔദ്യോഗികമായി പ്രഖ്യാപിച്ചു. കമ്പനി പുറത്തിറക്കിയ പത്രക്കുറിപ്പിലൂടെയാണ് ഈ സ്ഥിരീകരണം നൽകിയത്. താങ്ങാനാവുന്ന വിലയിൽ മികച്ച സവിശേഷതകൾ വാഗ്ദാനം ചെയ്യുന്ന ഒരു ബജറ്റ് ഫ്രണ്ട്ലി 5G ഫോണായിരിക്കും സാംസങ്ങ് ഗാലക്സി M36 5G എന്നു പ്രതീക്ഷിക്കുന്നു.

ആമസോൺ ഇന്ത്യയിൽ ഗാലക്‌സി M36 5G-യുടെ ഒരു ലൈവ് മൈക്രോസൈറ്റും ആരംഭിച്ചിട്ടുണ്ട്. ആമസോണിന്റെ ഓൺലൈൻ സ്റ്റോറിലൂടെയും സാംസങ് ഇന്ത്യയുടെ ഔദ്യോഗിക വെബ്‌സൈറ്റിലൂടെയും ഫോൺ വാങ്ങാൻ ലഭ്യമാകുമെന്ന് ഇത് സൂചിപ്പിക്കുന്നു. ഓറഞ്ച് ഹേസ്, സെറീൻ ഗ്രീൻ, വെൽവെറ്റ് ബ്ലാക്ക് എന്നീ മൂന്ന് ആകർഷകമായ നിറങ്ങളിൽ ഗാലക്‌സി M36 5G ലഭ്യമാകുമെന്ന് കമ്പനി വെളിപ്പെടുത്തി.

വരാനിരിക്കുന്ന സ്മാർട്ട്‌ഫോണിന്റെ ഏകദേശ വിലയും സാംസങ് വെളിപ്പെടുത്തിയിട്ടുണ്ട്. ഇന്ത്യയിൽ ഗാലക്‌സി M36 5G-യുടെ വില 20,000 രൂപയിൽ താഴെയായിരിക്കും. അതുകൊണ്ടു തന്നെ ബജറ്റ് ഫ്രണ്ട്ലി സ്മാർട്ട്ഫോണുകളുടെ വിപണിയിൽ വലിയ മത്സരമുണ്ടാക്കാൻ ഇതിനു കഴിയുമെന്നതിൽ സംശയമില്ല.

സാംസങ്ങ് ഗാലക്സി M36 5G-യിൽ പ്രതീക്ഷിക്കുന്ന സവിശേഷതകൾ:

സാംസങ്ങ് തങ്ങളുടെ വരാനിരിക്കുന്ന ഗാലക്‌സി M36 5G സ്മാർട്ട്‌ഫോണിനെക്കുറിച്ചുള്ള കൂടുതൽ വിവരങ്ങൾ കഴിഞ്ഞ ദിവസങ്ങളിൽ പുറത്തു വിട്ടിരുന്നു. ഫോൺ വളരെ മെലിഞ്ഞതായിരിക്കുമെന്നു സ്ഥിരീകരിച്ചിട്ടുണ്ട്. വെറും 7.7 മില്ലിമീറ്റർ കനമാകും ഇതിനുണ്ടാവുക. കോർണിംഗ് ഗൊറില്ല ഗ്ലാസ് വിക്ടസിൻ്റെ സംരക്ഷണമുള്ള ഒരു ഡിസ്‌പ്ലേ ഇതിൽ ഉണ്ടായിരിക്കും. ഇത് പോറലുകൾ പോലെയുള്ള കേടുപാടുകൾ തടയാൻ സഹായിക്കുന്നു. ഗൂഗിൾ ജെമിനി, സർക്കിൾ ടു സെർച്ച് പോലുള്ള AI പവർ ടൂളുകളും ഗാലക്‌സി M36 5G ഫോണിൽ ഉണ്ടായിരിക്കും.

ക്യാമറകളുടെ കാര്യത്തിൽ, ഗാലക്‌സി M36 5G ട്രിപ്പിൾ റിയർ ക്യാമറ സെറ്റപ്പുമായാണു വരുന്നത്. ഫോട്ടോകളിലും വീഡിയോകളിലും മങ്ങൽ കുറയ്ക്കാൻ സഹായിക്കുന്ന ഒപ്റ്റിക്കൽ ഇമേജ് സ്റ്റെബിലൈസേഷൻ (OIS) ഉള്ള 50 മെഗാപിക്സൽ സെൻസറായിരിക്കും പ്രധാന ക്യാമറ. മൂന്ന് ക്യാമറ സെൻസറുകളും ഫോണിന്റെ പിൻഭാഗത്തുള്ള ഒരു ഗുളിക ആകൃതിയിലുള്ള മൊഡ്യൂളിനുള്ളിൽ ആയിരിക്കും. അതിനടുത്തായി, ഒരു LED ഫ്ലാഷ് ഉണ്ടാകും. മുന്നിലെയും പിന്നിലെയും ക്യാമറകൾ 4K വീഡിയോ റെക്കോർഡിംഗിനെ പിന്തുണയ്ക്കുമെന്ന് സാംസങ് സ്ഥിരീകരിച്ചു. ഇത് മറ്റു ഫോണുകളിൽ അപേക്ഷിച്ചു സാംസങ്ങിനെ തിരഞ്ഞെടുക്കാൻ ആളുകളെ പ്രേരിപ്പിക്കും.

അടുത്തിടെ, ഗാലക്‌സി M36 5G എന്ന് വിശ്വസിക്കപ്പെടുന്ന, മോഡൽ നമ്പർ SM-M366B ഉള്ള ഒരു ഉപകരണം ഗീക്ക്ബെഞ്ച് ബെഞ്ച്മാർക്കിംഗ് വെബ്‌സൈറ്റിൽ പ്രത്യക്ഷപ്പെട്ടിരുന്നു. ലിസ്റ്റിംഗ് അനുസരിച്ച്, ഫോൺ എക്‌സിനോസ് 1380 പ്രോസസറിൽ പ്രവർത്തിക്കുമെന്നും 6 ജിബി റാമുമായി വരുമെന്നും പ്രതീക്ഷിക്കുന്നു. ആൻഡ്രോയ്ഡ് 15 അടിസ്ഥാനമാക്കിയുള്ള സാംസങ്ങിന്റെ ഏറ്റവും പുതിയ വൺ Ul7 സ്കിൻ ഉപയോഗിച്ച് ഇതു പ്രവർത്തിക്കുമെന്നും കരുതുന്നു. ലോഞ്ച് തിയ്യതിയോട് അടുക്കുമ്പോൾ കൂടുതൽ വിവരങ്ങൾ പുറത്തു വരുമെന്നാണു പ്രതീക്ഷിക്കുന്നത്.