മെസ്സിയുടെ നേതൃത്വത്തിൽ അർജന്റീനയുടെ ലോകകപ്പ് പട; വമ്പൻ താരങ്ങൾക്ക് സ്ഥാനം നഷ്ടമായി!

2026 ഫിഫ ലോകകപ്പിനായുള്ള അർജന്റീനയുടെ 26 അംഗ ടീമിനെ പരിശീലകൻ ലയണൽ സ്‌കലോണി പ്രഖ്യാപിച്ചു. ഫുട്ബോൾ ലോകം ആകാംക്ഷയോടെ കാത്തിരുന്ന ചോദ്യത്തിന് ഇതോടെ ഉത്തരമായി: അർജന്റീനയെ ലയണൽ മെസ്സി തന്നെ നയിക്കും. തന്റെ കരിയറിലെ ആറാം ലോകകപ്പിനാണ് 38-കാരനായ മെസ്സി ഇറങ്ങുന്നത്.

ഖത്തർ ലോകകപ്പിൽ ജേതാക്കളായ ടീമിലെ 17 താരങ്ങൾ ഇത്തവണയും സ്ക്വാഡിൽ ഇടംപിടിച്ചിട്ടുണ്ട്. പരിക്കിന്റെ ആശങ്കകൾക്കിടയിലും ടീമിനെ നയിക്കാൻ മെസ്സി തയ്യാറാണെന്ന് സ്‌കലോണി വ്യക്തമാക്കുന്നു. റയൽ മാഡ്രിഡ് താരം ഫ്രാങ്കോ മാസ്റ്റാൻടുണോ, റൊമയുടെ പൗലോ ഡിബാല, എമിലിയാനോ ബുവെൻഡിയ തുടങ്ങിയ പ്രമുഖ താരങ്ങൾക്ക് ടീമിൽ ഇടംനേടാനായില്ല എന്നത് ആരാധകർക്ക് വലിയ നിരാശയായിട്ടുണ്ട്.

അതേസമയം, പരിക്കിൽ നിന്നും മോചിതനായി വരുന്ന ടോട്ടനം ഹോട്ട്സ്പർ താരം ക്രിസ്റ്റ്യൻ റൊമേറോയെ ടീമിൽ ഉൾപ്പെടുത്തിയിട്ടുണ്ട്. നികോളാസ് പാസ്, വാലന്റീൻ ബാർകോ തുടങ്ങിയ യുവതാരങ്ങൾക്കും സ്‌കലോണി അവസരം നൽകി.

ജൂൺ 11-ന് ആരംഭിക്കുന്ന ലോകകപ്പിൽ അൽജീരിയക്കെതിരെയാണ് അർജന്റീനയുടെ ആദ്യ മത്സരം.

അർജന്റീന സ്ക്വാഡ്:

• ഗോൾകീപ്പർമാർ: എമിലിയാനോ മാർട്ടിനെസ്, ജെറോനിമോ റൂളി, ജുവാൻ മുസ്സോ.

• പ്രതിരോധനിര: ഗോൺസാലോ മോണ്ടിയൽ, നഹുൽ മൊലീന, ലിസാൻഡ്രോ മാർട്ടിനെസ്, നിക്കോളാസ് ഓട്ടമെൻഡി, ലിയോനാർഡോ ബലേർഡി, ക്രിസ്റ്റ്യൻ റൊമേറോ, ഫാകുണ്ടോ മെദീന, നിക്കോളാസ് ടാഗ്ലിയാഫിക്കോ.

• മധ്യനിര: ലിയാൻഡ്രോ പരേഡസ്, റോഡ്രിഗോ ഡി പോൾ, എക്സെക്വിയൽ പാലാസിയോസ്, എൻസോ ഫെർണാണ്ടസ്, അലക്സിസ് മാക് അലിസ്റ്റർ, ജിയോവാനി ലോ സെൽസോ, വാലന്റീൻ ബാർകോ.

• മുന്നേറ്റനിര: ലയണൽ മെസ്സി, നിക്കോളാസ് പാസ്, തിയാഗോ അൽമാഡ, നിക്കോളാസ് ഗോൺസാലസ്, ജൂലിയൻ അൽവാരസ്, ഗിലിയാനോ സിമിയോണി, ലൗട്ടാരോ മാർട്ടിനെസ്, ജോസ് മാനുവൽ ലോപ്പസ്.