ഐഫോൺ 18 പ്രോയുടെ നിർമ്മാണച്ചെലവ് 68,000 രൂപയായി ഉയരാൻ സാധ്യത

ഭാവിയിൽ ആപ്പിൾ ഉൽപ്പന്നങ്ങളുടെ വില വർദ്ധിക്കുമെന്ന് സിഇഒ ടിം കുക്ക് സൂചന നൽകി. മെമ്മറി, സ്റ്റോറേജ് തുടങ്ങിയ സ്മാർട്ട്ഫോൺ ഘടകങ്ങളുടെ വിലയിലുണ്ടായ വർദ്ധനവാണ് ഇതിന് കാരണമായി അദ്ദേഹം ചൂണ്ടിക്കാട്ടുന്നത്. ഐഫോൺ 18 പ്രോയ്ക്ക് വൻ വില വർദ്ധനവ് ഉണ്ടാകുമെന്ന് നേരത്തെ റിപ്പോർട്ടുകൾ വന്നിരുന്നുവെങ്കിലും, പുതിയ കണക്കുകൾ പ്രകാരം ഐഫോൺ 17, 18 സീരീസുകൾ തമ്മിലുള്ള വിലയിലെ വ്യത്യാസം അത്ര വലിയ തോതിലായിരിക്കില്ലെന്നാണ് സൂചന.

ഐഫോൺ 18 പ്രോ മോഡലുകളുടെ വിലയിൽ 50 ഡോളർ വരെ വർദ്ധനവുണ്ടാകാൻ സാധ്യതയുണ്ട്.

ജെപി മോർഗൻ റിപ്പോർട്ടിനെ അടിസ്ഥാനമാക്കി ക്രിയേറ്റീവ് സ്ട്രാറ്റജീസിലെ മാക്സ് വെയ്ൻബാക്ക് പറയുന്നത്, ഐഫോൺ 18 സീരീസിന്റെ വിലയിൽ പ്രതീക്ഷിച്ചതിലും ചെറിയ വർദ്ധനവ് മാത്രമേ ഉണ്ടാവുകയുള്ളൂ എന്നാണ്. ഏകദേശം 4,800 രൂപയുടെ (50 ഡോളർ) വർദ്ധനവാണ് ആപ്പിൾ ലക്ഷ്യമിടുന്നത്. ഐഫോൺ 17 പ്രോയിൽ ഉണ്ടായിരുന്ന ക്വാൽകോം മോഡമുകൾക്ക് പകരം ആപ്പിളിന്റെ സ്വന്തം സി സീരീസ് മോഡമുകൾ ഉപയോഗിക്കുന്നതിലൂടെ നിർമ്മാണച്ചെലവ് കുറയ്ക്കാനാണ് കമ്പനിയുടെ തീരുമാനം.

ഐഫോൺ 17 പ്രോ, ഐഫോൺ 17 പ്രോ മാക്സ് എന്നിവ ഇന്ത്യയിൽ യഥാക്രമം 1,34,900 രൂപ, 1,49,900 രൂപ എന്നിങ്ങനെയാണ് പുറത്തിറക്കിയത്. ഐഫോൺ 18 പ്രോയ്ക്ക് 200 ഡോളർ അഥവാ 19,000 രൂപ അധികം നൽകേണ്ടി വരുമെന്ന് വാൾ സ്ട്രീറ്റ് ജേണൽ നേരത്തെ റിപ്പോർട്ട് ചെയ്തിരുന്നു. അങ്ങനെ വരുമ്പോൾ ഫോണിന്റെ പ്രതീക്ഷിക്കുന്ന വില 1,299 ഡോളർ അഥവാ ഏകദേശം 1,23,000 രൂപയിലേക്ക് എത്തും.

ഐഫോൺ 18 പ്രോയുടെ നിർമ്മാണച്ചെലവ് 726 ഡോളർ അഥവാ ഏകദേശം 68,000 രൂപയായി ഉയരുമെന്നാണ് റിപ്പോർട്ടുകൾ പറയുന്നത്. മുൻ മോഡലായ ഐഫോൺ 17 പ്രോയുടേത് 582 ഡോളർ അഥവാ 55,000 രൂപയായിരുന്നു. മെമ്മറി, സ്റ്റോറേജ് എന്നിവയുടെ വിലയിലുണ്ടായ വർദ്ധനവാണ് ഇതിന് പ്രധാന കാരണം. ഓരോ യൂണിറ്റിലും ആപ്പിൾ നിലനിർത്തുന്ന ലാഭവിഹിതം അതേപടി തുടരുമെന്ന അടിസ്ഥാനത്തിലാണ് ഈ കണക്കുകൾ തയ്യാറാക്കിയിരിക്കുന്നത്.

ഐഫോൺ 18 സീരീസിന്റെ വരവ് ആപ്പിൾ ഔദ്യോഗികമായി സ്ഥിരീകരിച്ചിട്ടില്ല. എങ്കിലും, വാൾ സ്ട്രീറ്റ് ജേണലുമായുള്ള അഭിമുഖത്തിൽ വില വർദ്ധനവ് അനിവാര്യമാണെന്ന് സിഇഒ സൂചിപ്പിച്ചിരുന്നു. നിർമ്മാണച്ചെലവ് ക്രമാതീതമായി കൂടുന്ന സാഹചര്യത്തിൽ, അത് പൂർണ്ണമായും കമ്പനി മാത്രം വഹിക്കാൻ സാധിക്കില്ലെന്നാണ് റിപ്പോർട്ട് വ്യക്തമാക്കുന്നത്. അതിനാൽ തന്നെ പുതിയ ഐഫോൺ മോഡലുകൾ ഉയർന്ന വിലയിലായിരിക്കും വിപണിയിലെത്തുക.