ഇന്ത്യൻ ലാപ്ടോപ് വിപണിയിലേക്ക് മോട്ടറോളയുടെ എൻട്രി

പ്രമുഖ സ്മാർട്ട്ഫോൺ നിർമാതാക്കളായ മോട്ടറോള ഇന്ത്യയിൽ തങ്ങളുടെ ആദ്യത്തെ ലാപ്‌ടോപ്പ് പുറത്തിറക്കി, മോട്ടോ ബുക്ക് 60 എന്നാണ് ഇത് അറിയപ്പെടുന്നത്. ലെനോവോയുടെ ഉടമസ്ഥതയിലുള്ള മോട്ടറോള ബ്രാൻഡ് രാജ്യത്ത് ആദ്യമായാണ് ഒരു ലാപ്‌ടോപ്പ് റിലീസ് ചെയ്യുന്നത്. മോട്ടോ ബുക്ക് 60 ലാപ്ടോപ്പിൽ 2.8K റെസല്യൂഷനുള്ള 14 ഇഞ്ച് OLED ഡിസ്‌പ്ലേയുണ്ട്. ഇത് ഉപയോക്താക്കൾക്ക് തെളിച്ചമുള്ള ദൃശ്യങ്ങൾ നൽകുന്നു. 65W ഫാസ്റ്റ് ചാർജിംഗിനെ പിന്തുണയ്‌ക്കുന്ന 60Wh ബാറ്ററിയാണ് ഇതിന് കരുത്ത് പകരുന്നത്. ഇത് ലാപ്ടോപ് വേഗത്തിൽ ചാർജ് ചെയ്യാനും ഉപയോഗ സമയത്ത് കൂടുതൽ നേരം ചാർജ് നിലനിൽക്കാനും സഹായിക്കുന്നു. ഉപയോക്താക്കൾക്ക് രണ്ട് കളർ ഒപ്ഷനുകളിൽ ലാപ്ടോപ് തിരഞ്ഞെടുക്കാൻ കഴിയും. ഇന്റൽ കോർ 7 240H പ്രോസസർ, 32GB വരെ റാം, 1TB വരെ സ്റ്റോറേജ് എന്നിവ ഉപയോഗിച്ച് ലാപ്‌ടോപ്പ് കോൺഫിഗർ ചെയ്യാൻ കഴിയും. മോട്ടോ ബുക്ക് 60 അടുത്ത ആഴ്ച മുതൽ ഇന്ത്യയിൽ വാങ്ങാൻ ലഭ്യമാകുമെന്ന് മോട്ടറോള സ്ഥിരീകരിച്ചു.

മോട്ടോ ബുക്ക് 60 ലാപ്ടോപ്പിൻ്റെ വില സംബന്ധിച്ച വിവരങ്ങൾ:

16 ജിബി റാമും 512 ജിബി സ്റ്റോറേജുമുള്ള, ഇന്റൽ കോർ 5 സീരീസ് പ്രോസസർ കരുത്തു നൽകുന്ന മോട്ടോ ബുക്ക് 60 ലാപ്‌ടോപ്പിന്റെ വില 69,999 രൂപയാണ്. പ്രത്യേക ലോഞ്ച് ഓഫറായി ഇത് 61,999 രൂപയ്ക്ക് ലഭ്യമാകും.

ഇന്റൽ കോർ 7 സീരീസ് പ്രോസസറുകളുള്ള രണ്ട് മോഡലുകളും ഉണ്ട് - 16 ജിബി റാമും 512 ജിബി സ്റ്റോറേജുമുള്ള മോഡലിന് 74,990 രൂപയും, 16 ജിബി റാമും 1 ടിബി സ്റ്റോറേജുമുള്ള മറ്റൊരു മോഡലിന് 78,990 രൂപയുമാണു വില. ലോഞ്ച് സമയത്ത്, ഈ രണ്ട് മോഡലുകളും 73,999 രൂപയെന്ന ഡിസ്കൗണ്ട് വിലയ്ക്ക് വാങ്ങാം.

മോട്ടോ ബുക്ക് 60 ബ്രോൺസ് ഗ്രീൻ, വെഡ്ജ് വുഡ് എന്നിങ്ങനെ രണ്ട് നിറങ്ങളിൽ ലഭ്യമാണ്. മോട്ടറോളയുടെ ആദ്യ ലാപ്‌ടോപ്പായ ഇത് ഏപ്രിൽ 23-ന് ഉച്ചയ്ക്ക് 12 മണി മുതൽ ഫ്ലിപ്പ്കാർട്ടിൽ വിൽപ്പനയ്‌ക്കെത്തും.

മോട്ടോ ബുക്ക് 60 ലാപ് ടോപ്പിൻ്റെ പ്രധാന സവിശേഷതകൾ:

മോട്ടോ ബുക്ക് 60 വിൻഡോസ് 11 ഹോമിൽ പ്രവർത്തിക്കുന്നു, കൂടാതെ 2.8K (1,800x2,880 പിക്സൽസ്) റെസല്യൂഷനുള്ള 14 ഇഞ്ച് OLED ഡിസ്പ്ലേയുമായാണ് വരുന്നത്. സ്ക്രീൻ 120Hz റിഫ്രഷ് റേറ്റ്, 500 നിറ്റ്സ് പീക്ക് ബ്രൈറ്റ്നസ് ലെവൽ എന്നിവയെ പിന്തുണക്കുന്നതും ഡോൾബി വിഷൻ, HDR എന്നിവ ഉൾപ്പെടുന്നതുമായ ഡിസ്പ്ലേയാണ് ഇതിനുള്ളത്. കുറഞ്ഞ ബ്ലൂ ലൈറ്റിങ്ങിനും ഫ്ലിക്കർ-ഫ്രീ വ്യൂവിംഗിനുമായി TÜV റൈൻലാൻഡ് സർട്ടിഫിക്കേഷനുകളും ഇതിലുണ്ട്. ലാപ്ടോപ്പ് സുഗമമായ, ബട്ടണുകളില്ലാത്ത മൈലാർ ടച്ച്പാഡ് ഉപയോഗിക്കുന്നു.

ഇത് ഇന്റൽ കോർ 7 240H അല്ലെങ്കിൽ ഇന്റൽ കോർ 5 210H പ്രോസസറിൽ ലഭ്യമാണ്, കൂടാതെ ഇന്റഗ്രേറ്റഡ് ഇന്റൽ ഗ്രാഫിക്സും ഉപയോഗിക്കുന്നു. നിങ്ങൾക്ക് 32GB വരെ DDR5 റാമും 1TB വരെ PCIe 4.0 SSD സ്റ്റോറേജും ലഭിക്കും.

മോട്ടോ ബുക്ക് 60 ലാപ്ടോപ്പിൽ പ്രൈവസി ഷട്ടറുള്ള 1080p വെബ്‌ക്യാമും വിൻഡോസ് ഹലോ ഫേസ് റെക്കഗ്നിഷനുള്ള IR ക്യാമറയും ഉണ്ട്. ഇതിന് മിലിട്ടറി-ഗ്രേഡ് (MIL-STD-810H) ഡ്യൂറബിലിറ്റി ഉണ്ട്. ഡോൾബി അറ്റ്‌മോസിനെ പിന്തുണയ്ക്കുന്ന മൊത്തം 2W ഔട്ട്‌പുട്ടുള്ള ഡ്യുവൽ സ്റ്റീരിയോ സ്പീക്കറുകൾ ലാപ്‌ടോപ്പിലുണ്ട്.

കണക്ടിവിറ്റിയുടെ കാര്യത്തിൽ, ഇത് ബ്ലൂടൂത്ത് 5.4, വൈ-ഫൈ 7 എന്നിവയെ പിന്തുണയ്ക്കുന്നു. പോർട്ടുകളിൽ രണ്ട് യുഎസ്ബി ടൈപ്പ്-എ 3.2 ജെൻ 1 പോർട്ടുകൾ, രണ്ട് യുഎസ്ബി ടൈപ്പ്-സി 3.2 ജെൻ 1 പോർട്ടുകൾ, ഒരു ഡിസ്‌പ്ലേ പോർട്ട് 1.4, ഒരു എച്ച്ഡിഎംഐ പോർട്ട്, ഒരു മൈക്രോ എസ്ഡി കാർഡ് സ്ലോട്ട്, 3.5 എംഎം ഹെഡ്‌ഫോൺ ജാക്ക് എന്നിവ ഉൾപ്പെടുന്നു.

നിങ്ങളുടെ പിസി, ഫോൺ, ടാബ്‌ലെറ്റ്, ടിവി എന്നിവയ്ക്കിടയിൽ ഫയലുകൾ എളുപ്പത്തിൽ കണക്റ്റ് ചെയ്യാനും ട്രാൻസ്ഫർ ചെയ്യാനും സഹായിക്കുന്ന സ്മാർട്ട് കണക്റ്റ്, സ്മാർട്ട് ക്ലിപ്പ്ബോർഡ്, ഫയൽ ട്രാൻസ്ഫർ തുടങ്ങിയ AI അടിസ്ഥാനമാക്കിയുള്ള ഫീച്ചറുകളും ഈ ലാപ്‌ടോപ്പ് വാഗ്ദാനം ചെയ്യുന്നു.

ഇതിൽ ഒരു ഫേംവെയർ ടിപിഎം 2.0 സെക്യൂരിറ്റി ചിപ്പും ഉൾപ്പെടുന്നുണ്ട്. ബാറ്ററി 60Wh ആണ്, 65W ചാർജിംഗിനെ പിന്തുണയ്ക്കുന്നു. മോട്ടോ ബുക്ക് 60 ലാപ്ടോപ്പിന് 313.4 x 221 x 16.9mm വലിപ്പവും 1.39kg ഭാരവുമുണ്ട്.