ആവേശം നിറക്കാൻ സബ്നോട്ടിക്ക 2 എത്തി; ഇപ്പോൾ തന്നെ കളിക്കാം

നീണ്ട നിയമപോരാട്ടങ്ങൾക്കൊടുവിൽ ഏർലി ആക്സസിൽ പുറത്തിറങ്ങിയ സബ്നോട്ടിക്ക 2 റിലീസ് ചെയ്ത് വെറും 12 മണിക്കൂറിനുള്ളിൽ വൻ വിജയമായി മാറി. മെയ് 14-ന് പിസി, എക്സ്ബോസ് സീരീസ് എസ്/എക്സ് പ്ലാറ്റ്‌ഫോമുകളിൽ എത്തിയ ഈ സർവൈവൽ ഗെയിം വെറും 12 മണിക്കൂറിനുള്ളിൽ 20 ലക്ഷം കോപ്പികൾ വിറ്റഴിച്ചതായി ഡെവലപ്പർമാരായ അൺനോൺ വേൾഡ്സ് എന്റർടൈൻമെന്റ് അറിയിച്ചു.

വ്യാഴാഴ്ച ഏർലി ആക്സസ് റിലീസിന് തൊട്ടുമുമ്പ് തന്നെ സബ്നോട്ടിക്ക 2 പത്ത് ലക്ഷം കോപ്പികളുടെ വിൽപ്പന പൂർത്തിയാക്കുകയും സ്റ്റീമിന്റെ ആഗോള ബെസ്റ്റ് സെല്ലർ ചാർട്ടിൽ ഒന്നാമതെത്തുകയും ചെയ്തിരുന്നു. തൊട്ടടുത്ത ദിവസം ഏർലി ആക്സസ് ആരംഭിച്ച് വെറും 12 മണിക്കൂർ പിന്നിട്ടപ്പോഴേക്കും വിൽപ്പന ഇരട്ടിയാക്കി 20 ലക്ഷം കോപ്പികൾ എന്ന നേട്ടത്തിലേക്ക് ഗെയിം എത്തിച്ചേർന്നു.

സബ്നോട്ടിക്ക 2 നിയമപോരാട്ടം

ഡെവലപ്പർമാരായ അൺനോൺ വേൾഡ്സിലെ ഉന്നത ഉദ്യോഗസ്ഥരും പബ്ലിഷർമാരായ ക്രാഫ്റ്റണും തമ്മിൽ നിലനിന്നിരുന്ന ദീർഘകാല നിയമപോരാട്ടത്തിനൊടുവിലാണ് ഈ ഗെയിമിന്റെ ശ്രദ്ധേയമായ ഏർലി ആക്സസ് റിലീസ് നടന്നിരിക്കുന്നത്. കഴിഞ്ഞ വർഷം ജൂലൈയിൽ അൺനോൺ വേൾഡ്സിന്റെ നേതൃത്വത്തിൽ ക്രാഫ്റ്റൺ വലിയ മാറ്റങ്ങൾ വരുത്തിയിരുന്നു. സിഇഒ ടെഡ് ഗില്ലിനെയും സ്റ്റുഡിയോ സഹസ്ഥാപകരായ ചാർളി ക്ലീവ്‌ലാൻഡ്, മാക്സ് മക്ഗുയർ എന്നിവരെയും മാറ്റി സ്റ്റീവ് പാപൗട്സിസിനെ പുതിയ ചുമതല ഏൽപ്പിച്ചു.

നേതൃമാറ്റം നടന്ന് ദിവസങ്ങൾക്ക് ശേഷം, 2025-ൽ നിശ്ചയിച്ചിരുന്ന സബ്നോട്ടിക്ക 2 ഗെയിമിന്റെ ഏർലി ആക്സസ് റിലീസ് ക്രാഫ്റ്റൺ വൈകിപ്പിക്കുന്നതായി റിപ്പോർട്ടുകൾ പുറത്തുവന്നു. അൺനോൺ വേൾഡ്സ് ഡെവലപ്‌മെന്റ് ടീമിന് 25 കോടി ഡോളറിന്റെ ബോണസ് നൽകാൻ മാസങ്ങൾ മാത്രം ബാക്കിയുള്ളപ്പോഴായിരുന്നു ഈ നീക്കം. 2025 അവസാനത്തോടെ സ്റ്റുഡിയോ നിശ്ചിത വരുമാന ലക്ഷ്യം കൈവരിച്ചാൽ ഈ വൻ തുക ബോണസായി നൽകാൻ ദക്ഷിണ കൊറിയൻ കമ്പനിയായ ക്രാഫ്റ്റൺ ബാധ്യസ്ഥരായിരുന്നു. കഴിഞ്ഞ വർഷം അവസാനത്തോടെ സബ്നോട്ടിക്ക 2 ഏർലി ആക്സസിൽ പുറത്തിറക്കിയിരുന്നെങ്കിൽ ഡെവലപ്പർമാർക്ക് ആ വരുമാന ലക്ഷ്യത്തിൽ എളുപ്പം എത്താമായിരുന്നു.

ഇതിനെത്തുടർന്ന് മുൻ നേതൃത്വത്തിലുണ്ടായിരുന്ന ഗിൽ, ക്ലീവ്‌ലാൻഡ്, മക്ഗുയർ എന്നിവർ ക്രാഫ്റ്റണെതിരെ കോടതിയെ സമീപിച്ചു. തുടർന്ന് ഈ വർഷം ആദ്യം പുറത്തുവന്ന വിധിയിൽ ക്രാഫ്റ്റൺ കരാർ ലംഘനം നടത്തിയതായി ജഡ്ജി കണ്ടെത്തുകയും ടെഡ് ഗില്ലിനെ അൺനോൺ വേൾഡ്സിന്റെ സിഇഒ സ്ഥാനത്ത് വീണ്ടും നിയമിക്കാൻ ഉത്തരവിടുകയും ചെയ്തു.

ഏർലി ആക്സസ് റിലീസിന് മുന്നോടിയായി തന്നെ സബ്നോട്ടിക്ക 2 സ്റ്റീമിൽ 50 ലക്ഷം വിഷ്‌ലിസ്റ്റുകൾ സ്വന്തമാക്കിയിരുന്നു. റിലീസ് ചെയ്ത് ഏതാനും മണിക്കൂറുകൾക്കകം തന്നെ ഒരേസമയം ഗെയിം കളിക്കുന്നവരുടെ എണ്ണം 467,582 ആയി ഉയർന്നതായി സ്റ്റീംഡിബി ചാർട്ടുകൾ വ്യക്തമാക്കുന്നു. ഇതോടെ വാൽവ് പ്ലാറ്റ്‌ഫോമിൽ ഏറ്റവും കൂടുതൽ ആളുകൾ കളിക്കുന്ന ഗെയിമുകളുടെ പട്ടികയിൽ സബ്നോട്ടിക്ക 2 ഇടംപിടിച്ചു.

ലോകമെമ്പാടുമുള്ള ഗെയിമർമാർക്കൊപ്പം ചേർന്ന് കടലിന്റെ ആഴങ്ങളിലെ നിഗൂഢതകൾ കണ്ടെത്താനുള്ള ഒരു പുതിയ യാത്രയുടെ തുടക്കമാണ് ഈ റിലീസെന്ന് ഗെയിമിന്റെ എക്സിക്യൂട്ടീവ് പ്രൊഡ്യൂസർ ഫെർണാണ്ടോ മെലോ പ്രസ്താവനയിൽ പറഞ്ഞു. കളിക്കാരുടെ അഭിപ്രായങ്ങളാണ് തങ്ങളുടെ മുന്നോട്ടുള്ള വഴികാട്ടിയെന്നും കമ്മ്യൂണിറ്റിയുമായി ചേർന്ന് മികച്ച ഗെയിമിംഗ് അനുഭവം ഒരുക്കുന്നത് തുടരുമെന്നും അദ്ദേഹം കൂട്ടിച്ചേർത്തു. സബ്നോട്ടിക്ക 2 ഇപ്പോൾ പിസി, എക്സ്ബോക്സ് സീരീസ് എസ്/എക്സ് പ്ലാറ്റ്‌ഫോമുകളിൽ ഏർലി ആക്സസിൽ ലഭ്യമാണ്.