സൈഡ്‌ലോഡിംഗ് ഇനി അത്ര എളുപ്പമല്ല! ഗൂഗിളിന്റെ പുതിയ നിയന്ത്രണങ്ങൾ മറികടക്കാൻ ADB ഉപയോഗിക്കുന്നത് എങ്ങനെ?

ഗൂഗിൾ പ്ലേ സ്റ്റോർ വഴിയല്ലാതെ ഡൗൺലോഡ് ചെയ്യുന്ന ആൻഡ്രോയിഡ് ആപ്പുകളുടെ സുരക്ഷാ നയങ്ങളിൽ ഗൂഗിൾ വലിയ മാറ്റങ്ങൾ വരുത്തുന്നു. അംഗീകൃതമല്ലാത്ത ഡെവലപ്പർമാരിൽ നിന്നുള്ള ആപ്പുകൾ ഇൻസ്റ്റാൾ ചെയ്യുന്നതിന് 24 മണിക്കൂർ കാത്തിരിപ്പ് സമയം ഏർപ്പെടുത്തുന്നു എന്നതാണ് ഇതിലെ പ്രധാന മാറ്റം. തട്ടിപ്പുകളും മാൽവെയർ ആക്രമണങ്ങളും തടയുന്നതിനാണ് ഈ നടപടിയെന്നാണ് കമ്പനിയുടെ അവകാശവാദം. ഈ മാറ്റങ്ങൾ നടപ്പിലാക്കാൻ ഇനിയും മാസങ്ങൾ ബാക്കിയുണ്ടെങ്കിലും, സ്ഥിരമായി പുറത്തുനിന്നുള്ള ആപ്പുകൾ ഉപയോഗിക്കുന്നവർക്ക് ഇത് പ്രയാസമുണ്ടാക്കിയേക്കാം. നിങ്ങൾ ഇത്തരം ആപ്പുകൾ പതിവായി ഉപയോഗിക്കുന്ന ഒരാളാണെങ്കിൽ, വരാനിരിക്കുന്ന ഈ നിയന്ത്രണത്തെ മറികടക്കാനുള്ള മാർഗങ്ങളെക്കുറിച്ച് നിങ്ങൾ ചിന്തിക്കുന്നുണ്ടാകാം.

ഭാഗ്യവശാൽ, ഗൂഗിൾ തന്നെ വികസിപ്പിച്ചെടുത്ത ആൻഡ്രോയിഡ് ഡിബഗ് ബ്രിഡ്ജ് (ADB) എന്ന കരുത്തുറ്റ കമാൻഡ് ലൈൻ ടൂൾ ഉപയോഗിച്ച് ഉപയോക്താക്കൾക്ക് ഈ കാത്തിരിപ്പ് സമയം ഒഴിവാക്കാം. ഡെവലപ്പർമാരും സാങ്കേതിക താല്പര്യമുള്ളവരും സ്മാർട്ട്‌ഫോണുകളിൽ പുറത്തുനിന്നുള്ള ആപ്പുകൾ ഇൻസ്റ്റാൾ ചെയ്യാൻ പ്രധാനമായും ഉപയോഗിക്കുന്നത് ഈ സംവിധാനമാണ്. ഇതിനെക്കുറിച്ച് നിങ്ങൾ അറിഞ്ഞിരിക്കേണ്ട കാര്യങ്ങൾ താഴെ പറയുന്നവയാണ്.

ആൻഡ്രോയിഡിലെ പുതിയ സൈഡ്‌ലോഡിംഗ് നിയമങ്ങൾ എന്തൊക്കെയാണ്?

ഗൂഗിൾ പ്ലേ സ്റ്റോറിന് പുറത്തുനിന്ന് ആപ്പുകൾ ഇൻസ്റ്റാൾ ചെയ്യുന്ന രീതിയിൽ ഗൂഗിളിന്റെ പുതിയ ഡെവലപ്പർ വെരിഫിക്കേഷൻ സംവിധാനം നിയന്ത്രണങ്ങൾ ഏർപ്പെടുത്തും. പുതുക്കിയ നിയമങ്ങൾ അനുസരിച്ച്, അംഗീകൃത ഡെവലപ്പർമാരിൽ നിന്നുള്ള ആപ്പുകൾ മാത്രമേ ആൻഡ്രോയിഡ് ഫോണുകളിൽ ഇൻസ്റ്റാൾ ചെയ്യാൻ സാധിക്കൂ. ഇതിനായി ഡെവലപ്പർമാർ തങ്ങളുടെ തിരിച്ചറിയൽ രേഖകൾ സമർപ്പിക്കുകയും, ആപ്പ് സൈനിംഗ് കീകൾ അപ്‌ലോഡ് ചെയ്യുകയും, വെരിഫിക്കേഷൻ പൂർത്തിയാക്കുന്നതിനായി നിശ്ചിത തുക ഫീസായി അടയ്ക്കുകയും വേണം.

ഇതുകാരണം, അംഗീകൃതമല്ലാത്ത ഡെവലപ്പർമാരിൽ നിന്നുള്ള ആപ്പുകൾ ഇൻസ്റ്റാൾ ചെയ്യുന്നത് സിസ്റ്റം തടയുന്നതായിരിക്കും. എങ്കിലും ഇത്തരം ആപ്പുകൾ ഇൻസ്റ്റാൾ ചെയ്യാൻ ആഗ്രഹിക്കുന്നവർ 'ഡെവലപ്പർ സെറ്റിംഗ്‌സിനുള്ളിലെ' മറഞ്ഞിരിക്കുന്ന ഒരു ബൈപാസ് ഓപ്ഷൻ ഓൺ ചെയ്യേണ്ടതുണ്ട്. സാധാരണഗതിയിൽ ആപ്പുകൾ ഇൻസ്റ്റാൾ ചെയ്യുന്ന രീതിയെക്കാൾ സങ്കീർണ്ണമാണ് ഈ പ്രക്രിയ. മാത്രമല്ല, സാധാരണ ആപ്പ് ഇൻസ്റ്റലേഷൻ സമയത്ത് ഈ ഓപ്ഷൻ കാണുകയുമില്ല.

മേൽപ്പറഞ്ഞ കാര്യങ്ങൾ ചെയ്തുകഴിഞ്ഞാൽ, നിർബന്ധിതമായ 24 മണിക്കൂർ സുരക്ഷാ കാത്തിരിപ്പ് സമയം പൂർത്തിയാക്കേണ്ടതുണ്ട്. ഇതിനുശേഷം മാത്രമേ അംഗീകൃതമല്ലാത്ത ആപ്പുകൾ ഇൻസ്റ്റാൾ ചെയ്യാൻ അനുവാദം നൽകാൻ സാധിക്കൂ. ഇത് താൽക്കാലികമായോ അല്ലെങ്കിൽ സ്ഥിരമായോ നിലനിർത്താൻ ഉപയോക്താക്കൾക്ക് തീരുമാനിക്കാവുന്നതാണ്.

തന്ത്രപരമായ കബളിപ്പിക്കലുകൾ വഴിയുള്ള ആക്രമണങ്ങളെ പ്രതിരോധിക്കാനാണ് ഇത്തരമൊരു കാലതാമസം ഏർപ്പെടുത്തിയിരിക്കുന്നത് എന്നാണ് ഈ സാങ്കേതിക ഭീമൻ വ്യക്തമാക്കുന്നത്. ഉപയോക്താക്കളെ സമ്മർദ്ദത്തിലാക്കി ഹാനികരമായ സോഫ്റ്റ്‌വെയറുകൾ ഉടൻ തന്നെ ഇൻസ്റ്റാൾ ചെയ്യിപ്പിക്കുന്നത് തടയാനും, ആവശ്യമായ സുരക്ഷാ പരിശോധനകൾക്കായി സമയം ലഭ്യമാക്കാനും ഇതിലൂടെ ലക്ഷ്യമിടുന്നു.

എഡിബി (ADB) എങ്ങനെ ഈ കാലതാമസം ഒഴിവാക്കാൻ സഹായിക്കുന്നു?

കമ്പ്യൂട്ടർ വഴി ആൻഡ്രോയിഡ് ഫോണുകളെ നിയന്ത്രിക്കാനും അവയുമായി ആശയവിനിമയം നടത്താനും സഹായിക്കുന്ന ഒരു സാങ്കേതിക വിദ്യയാണ് എഡിബി. സാധാരണയായി ആപ്പുകളിലെ പിഴവുകൾ കണ്ടെത്താനാണ് ഡെവലപ്പർമാർ ഇത് ഉപയോഗിക്കുന്നതെങ്കിലും, ഫോണിന്റെ സിസ്റ്റം കമാൻഡുകൾ പ്രവർത്തിപ്പിക്കാനും ഈ സംവിധാനം വഴി സാധിക്കും.

ആൻഡ്രോയിഡിന്റെ പുതിയ സൈഡ്‌ലോഡിംഗ് നിയന്ത്രണങ്ങൾ മറികടക്കാനുള്ള ഒരു പോംവഴിയായും എഡിബി ഉപയോഗിക്കാം. ആപ്പ് വെരിഫിക്കേഷനുമായി ബന്ധപ്പെട്ട ഫോൺ സെറ്റിംഗ്‌സിൽ നേരിട്ട് മാറ്റങ്ങൾ വരുത്തിയാണ് ഇത് 24 മണിക്കൂർ കാത്തിരിപ്പ് ഒഴിവാക്കുന്നത്. സാധാരണ രീതികളെ അപേക്ഷിച്ച് അല്പം സങ്കീർണ്ണമായ പ്രക്രിയയാണെങ്കിലും, എഡിബി ഉപയോഗിക്കുന്നതിലൂടെ യാതൊരു കാലതാമസവുമില്ലാതെ അംഗീകൃതമല്ലാത്ത ആപ്പുകൾ ഇൻസ്റ്റാൾ ചെയ്യാൻ ഉപയോക്താക്കൾക്ക് സാധിക്കും.

എഡിബി (ADB) ഉപയോഗിക്കുന്നതിന് ഫോണിലെ 'യുഎസ്ബി ഡീബഗ്ഗിംഗ്' ഓൺ ചെയ്യുകയും ഫോൺ ഒരു കമ്പ്യൂട്ടറുമായി ബന്ധിപ്പിക്കുകയും വേണം. സാങ്കേതിക കാര്യങ്ങളിൽ കൃത്യമായ അറിവുള്ളവർ മാത്രമേ ഈ മാർഗ്ഗം സ്വീകരിക്കാവൂ. കൂടാതെ, 'ഡെവലപ്പർ ഓപ്ഷൻസ്' (Developer Options) ഓൺ ചെയ്യുന്നത് ആപ്പുകളുടെ പ്രവർത്തനത്തെ ബാധിച്ചേക്കാം.

ബാങ്കിംഗ്, ധനകാര്യ സേവന ആപ്പുകൾ അവയുടെ സുരക്ഷാ പരിശോധനയുടെ ഭാഗമായി ഫോണിൽ ഡെവലപ്പർ ഓപ്ഷൻസോ യുഎസ്ബി ഡീബഗ്ഗിംഗോ ഓൺ ആണോ എന്ന് പരിശോധിക്കാറുണ്ട്. ഇവ ഓൺ ആണെന്ന് കണ്ടാൽ ഇത്തരം ആപ്പുകൾ ഭാഗികമായി മാത്രമേ പ്രവർത്തിക്കുകയുള്ളൂ. ചിലപ്പോൾ ആപ്പുകൾ പൂർണ്ണമായും പ്രവർത്തിക്കാതിരിക്കാനും സാധ്യതയുണ്ട്. അതിനാൽ സൈഡ്‌ലോഡിംഗ് പ്രക്രിയ പൂർത്തിയായ ശേഷം ഡെവലപ്പർ ഓപ്ഷൻസ് ഓഫാക്കുന്നത് വരെ ഇത്തരം ആപ്പുകൾ ഉപയോഗിക്കാൻ സാധിച്ചെന്നു വരില്ല.

ADB ഉപയോഗിച്ച് 24 മണിക്കൂർ കാത്തിരിപ്പ് എങ്ങനെ ഒഴിവാക്കാം?

• ഡെവലപ്പർ ഓപ്ഷൻസ് ക്രമീകരിക്കുക: ഫോണിലെ 'Settings' തുറന്ന് 'About Phone' എന്നതിൽ പോകുക. അവിടെയുള്ള 'Build Number'-ൽ തുടർച്ചയായി ഏഴ് തവണ അമർത്തുക.

• USB ഡീബഗ്ഗിംഗ് ഓൺ ചെയ്യുക: 'Settings > System > Developer Options' എന്നതിൽ പോയി 'USB Debugging' ഓപ്ഷൻ ഓൺ ചെയ്യുക.

• കമ്പ്യൂട്ടറുമായി ബന്ധിപ്പിക്കുക: നിങ്ങളുടെ കമ്പ്യൂട്ടറിൽ ADB ഡൗൺലോഡ് ചെയ്ത് ഇൻസ്റ്റാൾ ചെയ്യുക. ശേഷം ഒരു USB കേബിൾ ഉപയോഗിച്ച് ഫോൺ കമ്പ്യൂട്ടറുമായി ബന്ധിപ്പിക്കുക.

• ഉപകരണം പരിശോധിക്കുക: കമ്പ്യൂട്ടറിൽ കമാൻഡ് പ്രോംപ്റ്റ്  അല്ലെങ്കിൽ ടെർമിനൽ തുറന്ന് adb devices എന്ന് ടൈപ്പ് ചെയ്യുക. നിങ്ങളുടെ ഫോൺ കമ്പ്യൂട്ടർ തിരിച്ചറിഞ്ഞു എന്ന് ഇതിലൂടെ ഉറപ്പാക്കാം.

• ആപ്പ് ഇൻസ്റ്റാൾ ചെയ്യുക: adb install <application>.apk എന്ന കമാൻഡ് നൽകി ആപ്പ് ഇൻസ്റ്റാൾ ചെയ്യാം. (ഇവിടെ <application> എന്നതിന് പകരം നിങ്ങളുടെ ആപ്പ് ഫയലിന്റെ പേര് നൽകുക).

• ബന്ധം വേർപെടുത്തുക: ഇൻസ്റ്റലേഷൻ പൂർത്തിയായ ശേഷം ഫോൺ കമ്പ്യൂട്ടറിൽ നിന്ന് മാറ്റാവുന്നതാണ്.

മുന്നറിയിപ്പ്: മാൽവെയറുകളിൽ നിന്നും തട്ടിപ്പുകളിൽ നിന്നും നിങ്ങളെ സംരക്ഷിക്കാനാണ് ഗൂഗിൾ ഇത്തരമൊരു സുരക്ഷാ കവചം ഒരുക്കിയിരിക്കുന്നത്. ഇത് മറികടക്കുന്നത് നിങ്ങളുടെ ഉപകരണത്തെ അപകടത്തിലാക്കിയേക്കാം. അതിനാൽ ഡെവലപ്പർമാരുടെ ഔദ്യോഗിക വെബ്‌സൈറ്റുകൾ പോലുള്ള വിശ്വസനീയമായ ഉറവിടങ്ങളിൽ നിന്നുള്ള ആപ്പുകൾ മാത്രമേ ഇൻസ്റ്റാൾ ചെയ്യാൻ പാടുള്ളൂ.