ചാറ്റ് ജിപിടി ഉപയോഗിക്കുമ്പോൾ ഈ അബദ്ധങ്ങൾ പറ്റാറുണ്ടോ? ഇനി പഴയ ചാറ്റുകൾ ഓർത്ത് പേടിക്കണ്ട

ചാറ്റ് ജിപിടി ഇന്ന് പലരുടെയും ജീവിതത്തിലെ ഒഴിച്ചുകൂടാനാവാത്ത ഒരു ഭാഗമാണ്. പുതിയ കാര്യങ്ങൾ പഠിക്കാനും റിസർച്ചിനും ചിലർ ഇത് ഉപയോഗിക്കുമ്പോൾ, വെറുതെ സംസാരിക്കാനും ജോലിസംബന്ധമായ കാര്യങ്ങൾ എളുപ്പമാക്കാനും മറ്റ് ചിലർ ഇതിനെ ആശ്രയിക്കുന്നു. എന്നാൽ നിങ്ങൾ ഏത് ആവശ്യത്തിനാണ് ഇത് ഉപയോഗിക്കുന്നത് എങ്കിലും, സ്വകാര്യമായതോ മറ്റാരും അറിയാൻ ആഗ്രഹിക്കാത്തതോ ആയ വിവരങ്ങൾ ഇതിലൂടെ കൈമാറപ്പെടുമ്പോൾ അത് ഓപ്പൺ എഐയുടെ സെർവറുകളിൽ സൂക്ഷിക്കപ്പെടുന്നത് വലിയൊരു സുരക്ഷാ വെല്ലുവിളിയായി മാറിയേക്കാം. ഇത്തരം ആശങ്കകൾ നിങ്ങൾക്കും ഉണ്ടെങ്കിൽ, നിങ്ങളുടെ ചാറ്റുകൾ കൂടുതൽ സ്വകാര്യതയോടെ കൈകാര്യം ചെയ്യാൻ പ്രധാനമായും രണ്ട് വഴികളുണ്ട്.

ചാറ്റ് ജിപിടിയിലെ ചാറ്റ് ഹിസ്റ്ററി എന്നാൽ എന്ത്?

ചാറ്റ് ജിപിടി ഉപയോഗിക്കുമ്പോൾ സൈഡ്ബാറിൽ കാണുന്ന പഴയ സംഭാഷണങ്ങളുടെ പട്ടികയെയാണ് ചാറ്റ് ഹിസ്റ്ററി എന്ന് പറയുന്നത്. നിങ്ങൾ ഓരോ തവണ ചാറ്റ് ചെയ്യുമ്പോഴും അത് ഓരോ സെഷനുകളായി അവിടെ സേവ് ചെയ്യപ്പെടുന്നു. നിങ്ങൾ തന്നെ അത് ഡിലീറ്റ് ചെയ്യുകയോ ആർക്കൈവ് ചെയ്യുകയോ ചെയ്യാത്തിടത്തോളം ആ പട്ടിക അവിടെത്തന്നെ ഉണ്ടാകും. സംഭാഷണങ്ങളിൽ തുടർച്ച നിലനിർത്താനും സേവനങ്ങൾ മെച്ചപ്പെടുത്താനുമാണ് ഈ വിവരങ്ങൾ സൂക്ഷിക്കുന്നത് എന്നാണ് ഓപ്പൺ എഐ പറയുന്നത്. ഉപയോക്താക്കൾക്ക് എപ്പോൾ വേണമെങ്കിലും പഴയ ചാറ്റുകളിലേക്ക് തിരിച്ചുപോകാനും അവിടെ നിന്ന് സംസാരം തുടരാനും ഇതിലൂടെ സാധിക്കുന്നു.

ഉപയോക്താക്കൾക്ക് ഓരോ സംഭാഷണങ്ങളും ചാറ്റ് ലിസ്റ്റിൽ നിന്ന് തന്നെ നേരിട്ട് നിയന്ത്രിക്കാൻ സാധിക്കും. ആവശ്യമില്ലാത്ത ചാറ്റുകൾ എന്നെന്നേക്കുമായി ഡിലീറ്റ് ചെയ്യാനോ ലിസ്റ്റിൽ നിന്ന് മറച്ചു വെക്കാനോ ഉള്ള സൗകര്യം ഇതിലുണ്ട്. കൂടാതെ ആക്റ്റീവ് ഹിസ്റ്ററിയിൽ വരാത്ത രീതിയിൽ ചാറ്റുകൾ ക്രമീകരിക്കാനും ഉപയോക്താക്കൾക്ക് സാധിക്കും.

നിങ്ങളുടെ സ്വകാര്യത നിലനിർത്തുന്നതിനും ഒട്ടനവധി സംഭാഷണങ്ങൾ കൃത്യമായി ക്രമീകരിക്കുന്നതിനും ഈ ഓപ്ഷനുകൾ എങ്ങനെ പ്രവർത്തിക്കുന്നു എന്ന് മനസ്സിലാക്കുന്നത് ഗുണകരമാണ്.

ചാറ്റ് ജിപിടിയിലെ ചാറ്റുകൾ എങ്ങനെ ഡിലീറ്റ് ചെയ്യാം

ഒരു ചാറ്റ് ഡിലീറ്റ് ചെയ്താൽ അത് ചാറ്റ് ലിസ്റ്റിൽ നിന്ന് എന്നെന്നേക്കുമായി നീക്കം ചെയ്യപ്പെടും. ഒരിക്കൽ ഡിലീറ്റ് ചെയ്ത സംഭാഷണങ്ങൾ ചാറ്റ് ജിപിടി ഇന്റർഫേസ് വഴിയോ എപിഐ വഴിയോ പിന്നീട് തിരിച്ചെടുക്കാൻ സാധിക്കില്ല. വെബ്സൈറ്റ് വഴി ഒരു ചാറ്റ് ഡിലീറ്റ് ചെയ്യാൻ താഴെ പറയുന്ന കാര്യങ്ങൾ ചെയ്യുക:

1. ചാറ്റ് ജിപിടി ഓപ്പൺ ചെയ്ത് നിങ്ങളുടെ അക്കൗണ്ടിൽ ലോഗിൻ ചെയ്യുക.
2. സൈഡ്ബാറിൽ നിന്ന് നിങ്ങൾക്ക് ഒഴിവാക്കേണ്ട ചാറ്റ് കണ്ടെത്തുക.
3. ചാറ്റിന്റെ ടൈറ്റിലിന് നേരെ മൗസ് പോയിന്റർ എത്തിക്കുക.
4. അവിടെ കാണുന്ന മൂന്ന് കുത്തുകളുള്ള മെനുവിൽ ക്ലിക്ക് ചെയ്യുക.
5. ഡിലീറ്റ് എന്നത് തിരഞ്ഞെടുക്കുക.
6. കൺഫർമേഷൻ നൽകുക.
7. ഇതോടെ ആ സംഭാഷണം നിങ്ങളുടെ ലിസ്റ്റിൽ നിന്ന് ഉടൻ തന്നെ അപ്രത്യക്ഷമാകും.

മൊബൈൽ ആപ്പ് ഉപയോഗിച്ച് ചാറ്റുകൾ ഡിലീറ്റ് ചെയ്യുന്ന രീതിയിൽ ചെറിയ വ്യത്യാസങ്ങളുണ്ട്. സ്ഥിരമായി ആപ്പ് ഉപയോഗിക്കുന്നവർക്ക് താഴെ പറയുന്ന കാര്യങ്ങൾ ചെയ്യാം:

1. ഫോണിൽ ചാറ്റ് ജിപിടി ആപ്പ് തുറക്കുക

2. ഒഴിവാക്കേണ്ട ചാറ്റ് കണ്ടെത്തുക

3. ആ ചാറ്റിൽ കുറച്ചുനേരം അമർത്തിപ്പിടിക്കുക

4. ഡിലീറ്റ് എന്നത് നൽകുക

5. ശരിയാണെന്ന് ഉറപ്പുവരുത്തുക

ചാറ്റുകൾ ഡിലീറ്റ് ചെയ്യുന്നതും ആർക്കൈവ് ചെയ്യുന്നതും തമ്മിൽ വ്യത്യാസമുണ്ട്. സംഭാഷണങ്ങൾ പൂർണ്ണമായും നീക്കം ചെയ്യുന്നതിന് പകരം പ്രധാന ലിസ്റ്റിൽ നിന്ന് അവയെ മാറ്റി സൂക്ഷിക്കുകയാണ് ആർക്കൈവ് ചെയ്യുന്നത്. ഈ ചാറ്റുകൾ നിങ്ങളുടെ അക്കൗണ്ടിൽ തന്നെ ഉണ്ടാകുമെന്നതിനാൽ ആർക്കൈവ് സെക്ഷനിൽ പോയി പിന്നീട് എപ്പോൾ വേണമെങ്കിലും ഇവ പരിശോധിക്കാം.

1. ചാറ്റ് ജിപിടി തുറന്ന് സൈഡ്ബാറിലെ ചാറ്റ് കണ്ടെത്തുക

2. ആ ചാറ്റിന് നേരെ മൗസ് പോയിന്റർ എത്തിക്കുക

3. അവിടെ കാണുന്ന മൂന്ന് കുത്തുകളിൽ ക്ലിക്ക് ചെയ്യുക

4. ആർക്കൈവ് എന്നത് തിരഞ്ഞെടുക്കുക

5. ഇതോടെ ആ ചാറ്റ് പ്രധാന ലിസ്റ്റിൽ നിന്ന് മാറി നിൽക്കും

മൊബൈൽ ആപ്പിൽ ചാറ്റുകൾ ആർക്കൈവ് ചെയ്യുന്ന രീതിയിൽ ചെറിയ വ്യത്യാസങ്ങളുണ്ട്. ഇതിനായി താഴെ പറയുന്ന കാര്യങ്ങൾ ശ്രദ്ധിക്കുക:

1. നിങ്ങളുടെ ഫോണിൽ ചാറ്റ് ജിപിടി ആപ്പ് തുറക്കുക

2. ഒഴിവാക്കേണ്ട ചാറ്റ് കണ്ടെത്തുക

3. ആ ചാറ്റിലെ ഓപ്ഷൻസ് മെനുവിൽ ക്ലിക്ക് ചെയ്യുക

4. ആർക്കൈവ് എന്നത് തിരഞ്ഞെടുക്കുക

ആവശ്യമെങ്കിൽ ആർക്കൈവ് ചെയ്ത ചാറ്റുകൾ പിന്നീട് തിരികെ കൊണ്ടുവരാൻ സാധിക്കും.

ഇതുകൂടാതെ ചാറ്റുകൾ ഹിസ്റ്ററിയിൽ വരാതിരിക്കാൻ മറ്റൊരു വഴിയുമുണ്ട്. പുതിയ ചാറ്റ് പേജിന്റെ മുകളിൽ വലതു വശത്തുള്ള ചാറ്റ് ഐക്കണിൽ ക്ലിക്ക് ചെയ്താൽ ടെമ്പററി ചാറ്റ് ഓപ്ഷൻ ഉപയോഗിക്കാം. നിങ്ങൾ ഒരു പുതിയ ചാറ്റ് തുടങ്ങുമ്പോഴോ അല്ലെങ്കിൽ പഴയ ചാറ്റിലേക്ക് പോകുമ്പോഴോ ഈ സംഭാഷണങ്ങൾ താനേ ഇല്ലാതാകും. കൂടാതെ ഇത്തരം ചാറ്റുകളിൽ നിങ്ങളുടെ വിവരങ്ങളോ താൽപ്പര്യങ്ങളോ ഒന്നും തന്നെ റെക്കോർഡ് ചെയ്യപ്പെടുകയുമില്ല.