ജെമിനിയിലെ പുതിയ 'പേഴ്സണൽ ഇന്റലിജൻസ്' ഫീച്ചർ: എങ്ങനെ ഉപയോഗിക്കാമെന്ന് നോക്കാം

ജെമിനി എഐയിൽ പേഴ്സണൽ ഇന്റലിജൻസ് ഫീച്ചർ ഇന്ത്യയിലുമെത്തിയ വിവരം കഴിഞ്ഞ തിങ്കളാഴ്ചയാണ് ഗൂഗിൾ അറിയിച്ചത്. വിവിധ ഗൂഗിൾ ആപ്പുകളെ തമ്മിൽ കോർത്തിണക്കി, ഓരോ വ്യക്തിക്കും അനിയോജ്യമായ രീതിയിലുള്ള മറുപടികൾ നൽകാൻ ഈ ഫീച്ചറിലൂടെ സാധിക്കും. ഈ വർഷം ആദ്യം അമേരിക്കയിൽ അവതരിപ്പിച്ച ഈ സാങ്കേതികവിദ്യ, ജിമെയിൽ, സെർച്ച്, ക്രോം തുടങ്ങിയവയിലെ വിവരങ്ങൾ കൂടി ഉൾപ്പെടുത്തി ചോദ്യങ്ങൾക്ക് കൂടുതൽ കൃത്യതയാർന്ന ഉത്തരം നൽകാൻ ജെമിനിയെ സഹായിക്കുന്നു. ഉപയോക്താക്കളുടെ ഡിജിറ്റൽ അനുഭവം കൂടുതൽ ലളിതമാക്കുന്നതിന്റെ ഭാഗമായാണ് ഗൂഗിളിന്റെ ഈ പുതിയ ചുവടുവെപ്പ്.

ജെമിനി പേഴ്സണൽ ഇന്റലിജൻസ് ഇനി ഇന്ത്യയിലും

ഗൂഗിൾ ജെമിനിയുടെ പേഴ്സണൽ ഇന്റലിജൻസ് ഫീച്ചർ ഇപ്പോൾ ഇന്ത്യയിലും ലഭ്യമാണ്. ജിമെയിൽ, ഗൂഗിൾ ഫോട്ടോസ്, യൂട്യൂബ്, സെർച്ച് തുടങ്ങിയ ആപ്പുകളെ ജെമിനിയുമായി ബന്ധിപ്പിക്കാൻ ഇതിലൂടെ സാധിക്കും. ഇങ്ങനെ ചെയ്യുന്നതോടെ, പല ആപ്പുകളിലായി ചിതറിക്കിടക്കുന്ന വിവരങ്ങൾ ഒരുമിച്ച് വിശകലനം ചെയ്ത് നിങ്ങളുടെ ചോദ്യങ്ങൾക്ക് കൃത്യമായ മറുപടി നൽകാൻ ജെമിനിക്ക് കഴിയും. ഈ സേവനം വേണോ വേണ്ടയോ എന്ന് ഉപയോക്താക്കൾക്ക് തീരുമാനിക്കാം; ഫോണിൽ ഇത് തനിയെ ഓൺ ആകില്ല. ഏതൊക്കെ ആപ്പുകൾ ജെമിനിയുമായി ലിങ്ക് ചെയ്യണമെന്ന് തീരുമാനിക്കാനുള്ള പൂർണ്ണ നിയന്ത്രണം ഉപയോക്താവിനായിരിക്കുമെന്ന് ഗൂഗിൾ വ്യക്തമാക്കി.

പേഴ്സണൽ ഇന്റലിജൻസ് എങ്ങനെയാണ് പ്രവർത്തിക്കുന്നതെന്ന് ജയ്പൂർ യാത്രയുടെ ഉദാഹരണത്തിലൂടെ ഗൂഗിൾ വിവരിക്കുന്നുണ്ട്. നിങ്ങളുടെ യാത്രാ പ്ലാനുകളെക്കുറിച്ച് ജെമിനിയോട് ചോദിച്ചാൽ, ജിമെയിലിലെ ബുക്കിംഗ് വിവരങ്ങളും ഫോട്ടോസിലെ മാപ്പുകളും കുറിപ്പുകളും പരിശോധിക്കാനും, നിങ്ങൾ കണ്ട യൂട്യൂബ് വീഡിയോകളുടെ അടിസ്ഥാനത്തിൽ പുതിയ സ്ഥലങ്ങൾ നിർദ്ദേശിക്കാനും ജെമിനിക്ക് കഴിയും. ഈ വിവരങ്ങളെല്ലാം ഒറ്റ മറുപടിയിൽ തന്നെ നിങ്ങൾക്ക് ലഭിക്കും എന്നതാണ് ഇതിന്റെ ഗുണം.

വിവിധ ആപ്പുകളിൽ നിന്നുള്ള വിവരങ്ങൾ ഒരേസമയം വിശകലനം ചെയ്ത് കൃത്യമായ മറുപടി നൽകാനാണ് ഈ ഫീച്ചർ തയ്യാറാക്കിയിരിക്കുന്നത്. ഓരോ വിവരവും ഏത് ആപ്പിൽ നിന്നാണ് എടുത്തതെന്ന് വ്യക്തമാക്കാനും ജെമിനിക്ക് സാധിക്കും. കൂടാതെ, സംശയങ്ങൾ തീർക്കാൻ തുടർച്ചയായി ചോദ്യങ്ങൾ ചോദിക്കാനുള്ള സൗകര്യവും ഇതിലുണ്ട്.

നമ്മുടെ സ്വകാര്യ വിവരങ്ങൾ ചോദ്യങ്ങൾക്ക് ഉത്തരം നൽകാൻ മാത്രമാണ് ഉപയോഗിക്കുന്നതെന്നും എഐയെ പരിശീലിപ്പിക്കാൻ ഇവ ഉപയോഗിക്കില്ലെന്നും ഗൂഗിൾ ഉറപ്പുനൽകുന്നു. ഉപയോക്താക്കൾക്ക് എപ്പോൾ വേണമെങ്കിലും ഈ ഫീച്ചർ ഓഫുചെയ്യാനോ, വിവരങ്ങൾ ശേഖരിക്കാത്ത 'ടെംപററി ചാറ്റുകൾ' ഉപയോഗിക്കാനോ ഉള്ള സ്വാതന്ത്ര്യമുണ്ട്. പുതിയ സാങ്കേതികവിദ്യയായതിനാൽ ചില സമയങ്ങളിൽ തെറ്റായ വിവരങ്ങളോ അമിതമായ വ്യക്തിഗത നിർദ്ദേശങ്ങളോ ജെമിനി നൽകിയേക്കാം. നിങ്ങളുടെ താൽപ്പര്യങ്ങൾ ജെമിനി തെറ്റായി മനസ്സിലാക്കിയാൽ അത് അപ്പോൾത്തന്നെ തിരുത്താനും 'തംബ്‌സ്-ഡൗൺ' ബട്ടൺ ഉപയോഗിച്ച് ഫീഡ്‌ബാക്ക് നൽകാനും സാധിക്കും.

നിലവിൽ ഇന്ത്യയിലുള്ള ഗൂഗിൾ എഐ പ്ലസ്, പ്രോ, അൾട്രാ വരിക്കാർക്കാണ് ഈ സേവനം ലഭിച്ചുതുടങ്ങുന്നത്. വരും ആഴ്ചകളിൽ തന്നെ മറ്റെല്ലാ ഉപയോക്താക്കളിലേക്കും ഇത് എത്തും. ഈ ഫീച്ചർ ഉപയോഗിക്കാൻ ജെമിനി ആപ്പിലെ 'Settings' പോയി 'Personal Intelligence' എന്ന ഓപ്ഷൻ തുറന്ന് നിങ്ങൾക്ക് ഇഷ്ടമുള്ള ആപ്പുകൾ സെലക്ട് ചെയ്താൽ മതിയാകും.